Bay U Darod U Tan Fithingan Jehovah Ni Dariy N’umngin Nap’an!
“Bay u Darod . . . u tan fithingan Jehovah ni Got rodad nde mudugil n’umngin nap’an, ara manemus.”—MIKAH 4:5, NW.
1. Mang e thin ni kan pi’ ni bay ko Mikah guruy ni 3 nge mada’ ko 5?
BAY ban’en ni yog Jehovah ngak e girdi’ rok, me fanay Mikah ni profet rok ni nge yodor. M’agan’ Got ngay ni nge gechignag e girdi’ ni ma rin’ e kireb. I gechignag piyu Israel ya bochan kar digeyed e tin riyul’. Machane bay e felfelan’ riy, ya ra taw’athnag Jehovah e piin ma yan u tan fithingan. Pi thin ney e rib tamilang ko guruy ni 3 nge mada’ ko 5 ko yiiy rok Mikah.
2, 3. (a) Fapi tayugang nu Israel e susun mang e ngara daged felngin, machane ri mang e baga’ ni yad ma rin’? (b) Uw rogon ni ngam weliy e thin ni be yip’ fan ban’en ni kan fanay ko Mikah 3:2, 3?
2 Fare profet rok Got e yog ni be gaar: “Pi pilung rok Jacob, nge piin ma yog e thin ko ulung rok piyu Israel, wenig ngomed, mu motoyilgad. Gathi maruwel romed ni ngam nanged murung’agen e tin nib mat’aw?” Arrogon, susun eram e maruwel rorad, machane mang e riyul’ ni yad ma rin’? Yog Mikah ni gaar: “Gimed e piin ni gimed be fanenikay e tin nib fel’ ma kam adaged e tin nib kireb, ma kam fathiyed e yalach ko girdi’ ma kam l’ufed e ufin ni immoy nib peth ko yil rorad; ma gimed ni ku kam lunguyed e ufin ko girdi’ rog, ma kam fathiyed e yalach rorad, ma gimed be t’et’ar e yil rorad, gimed be th’eth’ab e yil rorad ni ngan tay nga th’ib ni bod e ufin ni bay u lan e th’ib.”—Mikah 3:1-3, NW.
3 Mog, fapi pilung e yad be magawonnag e piin nib gafgow ndariy ban’en ni ra ayuwegrad! Fanathin ni kan fanay uroy e mmom rok e piin ni ke rung’ag e thin rok Mikah ni ngar nanged fan. Nap’an ni fare saf ni kan li’ yibe n’en ni ngan lith, ma som’mon e ngan fathiy e yalach u dow ma ngan t’et’ar e yilen. Yu ngiyal’ ma ngan bilig e yil ni nge yog ni ngeb e pi n’en bay u lan e yil nga but’. Min ta’ e ufin nge yil nga lan ba th’ib nib ga’ ngan lith, ni bod e n’en ni ke yog Mikah. (Ezekiel 24:3-5, 10) Rib puluw e re fanathin ney nga feni gel e gafgow ni be tay e pi ta yog e thin ni yad ba kireb ngak e girdi’ u nap’an Mikah!
Baadag Jehovah ni Ngad Daqed e Ngongol nib Mat’aw
4. Mang e n’en ba thil ni bay u thilin Jehovah nge fapi tayugang rok piyu Israel?
4 Ri bay e thil u thilin Jehovah ni ba Ta Chugul Saf ni ta runguyey nge fapi ta yog e thin nu Israel. Bochan dara maruweliyed e ngongol nib mat’aw, ma aram fan de yog rorad ni ngar rin’ed e maruwel rorad ni ngara ayuweged e ulung. Tin ni kar rin’ed, e kar siingad ngak fapi saf ni be yip’ fan ban’en, ma dar daged e ngongol nib mat’aw ngorad ma kar tayed yad nga fithik’ e “ngongol ni ma puog e racha’,” ni rogon ni yog ko Mikah 3:10 (NW). Mang e gad ra fil ko re magawon ney?
