Nge Michan’uy Ko Thin Rok Got Ni I Weliy E Pi Profet!

“Aram fan ni kari pagan’mad ko thin rok Got ni i weliy e pi profet.”—2 PETER 1:19.

1, 2. Mang e bin som’on e yiiy ni kan yoloy, ma mang reb e deer ni kan fith?

JEHOVAH e Ir i Yib Rok fa bin som’on e yiiy ni kan yoloy nga babyor. Tomren ni ke denen Adam nge Efa, me yog Got ngak fare porchoyog, ni gaar: “I gur nge fare pin e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif u ay.” (Genesis 3:1-7, 14, 15) Ke yan boor e chibog ma fin yibe nang fan e pi yiiy nem nrib tamilang.

² Re yiiy nem ni bin som’on e ke pi’ e athap nib riyul’ ngak e girdi’ ni tadenen. Munmun ma thin nu Bible e ke tamilangnag ni Satan ni fare Moonyan’ e ir “fare porchoyog ni ke kakrom.” (Revelation 12:9) Machane mini’ fare fak ara Owchen ni kan micheg?

Ngan Gayiy fare Owchen

3. Uwrogon ni dag Abel ni ke mich e bin som’on e yiiy uwan’?

³ De taabrogon ko chitamangin, ma Abel ni ir be’ nib mat’aw e ke mich e bin som’on e yiiy uwan’. Baga’ ni ke nang Abel ni ba t’uf ni ngan puog e racha’ ni fan ni ngan upunguy e denen. Ere michan’ rok e ir e ke k’aring ni nge pi’ e maligach ni gamanman min pirieg ni ffel’ e re n’em uwan’ Got. (Genesis 4:2-4) Machane, ka be par nib mith ko mini’ fare Owchen ni kan micheg.

4. Mang e i micheg Got ku Abraham, ma re n’ey e be dag e mang u murung’agen fare Owchen ni kan micheg?

⁴ 2,000 e duw u tomuren e rran rok Abel, me micheg Jehovah ngak Abraham ni patriarch ni gaar: “Ri bay gu fal’eg waatham ma ri bay gu yoornag e piin ni owchem ni bod e pi t’uf u lan e lang . . . Ma u daken owchem e ra fel’ waathan gubin e nam u fayleng riy.” (Genesis 22:17, 18, New World Translation) Pi thin nem e ba m’ag ngak Abraham nga rogon ni ke lebug fa bin som’on e yiiy. Pi n’en nem e be micheg ni fare Owchen e ra kirebnag e maruwel rok Satan ma ra m’ug u fithik’ chon e tabinaw rok Abraham. (1 John 3:8) “Ma bochan e tin ke micheg Got ma de maruwar uwan’ [Abraham]” ma ku arrogon e pi mich rok Jehovah u nap’an ndawori yib Kristus “ni dawori yog ngorad e tin ke micheg Got.” (Roma 4:20, 21; Hebrews 11:39) Machane, dar paged ni nge war e michan’ rorad ko thin rok Got ni i weliy fapi profet.

5. Mini’ fare Owchen ni ke micheg Got nra yib, ma mang fan ni aram rogon e fulweg rom?

⁵ I dag Paul ni apostal ko mini’ fare Owchen ni Got e ke micheg ko ngiyal’ ni ke yoloy, ni gaar: “Ere Got e ognag ngak Abraham e tin ni nge pi’ ngak nge ngak be’ ni bay sum ni ir owchen Abraham. Ma de yog ni gaar, ‘nge ngak e piin ni bay ra sumgad ni owchen Abraham,’ ni fan e re bugithin nem e boor e girdi’. Machane rogon ni yog e gaar, nge ngak be’ ni bayi sum ni owchen Abraham, ni fan e re bugithin nem e ke mus ntaabe’, ni aram Kristus.” (Galatia 3:16) Fare Owchen ni ra flaab e pi nam ni bochan e de un pifak Abraham ngay ni urngin. Piin ni owchen Ishmael ni fak nge pi fak row Keturah e dan fanay ni fan ni ngan fal’eg waathan e girdi’ riy. Fare Owchen nra fal’eg waathan e ra yib u daken Isak ni fak nge Jakob ni bitir rok Isak. (Genesis 21:12; 25:23, 31-34; 27:18-29, 37; 28:14) I dag Jakob ni “pi girdi’” e yad ra fol ku Shiloh ko ganong rok Juda, machane fare Owchen e goo ra yib u fithik’ fa piin ni owchen David. (Genesis 49:10; 2 Samuel 7:12-16) Piyu Jew ko fa bin som’on e chibog e kar sonniged be’ ni nge yib ni ereram fare Messiah, ara Kristus. (John 7:41, 42) Ma fare yiiy rok Got ko fare Owchen e ke lebug ni aram Fak, ni Jesus Kristus.

