Ma Dag Jehovah E Flaab Rok Ngak E Piin Nib Sobut’an’rad

“Angin ni ma yib ko ngan sobut’an’ nge madgun Got u wan’uy e fel’rogon nge flaab nge yafas.”​—PROVERBS 22:4.

1, 2. (a) Uw rogon ma fare babyor ni Acts e be dag ni Stefen e ir “reb e pumoon ni ke sug ko michan’ nge kan ni thothup”? (b) Mang e mich riy ni Stefen e be’ nib sobut’an’?

STEFEN e “be’ nib moon nib gel e michan’ rok ma ba sug ko kan ni thothup.” Maku ir be’ “nrib tarunguyey ma ba’ gelngin.” Bochan ni ir bagayad pi gachalpen Jesus kakrom, ma ke fal’eg boch ban’en u fithik’ e girdi’ ni be dag gelngin Got. Ba’ biyay, ni immoy boch e pumoon ni ra sak’iygad ni ngar togopuluwgad ngak, “machane dabiyog ni ngar gelgad ko gonop nge fare kan ni thothup ni ir e be ayuweg ni nge machib.” (Acts 6:5, 8-10) Ba gagiyel ni ma fil Stefen e Thin rok Got nib Gel, ma ke ayuweg e Thin rok Got nib gel u p’eowchen e pi tayugang ko teliw rok piyu Jew ko ngiyal’ nem. Machib ni i tay ni rib tamilang, ni bay ko Acts guruy ni 7, e be micheg ni ri ma tiyan’ nga rogon ni be tamilang i yan e tin nib m’agan’ Got ngay.

² De taareb rogon ko pi tayugang ko teliw, nbochan e liw rorad nge tamilangan’ rorad e yad be lemnag ni yad ba tolang ngak e yugu girdi’, me Stefen e be’ nib sobut’an’. (Matthew 23:2-7; John 7:49) Yugu aram rogon nib cheg ko Thin nu Bible, ma kari felan’ ni nge rin’ fare maruwel ni ngan “wereg e ggan ko tebel i yan” ni fan ni pi apostal e nge yog ni ngar tiyan’rad “ko meybil nge ngar machibnaged fare thin.” Ffel’ Stefen u wan’ e pi walag arfan ni kan mel’eg ni nge mang bagayad fa medlip i pumoon ni ngar ayuweged i wereg e ggan ni gubin e rran. Me fek fare maruwel u fithik’ e sobut’an’.​—Acts 6:1-6.

3. Uw rogon ni dag Got nrib gol ngak Stefen?

³ Ke guy Jehovah Stefen nib sobut’an, ma ri ma tiyan’ ko tirok Got nge lem rok nrib yul’yul’. Nap’an ni be machibnag Stefen e pi tayugang’ ni piyu Jew ni tatogopuluw ni yad bay u lan fare Sanhedrin, ma piin ni kar togopuluwgad ngak e kar guyed “owchen ni ke bod rogon owchen ba engel.” (Acts 6:15) Owchen e ke bod ba tamol’og rok Got, ni bay e gapas rok ni yib rok Got, ni Jehovah. Tomren ni ke machibnag girdien e Sanhedrin ni de rus, ma ke yog rok Stefen ni nge guy feni gol Got nrib gel ni kan dag. “Stefen nib sug ko fare Kan ni Thothup, e sap nga lang me guy e flaab rok Got, nge Jesus nib sak’iy u ba’ ni mat’aw rok Got.” (Acts 7:55) Rogon ni lem Stefen, e re n’en ney ni ke guy ni yira ngat ngay e be gagiyelnag e liw rok Jesus ni ir Fak Got nge fare Messiah. I gelnag e re n’ey Stefen ni be’ nib sobut’an’ me ayuweg ni ngari mich u wan’ ni ke fel’ u wan’ Jehovah.