5. Mang e baadag Jehovah ni nge rin’ e piin ni ma yog e thin ko girdi’ rok?
5 Baadag Got ni piin ni ma yog e thin ko girdi’ rok e nge maruweliy e ngongol nib mat’aw ni fan ngorad. Ireray e n’en ni gad ma guy ni be buch ko pi tapigpig rok Jehovah e ngiyal’ ney. Maku, ba puluw e re n’ey ko Isaiah 32:1, (NW) ma rayog ni ngad beeged ni gaar: “Am sap! Reb e pilung e ra gagiyeg ni nge dag e ngongol nib mat’aw; ma fapi fak e pilung, e ra gagiyeg ni nge dag e ngongol nib yaluw.” Machane, u nap’an Mikah, ma mang e gad be pirieg? “Piin ma fanenikay e tin nib fel’ nge piin ni kar adaged e tin nib kireb” ma ma par ni ma kirebnag e tin nib yaluw.
Meybil rok Mini’ e Kan Fulweg Taban?
6, 7. Mang e n’en nib ga’ fan ni kan tamilangnag ko Mikah 3:4?
6 Rayog ni nge athapeg e girdi’ u nap’an Mikah ni bay ra fel’gad u wan’ Jehovah? Ri danga! Mikah 3:4 (NW) e be yog ni gaar: “Bayra ninged e ayuw ngak Jehovah, machane dabi fulweg lungurad. Ma ra mithag owchen rorad ko re ngiyal’ nem, nrogon e tin nib kireb ni kar rin’ed.” Be tamilangnag e re n’en ney taaban’en ni rib ga’ fan.
7 Dabi fulweg Jehovah taban e meybil rodad nfaanra yig gad ma rin’ e denen. Ri aram rogon ni faanra l’agruw mit e ngongol ni gad ma dag, ma gad ma mithag e tin nib kireb ni gad ma rin’ ma gad be dake gad be pigpig ku Got u fithik’ e yul’yul’. Rogon e thin ni bay ko Psalm 26:4, me yon’ David e tang riy ni gaar: “Da gu par u fithik’ e girdi’ ni ma lifith l’ugun; ma piin ni ma mithag ko yad bod e mang e da gu wan nga fithik’rad.” Ma ri dabi fulweg Jehovah taban e meybil rok e piin ni dar folgad ko Thin Rok ni lem rorad!
Kan Pi’ e Kan ni Thothup Rok Got Ngorad
8. Fapi profet ni googsur u nap’an Mikah e kan ginangrad ko mang?
8 Ri ma k’aring e kireban’ e ngongol ni ma dag e pi tayugang rok piyu Israel! Fapi profet ni googsur e kar magawonnaged e girdi’ rok Got ko tirok Got ban’en. Fapi tayugang nib siin e kar tolulnaged e “Gapas!” machane tin riyul’ riy e yad be thothupnag e mahl ni fan ngak e en ni dabi pi’ ban’en ngorad ni ngar ked. “Arfan,” ni yog Jehovah, “nep’ e ra mang biromed, ma dab kun piliyeg e changar romed; ma gimed ra par u fithik’ e lumor, ma dabkum yiiynaged ban’en. Ma ra aw e yal’ ngak e pi profet, ma fare rran e thingari par nib lumor u puluwmed. Ma piin ni ma pig e changar rok nge guy ban’en e ngar tamra’gad. Ma ra upunguyed e bulduy rorad.”—Mikah 3:5-7a, (NW).
9, 10. Mang e be yip’ fan fare n’en ni ‘ngan upunguy e bulduy,’ ma mang fan ndariyfan ni nge rin’ Mikah ban’en ni aram rogon?
9 Mang fan ni ngan “upunguy e bulduy”? Ireray e n’en ni ma rin’ e girdi’ nib kireb u nap’an Mikah nbochan kar tamra’gad. Ma picha’ nem nib kireb e susun ngar tamra’gad. “Ya dariy e fulweg ni pi’ Got,” rogon ni ur lemnaged. (Mikah 3:7b) Dabi motoyil Jehovah ko meybil ni ma ta’ e en nib tolngan’ mab kireb.
10 Dariy fan ni nge “upunguy” Mikah e bulduy rok.” De tamra’. Ke fulweg Jehovah taban e pi meybil rok. Mu yaliy e Mikah 3:8, (NW) fare profet nib yul’yul’ e be yog ni gaar: “Maku reb, e gag e kan suguyeg ko kan ni thothup rok Jehovah, nge tin nib yaluw nge gelngin nib gel.” Kari pining Mikah e magar u n’umngin nap’an ni i machib u fithik’ e yul’yul’, me par ni “rib gel gelngin, u daken e kan ni thothup rok Jehovah”! Ma re n’ey e pi’ gelngin ni nge “yog ngak Jakob e togopuluw ni ma tay ma nge yog ngak piyu Israel e denen rorad.”
