Mang E Baadag Jehovah Ni Ngada Rin’ed?

“Be mang e be ning Jehovah ngom ni ngam rin’ baadag ni ngam adag i rin’ e tin nib yal’uw ma nge t’uf rom e ngongol nib gol mu um par ni ga manang e tin rayog rom nrogon ni gimew be yan e Got rom u taabang?”​—MIKAH 6:8, NW.

1, 2. Mang fan ni boch e tapigpig rok Jehovah e ke mulan’rad, machane mang e rayog ni nge ayuwegrad?

VERA e ir reb e Kristiano nib yul’yul’ ni sogonapan 75 e duw ma ke m’ar. “Yu ngiyal’, rogon ni yog, me ulul ngay ni gaar, “e gu ma sap nga wen u winda rog mu guy e pi walageg ni pumoon nge ppin ni Kristiano ni yad be machib u mit e tabinaw i yan. Me yib e lu’ u owcheg ni gu be yor ya gu baadag ni nggu un ngorad, machane bochan e m’ar rog e ir e be magawonnag e pigpig rog ngak Jehovah.”

² Kaam rin’ ni aram rogon ba ngiyal’ fa? Ma riyul’ ni, urngin e girdi’ nib t’uf Jehovah rorad e yad baadag ni nga ranod u tan fithingan muur rin’ed e tin baadag ni ngara rin’ed. Machane, uw rogon nfaanra gad be war i yan, ma kad pilibthirgad, ara bay e tabinaw ni ke mil fan ngodad ni ngada ayuweged? Sana ra mulan’dad ya bochan ni ireray e pi n’en ni ra talegdad ma dabkiyog ni ngad lebuguyed urngin ban’en ni baadag gum’irchadad ni ngad rin’ed ko pigpig ku Got. Faanra aram rogodad, ma susun ni ngad lemnageg fapi thin ni bay ko Mikah guruy ni 6 nge 7 nib baga’ ni ra pi’ e athamgil ngodad. Gali guruy ney e be dag ni tin ni ta’ Jehovah nib t’uf ni ngan rin’ e bay fan ma ku rayog ni ngan rin’.

Uwrogon ni Ke Rin’ Got Ban’en Ngak e Girdi’ Rok

3. Uw rogon ni ma rin’ Jehovah ban’en ngak piyu Israel ni tatogopuluw?

³ Som’mon ma ngad guyed e thin ni bay ko Mikah 6:3-5 ma ngad tedan’dad ko uwrogon ni ke rin’ Jehovah ban’en ngak e girdi’ rok. Mu lemnag u nap’an Mikah ma piyu Israel e kar manged piin tatogopuluw. Yugu aram rogon, me non Jehovah ngorad u fithik’ e runguy ni gaar, “O gimed e girdi’ rog.” Me wenig ngorad ni gaar: “O gimed e girdi’ rog, wenig ngomed, dabmu pagedtalin.” Ma de yog ngorad e thin nib gel, ya ke athamgil ni nge taw nga gum’ircharad me fith reb e deer ni gaar, “Mang e kug rin’ ngomed?” Maku ke pi’ e athamgil nga lanin’rad ni “ngar nonad nib togopuluw” ngak.

4. Bochan e runguy ni dag Got ma susun mang e ke rin’ ngodad?

⁴ Rib fel’ e n’en ni dag Got ngodad ni gadad gubin! U nap’an Mikah me pining Got e girdi’ nu Israel nge Judah ni tatogopuluw ni gaar, “girdi’ rog” u fithik’ e runguy me non ngorad ni be yog fare bugithin ni “wenig.” Ere, ba tamilang ni thingarda daged e runguy nge gol nrogon ni gad ma rin’ ban’en ngak e piin ni yad bang ko ulung. Riyul’, ni boch e girdi’ e de mom ni nge taareban’rad, ara yad meewar ko tirok Got. Machane, faanra ba t’uf Jehovah rorad, ma gad ra adag ni ngada ayuweged yad ma ngada daged e runguy ngorad.

