Rogon Feni Sorok Jehovah E Dabi Taw E Lem Ngay
“Jehovah e ba sorok ma ri bay rogon ni ngan pining e sorok ngak, ma rogon feni sorok e dabi taw e lem ngay.”—PSALM 145:3, NW.
1, 2. Mit i mang e girdi’ David, ma be ta’ ir ni uwrogon ngak e tha’ u thilrow Got?
ANI yoloy fare Psalm 145 e be’ ni ri yimanang murung’agen kakrom. Nap’an ni ka bochi pagal, mi sabliy reb e giant ni be fek talin e cham rok li’ ngem’. Ma bochan ni ir reb e pilung nib falu’, ma re psalmist ney e ke gel ngak boor e toogor rok. Fithingan e David, ma ir fa bin l’agruw e pilung rok piyu Israel kakrom. Ngongol rok David e i par u laniyan’ e girdi’ u tomren ni yim’, ma arfan ni chiney e bokum million e girdi’ e manang murung’agen.
2 Yugu aram rogon ni boor ban’en ni ke rin’ David, ma i par nib sobut’an. I yon’ e tang ni murung’agen Jehovah, ni gaar: “Faan gu ra yaliy lan e lang ni gur e kam sunmiy, nge pul nge pi t’uf nu lan e lang, ni gur e mu ta’rad nga tagil’rad, me lungug u wan’ug, Girdi’ e mang ni ngam lemnag; mang ni ngam lemnag ni yugu aram rogon ni ir e ke mus ni girdi’?” (Psalm 8:3, 4) De lemnag David ni ir be’ nib baga’, ya n’en ni rin’ e yog ni Jehovah e ke ayuweg me thay u pa’ urngin e pi toogor rok me yog e thin u murung’agen ni gaar: “Mu ayuweg e yafas rog, ma lanin’um nib sobut’ e ke gilnag buguwag.” (2 Samuel 22:1, 2, 36) I dag Jehovah laniyan’ nib sobut’ u nap’an ni i runguy e piin ni tadenen, me pining David e magar nbochan e gol rok Got.
‘Nggu Tolangnag Got ni Pilung
3. (a) Mang e ke lemnag David u murung’agen e en ra mang pilung nu Israel? (b) Baadag David nni nge pining e sorok ngak Jehovah nge taw ngan?
3 Yugu aram rogon ni David e ba pilung ni Got e ke dugliy, ma i changar ngak Jehovah ni ir e Pilung nu Israel nib riyul’. I yog David ni gaar: “Fare gil’ilungun, e fanam O Jehovah, maku gur e ga be tolangnigem ni lolugen urngin e pilung.” (1 Chronicles 29:11, NW) Riyul’ ni David e kari tayfan Got ni Tagagiyeg! I yon’ e tang ni gaar, “Got rog ma pilung rog, bay ug weliy rogon feni sorom ngan nang; bay ug pining e magar ngom ndariy n’umngin nap’an. Gubin e rran ni bay ug pining e magar ngom; bay ug pining e sorok nga fithingam ndariy n’umngin nap’an.” (Psalm 145:1, 2) David e ir e baadag ni nge pining e sorok ngak Jehovah Got ni polo’ e rran nge mada’ko ko ngiyal’ ndariy n’umngin nap’an.
4. Psalm 145 e be dag e mang thin ni ka nog ni de riyul’?
4 Psalm 145 e ir ba fulweg nib gel gelngin ko n’en ni yog Satan u murung’agen Got ni ba tagagiyeg nib siin ya de pi’ e pufrogon ngak e piin ke sunmiy. (Genesis 3:1-5) Re psalm ney e ku be tamilangnag e ban rok Satan ni gaar piin ni be fol rok Got e yad be rin’ ni kemus nbochan e tin rayog ni ngar feked riy, ma gathi bochan e t’ufeg ku Got. (Job 1:9-11; 2:4, 5) Ni bod David, tin riyul’ e Kristiano e chiney e yad be pi’ e fulweg ko tin ni yog fare Moonyan’ ni de riyul’. Yad be chaariy e athap rorad ni yafas ni dariy n’umngin nap’an u tan e gagiyeg ko fare Gil’ilungun ya bochan yad be athapeg ni ngar pininged e sorok ngak Jehovah ni dariy n’umngin nap’an. Bokum million e girdi’ e kar tababgad i rin’ e n’en ni aram rogon ma aram yad be maruweliy e michan’ rorad ko biyul ni pi’ Jesus ma yad ba yul’yul’ ni be pigpig ku Jehovah nbochan e t’ufeg ni yad e piin ni kar ognaged yad ma kan taufenagrad.—Roma 5:8; 1 John 5:3.