Ke M’ug Fare Messiah!

6. (a) Mang e kada filed u murung’agen e yiiy ko 70 e wik? (b) Wuin ma uwrogon ni ke “chuweg Jesus e denen”?

⁶ I yoloy Daniel ni profet reb e yiiy ni baga’ fan u murung’agen e Messiah. Bin som’on e duw ko gagiyeg rok Darius u Mede, e ke nang ni 70 e duw ni yira n’ag yu Jerusalem e ke chuchugur ni nge mus. (Jeremiah 29:10; Daniel 9:1-4) Nap’an ni be meybil Daniel, me yib Gabriel ni engel ngak me dag ni medlip e wik e kan dugliy ni ngan chuweg e denen.’ Faan ra taw nga lukngun fa bin 70 e wik ma ngan li’ fare Messiah ngem’. “Medlip e wik e aram e duw” ni ra tabab ko 455 B.C.E. ko ngiyal’ ni fare Pilung nu Persia ni Artaxerxes I e ke ‘yog boch e thin ni fan ni ngan toy biyay e Jerusalem.’ (Daniel 9:20-27; Moffatt; Nehemiah 2:1-8) Ra yib e Messiah u tomren 7 e wik nge ku 62 e wik. Pi duw nem ni 483 urngin e ra tabab ko 455 B.C.E. nge mada’ ko 29 C.E., ko ngiyal’ ni kan taufenag Jesus me dugliy Got ni nge mang Messiah, ara Kristus. (Luke 3:21, 22) Kan m’aynag e denen ko ngiyal’ ni ke pi’ Jesus e yafas rok ni maligach ko 33 C.E. (Mark 10:45) Ri ma k’aringey e re n’ey ni nge michan’uy ko thin rok Got ni i weliy fapi profet!a

7. Ran fana’ e Thin nu Bible, ma ngam dag ko uwrogon ni ke lebug fare yiiy u murung’agen e Messiah.

⁷ Michan’ rodad ko thin rok Got ni i weliy fapi profet e ir e ke ayuwegdad ni ngad nanged fare Messiah. Boor u fithik’ fapi yiiy ni kan yoloy nga Bible ko Hebrew Scriptures u murung’agen e Messiah, e ke weliy e piin tayol ko fare Christian Greek Scripture ni pi yiiy nem e ba sor fan ku Jesus. Ni bod e pi n’en ni baaray, ni be gaar: Kan gargelnag Jesus u Bethlehem. (Isaiah 7:14; Mikah 5:2; Matthew 1:18-23; Luke 2:4-11) Kan pining nga wuru’ u Egypt, min li’ e pi bitir ngar m’ad u tomren ni kan gargeleg. (Jeremiah 31:15; Hosea 11:1; Matthew 2:13-18) Me golnag Jesus e m’ar rodad. (Isaiah 53:4; Matthew 8:16, 17) Rogon ni weliy, ke yan nga lan Jerusalem ni ke af nga daken ba fak e donkey. (Zechariah 9:9; John 12:12-15) Ke lebug e thin ko fare psalmist u tomren ni kan richibiy Jesus min f’oth e mad rok nra reb fapi salthaw ma reb e f’oth ma karon’ed nochi ban’en nga but’ ni bay e pow riy ni ngan nang ko ra yan ngak mini’ fare mad rok ni ireray e mad ni thal ni langgin. (Psalm 22:18; John 19:23, 24) Maku ke lebug fare yiiy ndariy e yil rok Jesus ni ngan m’ing min rogoy e sarey ngak. (Psalm 34:20; Zechariah 12:10; John 19:33-37) Ereram boch e yiiy u murung’agen fare Messiah ni piin ni tayol Bible e kar weliyed ni fapi thin e be weliy murung’agen Jesus.b

Ngan Nog e Sorok Ngak fare Messiah ni Pilung!