5. Mang e n’en nib ga’fan ni Mikah 6:6, 7 e be weliy murung’agen?

⁵ Bin migid, ma nga darod ko Mikah 6:6, 7, NW. Me fith Mikah boch e deer, ni gaar: “Mang e gu ra fek ni nggu sabaliy Jehovah? Mang e gu ra fek ni nggu siro’ ngak Got ni bay u lang? Gu ra sabaliy ni gu be fek reb e maligach ni kan urfeg, ni reb e fak e garbaw ni taareb e duw yangaren? Rayog ni nge felfelan’nag Jehovah bokum biyu e saf ni pumoon, nge bokum biyu e lul’ ni gapgep? Gu ra pi’ fakag ni pumoon ni bin nganni nbochan e togopulw ni kug ta’, ni fare woom’engin e yal rog nbochan e denen rog?” Danga’, dabiyog ni nge felfelan’nag Jehovah “bokum biyu e saf ni pumoon, nge bokum biyu’ e lul’ ni gapgep.” Machane bay taa ban’en nra fel’fel’an’nag. Mang e re n’en nem?

Nguuda Maruweliyed e Ngongol nib Mat’aw

6. Mang dalip ban’en ni baadag Got ni ngan rin’ ni kan dag ko Mikah 6:8?

⁶ Thin ni bay ko Mikah 6:8, (NW) e kada filed ko mang e baadag Jehovah ni ngad rin’ed. Fith Mikah ni be gaar: “Mang e ke ning Jehovah ngom ya baadag ni ngam rin’ e tin nib yal’uw ma nge t’uf e ngongol nib gol rom muum par ni ga manang e tin ni rayog rom ni gimew be yan e Got rom?” Fa dalip i n’ey ni dabisiy ni ngan rin’ e ba l’ag rogon nga rogon ni gad be thamiy ban’en, nge rogon ni gad ma lemang ban’en, nge rogon ni gad ma rin’ ban’en. Thingarda adaged ni ngada daged e pi felngin ney, ma ngada lemnaged ko uw rogon ni ngada daged, ma ngada maruweliyed rogon ni ngada daged e pi n’en nem. Ngad weliyed e dalip i n’en ney ni susun ni ngan rin’ ni reb nge reb.

7, 8. (a) Mang e be yip’ fan ni “ngan rin’ e tin nib yal’uw”? (b) Mang e tin ni de yal’uw ni ke garer i yan u nap’an Mikah?

⁷ “Ra ngan rin’ e tin nib yal’uw” ma be yip’ fan ni ngan rin’ e tin nib mat’aw. Rogon ni ma rin’ Got ban’en e aram e fol ko tin nib yal’uw. Machane girdi’ u nap’an Mikah, e gathi tin ba yal’uw e ur rin’ed, ya tin de yal’uw. Ni uw rogon? Mu tiyan’um ko thin ni bay ko Mikah 6:10. Bang ko tungun e re verse nem, e piin ta fol chuway e kan weliy ni yad be fanay e “fol ko ephah ni rib buchuw e yima ta’ ngay,” ni be yip’ fan, ni rib achichig. Ma verse 11 e ku ke yog ni kar fanayed “yungi fol nge thabthabel ni ngi i sasaliyebnag e girdi’ ko chuway”. Ma rogon ni yog ko verse 12, e yad ma “lifith l’ugun’rad.” Arfan ni, tin nde puluw e fol, nge tomalngin nde puluw, nge thin ni bay e sasalap riy e ke wer i yan u nap’an Mikah.

⁸ Ngongol nib kireb e gathi kemus ni immoy ko gin ni yima pi’ ban’en ni chuway riy. Maku yima rin’ u lan e court. Mikah 7:3 e be dag ni “fare fak e pilung e ma ning ban’en, ma en tapuf oloboch e ku ma rin’ e maruwel rok nbochan ni nge yog puluwon ngak.” Kan pi’ boch ban’en ngak e piin tapuf oloboch ni fan ni nga ra turguyed e kireb nga daken e piin dariy e n’en ni kar bucheged. “En nib gel gelngin,” ara en nib tolang e liw rok e ke un ko pi oloboch nem. Tin riyul’ riy, e be yog Mikah ni fare fak e pilung, nge en tapuf oloboch, nge en nib gel gelngin e “kar maruwelgad u taabang” ara kara yarmiyed e maruwel rorad nib kireb.