4. Ma dag Jehovah e flaab rok ngak mini’?

⁴ Rogon e n’en ni kan tamilangnag u nap’an ni kan piliyeg e changar rok Stefen, e be tamilangnag Jehovah e flaab rok nge tin nib ma’gan’ ngay ngak e girdi’ ni bay madgun u wan’rad mab sobut’an’rad ma baga’ fan u wan’rad e tha’ u thilrad. “Angin ni yib ko ngan sobut’an’ me yib madgun Got u wan’uy e fel’ rogon nge flaab nge yafas,” rogon ni yog e Bible. (Proverbs 22:4) Ere, baga’ fan ni ngada nanged fan ko mang e bin riyul’ e sobut’an’, nge uw rogon ni ngada maruweliyed e re felngin ney nib ga’ fan, nge rogon ni nge fel’ rogodad riy ni ngad daged ko urngin ban’en ko yafas rodad.

Sobut’an’​—Reb i Felngin Got

5, 6. (a) Be mang e sobut’an’? (b) Uw rogon ni i dag Jehovah nib sobut’an’? (c) Mang e n’en ni ra rin’ ngodad e sobut’an’ ni ma dag Jehovah?

⁵ Boch e girdi’ e ma gin ngay ni Jehovah Got, e ir e en th’abi tolang ma en th’abi flaab u palpalthib, ma ir e th’abi fel’ rogon ni i dag nib sobut’an’. I yog David ni Pilung ngak Jehovah, ni gaar: “Mu pi’ ngog fa gin’en ni yima mith nga fon ko mahl nge ayuwegey, ma ba’ ni mat’aw i paam e ra ayuwegeg, ma fanam sobut’an’ e ra gilnag buguwag.” (Psalm 18:35) Nap’an ni be weliy David murung’agen Jehovah nib sobut’an’, me fanay fare bugithin ni likngin e thin ni Hebrew ni be yip’ fan ni “ngam lumel nga but’.” Maku gathi kemus ni “sobut’an’” e fan e re bugithin nem ya ku be yip’ fan ni “ngan sobut’nigey” nge “sumunguy,” nge “ngan sobut’nigey ni fan ni nge taarebrogoy ku be’ nib sobut’.” Ere ke sobut’an’ Jehovah u nap’an ni ke sobut’nag ir ni nge rin’ ban’en ni fan ngak David ni be’ nde flont me fanay ni nge mang pilung ni owchen. Thin ni bay u m’on ko Psalm 18 e be dag, ni ke yororiy miki ayuweg Jehovah David, nge thay u “pa’ e pi toogor rok nge pa’ Saul.” Maku, manang David, ni urngin e gilbuguwan nge flaab ni nge yog ngak ko pilung e be tor nga daken Jehovah ni be ayuweg u fithik’ e sobut’an’. Lem rok David ni aram rogon e ke ayuweg ni nge par nib sobut’an’.

⁶ Ma uw rarogodad? Ke mel’eg Jehovah ni nge fil ngodad e tin riyul’, ma sana ke pi’ ngodad e taw’ath ni aram reb e maruwel u lan e ulung rok, ara ke fanaydad u boch e kanawo’ ni fan ni nge lebuguy e tin nib m’agan’ ngay. Uw rogon u wan’dad urngin e pi n’ey? Gathi ba t’uf ni ngad sobut’an’niged gadad? Gathi ba t’uf ni ngada pininged e magar ku Jehovah ni ba sobut’an’ ma dab u da tolangnaged gadad, yab mudugil nra fekdad i yan ko gafgow nib gel?​—Proverbs 16:18; 29:23.

7, 8. (a) Uw rogon ni ke gagiyel e sobut’an’ rok Jehovah u rogon ni ke rin’ ban’en ngak Manasseh? (b) Mang kanawo’ e ke dag Jehovah, maku arrogon Manasseh, nib sobut’an’row nib fel’ ni nguud folgad riy?

