Tin Kan Micheg Nrayog Nim Pagan’um Ngay

PROFET rok Got ni Mikah e manang ni pi n’en kan micheg e ke yoor yay ni dabiyog ni ngan pagan’uy ngay. Pi rran u nap’an Mikah, e ki mada’ ko piin ni ri yad ba chugur e ku dabiyog ni nge gubin ngiyal’ mu um pagan’um ngorad ni yad ra rin’ e tin kar micheged. Ere ginangdad Mikah ni gaar: “Dabi mich u wan’um e tin ni be yog e en ni gimew bbuguli yoror ara pagan’um ngak e en ni gimew tafager. Mus ngak leengim ma ngam ayuw ko tin ni ga ra weliy ngak.”​—Mikah 7:5.

Ere pag Mikah e re ngiyal’ i n’eney nib kireban’ ni nge dabki mich u wan’ urngin e pi n’en ni yibe micheg? Danga’! I yog ni rib polo’ e pagan’ rok ko pi n’en ni ke micheg e Got rok, ni Jehovah. I yoloy Mikah ni gaar, “Machane gag e gu be tor ngak Somol. Bay ug par ni ke l’agan’ug ngak Got ma gu be sonnag, yi ir e bayi ayuwegneg; Got rog e bayi rungaag lungug.”​—Mikah 7:7.

Mang fan ni ba’ e re michan’ nem rok Mikah? Ya bochan nim nang ni Jehovah e gubin ngiyal’ ma ma rin’ e tin ke yog. Urngin ban’en ni ke mownag Got ngak e pi chitamangin Mikah ma ri de siy ni riyul’. (Mikah 7:20) Fani yul’yul’ Jehovah kafram e ir e ke pi’ urngin i fan ni nge mich u wan’uy ni ra rin’ e tini ke micheg boch ngaram.

“Dariy Taa Bugithin . . . Nde Lebug”

Bod rogon, ni manang Mikah, ni chuweg Jehovah piyu Israel ko sib u Egypt. (Mikah 7:15) Joshua, ni immoy u nap’an nni chuwegrad u Egypt, e i ta’ ir ngak e girdi’ rok ni piyu Israel ni nge michan’rad nga urngin e pi n’en ni ke micheg Got. U daken e mang? I puguran Joshua ngorad ni gaar, “Ri gimed manang nib fel’ rogon u fithik’ i gum’irchamed ngo fithik’ i lanin’med ni dariy taa bbugithin u fithik’ urngin fapi thin nib fel’ ni ke yog Jehovah ni Got romed ni de Lebug. Goo ke riyul’ u puluwmed. Dariy taab bugithin u fithik’ ni de lebug.”​—Joshua 23:14, New World Translation.

Piyu Israel e yad manang nib fel’ rogon ni Jehovah e boor ban’en ni ke rin’ ni fan ngorad ni yira ngat ngay. Ke lebuguy e n’en ni micheg ngak e chitamangirad ni Abraham ni ba’ madgun Got u wan’ ni piin pi fak e yad ra yoor ni bod e t’uf ma yad ra tafanay e binaw nu Kanaan. Ma ki yog Jehovah ngak Abraham ni piin pi fak e yad ra gafgow ko amith ni 400 e duw machane yad ra sul nga Kanaan u “lan e bin aningeg e mmfen.” Urngin e pi n’eney ni buch.​—Genesis 15:5-16; Exodus 3:6-8.

Piyu Israel e rib fel’ e thin ngorad ni ra bad nga Egypt ko pi rran ni nap’an fak Jakob ni pagel ni Josef. Me boch nga tomur riy ma piyu Egypt e ra tayedrad ngaur maruwelgad ni sib nib gel e gafgow ni un i tay ngorad, machane riyul’ e n’en ni micheg Got, u lan nap’an aningeg e mfen ni i mun daken e fel’ rogon rorad ni ka nap’an ni ra bad nga Egypt, pi cha’ ney ni pi fak Abraham e ni chuwegrad ko sib.a

Nap’an e bin migid e 40 e duw, miki yoor boch e mich ni gu’ yu Israel ni Jehovah e ri ma rin’ e tini ke micheg. Nap’an ni pi Amalekites ni ra chamgad ngak piyu Israel, ni dariy tapgin me cham Got ni fan ngak e girdi’ rok nge ayuwegrad. Me gamaneg e tin ba t’uf rorad ko tin nu fayleng ban’en u nap’an 40 e duw ni u ranod u daken e ted i yan me tomur riy me yan i ta’rad nga lan fagi Nam ni kan Micheg. Nap’an ni be sul Joshua nga i yaliy chapin e n’en i rin Jehovah ngak e piin pi fak Abraham ney, ma ra yog ni nge yog u fithik’ e michan’ ni nge gaar: “Dariy taa reb e pi n’en ni micheg u fithik’ fapi n’en nib fel’ ni micheg Jehovah ngak piyu Israel ni de ta’ nga tagil; urngin ni goo ke riyul’.”​—Joshua 21:45, NW.