9. Mang e ke buch rok Judah nge Israel nbochan e tin de yal’uw ni ke rin’ e piin ni kireb?

⁹ Ngongol ni de yal’uw ni ma rin’ e pi tayugang ni kireb e ke ab ngak urngin e girdi’ nu Judah ngu Israel. Mikah 7:5 e be yog ni bochan ni daki gaman e tin ni ba yal’uw ma ke fek i yan ko pagan’ ni ke war u thilin l’agruw ni’ ni yow ma maruwel u taabang, nge l’agruw i fager, ni mus nga thilin e mabgol. Verse 6 e be dag nbochan e re n’ey ma ke aw ni girdi’ u lan e tabinaw ni pi fakey ni pumoon nge pi matam, nge pi matin, e ka ra dariyfannaged yad.

10. Ngiyal’ ney ni ke yoor e tin de yal’uw, ma uw rogon e ngongol ko Kristiano?

¹⁰ Ma uw rogon e chiney? Gathi gad ma guy e magawon ni aram rogon fa? Ni bod Mikah, ni ke liyegdad e ngongol nde yal’uw, ma dakuriy e pagan’, ma ke kireb e tha’ u thilin e girdi’ nge girdien e tabinaw. Yugu aram rogon, ni gadad e pi tapigpig rok Got ni gad be par ko re fayleng ney nib kireb, e dabda paged nifingin e re fayleng ney ni de yal’uw nge yan nga lan e ulung ko Kristiano. Tin gad ra rin’, e ngada athamgilgad ni ngad tolangniged kenggin e motochiyel ko yul’yul’, ma ngad daged e pi n’en ney ni polo’ ko yafas rodad ni gubin e rran. Tin riyul’ riy, e “ngada yul’yul’gad ko urngin ban’en.” (Hebrews 13:18) Gathi ra fel’ u wan’um ni faan gad ra rin’ e tin nib yal’uw ma ra yoor e taw’ath rodad ni angin ni gadad ba ke walag ni gad ma dag e bin riyul’ e pagan’ ni yima guy u fithik’dad?

Uwrogon ni Nge Rung’ag e Girdi’ “Laman Jehovah”?

11. Uw rogon ni ke lebug e thin ni bay ko Mikah 7:12?

¹¹ I yiiynag Mikah ni yugu aram rogon ni ke yoor e tin de mat’aw, ma urngin mit e girdi’ e rayog ni ngeb ngorad e falfalan’ ko tin ba yal’uw. Fare profet e ke yiiynag ni girdi’ u “urngin yang” ni ngar manged e piin ma liyor ku Jehovah. (Mikah 7:12) Chiney, rogon ni ke lebug e bin tomur ko re yiiy ney, ma gathi taareb e nam, ya girdi’ ni be’ nge be’ ko pi nam e ke fel’ rogonrad ko ngongol rok Got ni ba yal’uw ma de laniyan’. (Isaiah 42:1) Uw rogon ni ke riyul’ e re n’en ney?

12. Uw rogon ni kan rung’ag “laman Jehovah” e ngiyal’ ney?

¹² Bay e fulweg riy, mu tiyan’um ko bin som’mon e thin ni yog Mikah. Mikah 6:9 (NW) e yog ni gaar: “Laman Jehovah e be pong u lan e mach, ma en ni bay e gonop rok ni ma fanay e ngeb madgun fithingam ngak.” Uw rogon ma girdi’ ko urngin e nam e ra rung’ag “laman Jehovah,” ma uw rogon ni ba l’ag e re n’ey ko ngongol rodad nib yal’uw? Riyul’, ni girdi’ e ngiyal’ ney e dabi rung’ag laman Got. Machane, u daken e maruwel rodad ni gad ma wereg e machib u ga’ngin yang e fayleng, ma girdi’ ni demtrug ramaen dow nge urngin mit e par ko girdi’ e kara rung’aged laman Jehovah. Ma angin riy, e piin ke motoyil e ‘keb madgun fithingan Got ngorad,’ ma kari ta’fan. Ba tamilang ni gad be rin’ e tin nib mat’aw ngu fithik’ e t’ufeg ni gadad e pi tamachib ko Gil’ilungun nib pasig. Bochan ni kada filed fithingan Got ngak urngin e girdi’ ndemtrug ko mini’, ma aram e “gad be rin’ e tin nib yal’uw.”

