Thin rok Jehovah e Ba Fas
Tin Ba Ga’ Fan ko Babyor rok James nge Peter
BA CHUGUR ko 30 e duw nga tomren e Pentekost ko 33 C.E., me yoloy James ni walagen Jesus bangi babyor ni fan ko ‘fa ragag nge l’agruw i ganong’ nu Israel. (Jas. 1:1) I yoloy e re babyor nem ni fan e: nge gelnag e michan’ rorad u nap’an nra yib e skeng ngorad. Miki pi’ e fonow u rogon ni ngan yal’uweg e magawon ni ke sum u lan e pi ulung rorad.
U m’on ko togopluw ni tay Nero ni Pilung nu Roma ko duw ni 64 C.E., me yoloy apostal Peter e gin som’on e babyor rok nge pi’ ngak e Kristiano ni be pi’ e athamgil nga lanin’rad ni ngaur pared nib mudugil lanin’rad. Gin l’agruw yang e babyor rok ni yoloy nde n’uw nap’an nga tomren ni ke mu’ i yoloy e gin som’on e babyor rok, e pi’ Peter e athamgil nga laniyan’ e pi Kristiano ni ngar tedan’rad ko Thin rok Got miki ginangrad ni be chugur fare rran rok Jehovah. Riyul’ nra fel’ rogodad riy nfaan gad ra tiyan’dad ko thin ni bay ko babyor rok James nge Peter.—Heb. 4:12.
MA PI’ JEHOVAH E GONOP NGAK E PIIN ‘YAD BE NING NGAK U FITHIK’ E MICHAN’
(Jas. 1:1–5:20)
“Ba felan’ e en nra par nib yul’yul’ ngak Got ko ngiyal’ ni be yib e tin nib mo’maw’ riy ngak, ni aram e yibe skengnag; ya ra athamgil ndabi mul ko re skeng nem ma yira pi’ e yafos ngak.” Piin ni ma ‘ning ban’en u fithik’ e pagan’,’ e ma pi’ Jehovah e gonop ngorad nge yog nra k’adedan’rad ko skeng.—Jas. 1:5-8, 12.
Piin ni ‘kar manged tamachib’ u lan e ulung e kub t’uf e michan’ nge gonop rorad. Tomren ni yog James ni bolowthey e bang u dowey nib “achichig” machane bay gelngin ni nge ‘alitnag dowey ni ga’ngin,’ ma ki ginangey u ngongolen e fayleng nrayog ni nge kirebnag e tha’ u thildad Got. Miki yoloy e pi n’en ni nge rin’ be’ ni ke war e michan’ rok.—Jas. 3:1, 5, 6; 5:14, 15.
Fulweg u Boch e Deer ko Bible:
2:13—Mang e kanawo’ ni ‘ra gel e runguy riy ko pufthin’? Rogon ni ma yaliydad Got, e ma lemnag e runguy ni kad daged ngak e girdi’ ma ma n’ag fan e kireb rodad ni bochan e maligach ni pi’ fak. (Rom. 14:12) Gur, gathi aray reb i fan ni ngad daged e t’ufeg ngak e girdi’?
4:5—Mang thin nu Bible e fek James e re thin ney riy? De fanay James reb e verse u Bible u roy. Machane re thin rok ney ni kan thagthagnag e dabisiy ni kan puluwnag ko thin nu Bible ni bod ko Genesis 6:5; 8:21; Proverbs 21:10; nge Galatia 5:17.
5:20—‘En nra fulweg be’ nib tadenen nge chuw ko kireb ni be ngongliy’ e ra ayuweg e yafos rok mini’? Re Kristiano ni ke ayuweg be’ nib tadenen nge kalngan’ e ke ayuweg nge fel’ thilrow Got miki ayuweg ndab ni thang e fan rok ni manemus. Maku faen ni ke ayuweg facha’ ni tadenen e ke ayuweg ni nge “n’ag Got fan e denen [rok] ni pire’.”
Tin Gad Ra Fil Riy:
1:14, 15. Ra sum e denen ko ar’ar nib kireb. Ere, thingar da chuweged u lanin’dad e lem nib kireb. Ba t’uf ni ‘ngaud lemnaged’ e pi n’en nib fel’ ma gad suguy lanin’dad ko pi n’em.—Fil. 4:8.