⁷ Nap’an ni be rin’ Jehovah bogi ban’en ngak e girdi’ ni de flont e gathi kemus ni be dag nib sobut’an’ ya ku ke dag nib m’agan’ ngay ni nge runguy e girdi’ nib sobut’an’rad, me tolangnag e piin ni kar daged nib sobut’an’rad. (Psalm 113:4-7) Mu lemnag, e tin ke buch rok Manasseh ni Pilung nu Judah. I kirebnag rogon i fanay e liw rok ni pilung me mon’eg e liyor ni googsur “ma kari rin’ e tin nrib kireb u owchen Jehovah ni fan ni nge k’aring e damumuw ngak.” (2 Chronicles 33:6) Tomur riy, me gechignag Jehovah Manasseh me pag fare pilung nu Assyria ni nge chuweg ko pilung. U lan e kalbus, me “munguynag Manasseh owchen Jehovah ni Got rok me par ni be dag ni kari sobut’an’ nrib gel,” ma arfan ni ke sulweg Jehovah Manasseh ko chiya ko pilung u Jerusalem, me “tamilang u wan’ ni Jehovah e ir e bin riyul’ e Got.” (2 Chronicles 33:11-13, NW) Arrogon, tomur riy, ma laniyan’ Manasseh nib sobut’ e ke felfelan’nag Jehovah, ma aram ke sobut’nag ir me n’agfan e kireb rok ma ke sulweg ko maruwel rok ni ba pilung.

⁸ N’en ni dag Jehovah nib m’agan’ ngay ni nge n’ag fan e kireb rok be’ nge n’en ni rin’ Manasseh e ke fil ngodad ban’en nib ga’ fan rogon ni ngada daged nib sobut’an’dad. Thingarda lemnaged ni gubin ngiyal’ ni ngongol ni gad ma dag ngak e piin ni sana ke k’aring e damumuw ngodad nge ngongol ni gad ma dag u nap’an ni kad denengad e ra magawonnag thildad Jehovah. Faanra ba m’agan’dad ngay ni ngad n’aged fan e kireb rok boch e girdi’ ma ngad dogned e kireb rodad u fithik’ e sobut’an’, ma ra runguydad Jehovah.​—Matthew 5:23, 24; 6:12.

Flaab Rok Got e Kan Dag Ngak e Piin nib Sobut’an’rad

9. Sobut’an’ e reb e pow ko meewar fa? Mu weliy.

⁹ Machane sobut’an’ nge pi felngin nib peth ngay, e thingar dab ni lemnag ni ir fare pow ko lem nib meewar ara lem ni mom ni ngan pag e tin kireb. Rogon ni weliy e Babyor nib thothup, e Jehovah e ba sobut’an’, machane ma dag e damumuw nib mat’aw nge gelngin nib gel ko ngiyal’ nib t’uf ni nge rin’. Bochan Jehovah ni ba sobut’an’, ma kari fel’ u wan’ ara ri ma runguy e piin nib sobut’ lanin’rad, machane dabi chuchugur ngak e piin nib tolangan’. (Psalm 138:6) Uw rogon ni ke dag Jehovah ni ri ma runguy e pi tapigpig rok nib sobut’an’rad?

10. Mang e ke dag Jehovah ngak e piin nib sobut’an’rad, u rogon ni kan dag ko 1 Korinth 2:6-10?

¹⁰ U lan e ngiyal’ ni ir e ke dugliy ngu daken e n’en ni ke mel’eg ni nge pi’ e thin rok riy ngak e girdi’, e ke dag Jehovah ngak e piin nib sobut’an’rad e pi n’en ni nge rin’ ni fan ni nge lebuguy e tin nib m’agan’ ngay. Pi n’en ney e ka be par nib mith rok e piin ni ri ma pagan’rad ko gonop ara lem ko girdi’. (1 Korinth 2:6-10) Machane piin nib sobut’an’rad, ni kan pi’ ngorad e tamilangan’ nib puluw u murung’agen e tin nib m’agan’ Jehovah ngay, e kar pininged e sorok ngak Jehovah ya bochan ni ri yad be tayfan e flaab rok.