Thingari T’uf e Ngongol nib Gol Rodad

13. Mang e bathil u thilin e t’ufeg nib yul’yul’ nge t’ufeg?

¹³ Bin migid, e ngada weliyed e bin l’agruw e n’en ni ngan rin’ ni yibe weliy ko Mikah 6:8. Baadag Jehovah ni “ngad t’ufeged e ngongol nib gol.” Fare bugithin ni Hebrew ni kan thiliyeg ni “gol” e ku kan thiliyeg ni “gol ni bay e t’ufeg riy” ara “t’ufeg nib yul’yul’.” T’ufeg nib yul’yul’ e ireray e ngongol ni ri ma lemnag yugu boch e girdi’, ni ma runguyrad. T’ufeg nib yul’yul’ e bathil ko fare felngin ni t’ufeg. Uw rogon? T’ufeg e bay boor ban’en nib muun ngay, ni rayog ni ngan fanay ko chugum nge lem. Ni bod ni, Thin nu Bible e be weliy murung’agen be’ nib “t’uf e tin ni bay u fayleng” rok.” (1 John 2:15) U yu pa’ i kanawo’, ma t’ufeg nib yul’yul’ e gubin ngiyal’ nib l’ag e girdi’ ngay, ni baga’ ni piin ni be pigpig ku Got. Ere Mikah 7:20, (NW) e be weliy murung’agen e “t’ufeg nib yul’yul’ ni kan pi’ ngak Abraham”​—ni en ni ke pigpig ku Jehovah Got.

14, 15. Uw rogon ni kan dag e t’ufeg nib yul’yul’, ma mang e mich riy ni be weliy e paragraph murung’agen?

¹⁴ Rogon e thin ni bay ko Mikah 7:18, be yog fare profet ni ke felfelan’ Got ko “t’ufeg nib yul’yul’.” U Mikah 6:8, e ka nog ngodad ni gathi kemus ni ngad daged e t’ufeg nib yul’yul’ ya ngarda t’ufeged e re felngin nem ni fel’ u wan’dad. Mang e kada filed ko pi thin nu Bible ney? Kan dag e t’ufeg ndariy e maruwar riy ya bochan gad baadag ni ngada daged e re n’ey. Ni bod Jehovah, ma ra felan’dad, ni ngad daged e t’ufeg nib yul’yul’ ngak e piin nib t’uf e ayuw rorad.

¹⁵ Chiney, ma re t’ufeg nib yul’yul’ ney e reb e pow ko girdi’ rok Got. Mu lemnag reb e n’en ni buch. Pul ni June ko duw ni 2001, ma reb e yoko’ ni tropical e ke yibnag boor e ran ni ke yib nga Texas, U.S.A., me kirebnag bokum biyu’ e naun, mab muun ngay e naun ko Pi Mich Rok Jehovah. Rogon ni ngan ayuweg e tin nib t’uf rok e pi walagrad ni Kristiano ni kar gafgowgad, ma sogonapan 10,000 e Pi Mich ni kar pied e tayim nge gelngirad ndariy pulwon. Ke pag baley e duw, ni dar talgad ko maruwel, ni kar fanayed e rran rorad, nge nep’, nge Sabado nge Madenom ni fan ni ngar toyed biyay 8 e Kingdom Hall ma ke pag 700 e naun rok e pi walag ni Kristiano. Piin ni dabiyog rorad ni ngar uned ko re maruwel ney e kar pied e ggan, nge tin nib t’uf, nge salpiy. Mang fan ni pi cha’ nem ni bokum biyu’ e Pi Mich e kar bad ni ngar ayuweged e pi walagrad? Bochan “ba t’uf e ngongol nib gol” rorad. Ma uw feni gel e felfelan’ riy ni ngan nang ni pi walagdad u ga’ngin yang e fayleng e yad ma dag e re t’ufeg nib yul’yul’ ney! Arrogon, rogon nib t’uf ni ngan dag e “t’ufeg nib yul’yul’”, e gathi ban’en nib tomal, ya bay e felfelan’ riy!