5, 6. Mang e pi n’en ni bay ni rayog ni ngan ta’ fan min pining e sorok ngak Jehovah?
5 Mu lemnag e tayim ni boor ni kan bing ngodad ni ngad pininged e sorok ngak Jehovah ni gadad e pi tapigpig rok. Rayog ni ngad rin’ed e n’en ni aram rogon u daken e meybil u nap’an ni bay ban’en ni ke k’aring gum’ircha’dad ko n’en ni kad bieged ko Thin rok, ni fare Bible. Ngan pining e sorok nge magar ngak Got e rayog ni ngan dag u nap’an ni ke k’aringdad u rogon ni ma ayuweg Got e girdi’ rok ara nap’an ni kad ngatgad nga boch e pi n’en ni ke sunmiy ni yira ngat ngay. Maku gad ma pining e sorok ngak Jehovah Got u nap’an ni ngad weliyed e tin nib m’agan’ ngay ngak e pi walagdad ko muulung rodad ara nap’an e sabathin ni goo gadad. Riyul’, ni urngin e “maruwel nib fel’” ni kan rin’ nbochan Gil’ilungun Got e ra pining e sorok ngak Jehovah.—Matthew 5:16.
6 Tin ni buch ni dawori n’uw nap’an ni be dag e maruwel nib fel’ ni aram e ba muun ngay e dimow naun ni ma liyor e pi tapigpig rok Jehovah riy u lan e pi binaw ni rib gafgow. Ma boor riy e kan toy ni pi walag u yugu boch e nam e kar ayuweged kar pied boch e salpiy. Boch e Kristiano e kar pied e ayuw ma aram ka ranod ko pi binaw nem ni fan ni ngar uned ko maruwel ngan toy e pi Kingdom Hall u rom. Ma bin th’abi ga’ fan u fithik’ urngin e maruwel nib fel’ e aram ngan pining e sorok ngak Jehovah u daken e maruwel ni ngan machibnag fare thin nib fel’ ko Gil’ilungun. (Matthew 24:14) Rogon ni dag e pi verse ni bay ko tomur ko Psalm 145, e pining David e magar me tayfan e gagiyeg rok Got me tolangnag e liw Rok ni pilung. (Psalm 145:11, 12) Maku ga ma pining e magar ni bochan ni ma gagiyeg Got u fithik’ e t’ufeg? Ga ma weliy ngak yugu boch e girdi’ murung’agen Gil’ilungun u gubin ngiyal’ fa?
Tin Be Dag Feni Tolang Got
7. Mu pi’ kenggin i fan ni ngan pining e sorok ngak Jehovah.
7 Psalm 145:3 e be yog fan nib gel ni ngan pining e sorok ngak Jehovah. I yon’ David e tang ni gaar: “Jehovah e baga’ ma ri bay rogon ni ngan pining e sorok ngak, ma rogon feni sorok e dabi taw e lam ngay.” Rogon feni tolang Jehovah e dariy e gin ni ra mus riy. Girdi’ e dabiyog ni nge pirieg fan ni polo’, ma dabiyog ni ngari nang fan, ara ngari foleg ga’ngin. Machane mutrug ni rayog ni nge fel’ rogodad e chiney ni ra ngad weliyed boch ban’en ni be dag feni sorok Jehovah nib dabi taw e lem ngay.
8. Mang e be dag fare palpalthib rogon feni sorok Jehovah nge gelngin?
8 Mu guy rogon ni ngeb ngan’um ba ngiyal’ ni ummoy ko gin nib palog ko raen e magal nib tamilang u reb e mach ma ga sap nga lan e lang ni dariy e manileng riy. Gathi kam ngat ngay ni kam guy boor e t’uf ni ur moyed u lan e lang ni susun ba talomur? Gathi ke k’aringem ngam pining e sorok ngak Jehovah rogon ni sunmiy urngin e t’uf u fithik’ e gonop? Machane, tin kam guy e kemus ni bochuw ko tin boor e t’uf u lan fare galaxy ni fare fayleng e bay riy. Maku, yibe susunnag ni urngin e galaxy e ka pag raay e billion e galaxy, ma kemus ni dalip e rayog ni ngan guy ni dan fanay e telescope. Riyul’, ni pi t’uf ni boor nge pi galaxy ni bang ko palpalthib ni rib ga’ e be dag gelngin Jehovah ni sunmiy ban’en nge rogon feni sorok ni dabi taw e lem ngay.—Isaiah 40:26.
