Ngan Maruweliy Nge Yog E Lem Rok Kristus Ko Ngan Tolang

“Ani baadag ni ir e nge mang tolang u fithik’med e thingari mang tapigpig romed.”​—MATTHEW 20:26.

1. Mang e ma lemnag e fayleng ko ani tolang?

U TOOBEN fare mach rok piyu Egypt ni kakrom ni kanog yu Thebes ngay (chiney e Karnak), ni gonapan 300 mayel nga yimuch u Cairo, e ba’ ba liyos riy ni 60-e fit-n’umngin ni yaan Pharaoh Amenhotep bin III. Dariy be’ ni ra sap ko fare liyos ndabi lemnag ni kari achichig ni ra nge taarebnag ir ko re liyos nem. Re n’eney, ni kan ngongliy, e dariy maruwar riy ni nge k’aringey ni nguun ta fan e pilung, aram e pow u rogon ni ma lemnag e fayleng e en nib tolang​—ni aram e be’ ni nge par ni nge m’ug nib tolang ma baga’ fan aram rogon ma rayog ni ta’ boch e girdi’ nib achig fan.

2. Mang e wok ni ta’ Jesus ni fan ngak pi gachalpen, ma mang e pi deer nib t’uf ni ngad deeriyed gadad riy?

² Mu taarebnag e re lem ney ko ngan tolang ko fare lem ni fil Jesus Kristus. Yugu aram rogon ni immoy ni “Somol ma Sensey” rok pi gachalpen, me fil Jesus ngorad ni ra ngan tolang ma ra yib ko nguun pigpig ngak boch e girdi’. Bin tomur e rran ko yafas rok u fayleng, me dag Jesus rogon fan e n’en ni ke fil ni aram e luknag e rifrif u ay pi gachalpen. Rib mudugil ni re n’ey e ngongol ko pigpig nib sobut’an’! (John 13:4, 5, 14) Ngam pigpig fa ngan pigpig ngom​—bin ngan e ga baadag? Fare ngongol ni dag Kristus e ra pug lanin’um ngam adag ni ngam sobut’an’ ni bod ir fa? Ere ngad fal’eged i yaliy rogon e lem rok Kristus ko ngan tolang nib thil ko lem ni ir e baga’ u fayleng.

Mu Palog ko Lem nu Fayleng ni Ngan Tolang

3. Mang e n’en ni be dag e Bible nib kireban’ ko n’en ni buch ko piin ni yad baadag ni nge yog e girdi’ e sorok ngorad?

³ Boor bogi n’en ni kuun rin’ ni bay u Bible ni be dag ni rogon e lem ni ma ta’ e fayleng ko ngan tolang e ma yan i aw nib kireb. Mu lemnag Haman nib gel gelngin, ma be’ nib ga’ fan u tafen e pilung nu Persia u nap’an Esther nge Mordecai. Feni gel ni be yim’ Haman ni bochan ni nge gilbuguwan e fek i yan ko tamra’ nge yam’. (Esther 3:5; 6:10-12; 7:9, 10) Ma uw rogon Nebuchadnezzar nib ufanthin, me yib e aliliy ngak u nap’an ni kari taw gelngin nga rogon? Lem rok ni nge tolang ni de puluw e yog ko pi thin ni baaray: “Gathi ireray e Babylon nib Gilbuguwan, ni gag rog e gu toy ni fan ko naun ko pilung ni gelngin fanag gel nge feni sorog nge fanag pilung?” (Daniel 4:30) Maku ba’ Herod Agrippa I ni ufanthin, ni adag ni nge gilbuguwan ni dariy mat’awun ni nge rin’ ko bin ni nge gilbuguwannag Got. Me “longuy e faklud me yim’.” (Acts 12:21-23) Bochan ni de nang e pi pumoon ney rogon e lem rok Jehovah ko ngan tolang me fekrad ni yad urngin i yan ko tamra’ ma ra mulgad.

4. Mini’ e bay u tanggin fare lem ni tolangan’ ni ba’ ko fayleng?

⁴ Ba fel’ ngodad ni ngad adaged ni nguuda fanayed e yafas radad u reb e kanawo’ ni ra yibnag e sorok nge ta’ fan. Machane, fare Moonyan’ e ma fanay e re lem ney nge mon’ognag e lem nib tolangan’, nib n’en ni be dag yaan e n’en ni yima yim’ ni bochan ni ngan mang reb e tolang. (Matthew 4:8, 9) Dabmu pagtalin ni ir “fare got ko re m’ag ney,” ma ke dugliy u wan’ ni nge gelnag e re lem rok nem u roy u fayleng. (2 Korinth 4:4; Efesus 2:2; Revelation 12:9) Manang e pi Kristiano e gini yib e re lem nem riy, e re yad ma pilo’ ko lem ko fayleng ni ngan mang tolang.