Mu Par ni Ga Manang e Tin ni Rayog Rom u Rogon ni Gimew Be Yan Got

16. Mang fanathin ni be ayuwegey ni ngari tamilang u wan’uy nib t’uf ni nge nang be’ e tin rayog rok u rogon ni nga ranow Got u taabang?

¹⁶ Bin dalip ban’en ni ngan rin’ e bay ko Mikah 6:8 (NW) ni aram e “mu par ni ga manang e tin ni rayog rom u rogon ni gimew be yan Got.” Biney e be yip’ fan ni ngad nanged e tin rayog rodad ma ngada pagedan’dad ku Got. Ngan dag rogon: Mu susunnag nib ngoch nap’an reb e bulyel ni be kol pa’ e chitamangin ni ke chichiiy pa’ rok u nap’an ni yow be yan u fithik’ e yoko’. Ri manang fare bulyel ni de gel gelngin, machane ke pagan’ ngak e chitamangin. Gadad e ku susun ni ngad nanged e tin rayog rodad machane ngada pagedan’dad ngak e Chitamangidad nu tharmiy. Uw rogon ma nge par ni bay e pagan’ rodad ni aram rogon? Reb e kanawo’ e, nguuda ted nga lanin’dad ko mang fan nib fel’ ni nguuda pared nib chuchugur ku Got. Be puguran Micah ngodad dalip ban’en ni: Jehovah e ir e ma Ayuwegdad, nge ir e ma Pow’iydad, nge ir e ma Yororiydad.

17. Uw rogon ni ke ayuweg Jehovah e girdi’ rok, me pow’iyrad, me yororiyrad kakrom?

¹⁷ Rogon e thin ni bay ko Mikah 6:4, 5, e yog Got ni gaar: “I gag e gu chuwegmed u Egypt.” Arrogon, Jehovah e ir e Ke Chuweg piyu Israel. Maku ke yog Jehovah ni gaar: “Gu pi’ Moses nge Aaron nge Miriam ni nguur pow’iyed gimed.” Kan fanay Moses nge Aaron nguur pow’iyew fare nam, ma Miriam e ir e ke pow’iy e piin ni ppin nu Israel kar churu’gad ni churu’ ni fan ni kan gel ko mahl. (Exodus 7:1, 2; 15:1, 19-21; Deuteronomy 34:10) Jehovah e ke pow’iyey u daken e pi tapigpig rok. U verse 5, i puguran Jehovah ngak fare nam nu Israel ni ke yororiyrad rok Balak nge Balaam ma ke yororiy piyu Israel u nap’an e bin tomur ko melikag ni kar ted ni kar tababgad u Shittim nu Moab nge mada’ ko Gilgal ko fare Binaw ni Kan Micheg.

18. Uwrogon ni rin’ Got e maruwel rok ni ir e Ma Ayuwegey, ma Ma Pow’iyey, ma Ma Yororiyey e ngiyal’ ney?

¹⁸ Nap’an ni gad be yan Got u taabang, ma ra ayuwegdad nge dabi gel ngodad e fayleng rok Satan, ma ma pow’iydad u daken e Thin rok nge ulung rok, ma ma yororiydad ni reb e ulung u nap’an ni keb e piin tatogopuluw ni nge magawonnagdad. Ere ri ba’ fan ni ngad chichiyed pa’dad u pa’ e Chitamangidad nu tharmiy u nap’an ni gadad be yan u taabang u nap’an e yay ntomur e melikag rodad u fithik’ e yoko’ ngadarod nga bang ni kab ga’ ko fare Binaw ni Kan Micheg kakrom​—ni aram e fayleng rok Got nib biech mab mat’aw.