9, 10. (a) Mang e ngongol rok Jehovah nib l’ag rogon nga feni sorok e kan dag nib peth ku Jesus Kristus? (b) Mang e ra rin’ e fas ko yam’ ni tay Jesus ko michan’ rodad?
9 Mu lemnag bochi yang ni be dag rogon feni tolang Jehovah—ni pi n’en ni bay rogon Jesus Kristus ngay. Rogon feni tolang Got e kan dag u nap’an ni ke sunmiy Fak me fanay nge mang girdien e maruwel rok “nib salap i rin’ ban’en” u lan e tayim nib mo’maw’ ni ngan thieg. (Proverbs 8:22-31) Rogon feni gel e t’ufeg rok Jehovah e kan dag u nap’an ni ke pi’ Fak ni kari maagirag rok nge mang biyul ni maligach ni fan ko girdi’. (Matthew 20:28; John 3:16; 1 John 2:1, 2) Ma ban’en nib mo’maw’ ni ngan nang fan e aram fare dowef ni ba kan ma dabi yim’ ni ke fal’eg Jehovah ni fan ku Jesus u nap’an ni kan faseg ko yam’.—1 Peter 3:18.
10 Fas ko yam’ ni tay Jesus e ba muun ngay boor ban’en ni yira ngat ngay ni be dag feni sorok Jehovah ni dabi taw e lem ngay. Dariy e maruwar riy ni ke sulweg Got nga laniyan’ Jesus fare maruwel ni bay rogon ni un sunmiy e tin dabiyog ni ngan guy nge tin rayog. (Kolose 1:15, 16) Ma ba muun ngay yugu boch e pi engel, nge palpalthib, nge fare fayleng ni be yibnag boor ban’en, mab muun ngay urngin mit i yafas nrayog ni ngan guy u fayleng rodad. Gathi kemus ni nge sulweg e tin manang Fak ni urngin ni murung’agen e yafas u tharmiy nge fayleng ni i guy u nap’an ni dawori mang ba girdi’, I sulweg Jehovah nga laniyan’ Jesus e tin ni ke nang nib girdi’ nib flont. Arrogon, rogon feni sorok Jehovah ni dabi taw e lem ngay e ke tamilang u nap’an ni kan faseg Jesus ko yam’. Maku, re n’em e be dag ni ku rayog ni ngan faseg boch e girdi’ ko yam’. Susun ra gelnag e michan’ rodad ni rayog rok Got ni nge faseg bokum million e girdi’ ni kar m’ad ni ke tay nga laniyan’ nib flont.—John 5:28, 29; Acts 17:31.
Maruwel ni Yira Ngat Ngay ngu Fithik’ Gelngin nib Gel
11. Mang maruwel rok Jehovah ni rib fel’ e ke tabab ko Pentecost 33 C.E.?
11 Ka nap’an e ngiyal’ ni kan faseg Jesus ko yam’, i ngongliy Jehovah boor e maruwel ni rib fel’ ma yira ngat ngay. (Psalm 40:5) Nap’an e Pentecost 33 C.E., i sunmiy Jehovah e bin nib biech e nam, “fare Israel rok Got,” ni girdi’ ni bang riy e aram e pi gachalpen Kristus ni kan dugliyrad ko kan ni thothup. (Galatia 6:16) U fithik’ gelngin nib gel, re nam ney nib spiritual e ke ga’ i yan me taw ko fapi binaw ni ka nog e fayleng ngay kakrom ni ga’ngin. Yugu demtrug rogon ni tomren ni ke yim’ e pi apostal rok Jesus me sum e piin ni kar digeyed e tin riyul’ ma arfan ni ke yoor e piin ni Kristiano ni de riyul’, me ulul Jehovah ni nge rin’ e maruwel ni yira ngat ngay ni fan ni nge mudugil nra lebug e tin nib m’agan’ ngay.
12. Bochan ni Bible e kan thiliyeg ko urngin mit e thin ni boor e girdi’ ni ma fanay e be micheg e mang?
12 Ni bod ni, fare Bible canon e kan ayuweg nge dabi kireb ma tomur riy e kan thiliyeg ko urngin e thin u fayleng e chiney ni boor e girdi’ ni ma non. Baga’ ni yima thiliyeg e Bible kakrom u fithik’ e magawon nib mo’maw’ ngu fithik’ e riya’ ni ngem’ e en be thiliyeg nbochan girdien Satan. Ba mudugil, ndabiyog ni ngan thiliyeg e Bible ko thin ni ke pag 2,000 oren nfaanra de m’agan’ Jehovah Got ni dabiyog ni nge taw e lem nga rogon feni sorok!