5. Tin kan rin’, nge gilbuguwan, nge salpiy ni boor e be dugliy ni tin ba gaman e ra par ni dabi m’ay? Mu weliy.

⁵ Reb e lem ni ma mon’ognag fare Moonyan’ e aram e nge lingagil fithingan be’ u fayleng, me tay e girdi’ fan, me yoor salpiyen me yib angin ni ba yafas nib felfelan’. Riyul’ e re n’em? Gur tin ni kan rin’, nge gilbuguwan, nge fel’ rogon ko salpiy e be dugliy ba yafas nib gaman ko tin yibe finey? Be ginangdad e Bible ni nge dabi bannagdad e lem ni aram rogon. Solomon ni Pilung nib gonop e yoloy ni gaar: “I gag rog ma kug guy ni urngin e maruwel nge urngin e llowan’ ko maruwel, ni fan e tagenging rok be’ ngak be’; biney e kub m’ay fan ma yibe l’ol’og e nifeng.” (Eklesiastes 4:4, NW) Boor e girdi ni kar pied e yafas rorad ni fan ni nge yog e fel’ rogon ngorad u fayleng e rayog ni ngar micheged feni riyul’ fare fonow nu Bible nthagthagnag. Reb e n’en ni gad ra guy e reb e pumoon ni un i fal’eg rogon yaan, miki un i toy, me un i skengnag fare skoki ni fek e girdi’ ko pul. I yog ni gaar: “Kugu maruwel nib gel ma kug mang be’ nrib salap ko maruwel rog. Machane ke aw ni dariy fan, ara dariy felngin, ni nge yognag e felfelan’ ni dabi m’ay nge gapas laniyan’.”a Fare lem ko fayleng ko ngan ga’, ni demtrug ko siyobay, fa gosgos, ara pi n’en ni yima felfelan’ ngay, e der dugliy ni ra par ni dabi m’ay e tin kan gaman riy.

Gilbuguwan ni Yib ko Pigpig e T’ufeg e Ma K’aring

6. Mang e be dag ni James nge John e keb e lem ngorow ni de puluw ko rogon ni ngan tolang?

⁶ Reb e ban’en ni buch u lan e yafas rok Jesus e dag ko mang e ba muun ko bin riyul’ ni ngan tolang. Jesus nge pi gachalpen e ra milekaggad nga Jerusalem ni fan ko madenom ni Paluk’af ko duw ni 33 C.E. Yad be yan u kanawo’, ma l’agruw i pi be’ rok Jesus, James nge John, e ra dagew e lem ko ngan tolang nib kireb. U daken e chitiningrow, ma aram ma rognew e re n’ey ngak Jesus ni lungrow: ‘Mog ni rayog ni gu pirew ko ba’ ni mat’aw nge ba’ ni gil’ay rom, u lan gil’ilungum.’ (Matthew 20:21) Rogon rok yu Jew, e ga ra par nga baan mat’aw fa gil’ay ma yima lemnag ni aram e ta’ fan nib ga’. (1 Kings 2:19) James nge John e ba samithmith rogon ni ri yow baadag ni ngar lagew nge yog ngorow e gin th’abi gilbuguwan. Yow baadag ni nge yog ngorow e pi liw ney nib tolang. Manang Jesus ko mang e n’en ni yow be lemnag ma aram me fanay e ngiyal’ nem nge yaluweg e lem rorow ni ke oloboch u rogon ni ngan tolang.

7. Uw rogon ni weliy Jesus rogon ni ngan tolang ngak e tin riyul’ e Kristiano?

⁷ Manang Jesus ni lan e re fayleng ney nib ufanthin, e ani yibe lemnag nib ga’ e ir e ani ma ta’ suwon ban’en ma ma gagiyegnag e girdi’ be’ ni yugu ra chubeg buguli pa’ ma urngin e tin nib adag ni ngan rin’ e ngan rin’ ni papey. Machane fithik’ pi gachalpen Jesus, e pigpig u fithik’ e sobut’an’ e aram e n’en ma dugliy e an ba tolang. I gaar Jesus: “Faanra baadag bigimed ni nge mang ir e ba tolang u fithik’med ma thingari mang tapigpig romed ma ani baadag ni ir e nge m’on u fithik’med ma thingari mang sib romed.”​—Matthew 20:26,2 7, NW.