19. Mang e kanawo’ nib l’ag rogon ni gad manang e tin rayog rodad ko rogon ni gad manang e gin ni ngad mus gad riy?

¹⁹ Ra gad ra nang e tin rayog rodad u rogon ni gadad be yan Got u taabang ma ra ayuwegdad ni ngada yaliyed e par rodad nrogon. Riyul’ ni aram rogon ya bochan ni gad manang e tin rayog rodad e ba muun ngay ni gad manang e gin ni da musgad riy. Sana bochan ni kad pilibthirgad ara bochan e m’ar rodad ma ke mudugil e tin rayog ni ngad rin’ed ni fan ko pigpig ku Jehovah. Machane, dabda paged nge mulan’dad nbochan e re n’ey, ma arfan nib t’uf ni ngada ted nga lanin’dad ni ra fel’ u wan’ Got e maruwel nge maligach ni ngad pied ngak ‘nrogon e tin nrayog rodad ni ngad pied, ma gathi tin ndariy rodad.’ (2 Korinth 8:12) Tin riyul’ riy, e baadag Jehovah ni ngada pigpiggad ngak u polo’ e yafas rodad, ni ngada rin’ed e tin rayog rodad. (Kolose 3:23) Nap’an ni gad ra rin’ urngin ban’en nrayog rodad ko pigpig ngak u fithik’ e yul’yul’ ngu fithik’ e pasig, ma ra flaabnagdad Got.​—Proverbs 10:22.

Rogon ni Nge Yog ni Nga Un Son e Ma Yibnag e Taw’ath

20. Mang e gad ra nang ma ra ayuwegdad ni ngada daged e lem ni nguuda songad ni bod Mikah?

²⁰ Bochan e taw’ath ni pi’ Jehovah ngodad e ra k’aringdad ni ngad folwokgad ko ngongol rok Mikah. Yog ni gaar: “Bay ug par ni ke l’agan’ug ngak Got ma gu be sonnag, yi ir e bayi ayuwegneg.” (Mikah 7:7) Uw rogon ma pi thin ney e bay rogon ko tin ni baaray ni nguuda pared ni gad manang e tin rayog rodad u rogon ni gad be yan Got u taabang? Faanra bay e lem rodad ni rayog ni ngaun son, ara yiba gum’an’, ma ra ayuwegdad ni dabi mulan’dad ni bochan e dawori yib e rran rok Jehovah. (Proverbs 13:12) Tin riyul’ riy, e gadad gubin e gad be athapeg ni ngeb e tomur ko re fayleng nib kireb ney. Machane, gubin e wik ma bokum biyu’ e girdi’ ni kefin ra tababgad ni nguu ranod Got u taabang. Gad ra nang e re n’em ma ra ayuwegdad ni ngad daged e lem ni nguun son. Reb e Mich ni ke pigpig ku Got nib n’uw nap’an e ke yog ni gaar: “Ra gu lemnag ngal’an ni kug un ko machib ni ke pag 55 e duw, ma kari tamilang u wan’ug ni dariy ban’en ni kug adbey nbochan kug sonnag Jehovah. N’en nib thil riy, e ke baud lanin’ug ko boor ban’en ni ma buch rog ni ma k’aring e kireban’.” Ke buch rom ban’en ni aram rogon fa?

21, 22. Uw rogon ni ke lebug e thin ko Mikah 7:14 e ngiyal’ ney?

²¹ Gad ra yan Jehovah u taabang ma dariy e maruwar riy ni ra fel’ rogodad. Rogon e thin ni bay ko Mikah 7:14, be taareb rogonnag Micah e girdi’ rok Got ko fapi saf ni yad be par nib pagan’rad u bang ni bay e en ni ma gafaliyrad riy. Rogon ni kari lebug e re yiiy ney e chiney, ma tin ni ka ba’ ko Israel nib spiritual nib muun ngay fare “yugu boch e saf” e kar pirieged e pagan’ ya ba’ rorad e En Ta Chugul saf nib pagan’rad ngak, i Jehovah. Yad ma par ni “goo yad u fithik’ e gerger​—u lukngun e gin’en ni bay boor e woom’engin riy,” ni aram e yad be par nib dar ko re fayleng ney nib sug ko wagey nge riya’ ni be gel iyan.​—John 10:16; Deuteronomy 33:28; Jeremiah 49:31; Galatia 6:16.