13. Ka nap’an e duw ni 1914, ma uwrogon ni kan dag rogon feni sorok Jehovah nib peth ko tin nib m’agan’ ngay ko GilIlungun?
13 Rogon feni tolang Jehovah e kan dag nib peth ko tin nib m’agan’ ngay ko Gil’ilungun. Ni bod, lan e duw ni 1914, i tay Fak, i Jesus Kristus, nge mang Pilung nu tharmiy. De n’uw nap’an nga tomren, me rin’ Jesus ban’en nib togopuluw ku Satan nge pi moonyan’ rok. Kan tulufrad u tharmiy min tayrad nga bang nib chuchugur ko fayleng, ni yad be sonnag e chiney ni ngan kalbusnagrad. (Revelation 12:9-12; 20:1-3) Ka nap’an e ngiyal’ nem, ma pi gachalpen Jesus ni kan dugliyrad e keb ngorad e togopuluw ni kab gel boch. Machane, be ayuwegrad Jehovah u nap’an e re tayim ney ni ba’ Kristus ni dabiyog ni ngan guy.—Matthew 24:3; Revelation 12:17.
14. Mang maruwel ni yira ngat ngay e ke rin’ Jehovah ko duw ni 1919, ma mang e ke lebuguy e re n’ey?
14 U lan e duw ni 1919, i ngongliy Jehovah yugu reb e maruwel ni yira ngat ngay ni be dag feni sorok. Pi gachalpen Jesus ni kan dugliyrad, ni kar wargad ko tirok Got ban’en, e kan sulwegrad nga rogon. (Revelation 11:3-11) Ka nap’an e re duw nem i yib, ma piin ni kan dugliyrad e ur machibnaged u fithik’ e pasig fare thin nib fel’ ko Gil’ilungun u tharmiy ni kan sunmiy. Yugu boch e piin ni kan dugliyrad e kan ulunguyrad ni ngan gamaneg fare namba ni 144,000. (Revelation 14:1-3) Mu daken e pi gachalpen Kristus ni kan dugliyrad, i ngongliy Jehovah e def ko “fa bin nib biech e fayleng,” ni aram reb e ulung ko girdi’ nib mat’aw. (Revelation 21:1) Machane mang e ra buch rok “fa bin nib biech e fayleng” u tomren ni urngin e piin ni kan dugliyrad nib yul’yul’ e kar ranod nga tharmiy?
15. Mang maruwel ni piin Kristiano ni kan dugliyrad e yad ma pow’iy, ma mang angin?
15 U lan e duw ni 1935, ma fare issue ni August 1 nge August 15 ko re ke babyor ney e immoy e article riy ni be weliy murung’agen fare “ulung ni baga’,” ni bay ko Revelation guruy ni 7. Piin ni Kristiano ni kan dugliyrad e kar tababgad ngar gayed mar pininged ngaur chaggad ngorad ni kar bad u urngin e pi nam, nge ganong, nge girdi’, nge thin. Re “ulung ni baga’ ney” e ra magay nib fas ko fare “gafgow ni baga’” ni be chuchugur i yib ni bay e athap rorad nge yog ngorad e yafas ni manemus u Paradis ngar manged bang ko “fa bin nib biech e fayleng” ndariy n’umngin nap’an. (Revelation 7:9-14) Bochan e maruwel ni ngan machibnag fare Gil’iliungun min pingeg e girdi’ ngar manged gachalpen, ni piin Kristiano ni kan dugliyrad e be pow’iyrad, ke pag nel’ million i girdi’ e bay e athap rorad e chiney ni yafas ni manemus u paradis u fayleng. Mini’ e thingar ni pining e sorok ngak ko re mon’og ney ni yugu aram rogon ni be togopuluw Satan nge fayleng rok nib kireb ngorad? (1 John 5:19) Kemus ni Jehovah e rayog ni nge rin’ urngin e pi n’en ney, ni be fanay e kan ni thothup rok.—Isaiah 60:22; Zekariah 4:6.