8. Mang fan e ngan mang ba tapigpig, ma mang e pi deer ni manga ngad deeriyed gadad riy?

⁸ Fare bugithin ni Greek nni piliyeg ni “tapigpig” u lan e Bible e be yip’ fan be’ ni yugu ma athamgil nga i musmus rogon ni nge yan nge pigpig ni fan ngak boch e girdi’. I fil Jesus ngak pi gachalpen ban’en nrib ga’ fan: Nguun gelnag e thin ngak e girdi’ ko n’en ni ngar rin’ed e der ma tolangnag be’; ra un pigpig ko girdi’ ni bochan e t’ufeg ma yira tolang. Am fithem: ‘Uw rogon e n’en gu ra rin’ ni faan manga gag James fa John? Gur ri gu ra nang fan ni ngan tolang ni riyul’ e ma yib ko pigpig ni bochan e t’ufeg?’​—1 Korinth 13:3.

9. Mang e n’en ni ta’ Jesus ni ngan folwok riy u rogon ngongolen ngak e girdi’?

⁹ I dag Jesus ngak pi gachalpen ni rogon ni ngan tolang ko fayleng e gathi aram rogon ko birok Kristus ni ke dag. Ri der ma ta’ ir nib tolang ngak e piin ma pigpig ngorad ara k’aringrad nguur lemniged ni yad ba sobut’. Urngin mit e girdi’ ni​—pumoon, nge ppin, nge bitir, nge piin boor ban’en rok, nge piin gafgow, nge piin nib gel gelnginrad, maku e ri tay e piin ni goo yimanangrad ni yad e tadenen—​ma ba pufpuf rogorad ngak. (Mark 10:13-16; Luke 7:37-50) Girdi’ e baga’ ni da ra ma k’adedan’rad rok e piin meewar. Jesus e ba thil. Yugu aram rogon ni pi gachalpen e yu ngiyal’ ma der ma lemgad ma yad ma tugthin, ma ma k’adan’ nga i fonownagrad, ma be dag ni riyul’ nib sumunguy ma der ma damumuw nib gel.​—Zekariah 9:9; Matthew 11:29; Luke 22:24-27.

10. Uw rogon ma n’umngin nap’an e yafas rok Jesus e i dag e pigpig ngak boch e girdi’ ni de laniyan’?

¹⁰ Fare lem ni gathi goo ir e be lemnag ir e reb e wok ni ta’ e cha’ ney nib tolang ni Fak Got ni ke dag ko mang e bin riyul’ i fan e ngan tolang. Jesus e de yib nga fayleng ni ngan pigpig ngak ya nge pigpig ngak e girdi’, nge golnag “boor mit e m’ar” me chuweg e girdi’ u tan gelngin moonyan’. Yugu aram rogon ni ma magar ma ba t’uf rok yu ngiyal’ ni nga i toffan riy, ma gubin ngiyal’ ni ma mon’eg e tin ba t’uf rok boch e girdi’ ko tirok, ri ma athamgil ni nge fal’eg rogorad. (Mark 1:32-34; 6:30-34; John 11:11, 17, 33) T’ufeg rok e ir e k’aring ni nge ayuweg e girdi’ ko tirok Got ban’en, ma milekag u bokum miriay e mayel u daken e kanawo’ ni goo thi’ab ni nge machibnag e thin nib fel’ ko Gil’ilungun. (Mark 1:38, 39) Dariy e maruwar riy, ni ma lemnag Jesus ni ngan pigpig ngak boch e girdi’ e rib ga’ fan.