11. Nap’an e bin som’mon e chibog, uw rogon ni dag boch e girdi’ ni de sobut’an’rad, ma uw rogon ni ke m’ug ni ireray e n’en ni rayog ni nge kirebnagrad?

¹¹ U lan e bin som’mon e chibog, ma boor e girdi’ nib muun ngay e piin ni ka rogned ni yad e Kristiano, e dara daged nib sobut’an’rad ma ke mulan’rad ni bochan e n’en ni ke dag Paul ngorad u murung’agen e tin nib m’agan’ Got ngay. Paul e ke mang “apostal ngak e piin ni gathi yad piyu Israel,” machane gathi bochan e nam rok, nge skul, nge yangaren, ara bochan ke un ko maruwel nib fel, nib n’uw nap’an. (Roma 11:13) Baga’ ni, girdi’ ni dawori ilal ko tirok Got e yad be lemnag ni ireray mit i girdi’ ni thingari mel’eg Jehovah nge fanayrad. (1 Korinth 1:26-29; 3:1; Kolose 2:18) Machane, i mel’eg Jehovah Paul, nrogon nib puluw ko t’ufeg rok nib yul’yul’ nge tin nib m’agan’ ngay nib mat’aw. (1 Korinth 15:8-10) Piin ni ke weliy Paul ni yad “fapi apostal rorad ni beer nib sororad,” nge yugu boch e girdi’ ni tatogopuluw, e kar dabuyed daken Paul nge rogon ni ma weliy fan e thin nu Bible. Bochan de sobut’an’rad ma de yog ni nge tamilang u wan’rad rogon ni ma maruweliy Jehovah ni nge lebuguy e tin nib m’agan’ ngay nib flaab. Yibe athapeg ni dabda dariy fannaged ara da turguyed e kireb nga daken e piin ke mel’egrad Jehovah ni fan ni nge lebuguy e tin nib m’agan’ ngay.​—2 Korinth 11:4-6.

12. Uw rogon ma n’en ni buch rok Moses e be dag nib fel’ u wan’ Jehovah e piin nib sobut’an’rad?

¹² N’en nib thil riy, e boor e thin nu Bible ni be dag ni girdi’ nib sobut’an’rad e kan taw’athnagrad min dag ngorad e flaab rok Got. Moses, ni “th’abi sobut’an’ ” u fithik’ e girdi’ nu fayleng, e ke guy e flaab rok Got ma kari fel’ thilrow Got. (Numbers 12:3) Re moon nib sobut’an’ ney, ni maruwel rok u lan 40 e duw e ba tachugol saf nib sobut’, ni baga’ ni i rin’ e re maruwel nem u Arabian Peninsula, mi ri fel’ u wan’ e En Tasunmiy u boor e kanawo’. (Exodus 6:12, 30) U daken e ayuw rok Jehovah, me mang Moses mit e thin ma en ni tayarmiy ni th’abi ga’ ko nam nu Israel. Ma falan’ ni yow ma non Got. Me guy “owchen Jehovah” u daken e changar rok ni kan piliyeg. (Numbers 12:7, 8; Exodus 24:10, 11) Piin ni ke fel’ u wan’rad e re tapigpig rok Got ney ma owchen nib sobut’an’ e ku kan taw’athnagrad. Maku, yira taw’athnagdad ni faanra ke fel’ u wan’dad ma ngad folgad ko fare profet ni kab ga’ ngak Moses, ni Jesus, maku arrogon “fare tapigpig nib yul’yul’ mab gonop” ni ir e ke dugliyrad.​—Matthew 24:45, 46; Acts 3:22.