Jehovah ni Rib Galgal Ramaen mab Tolang
16. Mang fan ni girdi’ e dabiyog ni ngar guyed nga owcherad tolangin Jehovah nib galgal ramaen?
16 Yugu demtrug ko mit i mang e maruwel nge ngongol e pi n’em, ma fapi maruwel rok Jehovah ni “yira ngat ngay” nge “tin ni rin’ u fithik’ gelngin nib gel” e dabni pagtalin. I yoloy David ni gaar: “Tin kam rin’ e bay ni pining e sorok riy ngom u reb e mfen ngu reb; bay ur weliyed ngan nang e pi n’en nib sorom ni kam ngongliy. Ma girdi’ e bay ur weliyed e pi n’en nib sorom ni kam ngongliy, ma bay ug weliy rogon feni sorom ngan nang.” (Psalm 145:4-6) Yugu aram rogon, feni yoor ma rayog ni nge nang David murung’agen e flaab rok nge rogon feni sorok Jehovah, ya bochan ni “Got e Kan” ma arfan ni dabiyog ni nge guy e girdi’?—John 1:18; 4:24.
17, 18. Uw rogon ma ke gel i yan e tayfan rok David ko ‘galgal ramaen ko liw rok Jehovah nib tolang?
17 Yugu aram rogon ni dabiyog ni ngan guy Got, ma immoy fapi kanawo’ ni nge gel e tayfan rok David rogon feni sorok Jehovah. Ni bod ni, rayog ni nge bieg e Thin nu Bible ni be weliy ko tin i rin’ Jehovah u fithik’ gelngin nib gel, ni bod fare fayleng nib kireb ni kan gothey u daken e ran ni boor. Baga’ ni, ke fil David ko uw rogon ni kan tamra’nag e pi got ni googsur nu Egypt ko ngiyal’ ni ke ayuweg Got piyu Israel ni dab kuura pared ni sib rok piyu Egypt. Re n’en nem e be micheg rogon feni tolang e liw nge feni sorok.
18 Dariy e maruwar riy ni ke gel iyan e tayfan rok David nga rogon feni sorok Got ni gathi kemus nbochan ma bieg e Thin nu Bible ya ku ma fal’eg i lemnag. Ni bod ni, sana ke fal’eg i lemnag ko mang e ke buch u nap’an ni ke pi’ Jehovah fare Motochiyel ngak piyu Israel. Immoy fapi dirra’, nge uluch, nge manileng ni ba dib’ag, nge lingan e rappa ni baga’. Fare burey ni Sinai e ke mithmith nib gel meb e ath riy. Nap’an ni kar muulunggad u enggin fare burey, me rung’ag piyu Israel ni be non Jehovah ni murung’agen fa “Ragag i Motochiyel” u daken reb e engel u fithik’ e nifiy nge manileng. (Deuteronomy 4:32-36; 5:22-24; 10:4; Exodus 19:16-20; Acts 7:38, 53) Kari dag feni gel gelngin Jehovah! Piin ba t’uf e Thin Rok Got rorad e kar fal’eged i lemnag e pi thin ney e susun kan pug e tafinay rorad nbochan fare ‘galgal ramaen e liw rok Jehovah nib tolang.’ Chiney e riyul’, ni bay e Bible rodad ni polo’, ni bay riy boch e changar nib thilthil ni be dag ngodad feni sorok Jehovah.—Ezekiel 1:26-28; Daniel 7:9, 10; Revelation, chapter 4.
19. Mang e mon’ognag e tay fan rodad ko liw rok Jehovah nib tolang?
19 Maku reb e kanawo’ ni ku rayog ni ngat David nga rogon feni sorok Got e nge fil e motochiyel ni ke pi’ Got ngak piyu Israel. (Deuteronomy 17:18-20; Psalm 19:7-11) Ngan fol ko motochiyel rok Jehovah e ke tolangnag fare nam nu Israel me tayrad nib dar ko yugu boch e girdi’ ni urngin. (Deuteronomy 4:6-8) Ngan bieg fare Thin nu Bible ni gubin ngiyal’, ngan fal’eg i lemnag nib gel, ma ngan fil nib fel’ rogon e ra gelnag e tayfan rodad nga rogon feni sorok Jehovah ni bod rogon David.
Ke Pag Feni Fel’ e Pi Felngin Got
20, 21. (a) Psalm 145:7-9 e be tolangnag e ngongol rok Jehovah ni rib fel’ nib peth ko mang e pi felngin? (b) Mang e rin’ e pi felngin Got nib fel’ ni kan weliy u roy ngak urngin e girdi’ nib t’uf Got rorad?