11. Uw rogon ni kan pi’ gelngin e girdi’ ni ngar machibnaged e thin rok Got?
11 Ba t’uf rok Mikah gelngin ni kab gel ko gelngin e girdi’ ma aram rayog ni nge machibnag e thin rok Got ni murung’agen e pufthin ni ra tay ni rib gel. Kan ni thothup rok Jehovah, ara gelngin Got nib gel, e baga’ fan. Ma uw rogon gadad? Rayog ni ngad mu’naged e maruwel rodad ko machib ni ke mus nfaanra pi’ Jehovah gelngidad u daken e kan ni thothup rok. Rib m’ay fan e machib ni gad ra ta’ nfaan ra ud denengad ni lem rodad. Ra aram rogon ma dabiyog ni nge fulweg Got taban e meybil rodad ni nge pi’ gelngidad ni fan ni ngad rin’ed e maruwel rok. Ba mudugil ni dabiyog ni ngad machibnaged e pufthin ni ra tay e Chitamangidad nu tharmiy nfaanra dabi par “fare kan ni thothup rok Jehovah” u dakendad. U daken e pi meybil ni kan rung’ag ngu daken e ayuw ko kan ni thothup, ma rayog ni ngad weliyed e thin rok Got ni dabda rusgad ni bod Mikah.
12. Mang fan ni pi gachalpen Jesus kakrom e i yog rorad ni ‘nguura machibnaged e thin rok Got ni dabra rusgad’?
12 Dabisiy ni keb ngan’um e chep ni bay ko Acts 4:23-31 (NW). Mu susunnag ni gur bagayad e pi gachalpen Jesus ko fa bin som’mon e chibog. Piin tatogopuluw e kar athamgilgad ni ngar taleged e pi gachalpen Kristus ni dabkuura wereged e machib. Machane picha’ ney nib yul’yul’ e kar meybilgad ngak Somol rorad nth’abi tolang, kar wenignaged ngak ni lungurad: “Jehovah, mu tiyan’um ko thin rorad ni be magawonnagey, ma ga pag e pi sib rom ngaur ululgad nguura machibnaged e thin rom ni dabra rusgad.” Ma angin nib riy? Nap’an ni kar wenignaged ku Got, ma gin’en ni kar muulunggad nga taabang riy e rur, ma yad gubin ni goo ra suggad ko kan ni thothup mi yad machibnag e thin rok Got ni dar rusgad. Ere sana ngada sapgad ngak Jehovah u fithik’ e meybil ma ngad pagedan’dad ko ayuw rok u daken e kan ni thothup u nap’an ni gadad be lebuguy i wereg e machib.
13. Mang e ra buch u Jerusalem nge Samaria, ma mang fan?
13 Mu fal’eg i lemnag biyay u nap’an Mikah. Rogon ni yog ko Mikah 3:9-12, e fapi pilung ni ta denen e kar pufthinnaged e girdi’ yad be fek pulowon e sasalap, ma fapi prists e kar filed ban’en ngorad ni bay pulwon, ma pi profet ni googsur e kar yiiynaged ban’en nbochan e nge yog e salpiy. Arfan ni Got e ke motochiyelnag ni Jerusalem ni ir e baga’ ko nug nu Judah, ni “nge mang ba ulung i naun ni ke puth”! Bochan ku ke garer e liyor ni googsur nge gafarig ni kireb i yan u Israel, min thagthagnag ngak Mikah ni nge ginangey nra gagiyegnag Got ni Samaria e ra bod “ba ulung i naun ni ke puth.” (Mikah 1:6) Tin riyul’ riy, ma ke magey fare profet nib fas me guy ni pi salthaw nu Assyria e kar gotheyed yu Samaria ko 740 B.C.E. nrogon ni kan yiiynag. (2 Kings 17:5, 6; 25:1-21) Ba tamilang ni pi thin ney nib gel nib togopuluw ko piyu Jerusalem nge piyu Samaria e rayog ni ngan wereg ni kemus nu daken gelngin Jehovah.