Mu Folwok ko Sobut’an’ Rok Kristus

11. Mang e pi felngin nib t’uf ni ngan sapnag ko pi walag ni kan dugliyrad ni ngar pigpiggad ni ta ayuweg e ulung?

¹¹ U lan fapi duw ko 1800, e bin nib puluw e lem ni thingari maruweliy e pi Kristiano ni overseer e ni weliy u nap’an nni mel’eg e pumoon ni ngar manged e piin ta lekag e ulung ni ngar maruweliyed e tin ba t’uf ko girdi’ rok Got. N’en nib t’uf ni yibe changar ngay e, rogon ni yog e Zion’s Watch Tower ko September 1, 1894, e girdi’ “ni ba sumunguy​—ni nge dabra ufanthingad . . . , girdi’ nib sobut’an’ ni gathi yad be non ni yad e nge fel’ rogorad, ya Kristus—​gathi yad be weliy e llowan’ rorad, ya Thin rok u rogon feni mom nge gelngin.” Ba tamilang, ni tin riyul’ e Kristiano e thingari dabi gay ban’en ni nge rin’ ni bochan ni nge gaman rok e tin nra ga’ riy, ara nge gilbuguwan, nge gelngin, nge nga i gagiyegnag boch e girdi’. Ba ta ayuweg e ulung nib sobut’an’ e nga i lemnag ni maruwel rok e yib u “ba maruwel nib fel’,” gathi ba liw nib tolang ni ra gilbuguwannag. (1 Timothy 3:1, 2) Urngin e piilal ko ulung nge ministerial servants e thingara athamgilgad u rogon ni rayog rorad ni ngar pigpiggad u fithik’ e sobut’an’ ni fan ngak boch e girdi’ ma nga u ra pow’iyed e pigpig nib thothup, mar fal’eged e wok nib fel’ ni ngan folwok riy.​—1 Korinth 9:19; Galatia 5:13; 2 Timothy 4:5.

12. Piin ni yad be nameg boch e maruwel u lan e ulung mang e pi deer ni ngar deeriyed yad riy?

¹² Re walag ni be nameg ni nge un nga reb e maruwel e ra t’uf rok ni nge fith ir ni gaar: ‘Gu be gay rogon ni nge yog ni u gu pigpig ngak boch e girdi’, fa gu be rin’ ya gu baadag ni ngan pigpig ngog? Ba m’ag u wan’ug ni nggu fal’eg boch e maruwel nib ga’ e ayuw riy ma gathi ri yira nang?’ Ni bod rogon, ba pagel nib fel’ yangaren ni baadag ni nge pi’ e welthin ko muulung ko Kristiano ma gathi rib adag ni nge pi’ e ayuw ngak e piin pillibthir. Sana ri i adag ni nga i chag ngak e piin pumoon nib ga’ farad u lan e ulung ma gathi rib adag ni nge un ko maruwel ni machib. Pagel ni fel’ yangaren ni aram rogon e ba fel’ ni thingari deeriy ir ni nge gaar: ‘Gu be sap nga rogon e pigpig rok Got ni yira nangeg riy min nog e fel’ riy ngog? Gur gu be athamgiliy ni nga gu ga’ u p’eowchen e girdi’?’ Ra un gay rogon ni nge gilbuguwey ma aram e rib mudugil ni gathi gadad be folwok rok Kristus.​—John 5:41.

13. (a) Uw rogon ma ngongol rok ba ta ayuweg e ulung nib sobut’an’ e yib angin ngak boch e girdi’? (b) Mang fan ni rayog ni nga nog ni sumunguy, nge sobut’an’ e gathi ban’en ni nge guy ba Kristiano ko nge rin’ fa dangay?

¹³ Nap’an ni gadad ra athamgil ni ngad folwokgad ko sobut’an’ rok Kristus, ma ra k’aringdad ni ngad pigpiggad ngak boch e girdi’. Mu lemnag fare n’en ni rin’ reb e zone overseer ni i fal’eg i guy rogon e maruwel u reb e branch ofis ko Pi Mich Rok Jehovah. Dariy fan ni ri boor e maruwel ni ba’ ni nge rin’ ma rib gel e maruwel rok, ma re overseer ney e tal ni nge ayuweg ba walag nib pagel ni be athamgil i guy rogon ni nge ayli nge puluw bangi n’en u ba masin ni ma yip e babyor nge dabki dar me yib yu ken e babyor riy ara magazine. I gaar fare walag, “Ri gu gin ngay!” “I yog ngog ni ki i maruwel nga reb e masin ni taareb rogon ko biney u nap’an ni kab pagel ni i maruwel u Bethel, e re ke nang feni mo’maw’ ni ngan ayliy ngeni aw ko gin ni rib puluw. I un ngog nga gu maruweliyew e re masin nem nib n’uw nap’an ni yug aram rogon ni boor bogi n’en nib ga’ fan ni nge rin’. Ri una n’ug ko re n’em.” Re walag nem, e chiney e ke mang reb e taayuweg reb e branch ofis ko Pi Mich Rok Jehovah, ma ka bay uwan’ e re ngongol nem ko sobut’an’. Ere dab uda lemniged ni kaygu da tolanggad ni ngad rin’ed e tin sobut’ ban’en ara kaygi ga’ fadad ni ngada rin’ed e maruwel ni ba achig. Ya rogon, e ngad fal’eged rogodad ko “lem nib sobut’.” Re n’em e gathi ngan guy ko ngan rin’ fa dangay. Ya bayang ko “fa bin nib biech i gadad” ni thingari yin’ e Kristiano nga daken.​—Filippi 2:3; Kolose 3:10, 12; Roma 12:16.