8. Mini’ e En ni rib Kakrom, ma uwrogon ni kan lebuguy e yiiy ni bay ko Daniel 7:9-14?

⁸ Nap’an fa bin som’on e duw ko gagiyeg rok Belshazzar ni Pilung nu Babylon, me pi Jehovah reb e lik’ay min piliyeg e changar rok. Som’on me guy fare profet fa aningeg i gamanman ni ba gagang’. Me weliy fare engel rok Got ni ereram “fa aningeg e pilung,” ni be dag ni pi n’em e be yip’ fan aningeg e am ni ra yib ni ngara gagiyegnaged e fayleng. (Daniel 7:1-8, 17) Ma bin migid me guy Daniel Jehovah, “fa En ni kab kakrom,” ni be par u tagil’ u fithik’ e falfalan’. Me dugliy ni ngan thang e pi gamanman nem, me chuweg mat’awon e gagiyeg rorad me gothey fare gamanman ni bin aningeg. Fare gagiyeg nra par ndariy n’umngin nap’an ni fan ngak “fapi girdi’, nge pi nam nge pi thin” e kan pi’ ngak “e en ni bod yaan fak e girdi’.” (Daniel 7:9-14, NW) Kaygi pag feni fel’ e re yiiy ney nib m’ag ko “fare Fak e girdi’,” ni Jesus Kristus, ni kan dugliy ni nge tabab ko gagiyeg rok u tharmiy ko duw ni 1914!​—Matthew 16:13.

9, 10. (a) Yu yang ko fre liyos ni kan gu’ u malik’ay e ba sor fan ko mang? (b) Uwrogon ni ngam weliy fan e n’en nra buch nga m’on ko ngiyal’ ni nge lebug e thin ni bay ko Daniel 2:44?

⁹ Manang Daniel ni Got e ir e “ma pilungnigey me ir e ma chuwegey ko pilung.” (Daniel 2:21) Bochan ni ke mich Jehovah u wan’, ni ir e En ni “ma Dag e pi n’en nda nnang,” ma aram ke weliy fare profet fan e lik’ay ni ke yib ngak Nebuchadnezzer ni ir e Pilung nu Babylon u murung’agen ba liyos nib ga’. Ma yu yang ko re liyos nem nib thil thil e be dag ni bay ngal’an ni nge yib reb e am ni nge gagiyegnag e fayleng nge ngal’an ni nge mus e gagiyeg rok ni bod Babylon, Medo-Persia, Greece, nge Roma. Ku ke fanay Got Daniel ni nge weliy e pi n’en ni ra buch u fayleng e chiney nge gabul nge langleth.​—Daniel 2:24-30.

¹⁰ “Ngiyal’ ni bay i gagiyeg e pi pilung nem,” rogon ni yog fare yiiy, “e aram e bayi sunmeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Daniel 2:44) Nap’an nge “ngal’an nni dugliy ni nge gagiyegnag e pi nam” e ke m’ay ko duw ni 1914, me ngongliy Got Gil’ilungun u tan pa’ Kristus. (Luke 21:24, NW; Revelation 12:1-5) Ran fanay gelngin Got ma bay “ba malang” ni ir fare Gil’ilungun Kristus ni mul u taban “bangi war nib tolang” ni ir e gagiyeg rok Got nth’abi tolang. Nap’an Armageddon ma re malang nem e ra kirebnag fare liyos ma ra bilbilig nge bod e fiyath. Taabrogon ko pi am ni ir e be gagiyegnag e “fayleng ni polo’ ” ma fare gil’ilungun Kristus e ra par ndariy n’umngin nap’an.​—Daniel 2:35, 45; Revelation 16:14, 16.c

11. Fare thiliyeg yaan ni ta’ Jesus’ e be dag nib m’on u murung’agen e mang, ma mang angin ni ke yib ngak Peter nbochan e re thiliyegyaan nem?

¹¹ Nap’an ni be lemnag Jesus e gagiyeg rok u Gil’ilungun, me yog ngak pi gachalpen, ni be gaar: “Ba’ boch e girdi’ u roy ndab ra m’ad me yan i taw ko ngiyal’ ni bay ra guyed e en ni Fak e Girdi’ riy ni ke yib ni ir e pilung.” (Matthew 16:28) Me yan nel’ e rran nga tomren, me fek Jesus Peter, James, nge John ngar ranod nga daken fare burey nib tolang me thiliyeg yaan u p’eowcherad. Ma nap’an ni ka bay e manileng nib tamilang ni ke upunguy fapi apostal, me non Got ngorad, ni gaar: “Ereray Fakag nrib t’uf rog, ni kari felan’ug ngak ere mu telmed ngak.” (Matthew 17:1-9; Mark 9:1-9) Uw feni fel’ ma ma gin e girdi’ ngay ni kan guy gelngin Kristus nib galgal ramaen u Gil’ilungun u m’on ni nge yib! Arfan ni ke weliy Peter ni re tamilang nem e aram e ba changar ni pig, me gaar: “Aram fan ni kari pagan’mad ko thin rok Got ni i weliy fapi profet.”​—2 Peter 1:16-19.d