14. Uw rogon ni ke lebug fare yiiy ni bay ko Mikah 3:12, ma mang e ra rin’ ngodad e re n’em?
14 Ri dabiyog rok Judah ni nge mil rok e pufthin ni ra yib rok Jehovah nib gel. Rogon ni ke lebug e yiiy ni bay ko Mikah 3:12, ma Zion e ra “bod bangi ted ni kan gi’.” Rogon ni gad be guy e chiney ni gad bay ko fa bin 21 e chibog, e gad manang ni ke buch e pi n’en ney ko ngiyal’ ni gothey piyu Babylon e nam nu Judah nge Jerusalem ko duw ni 607 B.C.E. Ke buch e re n’ey u tomren ni ke yan boor e duw ni ke yiiynag Mikah, machane ke mudugil u laniyan’ ni bay yib. Ba mudugil ni ku aram rogon gadad ni kari pagan’dad ni re m’ag ney nib kireb e bayi m’ay ko fare “rran rok Jehovah” ni kan yiiynag—2 Peter 3:11, 12.
Ke Yal’uweg Jehovah Boch Ban’en
15. Uw rogon ni ngam weliy fare yiiy ni bay ko Mikah 4:1-4 ko thin rom?
15 Gad ra sap nga tomur, ma rayog ni ngad guyed ni ku ke machibnag Mikah reb e thin ko athap ni ra pug lanin’uy. Thin ni ri be pasignagan’uy ni gad ra pirieg ko Mikah 4:1-4! Bang riy e yog Mikah (NW) ni be gaar: “Thingari buch ko tin tomren e rran ni fare burey ko naun rok Jehovah e ra par ni rib mudugil u daken urngin e pi burey, mab mudugil ni yira tolangnag nge tolang ko pi burey nib achichig; ma bay yib e girdi’ ngay ni bod e lul’. . . . Mab mutrug ni ra mang tapuf oloboch u fithik’ e girdi’ ni yoor, ma bayi yal’uweg boch ban’en ni bay rogon ko fapi nam nib gel mab palog nga orel. Ma sayden rorad e bay ra pirdiiyed ngar ngongliyed talin e maruwel riy ni ma gi’ e but’, mi yad yodoromnag e sarey rorad ngar ngongliyed e yar riy ni yima th’eth’ab papa’ngin e woldug ngay ni bochan e nge tamilang l’ugun. Pi nam e dab kur sulod ngar mahlgad bayay, ara ra fal’eged rogorad bayay ni ngar mahlgad. Ma ri bayra pared nga but’, nra bagayad ma bay u tan e grapes rok ngu tan e gek’iy ni fig, ma dariy be’ nra k’aring e marus ngorad ngar dada’gad; ya bochan l’ugun Jehovah ko fapi salthaw e ke yog e pi thin ney.”
16, 17. Uw rogon ma thin ni bay ko Mikah 4:1-4 e ke lebug e chiney?
16 Mini’ e “girdi’ ni yoor” nge fapi “nam nib gel” ni yibe weliy uroy? Gathi yad e pi nam nge fapi am ko re fayleng ney. N’en nib math keru’ ngay, e fare yiiy e ba m’ag ko girdi’ ni be’ nge be’ nra yib ko fapi nam ni urngin ni ke taareban’rad ko pigpig nib thothup u lan e burey rok Jehovah ko liyor nib riyul’.
17 Rogon nib puluw ko yiiy rok Mikah, ma fare liyor ku Jehovah nib biech e ke chuchugur ni ngan rin’ u polo’ e fayleng. Ngiyal’ ney, ma girdi’ ni “rib fel’ u wan’rad e yafas ni manemus” e yibe fil ngorad kanawoen Jehovah. (Acts 13:48, NW) Ma pufthinnag Jehovah ma ma yal’uweg boch ban’en nib spiritual ni fan ko piin ke michan’rad ni kar yul’yul’gad ko Gil’ilungun. Bay ra mageygad nib fas ko “fare gafgow nib ga’” ni yad bang ko fare “ulung ni baga’.” (Revelation 7:9, 14) Bochan ni kar pirdiiyed e sayden rorad ngar ngongliyed talin e maruwel riy ni ma gi’ e but’, ma mus ko chiney e kar pared u fithik’ e pi mich rok Jehovah nge yugu boch e girdi’ nib gapas lanin’rad. Uw feni rib gel e fel’fel’an’ ni ngn par u fithik’rad!