Mu Ubung e Michan’ Rom Nga Daken e Pi N’en ni Ke Micheg Got

Uw rogon ma rayog nim ubung e michan’ rom nga daken e pi n’en ni ke micheg Jehovah, ni bod rogon ni rin’ Mikah nge Joshua? Uw rogon ni ga ma gelnag e pagan’ rom ngak boch e girdi’? Ngam nang urngin e tin nrayog nim nang u murung’agrad. Ni bod rogon, ni rayog ni ngam nang ko uw feni rayog nni pagan’uy ngorad ni aram rogon ni yad ba yul’yul’ i gay rogon ni ngara lebuguyed e tin kar micheged. Nap’an ni ra ga’ e tamilangan’ rom u rogorad, ma aram mi i mon’og rogon ni be gel e pagan’ rom ngorad. Ku rayog ni nga kum rin’ ni aram rogon ni fan ni ngam gelnag e michan’ rom ko pi n’en ni ke micheg Got.

Reb e kanawo’ ni rayog ni ngan rin’ e re n’eney e nga um fal’eg i lemnag e n’en ni kan sunmiy nge rogon e motochiyel ni be gagiyegnag. Pi scientists e kar ted e michan’ rorad nga daken e pi motochiyel ney, ni bod rogon e tin baaram ni be gagiyegnag kanawoen taareb e cell u fithik’ i dow e girdi’ ni ma ki’ nge l’agruw me bagayow me ki’ mar manged aningeg mi i yodorom i yan nge ni gaman trillion e cell ni ir e ke mang dowam. Rogon nib riyul’ riy, e fapi motochiyel ni be gagiyegnag rogon ngongolen ban’en nge gelngin u lan e palpalthib ni gaangin e thingari be’ nib Tangongliy e motochiyel ni dariy ban’en ni dabiyog rok e ir e ngongliy. Riyul’ ni rayog ni ngam pagan’um ko pi n’en ni ke micheg, ni ku bod ni kam pagan’um ko pi motochiyel ni be gagiyegnag e n’en ni ke sunmiy.​—Psalm 139:14-16; Isaiah 40:26; Hebrews 3:4.

U daken fare profet ni Isaiah, ni taabang ngiyal’ e ur moyew Mikah, riy e non Jehovah riy ni fanay rogon ngal’an e yafang ni ma chel nge rogon ni ma chel e ran ni yira ngat ngay ni nge dag rogon feni rayog ni ngan pagan’uy ko thin rok. Ra reb e duw meb e n’uw. Ni nge tarannag e but’ nge yog ni nge yung e girdi’ e awoch rorad ngar t’ared e tin keb riy. Rogon e re n’ey, e gaar Jehovah: “Thin rog e bod e ayis nge n’uw ni ma aw u lang nga but’ ya nge tarannag e but’; me ayuweg e woldug nge ga’; me yib awochngin ni nga ni kay. Ku aram rogon e thin ni ma yib u l’ugunag, ndabiyog ni nge dabi rin’ e tin ni ke m’ay i lemnag rog; ya ra rin’ urngin ban’en ni kug l’og ni nge rin’.”​—Isaiah 55:10, 11.

Riyul’ e Pi N’en ni Kan Micheg ko Paradis

Ngan fal’eg i lemnag e n’en kan sunmiy e rayog ni gelnag e michan’ ngak e ani Tasunmiy, machane ka ba’ ban’en ni ba t’uf ni faanra ga baadag ni ngam fil murung’agen fapi n’en ni kan micheg ni bang ko fare “thin ni yib u l’ugun [Got].” Ra ngan fil murung’agen e pi n’en kan micheg ney ni bochan ni nge yog ni mu tay e pagan’ rom nga daken, ma ba t’uf ni ngam fal’eg i gay mag lemnag e Thin rok Got ni kan thagthagnag ko fare Bible ni kan yoloy ni n’en nib m’agan’ Got ngay ko fayleng nge rogon ni be ngongol ngak e girdi’.​—2 Timothy 3:14-17.

Mikah ni profet e bay e pagan’ rok ko pi n’en ni ke micheg Jehovah. Boor e tin ke thagthagnag Got kan yoloy ni ba’ rom ni rayog ni nga um sap ngay ko tin immoy rok Mikah. Nap’an ni ra um poy e Bible ma ga fal’eg i lemnag fan, ma ku rayog ni ngam gelnag e michan’ rom ko lebug ni ra ta’ e pi n’en ni ke micheg Got. Pi n’en ni kan micheg ney e gathi kemus ni ri girdi’ ni yib rok Abraham ya urngin mit e girdi’. I micheg Jehovah ngak e re patriach ney ni ba’ madgun Got u wan’ ni gaar: “Bochan be’ ni owchem ma urngin e nam nu fayleng e rib mudugil ni bay ra taw’athgad ni bochan ni kam motoyil nga lingug.” (Genesis 22:18, NW) Gin th’abi ga’ fan ko fare “owchen,” ara be’ ni yib rok Abraham, e aram fare Messiah, ni Jesus Kristus.​—Galatia 3:16.