12. Mang fan ni ri ireray e tayim ni thingarda daged ni ke mich e thin rok Got ni kan yiinag u wan’dad?

¹² Ba tamilang ni “fapi thin ni kan yiiynag” e gathi ke mus ni thin ko Hebrew Scripture ni be weliy murung’agen fare Messiah ya ku ba muun ngay e thin rok Jesus ni yog ni ra yib “ni bay gelngin ma rib galgal ramaen.” (Matthew 24:30) Fare yaan ni thil e ke gelnag fa pi thin u murung’agen Kristus ni be weliy nra yib ni bay gelngin ma ra galgal ramaen u Gil’ilungun. Dabki n’uw nap’an, ma ra yib Jesus ni ba galgal ramaen ma reb i fan e aram e ran thang e piin ni de michan’rad ma yira taw’athnag e piin ni yad be maruweliy e michan’ rorad. (2 Thessalonika 1:6-10) Bochan ni ke lebug e thin nu Bible ni kan yiiynag ma re n’ey e be dag ni tiney e rran e ir e tayim ni kan nog e “tin tomren e rran” ngay. (2 Timothy 3:1-5, 16, 17; Matthew 24:3-14) Michael ni ir e pilung ko mathmit ni ke dugliy Jehovah, ni Jesus Kristus, e ba sak’iy ni ke fal’eg rogon ni nge gothey e re m’ag nib kireb ney u nap’an fare “gafgow ni baga’.” (Matthew 24:21; Daniel 12:1) Ere chiney, ereray e tayim ni ngada daged ni ke mich e thin rok Got ni i weliy fapi profet uwan’dad.

Par ni Ke Michan’uy ko Thin rok Got ni I Weliy fapi Profet

13. Mang e ra ayuwegdad nra par nib t’uf Got rodad ma ra par nib fas e michan’ rodad ko thin rok?

¹³ Riyul’ ni kada falfalan’gad ko ngiyal’ ni som’on ni kad filed ni ra riyul’ e thin rok Got ni kan yiiynag. Machane ka nap’an e ngiyal’ nem ma ke war iyan e michan’ nge t’ufeg rodad ko re n’ey, fa? Yibe athapeg ni dabda boded e pi Kristiano u Efesus ni kar ‘digiyed fare t’ufeg ni immoy rorad ko som’on.’ (Revelation 2:1-4) Demtrug ko uw n’umngin nap’an ni kada pigpiggad ku Jehovah, ma ra yib ngodad e magawon ni aram rogon nfaanra dabda m’onaged u wan’dad e gagiyeg rok Got nge tin nib m’agan’ ngay ni ngad rin’ed’ ni fan ni ngada chaariyed e chugum nib spiritual u Tharmiy. (Matthew 6:19-21, 31-33) Ngan fil e Bible nib fel’ rogon, ma ngan un ko muulung ko piin Kristiano u gubin ngiyal’, ma ngan un ko machib u fithik’ e pasig ma pi n’en ney era ayuwegdad ni nge par nib t’uf Jehovah rodad, nge Fak, nge Thin rok Got. (Psalm 119:105; Mark 13:10; Hebrews 10:24, 25) Ma ra ayuwegdad e re n’ey ni nge par nib fas e michan’ rodad ko thin rok Got.​—Psalm 106:12.

14. Uwrogon ni kan teeliyawnag e pi Kristiano ni kan dugliyrad nbochan e michan’ rorad ko thin rok Jehovah ni kan yiiynag?