²² Girdi’ rok Jehovah e be mon’og iyan rogon ni ku kan yiiynag ko Mikah 7:14. Be weliy murung’agen e pi saf rok Got, ara girdi’, e yog Mikah ni gaar: “Mu pagrad ngar ked e pan u Bashan ngu Gilead.” Ni bod ni fapi saf e kara ked boch e pan u Bashan nge Gilead ni but’ riy e ba yong’ol ma ke yoor e saf iyan, ere girdi’ rok Got e chiney e kar mon’oggad ko tirok Got ban’en​—ni aram e ku reb e taw’ath ngak e piin ni yad manang e tin nrayog rorad u rogon ni yad be yan Got u taabang.​—Numbers 32:1; Deuteronomy 32:14.

23. Mang e gad ra fil ko n’en ni kada weliyed ko Mikah 7:18, 19?

²³ U Mikah 7:18, 19, (NW) ma fare profet e ke tamilangnag ni baadag Jehovah ni nge n’agfan ko piin ni kar kalgadngan’rad. Ma Mic 7 verse 18 e be weliy ni “ma n’ag Jehovah fan” e denen. Rogon ni yog ko Mic 7 verse 19, ra pi’ Got e denen “nge yan i par nga t’ay e rigur.” Mang e reb e ban’en nrayog ni ngad filed u roy? Rayog ni ngad fithed gadad ko gad be folwok rok Jehovah fa. Gad ma n’agfan e denen ni ke rin’ yugu boch e girdi’ ngodad? Nap’an ni ngar kalgadngan’rad ma ra athamgilgad nge fel’ thildad biyay, ma mutrug ni gad baadag ni ngada boded Jehovah ni baadag ni ngari n’agfan e denen ndariy n’umngin nap’an.

24. Uw rogon ni ke fel’ rogom ko yiiy rok Mikah?

²⁴ Uw rogon ni ke fel’ rogodad ko thin ni kad weliyed u murung’agen e yiiy rok Mikah? Ke puguran ngodad ni ke pi’ Jehovah e athap nib riyul’ ngak e piin ni be yib ngak. (Mikah 2:1-13) Kan pi’ e athamgil nga lanin’dad ni ngad rin’ed urngin ban’en nrayog rodad ni ngada mon’nognaged e liyor nib riyul’ ma aram e rayog ni nga darod Got u taabang ndariy n’umngin nap’an. (Mikah 4:1-5) Ma kan micheg ngodad ni demtrug e magawon ni ra yib, ma rayog ni ngad rin’ed e tin baadag Jehovah ni nguuda rin’ed. Arrogon, yiiy rok Mikah e riyul’ ni be gelnagdad ni nguu darod u tan fithingan Jehovah.

Uw Rogon ni Ngam Pi’ e Fulweg?

• Rogon ni yog ko Mikah 6:8, mang e baadag Jehovah ni ngada rin’ed?

• Mang e tin nib t’uf rodad nfaan “gad ra rin’ e tin nib yal’uw”?

• Uw rogon ni ngada daged “nib t’uf e ngongol nib gol rodad”?

• Mang e ba muun ngay ni ‘nge par be’ ni manang e tin ni rayog rok nrogon ni yow be yan Got u taabang’?

[Pictures on page 17]

Yugu aram rogon ni rib kireb e par ko girdi’ u nap’an Mikah, ma ke rin’ e tin ni ta’ Jehovah chilen ngak ni susun ni nge rin’. Maku rayog rom

[Picture on page 19]

Mu rin’ e tin nib yal’uw ma ngam machibnag urngin mit e girdi’

[Pictures on page 19]

Mu dag nib t’uf e ngongol nib gol rom ma ngam pi’ e tin nib t’uf ko yugu boch e girdi’

[Picture on page 19]

Mu rin’ e tin nrayog rom ma ga nang e tin ndabiyog ni ngam rin’