Ke Mudugil e Lem ni Ngaun Yan u Tan Fithingan Jehovah
18. Mang e be yip’ fan ni nge be’ me ‘par u tan e grape nge fig rok’?
18 Ngiyal’ ney, ni ke upong e fayleng ko marus ni bod bangi manileng, ma gad be felfelan’ ni boor e girdi’ ni kar filed ban’en u murung’agen kanawoen Jehovah. Gad be athapeg ni nge yib e ngiyal’ nem ni ke chuchugur nap’an ni urngin e girdi’ nib t’uf Got rorad e dabkuura filed rogon ni ngar mahlgad machane bay ra pared u tan e grape rorad nge gek’iy ni fig. Baga ni yima yung e fig nga fithik’ e grapes. (Luke 13:6) Nge par be’ u tan e grape rok nge gek’iy ni fig e be yip’ fan e par nib gapas ma be mon’nog iyan nge par ni ba pagan’. Mus ko chiney, ma tha’ u thildad Jehovah e ma pi’ ngodad e lem nib gapas ma gad ba pagan’ ko tirok Got. Nap’an ni ra yib e par ni aram rogon u tan e gagiyeg ko Gil’ilungun, ma dabki yib e marus ngodad ma ri gad ba pagan’.
19. Mang e be yip’ fan ni ngan yan u tan fithingan Jehovah?
19 Rogon ni ngad fel’gad u wan’ Got me taw’athnagdad, e thingar darod u fithingan Jehovah. Kari weliy e re n’ey ko Mikah 4:5, (NW) ma fare profet e ke yog ni gaar: “Ra reb e nam ma yad be meybil ma yad be fol rok e birorad e kan, machane gadad e bay ud darod u tan fithingan Jehovah ni Got rodad ndariy n’umngin nap’an.” Darod u tan fithingan Jehovah e der yip’ fan ni goo nga dogned ni ir e Got rodad. Ka bay ban’en nib t’uf riy ni gathi kemus ni ngani un ko muulung ko Kristiano nge ngan machibnag e thin ko Gil’ilungun, nyugu aram ni aram e maruwel nib ga’ fan. Faanra gad be yan u tan fithingan Jehovah, ma kad ognaged gadad ngak ma gadad be athamgil ni ngad pigpiggad ngak u fithik’ e yul’yul’ nbochan rib t’uf rodad. (Matthew 22:37) Ma gadad ni gadad e pi tapigpig rok, e ke mudugil lanin’dad ni ngaud darod u tan fithingan Jehovah ni Got rodad ndariy n’umngin nap’an.
20. Mang e kan yiiynag ko Mikah 4:6-13?
20 Chiney mu tiyan’um ko yiiy ni bay ko Mikah 4:6-13. “Fare fak ni ppin nu Zion” e ba t’uf ni ngan pi’ “nga Babylon.” Ri aram e n’en ni ke buch rok piyu Jerusalem ko fa bin medlip e chibog B.C.E. Yugu aram rogon, ma yiiy rok Mikah e be dag ni tin ni ka ba’ e nge sul nga Judah, ma ngiyal’ ni ngan sulweg nga rogon u Zion ma ra guy Jehovah pi toogor rok ni ran bilbilig nge ngal’ ni ab.
21, 22. Uw rogon ni ke lebug e thin ni bay ko Mikah 5:2?
21 Boch ban’en ni ra buch nib tomgin e kan weliy u m’on ko Mikah guruy ni 5. Ni bod ni, ga ra tiyan’um ko n’en ni be yog ko Mikah 5:2-4, NW. Ke yiiynag Mikah ni fare Pilung ni Got e ke dugliy—ni en ni “ngiyal’ ni sum riy e aram ko som’mon”—ra yib u Bethlehem. Ra gagiyeg ni bod e ta chugul saf “u gelngin Jehovah.” Maku, re Pilung ney e ra ga’ l’ungun ni gathi kemus nu Israel, machane u “ga’ngin yang u fayleng.” Sana ke balyangan’ e fayleng ko mini’ facha’, machane gadad e ba tamilang ngodad.
22 Mini’ e cha’ nem nth’abi ga’ fan ni kan gargelnag u Bethlehem? Ma bayi “ga’ lungun u ga’ngin yang e fayleng”? I ir fare Messiah, i Jesus Kristus! Nap’an ni ke fith Herod nib Gilbuguwan ngak e pi prist nib tolang nge fapi scribes ko uw e kan gargelnag fare Messiah riy, kar pied e fulweg ni lungurad: “U Bethlehem nu Judea.” Ma karogned e thin ni bay ko Mikah 5:2. (Matthew 2:3-6) Ma boch e yu girdi’ e kar nanged murung’agen, ya bochan John 7:42 e be yog u murung’agrad ni gaar: “Gathi be yog fare babyor nib thothup ni fare Messiah e be’ ni owchen e ganong rok David, ma yira gargeleg u lan yu Bethlehem, ni fare binaw ni i par David riy?”