¹⁴ Bochan fapi thin ni kan yiinag kakrom ni be weliy boch ban’en ni ke lebug ko ngiyal’ nem, me re ku rayog ni nge michan’dad ni bay boch ban’en ni kura lebug boch ngaram. Ni bod fare n’en ni kan weliy murung’agen e gagiyeg rok Kristus u Gil’ilungun nib galgal ramaen ni be lebug e chiney, nge piin Kristiano ni kan dugliyrad ni kar pired nib yul’yul’ ku Got nge mada’ ko yam’ ma aram e ke riyul’ u nap’rad fare yiiy ni kan micheg ni gaar: “Cha’ ni ke gel me par nib yul’yul’ e gu ra pi’ ngak nge kay waamgin fa ke gek’iy ko yafas, u tharmiy ni ir fare paradis rok Got.” (Revelation 2:7, 10, NW; 1 Thessalonika 4:14-17) Be taw’athnag Jesus e piin ni kan teeliyawnag ni “ngar ked wom’ngin fare gek’iy ko yafas” u “paradis rok Got” u tharmiy. Nap’an ni ngan fasegrad ko yam’ ngu daken Jesus Kristus, ma rayog ni nge yog ngorad e yafas ni dabki kireb biid nra pi’ Jehovah ngorad ni “fare Pilung ni bay i par ndariy n’umngin nap’an, ma dabi yim’ biid, ma dabni guy nga owchey, ma ke mus ni ir e taare Got ni ba’.” (1 Timothy 1:17; 1 Korinth 15:50-54; 2 Timothy 1:10) Aram e taw’ath ni rib ga’ nbochan ni rib t’uf Got rorad ma kari mich fapi thin ni kan yiiynag uwan’rad!

15. Fare def ko fa “bin nib biech e fayleng” e kan ta’ nga daken mini’, ma mini’ e pi cha’ ni ma un ngorad?

¹⁵ Dawori n’uw nap’an nga tomren ni kan faseg ko yam’ e piin ni kan dugliyrad mi yad par u “paradis rok Got” u tharmiy, ma tin ni ka ba’ ko fare Israel ni spiritual e kan pithigrad ko “Babylon ni Gilbuguwan,” ni aram e pi yuraba i teliw ni googsur. (Revelation 14:8; Galatia 6:16) Kan toy nga dakenrad fare def ko fa “bin nib biech e fayleng”. (Revelation 21:1) Ere kan sunmiy “reb e binaw”, ma kan ngongliy e re n’ey ni nge mang e paradis nib spiritual ni kan wereg e re n’ey nga ga’ngin e fayleng e ngiyal’ ney. (Isaiah 66:8) Ma girdi’ ni yoor ni kan taarebnagrad ko saf e kar chaggad ko fare Israel ni spiritual ni yad be sor i yan nga ram e chiney ni ireray e ngiyal ni “tin tomren e rran.”​—Isaiah 2:2-4; Zechariah 8:23; John 10:16; Revelation 7:9.

Kan Weliy e Par ko Girdi’ Nga M’on ko fapi Thin ni Kan Yiiynag

16. Mang athap ni bay ko piin ni ma ayuweg e piin kan dugliyrad u fithik’ e yul’yul’?

¹⁶ Mang athap ni bay ko piin ni ma ayuweg fa piin kan dugliyrad u fithik’ e yul’yul’? Ku ke mich fapi thin rok Got ni kan yiiynag uwan’rad, ma athap rorad e aram e ngar ranod ngar pared nga Paradise u fayleng. (Luke 23:39-43) Mu rom e yad ra unum boch e ran ko “fare lul’ ni bay e ran ko yafas riy” ma yad ra gol ko “fapi yuwan e gek’iy” ni kan yung u tooben e lul’. (Revelation 22:1, 2) Faanra bay e athap rom nib fel’ ni aray rogon, ma sana rayog ni ngam ulul ngay ni ngam dag ni rib t’uf Jehovah rom ma ke mich fapi thin ni kan yiiynag uwan’um. Yibe athapeg ni rayog ni ngam mang bagayad fa piin ni ra yog ngorad e yafas ni dariy n’umngin nap’an mab falfalan’ u Paradis u fayleng.

17. Yafas u Paradis u Fayleng e mang e pi taw’ath nib muun ngay?

¹⁷ Girdi’ ni dawora flontgad e ri dabiyog rorad ni ngar weliyed ko uwrogon e yafas ko girdi’ u Paradis u fayleng, machane fapi thin ni kan yiiynag e ra tamilangnagdad u murung’agen boch e taw’ath ni yira pi’ ngak e piin ni ma fol rok Got. Nap’an ni ra gagiyeg Gil’ilungun Got ndariy be’ ni nge togopuluw ngay ma yira rin’ e tin nib m’agan’ ngay u fayleng ni bod rogon u tharmiy, ma aram dakuriy e girdi’ nib kireb​—ni mus ko gamanman ma dakuriy—​nra “kirebnag ara nge k’aring e tin kireb.” (Isaiah 11:9; Matthew 6:9, 10) Piin ni yad mmunguy e bay ra pared u fayleng, ma “ur pired u fithik’ e gapas ni yad ba falfalan’.” (Psalm 37:11) Ma dakuriy e piin ni ke yib e bilig ngorad, ya bochan ni ra “par e nam nib sug ko grain; me sug yungi ted ko woldug.” (Psalm 72:16) Ma dabki yib e lu’ u owchey nbochan e kireban’. Dakuriy e m’ar, ma mus ko yam’ e dakuriy. (Isaiah 33:24; Revelation 21:4) A mu lemnag e re n’ey ni​—dariy e togta, dariy e falay, dariy e hospital ara tafen e piin nib aliliy, ma dariy e gum’eyag fa naun ni yima ta’ e girdi’ ni ke yim’ ngay. Uw feni fel’ e re athap rok e girdi’ ney!