13. Uw rogon ni kan dag e flaab rok Jehovah ngak e piin tachugol saf nib sobut’an’rad ko fa bin som’mon e chibog?

¹³ I mini’ e i ‘galgal ramaen Jehovah rok’ nib muun ngay e thin nib fel’ ni yog fare engel u murung’agen “fare Taayuw, ni ir fare Kristus ni Somol” ni kan gargelnag”? Gathi pi tayugang ko teliw nib tolangan’ ara girdi’ nib tolang e liw rorad ya piin tachugol saf ni “bogi girdi’ ni yad ma gafaliy e gamanman ko re gi nam nem yad ma par u daken e ted ni nnep’.” (Luke 2:8-11) Pi cha’nem e gathi ri yima tayfarad ni bochan rarogorad nge maruwel rorad. Yugu aram rogon, ma yad e girdi’ ni ke guyrad Jehovah me mel’egrad ni nga nog ngorad ni som’mon murung’agen fare Messiah ni kan gargelnag. Arrogon, ma dag Jehovah e flaab rok ngak e piin nib sobut’an’ ma bay’ madgun Got u wan’rad.

14. Uw rogon ni nge taw’athnag Got e piin nib sobut’an’rad?

¹⁴ Mang e be fil ngodad e pi n’en ney? Be fil ngodad ni ba fel’ u wan’ Jehovah ma ma dag e tamilangan’ u murung’agen e tin nib m’agan’ ngay ngak e piin nib sobut’an’rad. Ma mel’eg e piin ni sana be lemnag e girdi’ ni dariy rogorad ma ma fanayrad ni ngar manged talin e maruwel rok ni fan ni nge nang boch e girdi’ e tin nib m’agan’ ngay nib flaab. Re n’ey e susun ni nge k’aringdad ni nguuda sapgad ngak Jehovah, nge Thin rok ni be yiiynag ban’en, nge ulung rok ni ra ayuwegdad. Rayog ni nge mudugil lanin’dad ni ra ulul Jehovah ni nge pi’ e tamilangan’ ngak e pi tapigpig rok nib sobut’an’rad u murung’agen e tin nib m’agan’ ngay nib flaab ni tamilang riy e be gel i yan. I yog Amos ni profet ni gaar: “I Somol ni Got e dariy ban’en ni ma rin’ nder ma weliy ngak e pi profet, ni aram e pi tapigpig rok’ nge mu’ mfini rin’.”​—Amos 3:7.

Mu Maruweliy ni Ngarim Dag nib Sobut’an’um ma Ga Fel’ u Wan’ Got

15. Mang fan ni thingarda maruweliyed ni nge par nib sobut’an’dad, ma uw rogon ni kan dag e re n’ey ko tin ke buch rok Saul ni Pilung nu Israel?

¹⁵ Rogon ni uda fel’gad u wan’ Got ni dariy n’umngin nap’an, e thingari par nib sobut’an’dad. Be’ ni i dag nib sobut’an’ u boch e kanawo’ e gathi be yip’ fan ni ra par nib sobut’an’ u gubin ngiyal’. Rayog ni nge war laniyan’ nib sobut’ me pag ni nge tolangan’ me tolangnag ir, ma bayi rin’ e tin dan pi’ mat’awon ni nge rin’ ma ra gafgow. Saul, ni ir e bin som’mon ni kan dugliy ni nge mang pilung nu Israel, e i rin’ ni ri aram rogon. Nap’an ni kan mel’eg ni nge mang pilung, me lemnag ni ‘ir be’ ni dariy rogon.’ (1 Samuel 15:17) Machane, kemus ni tomren ni ke gagiyeg u lan l’agruw e duw, me rin’ ban’en ni gathi mat’awun. I dariyfannag e yaram rok Jehovah ni Samuel ni profet e ir e ma pi’ e maligach, me mat’awnag e n’en ni rin’ ni ir e ke pi’ fare maligach. (1 Samuel 13:1, 8-14) Ireray e tabolngin e tin ke rin’ ni kari dag ni de sobut’an’. Ma wenegen nib riy e ke chuw fare kan ni thothup rok ma daki fel’ u wan’ Got, ma munmun me yim’ u reb e kanawo’ ni yira tamra’ ngay. (1 Samuel 15:3-19, 26; 28:6; 31:4) Ba tamilang e n’en ni gad ra fil riy: Thingarda maruweliyed ni nge par nib sobut’an’dad ma uda folgad ku be’ ni bay mat’awun ma dab kuuda lemnaged ni baga’ fadad, ma aram dabiyog ni ngada rin’ed e tin dan pi’ mat’awdad ni ngad rin’ed nra k’aring e damumuw ngak Jehovah.