Riyul’ ni Ma Baudnag Laniyan’ e Girdi’
23. Mang e be buch e chiney nbochan ni ke lebug e thin ni bay ko Mikah 5:7?
23 Mikah 5:5-15 e be weliy murung’agen piyu Assyria ni ngeb ni nge k’aring e cham ma ra gelgad nib ngoch nap’an ma be yog ni Got e ra fulweg taban e kireb rok e pi nam ni dara folgad. Mikah 5:7 (NW) e micheg ni tin ni ka ba’ ko piyu Jew ni kar kalgadngan’rad e ngan sulwegrad nga taferad, machane pi thin ney e ku bay rogon ngodad e ngiyal’ ney. I yog Mikah ni gaar: “Girdi’ rok Jakob nra magey e ra bod e waangchal ni yib rok Jehovah u fithik’ e girdi’ ni yoor, ma ra bod e n’uw ni baga’ ni ke aw nga daken e woldug.” Re thin ney nib fel’ e be yip’ fan ban’en ni kan fanay ni fan ni ngan yiiynag ni girdi’ rok Jakob, ara Israel ni ke magey e ra mang taw’ath ni yib rok Got ngak e girdi’. Fare “yugu boch e saf,” ni bay e athap rorad u fayleng, e kar felfelan’gad ni ngar pigpiggad u taabang ni be un ngorad e girdi’ ni ke magey ko “fare Israel rok Got,” e ngiyal’ ney ni yad be ayuweg yugu boch e girdi’ ni nge baud lanin’rad ko tirok Got. (John 10:16; Galatia 6:16; Zefaniah 3:9) Re n’ey, e ban’en nib ga’ fan ni ngan fal’eg i lemnag. Gadad ni gadad e pi tamachib ko Gil’ilungun, ma gad gubin e ba t’uf ni ngada chaariyed e taw’ath rodad ni ri gad ma baudnag laniyan’ yugu boch e girdi’.
24. Mang e pin’en ni bay ko Mikah guruy ni 3 nge mada’ ko 5 ni keb ngan’um?
24 Mang e kam fil ko guruy ni 3 nge mada’ ko 5 ko yiiy rok Mikah? Sana boch ban’en ni bod ni: (1) Be tay Got nga laniyan’ e piin ni ma ayuweg e girdi’ rok e nguura daged e ngongol nib mat’aw ngorad. (2) Dabi fulweg Jehovah taban e meybil rodad nfaanra gad ma denen ni lem rodad. (3) Maruwel rodad ni ngan machib e rayog ni nge lebug nfaanra Got e ra gelnagdad u daken e kan ni thothup rok. (4) Rogon ni ngad fel’gad u wan’ Got, ma thingar ud darod u tan fithingan Jehovah. (5) Gadad ni gadad e pi tamachib ko Gil’ilungun, e thingarda chaariyed e taw’ath rodad ni gad ma baudnag laniyan’ e girdi’. Sana ka bay boch ban’en ni keb ngan’um ni ga baadag. Ku mang boch ban’en e gad ra fil ko re babyor ney ni bay e thin riy ni kan yiiynag? Bin migid e article e ra ayuwegdad ni ngad filed boch ban’en nib fel’ ni bay ko l’agruw e guruy ko Mikah ni ka ba’ ni yiiy rok ni ma gelnag e michan.
Uw Rogon ni Ngam Pi’ e Fulweg?
• Mang e baadag Got ni nge rin’ e piin ma yog e thin ko girdi’ rok?
• Mang fan ni baga’ fan e meybil nge kan ni thothup ni fan ko pigpig rodad ku Jehovah?
• Uw rogon ni ‘nga i yan e girdi’ u tan fithingan Jehovah’?
[Picture on page 11]
Rayog ni ngam weliy e fanathin ni yog Mikah u murung’agen reb e th’ib?
[Picture on page 14]
Nguuda lebuguyed e maruwel rodad ni ngan wereg e machib ni dabda rusgad ni bod Mikah