18. (a) Mang e n’en ni kan micheg ngak Daniel? (b) Mang e n’en ni ngan pi’ ngak Daniel ni nge mang “f’oth rok”?

¹⁸ Mus ko low ko yam’ ma ra m’ay downgin e girdi’ riy ni ke yim’ ya yira faseg e girdi’ ni kar m’ad ko yam’. Piin nib mat’aw e bay e athap rorad ni aray rogon. (Job 14:14, 15) Ku arrogon Daniel ni profet, ya ke micheg fare engel rok Jehovah ngak ni gaar: “Me gur, Daniel, e nguum par ni gab yul’yul’ nge mada’ ko tomur. Ma aram e bay mum’, machane bayi taw ko tungun ma ga fos ko yam’ mi ni pi’ puluwom ngom.” (Daniel 12:13) I pigpig Daniel ku Got nib yul’yul’ nge mada’ ko yam’. Chiney e ka be par ni ba yam’, machane ra “suwon” ko ngiyal’ ni “kan faseg ko yam’ e piin ni yad ba fel’” u nap’an e gagiyeg rok Kristus u lan Bbiyu’ e Duw. (Luke 14:14) Mang e n’en ni nge mang “birok” Daniel ko ngiyal’ nem? Nap’an ni yib e Paradis, ma fapi thin ni yog Ezekiel ko yiiy rok e be dag ni yira f’oth e binaw ko girdi’ rok Jehovah nib fel’ rogon ma ngan pi’ tafen urngin e girdi’. (Ezekiel 47:13–48:35) Ere bay e binaw rok Daniel u Paradise, machane gathi ke mus ni goo binaw e yira pi’ ngak. Ya bochan e ba muun ngay boch ban’en ni be finey Jehovah ni nge pi’ ngak ni ir bang ko tin nib m’agan’ ngay.

19. Mang e ba t’uf ni ngan rin’ me yog e yafas u Paradis u fayleng?

¹⁹ Uwrogon gur nge n’en ni ngan pi’ ngom ni nge mil fan ngom? Faanra ke mich e Thin rok Got uwan’um, ni aram fare Bible, ma baga’ ni ngam nameg ni nge yog ngom e yafas u Paradise u fayleng. Sana kam tay nga lanin’um ni ga bay u rom, ma ke felan’um ko taw’ath ni ke yib ngom, ma ga be rin’ ban’en ni ngam ayuweg e fayleng, ma ga be ayuweg e piin ni kan fasegrad ko yam’. Maku, girdi’ e kan sunmiy ni fan e ngar pared u Paradis. I sunmiy Got fare mabgol ni som’on ni fan e ngar parew urom. (Genesis 2:7-9) Ma baadag ni piin ni ma fol rok e yad ra par u Paradis ni manemus. Ga baadag ni ngam ngongliy e tin nib puluw ko Thin nu Bible ma aram rogon ma rayog ni ngam un ko bokum milyon e girdi’ ni yad ra par u Paradis u Fayleng? Ga ra moy urom nfaanra riyul’ nib t’uf rom e Chitamam nu tharmiy, ni Jehovah, ma ga be athamagil ni nge par nib mich e thin rok Got ni kan yiiynag u wan’um.

[Footnotes]

Uwrogon ni Ngam Pi’ e Fulweg?

• Mang e bin som’on e yiiy, ma mini’ fare Owchen ni kan micheg?

• Mang boch e yiiy u murung’agen e Messiah ni ke lebug ku Jesus?

• Uwrogon ni bayi riyul’ e thin ni bay ko Daniel 2:​44, 45?

• Thin rok Got ni kan yiiynag e be dag e mang ni aram e n’en ni nge yog ngak e piin ni ma fol rok Got nga m’on?

[Picture on page 16]

Ga be athapeg ni bay mu par u Paradis u fayleng?