16. Uw rogon ni ra ngada fal’eged i lemnag e tha’ u thildad Jehovah nge girdi’ ma ra ayuwegdad ni ngad daged nib sobut’an’dad?

¹⁶ Yugu aram rogon ni sobut’an’ e dan ta’ ni bang ko wom’engin e kan ni thothup, ma re n’ey e felngin Got ni thingarni maruweliy. (Galatia 5:22, 23; Kolose 3:10, 12) Bochan ni ba muun ngay rarogon e lem rodad​—ni aram e, uw rogon ni gad be changar ngodad nge boch e girdi’—​rogon ni ngan maruweliy ni nge gel e sobut’an’ e ba t’uf ni ngan athamgil. Ngan weliy fan u wan’dad ma ngad fal’eged i lemnag e tha u thildad Jehovah nge girdi’ e ra ayuwegdad ni ngad pared nib sobut’an’dad. U owchen Got, e urngin e girdi’ ni de flont e yad bod e pan nib galunglung nra tugul ni ba’ n’umngin nap’an, me mororoy. Girdi’ e yad bod e pi asmening u daken e ted. (Isaiah 40:6, 7, 22) Gur reb e yuwan e pan e bay fan ni nge uf ya bochan kab n’uw ko yugu boch e yuwan e pan? Gur bay fan reb e asmening ni nge uf ya bochan rayog ni nge og nib palog boch nga yugu boch e asmening? Ra ngan fal’eg i lemnag ma de puluw. Arfan ni, Paul ni apostal e ke puguran ngak e pi Kristiano ni gaar: “I mini’ e cha’ ni ke tam’ed ni gimed ba tolang ngak e tin ni ka ba’ e girdi’? Gathi urngin ban’en ni ba’ romed me Got e pi’? Ere ra diin mi gimed yog ni gimed e soromed ni gowa tin ni ba’ romed ban’en e gathi ni pi’ ngomed nib tow’ath?” (1 Korinth 4:7) Ngan fal’eg i lemnag e thin nu Bible ni aram rogon ma ra ayuwegdad ni ngada maruweliyed ma ngada daged e lem nib sobut’.

17. Mang e ke ayuweg Daniel ni profet ni ngari dag nib sobut’an’, ma mang e ra ayuwegdad ni ngada yodoromgad?

¹⁷ Daniel ni ba profet nu Hebrew e ka nog ni ir “be’ nrib fel’” u owchen Got ya bochan ni ke “sobut’nag” ir, ni aram, i dag e sobut’an’. (Daniel 10:11, 12) Mang e ke ayuweg Daniel ni nge maruweliy ni fan ni nge dag nib sobut’an’? Som’mon, ke dag ni rib gel e pagan’ rok ngak Jehovah, ma ma meybil ngak ni gubin ngiyal’. (Daniel 6:10, 11) Maku, Daniel e ma fil e Thin rok Got u fithik’ e pasig ma baadag, ni ireray e n’en ni ke ayuweg ni nge par nib tamilangan’ ko tin nib m’agan’ Got ngay. Ma ke m’agan’ ngay ni nge yog e oloboch rok, gathi ke mus ni oloboch rok e girdi’. Ma riyul’ ni baadag ni nge m’oneg e tin nib mat’aw rok Got, gathi tirok. (Daniel 9:2, 5, 7) Gur rayog ni ngada filed ban’en rok Daniel ko tin ke rin’ ma ngad athamgilgad ni ngad daged nib sobut’an’dad ko urngin ban’en ko yafas rodad?