Rogon Me Yog e Lem ni Bod e Lem Rok Kristus ko Ngan Tolang

14. Uw rogon ni gadad ra fal’eg i lemnag e tha’ u thildad Got nge piin gadad e ra ayuwegdad nge yog rodad e bin nib puluw e lem ko ngan tolang?

¹⁴ Uw rogon me yog ngodad e bin nib puluw e lem ko ngan tolang? Reb e kanawo’ e ngan fal’eg i lemnag e tha’ u thildad Jehovah Got. Feni tolang, nge gelngin, nge feni gonop e ke tolangnag kari tolang ko llowan’ nge ngongol ko girdi’ ni yad ba achig ma gathi uw rogorad. (Isaiah 40:22) Nguud fal’eged i lemang e tha’ u thildad bochi gadad e ku ra ayuwegdad ni nge yog e sobut’an’ ngodad. Ni bod rogon, ni sana ramoy boch ban’en ni gad ba salap riy ngak boch e girdi’, machane rayog ni yad ba cheg ngodad u boch ban’en ko yafas ni kab ga’ fan, ara pi walagdad ni Kristiano e ramoy boch i felngirad ni dariy rodad. Rogon nib riyul’, e boor e girdi’ ni rib fel’ u p’eowchen Got e der ma gagiyel ni bochan ni yad ba sumunguy ma yad ba ngongol i sobut’an’.​—Proverbs 3:34; James 4:6.

15. Uw rogon ma yul’yul’ u gum’irchaen e girdi’ rok Got e be dag ni dariy be’ ni ba’ rogon ni nge lemnag nib tolang ngak boch e girdi’?

¹⁵ N’en ni ke rin’ e Pi Mich Rok Jehovah u tan e skeng ni bochan e michan’ rorad e kari dag rogon e re ney nib fel’ rogon. Boor yay, ni piin ni ma lemnagrad e fayleng ni yu girdi’ e yad e kar pired ni yad ba yul’yul’ u gum’ircharad ngak Got u tan e skeng nib gel. Ra uni fal’eg i lemnag e pi ngongol nem ma ra ayuweg i ta’dad ni gad ba sobut’an’ me fil ngodad ‘ni yugu dabi ga’ ni gadad e nguud lemniged gadad nge pag rogon.’​—Roma 12:3.b

16. Uw rogon me yog rok urngin e girdi’ u lan e ulung ni ngar maruweliyed ni ngan tolang ni ngan folwok u rogon ni ke ta’ Jesus?

¹⁶ Urngin e Kristiano, ni fel’ yangaren nge piilal, ni thingari gay rogon ni nge maruweliy e lem ni bod e lem rok Kristus ko ngan tolang. U lan e ulung, e boor mit e maruwel ni thingar ni rin’ riy. Dabmu dabuy ni yira yog ngom ni ngam rin’ e n’en ni be m’ug nib sobut’. (1 Samuel 25:41; 2 Kings 3:11) Gallabthir, gimew ma pi’ e athamgil nga laniyan’ pi fakmew nge pi fel’ yangaren ni ngar maruweliyed u fithik’ e felfelan’ e maruwel ni kan pi’ ngorad ni ngar rin’ed, ndemtrug ko Kingdom Hall, fa assembly, ara gin bay e convention riy? Yad ma guyem ni ga ma rin’ e tin sobut’ e maruwel fa? Reb e walag, ko fare world headquarters rok e Pi Mich Rok Jehovah, rib tamilang rogon ni be lemnag e n’en ni i rin’ e gallabthir rok. I gaar: “Rogon ni yow ma rin’ fare maruwel ni ngan klinnag e Kingdom Hall ara tagil’ e convention e dag ngog ni yow be lemnag ni baga’ fan. Boor yay ni yow ma ognagew yow ni ngar rin’ew e maruwel ni nge fel’ ko ulung ara pi walag, ni demtrug feni sobut’ e pi maruwel nem ni bebi m’ug. Biney e wok e ke ayuwegeg ni nga gu adag e maruwel ni demtrug ni yira pi’ ngog u roy u Bethel.”