20 Rogon e n’en ni kad guyed, fa bin som’mon ko aningeg e verse ko Psalm 145 e be pi’ fan ngodad nib fel’ ni ngad pininged e sorok ngak Jehovah ko pi n’en nib peth nga rogon feni tolang nib mo’maw’ ni ngan nang fan. Verse 7 nge mada’ ko 9 e be tamilangnag feni sorok Got ya be weliy murung’agen e pi felngin nib fel’. I yon’ David e tang ni gaar: “Bay ur weliyed murung’agen fanam fel’, mi yad tangnag murung’agem nri gab gol. I Somol e ba t’uf e girdi’ rok ma ma runguyrad, ba sowath ni nge damumuw ma yugu ma par nib t’uf e girdi’ rok. Ba fel’ e tin ni ma rin’ ngak urngin e girdi’, ma ma runguy urngin e tin ni ke sunumeg.”
21 Som’mon ke tamilangnag David felngin Jehovah ni fel’ ngak e girdi’ nge ba mat’aw—ni aram e gali felngin Got ni ke weliy Satan ni fare Moonyan’ murung’agen. Mang e ra rin’ e gali felngin ney ngak urngin e girdi’ nib t’uf Got rorad ma ra pared u tan e gagiyeg rok? Mog, rogon feni fel’ Jehovah ngak e girdi’ nge feni mat’aw rogon ni ma gagiyeg e ke felfelan’nag e piin ni be pigpig ngak ma arfan ni dabiyog ni ngar talgad i pining e sorok ngak. Maku, felngin Jehovah ni fel’ ngak e girdi’ e kan dag ngak “urngin e girdi’.” Yibe athapeg, ni re n’ey e ra ayuweg boor e girdi’ ni ngar kalgadngan’rad ma ra manged e piin ma liyor ku bin riyul’ e Got ko ngiyal’ ni dawori sowath.—Acts 14:15-17.
22. Uw rogon ni ke ayuweg Jehovah e pi tapigpig rok?
22 Maku ke tayfan David e pi felngin Got ni ir e ke tamilangnag u nap’an ni Ke “th’ab p’eowchen [Moses’] me non ni gaar: “Jehovah, Jehovah, e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.’” (Exodus 34:6, NW) Ma arfan, ni David e rayog ni nge yog ni gaar: “Jehovah e ba gol ma ba tarunguyey, ma gathi mmachreg ni ma yib e puwan’ ngak ma ri ma dag e t’ufeg nib yul’yul’.” Yugu aram rogon ni Jehovah e dabiyog ni taw e lem nga sorok, ma ma ta’fan e pi tapigpig rok nib girdi’ ma ma ayuwegrad u fithik’ e gol. Ri ma dag e runguy, mab m’agan’ ngay ni nge n’agfan e denen ko piin ni ke kalngan’ u daken e biyul ni maligach ni pi’ Jesus. Jehovah e ku gathi mmachreg ni ma yib e puwan’ ngak, ya bochan ke bing e kanawo’ ngak e pi tapigpig rok ni ngar gelgad ko thibngirad ni ra talegrad ndabiyog ni nga ranod nga fa bin nib biech e fayleng nib mat’aw.—2 Peter 3:9, 13, 14.
23. Mang felngin nib ga’ fan e gad ra weliy ko bin migid e article?
23 Be tolangnag David e t’ufeg rok Got nib yul’yul’. Tin riyul’ riy, tin ni ka ba’ ko Psalm 145 e be dag ko uw rogon ni be dag Jehovah e re felngin ney nge mang e ke rin’ e pi tapigpig rok nib yul’yul’ nbochan e t’ufeg rok nib yul’yul’. Pi n’en ney e yira weliy ko bin migid e article.
Uw Rogon ni Ngam Pi’ e Fulweg?
• Mang ngiyal’ ni bay nib fel’ ni rayog ni ngan pining e sorok ngak Jehovah “u lan reb e rran ni polo’”?
• Mang e pi n’en ni be dag nrogon feni sorok Jehovah ni dabi taw e lem ngay?
• Uw rogon ni nge ga’ e tayfan rodad ko liw rok Jehovah nib tolang?
[Picture on page 8]
Fapi galaxy u palpalth’ib e be micheg feni fel’ Jehovah
[Credit Line]
Courtesy of Anglo-Australian Observatory, photograph by David Malin
[Picture on page 10]
Uwrogon ni kan dag ni Jehovah e rib fel’ nib peth ku Jesus Kristus?