18. Mang flaab e be sonnag e piin ni ma dag nib sobut’an’rad e ngiyal’ ney?

¹⁸ “Um par ni bay madgun Somol u wan’um, ma ba sobut’an’um me yoor ban’en rom, ma ga par ni yibe ta fam, me n’uw napam,” rogon ni yog ko Proverbs 22:4. Arrogon, ba fel’ u wan’ Jehovah e piin nib sobut’an’rad, ma angin ni ra yib e flaab nge yafas. Tomren ni ke yal’uweg Jehovah laniyan’ Asaph, ye chugur ni nge tal ko pigpig ku Got, me weliy fare psalmist u fithik’ e sobut’an’ ni gaar: Ga be pow’iyeg ko fonow ni ga be tay ngog, ma tomur e bay mu fekeg nga fithik’ e flaab ni aram e kam ta’fag.” (Psalm 73:24) Uw rogon e ngiyal’ ney? Mang flaab e be sonnag e piin nib sobut’an’rad? Gathi ke mus ni ngari fel’ thildad Jehovah, ya ku rayog ni ngar sonnaged e ngiyal’ ni ngar guyed ni ke lebug e thin rok David ni pilung ni kan thagthagnag ni gaar: “Piin ni yad mmunguy e bay ra tafanayed e fayleng, mu ur pired u fithik’ e gapas ni yad ba felfelan’.” Riyul’ ni ireray e tin nrib flaab ni bayi yib!​—Psalm 37:11.

Ka Ga Manang?

• Uw rogon ni dag Stefen nib sobut’an’ me dag Jehovah e flaab Rok ngak?

• Uw rogon ni dag Jehovah Got nib sobut’an’?

• Mang e pi n’en ni be dag ni ke dag Jehovah e flaab rok ngak e piin nib sobut’an’?

• Uw rogon ma n’en ni rin’ Daniel e be ayuwegdad ni ngada maruweliyed ni ngarda daged nib sobut’an’dad?

[Box on page 21]

Bagel e Michan’ Rok Machane Ba Sobut’an’

U nap’an e convention ko piin ka nog e Bible Students ngorad (yimanangrad e chiney ni Pi Mich Rok Jehovah) ko 1919 u Cedar Point, Ohio, U.S.A., me J. F. Rutherford ni ke 50 e duw rok ma ir e be ayuweg e maruwel ko ngiyal’ nem, e ke un ko maruwel ni ka nog e bellhop ngay u fithik e felfelan’, ni aram e maruwel ni ngan ayuweg ngan fek e chugum ko girdi’ ni kar bad min pow’iyrad ko pi singgil rorad. Bin tomur e rran ko fare convention, e kari felfelan’ fa 7,000 e girdi’ ni kar rung’aged e thin rok ni gaar: “Gimed e piin ni ambassador ko fare Pilung ko pilung nge Somol ko pi somol, ni gimed be machibnag . . . fare gil’ilungun e Somol rodad nib flaab.” Yugu aram rogon nrib gel e michan’ rok Brother Rutherford, ni kan nang nbochan ni ma non nib gel e thin rok ma der ma dariy fannag e n’en ni ke nang ni ireray e tin riyul’, ma ku rib sobut’an’ u mit Got, ni baga’ yima guy e re n’em ko meybil rok u nap’an e liyor ni kakadbul u Bethel.

[Picture on page 18]

Stefen, ni boor e Thin nu Bible ni manang, e i wereg e ggan u fithik’ e sobut’an’

[Picture on page 19]

Lem rok Manasseh nib sobut’ e ke felfelan’nag Jehovah

[Picture on page 21]

Mang fan ni Daniel e ke mang “be’ nrib fel’ u wan’uy”?