Mu Filed Ban’en Rok e Pi Profet—Mikah
1. Mang deer e dabisiy ni i lemnag Mikah, machane mang fan nde aw nib m’ay fan e machib ni i tay?
1 ‘Wuin e ra yib e tomur ko re m’ag nib kireb ney?’ Sana i lemnag Mikah e re deer ney u nap’an ni be weliy murung’agen e pufthin ni bayi tay Jehovah ko fare ganong nu Israel nge Judah. Yugu aram rogon ma de aw nib m’ay fan e machib ni i tay. Nap’an e duw ni 740 B.C.E., u nap’an ni kab fas Mikah me lebug e thin ni yog Jehovah nib togopuluw ngak yu Samaria. (Mik. 1:6, 7) Boch nga tomuren ko duw ni 607 B.C.E. min gothey yu Jerusalem. (Mik. 3:12) Uw rogon ni ngad folwokgad rok Mikah u nap’an ni gad be sonnag e ngiyal’ nra pufthinnag Jehovah e re fayleng ney?
2. Uw rogon nge mang fan nsusun e ngaud gum’an’niged gadad u nap’an ni gad be sonnag fare rran rok Jehovah?
2 Mu Gum’an’nigem: I yoloy Mikah ni gaar: “Gag e gu be tor ngak Somol. Bay ug par ni ke l’agan’ug ngak Got ma gu be sonnag, yi ir e bayi ayuwegneg; Got rog e bayi rung’ag lungug.” (Mik. 7:7) Machane, gathi i par Mikah ni be sonnag e tomur ndariy ban’en ni i rin’. Ya boor e maruwel ni i rin’ ni ir reb e profet rok Jehovah. Ku er rogodad nnap’an ni gad be sonnag e rran rok Jehovah, ma susun ni ‘pangidad e nge par nib thothup ma kad pied gadad nga pa’ Got.’ (2 Pet. 3:11, 12) Bochan ni ka be gum’an’ Jehovah u puluwdad ma aram fan ni ka bay e tayim nrayog ni nge kal e girdi’ ngan’rad ko kireb ni yad be rin’. (2 Pet. 3:9) Ere, susun ni ngad folgad ko fonow ni be pi’ e Bible ngad folwokgad ko pi profet rok Got ni ur gum’an’niged yad.—Jas. 5:10.
3. Mang fan ni susun e ngad weniggad ngak Jehovah ni nge pi’ gelngin nib thothup ngodad?
3 Nge Pagan’um nga Gelngin Jehovah: Yugu aram rogon nib mo’maw’ e maruwel ni i rin’ Mikah, ma i sap ngak Jehovah ni nge pi’ gelngin ni nge rin’ e re maruwel nem. (Mik. 3:8) Manang Jehovah nib t’uf gelngin rodad. Ere aram fan ni ke yog ngodad u lan e Bible ni ngad ninged gelngin. Ma pi’ gelngin e piin ni ke m’ay gelngirad ya nge yag nra lebguyed e pi n’en nib milfan ngorad ni fan ko pigpig ni yad be tay ngak. (Ps. 84:5, 7; Isa. 40:28-31) Ke buch e re n’ey rom, fa? Gubin ngiyal’ ni ga ma wenig ngak Jehovah ni nge pi’ gelngin nib thothup ni nge ayuwegem, fa?—Luke 11:13.
4. Uw rogon ni ngad folwokgad ko n’en ni rin’ Mikah?
4 N’umngin nap’an e yafas rok Mikah ni i par ni tin nib m’agan’ Got ngay e aram e n’en nib m’on u wan’. Ke dugliy u wan’ ni nge par nib yul’yul’ ni yugu aram rogon ni ke sug e ngongol nib kireb u tooben. Ku er rogodad ni yibe skengnag e yul’yul’ rodad ni gubin e rran. Ere, ngad athamgilgad ni ngaud “meybilgad ngak Somol ni Got rodad ma gadad be fol rok ndariy n’umngin nap’an.”—Mik. 4:5.