U daken Jesus Kristus, e bayi micheg Jehovah riy ni fapi taw’ath e goo nge yan ngak e girdi’ ni ma fol. Ma mang e ke micheg Got ni nge rin’ ko ngiyal’ ney ni gad bay? Mikah 4:1, 2, (NW) e be fulweg ko pi thin ni baaray ni kan yiiynag ni gaar: “Thingari bi m’ug ko tin tomuren e rran ni fare burey ko naun rok Jehovah e ri bayi fel’ rogon i ngongliy nga daken p’ebugul e pi burey, ma rib mudugil ni bay ni tolangnag nge e tolang ko nochi burey; ma ir e boor e girdi’ ni bayi yan ngay. Ma boor e nam nib mudugil ni bayi yan me gaar: ‘Mired, gimed e girdi’, nga darod nga talang nga daken e burey rok Jehovah nge fare naun ko fare Got rok Jakob; nge fonownagdad u murung’agen e pi kanawo’ rok, mu u darod ko pi kanawo’ rok.’”

Picha’ ni kar filed murung’agen e pi kanawo’ rok Jehovah e bay ra “pirdiiyed e sayden rorad ngar ngongliyed talin e maruwel riy ni ma gi’ e but’, mi yad yodoromnag e sarey rorad ngar ngonliyed e yar riy ni yima the’thab papa’ngin e woldug ngay.” Demtrug ban’en ni ra k’aring ni ngan lemnag e mahl e ra yan nge chuw. Dabi n’uw nap’an me sug e fayleng ko girdi’ ni yad ba yal’uw, ma dariy be’ ni ra k’aring e daada’ ko marus ngorad. (Mikah 4:3, 4) Arrogon, Thin rok Got e be micheg nu tan e gagiyeg ko Gil’ilungun u pa’ Jesus Kristus, ma ra chuweg Jehovah u fayleng urngin e piin ni yad ma diliiy e girdi’ nga but’.​—Isaiah 11:6-9; Daniel 2:44; Revelation 11:18.

Ki mus ngak e piin ni ku ur gafgowgad mar m’ad ni bochan e togopuluw ko girdi’ ngak Got e bayni fasegrad ni ba’ e athap rorad ni ngar pired u fayleng ni manemus. (John 5:28, 29) Satan nge pi kan nib kireb rok, ni yad ma gelnag e tin kireb, e bay ra chuwgad, ma wenegan e denen rok Adam e bay ni chuweg u daken e biyul ni maligach rok Jesus. (Matthew 20:28; Roma 3:23, 24; 5:12; 6:23; Revelation 20:1-3) Ma aram e ra uw rarogon e girdi’ ni ma fol? Gamanang, yira taw’athnagrad ko yafas ni manemus ni rib fel’ rogorad ni dariy e m’ar u daken e fayleng nib paradis!​—Psalm 37:10, 11; Luke 23:43; Revelation 21:3-5.

Pi n’eney e rib mudugil ni bogi n’en ni kan micheg ni rib pag feni fel’! Machane rayog ni nge mich u wan’um? Arrogon rayog. Pi n’eney e gathi i micheg e girdi’ ni sana ba fel’ rogon e n’en ni yad be lemnag machane dariy gelngirad ni ngar lebuguyed. Ya bogi n’en ni ke micheg fare Got ni Th’abi Tolang, ni dabiyog ni nge ban ma “de sowath i ta’ fan e pi n’en ni ke micheg.” (2 Peter 3:9; NW, Hebrews 6:13-18) Rayog ni ngam pagan’um ni polo’ nga urngin e pi n’en ni kan micheg ni bay u Bible, ya gin ra bad riy e yib rok “Jehovah fare Got ko tin riyul’.”​—Psalm 31:5, NW.

[Footnote]

[Blurb on page 6]

“Dariy taa bugithin u fithik’ urngin fapi thin nib fel’ ni ke yog Jehovah ni Got romed ni de ta’ nga tagil’.”​—JOSHUA 23:14

[Pictures on page 4, 5]

Jehovah e ta’ nga rogon e tin ke micheg ngak yu Israel ko fare Red Sea ngo daken e ted i yan

[Pictures on page 7]

Ke lebuguy Jehovah e n’en ni ke micheg ngak Abraham. Owchen, Jesus Kristus, e ra fek e taw’ath i yib ngak e girdi’