17. Mang e pi kanawo’ ni rayog ni mang be’ ni ppin nib sumunguy ba taw’ath ko ulung?

¹⁷ Rogon ni ngan ta’ e tin baadag boch e girdi’ nga m’on ko tin yi baadag, e ba’ reb e kanawo’ ni rib fel’ rok Esther, ni faani mang leengin e pilung nu Persia ko fa bin lal e chibog B.C.E. Aram rogon ni be par u tafen e pilung, me adag ni nge tay e yafas rok nga thatharen e riya’ ni fan ko girdi’ rok Got, me maruwel nib puluw ko tin nib m’agan’ Got ngay. (Esther 1:5, 6; 4:14-16) Pi ppin ni Kristiano e chiney, e demtrug rarogon e par rorad ma rayog ni ngar daged e lem ni bod e lem rok Esther ni yad ma pi’ e athamgil nga laniyan’ e piin kar mochuchgad, yad ma yan ra guyed e piin m’ar, yad ma un ko machib, ma yad ma fol ko piin piilal. Pi walag ni ppin nem ni yad ba sobut’an’ e ri yad e taw’ath ko ulung!

Pi Taw’ath ko Ngan Tolang ni Bod Kristus

18. Mang e pi felngin ni ra yib ko ngan dag e lem ko ngan tolang ni bod e lem rok Kristus?

¹⁸ Ra yib felngin ngom ni boor u nap’an ni ri i par e lem rom ko ngan tolang ni bod Kristus. Ra uni pigpig ngak boch e girdi’ ni dariy e laniyan’ riy ma ra yibnag e felfelan’ ngorad nge gur. (Acts 20:35) U nap’an ni ga ra maruweliy nib gel nib m’agan’um ngay ma ri ga baadag ni fan ngak pi walagem, me gel fanam mu t’uf rorad. (Acts 20:37) Ma n’en ni kab ga’ fan, e ra lemnag Jehovah e n’en ni ga be rin’ ni ga be mon’eg e tirok e piin Kristiano ni ba maligach ko ngan pining e sorok ngak.​—Filippi 2:17.

19. Mang e n’en ni thingarda dugliyed u lanin’dad u rogon fare lem rok Kristus ni ngan tolang?

¹⁹ Ra bagadad ma ba t’uf ni ngari fal’eg i yaliy gum’irchaen nge fith ni gaar: ‘Kemus ni gu be weliy murung’agen ni ngan maruweliy nge yog rogon e lem rok Kristus ko ngan tolang, fa gu be maruweliy nib gel ni nge yog ni gu rin’?’ Rogon e lem rok Jehovah ko piin tolangan’ e ba tamilang. (Proverbs 16:5; 1 Peter 5:5) Ma nge yog ni dag e ngongol rodad ni gadad ba felfelan’ ni ngada daged e lem ko ngan tolang ni bod Kristus, ni demtrug ko lan e ulung ko Kristiano, fa lan e yafas ko tabinaw rodad, ara n’en ni gadad ma rin’ u reb e rran ngo reb ngak e piin gadad​—ngan rin’ urngin ban’en ni ngan gilbuguwannag min ta’ fan Got.​—1 Korinth 10:31.

[Footnotes]

Rayog ni Mu Weliy?

• Mang fan ni thingarda pilo’gad u rogon ni ma lemnag e fayleng e ngan tolang?

• Uw rogon u wan’ Jesus e ngan tolang?

• Uw rogon ni nge folwok e pi taayuweg e ulung ko sobut’an’ rok Kristus?

• Mang e rayog ni ayuwegdad ngad maruweliyed e lem ni ngan tolang ni bod Kristus?

[Box on page 26]

Mini’ e Bay Rok e Lem ni Ngan Tolang ni Bod Kristus?

Cha’ ni baadag ni ngan pigpig ngak fa anib m’agan’ ngay ni nge pigpig?

Cha’ ni baadag ni nge gilbuguwan ara cha’ ni baadag e maruwel nib sobut’?

Cha’ ni ma tolangnag ir ara cha’ ni ma tolangnag boch e girdi’?

[Picture on page 23]

Ba liyos nib ga’ nib ga’ ni yaan Pharaoh Amenhotep III

[Picture on page 24]

Gamanang ko mang e k’aring Haman nge mul?

[Pictures on page 25]

Ga ma gay kanawoen ni ngam pigpig ngak boch e girdi’ fa?