2:8, 9. ‘Ra dabi taareb rogon e girdi’ ni gubin u lanin’uy’ ma yibe th’ab fare “motochiyel” ko t’ufeg. Ere tin riyul’ e Kristiano e dab ra uned ko biney e ngongol.
2:14-26. Gad ra ‘thap ngak Got ni bochan e michan’,’ ma ‘gathi bochan ni ngan fol’ ko Motochiyel ni kan pi’ ngak Moses ara pi n’en ni ma rin’ e Kristiano. Michan’ rodad e gathi kemus ni nga dogned nga l’ugundad. (Efe. 2:8, 9; John 3:16) Michan’ rodad e thingari k’aringdad ni ngad rin’ed e tin nib m’agan’ Got ngay.
3:13-17. ‘Gonop ni yib u tharmiy’ e kab ga’ ko ‘gonop nu fayleng nge gonop ni yib rok moonyan’’! Thingar da ‘fal’eged i gay e gonop rok Got ni bod e machaf ni kan mithag.’—Prov. 2:1-5.
3:18. Fare awochngin e thin nib fel’ ko Gil’ilungun Got e ngan ‘wereg u fithik’ e gapas ko piin ni ma k’aring e gapas.’ Ba ga’ fan ni nguud maruweliyed ni nge aw e gapas u thildad ma dabda ufanthingad, ma dabda chamgad e girdi’, maku dabda k’aringed e wagey.
‘NGE PAR NIB GEL E MICHAN’’
(1 Pet. 1:1–5:14)
I puguran Peter ngak e Kristiano e athap rorad ni nga ranod nga tharmiy. Yog Peter ngorad ni gaar: “Gimed girdien fare nam ni ke mel’egmed Got, ni gimed e pi prist rok e en ni Pilung.” Tomren ni ke fonownagrad ni ngar ted fan e piin ma yog e thin rorad, miki fonownagrad ni ‘thingari yad gubin ni nge taareb rogon e lem rorad mu ur runguyed yad, me bagayad me t’uf bagayad rok nrogon e walag ni girdien Kristus, mu ur pired nib fel’ e thin rorad ngorad mab sobut’ lanin’rad ngorad.’—1 Pet. 1:3, 4; 2:9; 3:8.
Bochan ni “ke chugur” ni ngan gothey [fare m’ag rok piyu Jew], me fonownag Peter e pi Kristiano ni ngaur meybilgad. I gaar ngorad: “Mu tedan’med mi gimed ayuwegmed! . . . Um pired nib mudugil e michan’ romed ngak Kristus mi gimed togopluw ngak fare [Moonyan’].”—1 Pet. 4:7; 5:8, 9.
Fulweg u Boch e Deer ko Bible:
3:20-22—Uw rogon ni ngad thapgad u daken e taufe? Piin ni baadag ni ngar thapgad ngak Got e ba t’uf ni ngar uned ko taufe. Machane, dabiyog ni ngad thapgad ngak Got ni kemus ni bochan e taufe. Gad ra thap ngak Got u “daken e fas ko yam’ ni tay Jesus Kristus.” Be’ ni be n’en ni nge un ko taufe e thingari mich u wan’ nrayog ni ngan thap ngak Got ni kemus ni bochan e ke pi’ Jesus e yafos rok ni maligach, min faseg ko yam’, me “yan i par nga ba’ ni mat’aw rok Got,” ma be gagiyegnag e piin nib fas nge piin ni kar m’ad. Ngan taufe nga daken e re michan’ nem e aram e n’en taareb rogon ko fa meruk i girdi’ nra “fosgad nde li’rad e ran.”
4:6—Mini’ e ‘piin nib yam’’ ni ‘kan machibnag fare thin nib fel’ ngorad’? Yad e piin ni yad ‘ba yam’ nbochan e denen rorad,’ ara yad ba yam’ u m’on nrung’aged fare thin nib fel’. (Efe. 2:1) Machane tomren ni ke mich fare thin nib fel’ u wan’rad mar ‘fasgad’ ko tirok Got ban’en.
Tin Gad Ra Fil Riy:
1:7. Rogon ni nge yib puluwon e michan’ rodad, e thingari par nib mudugil. Michan’ ni aram rogon nib mudugil e ra ‘thapeg e yafos rodad.’ (Heb. 10:39) Thingar dab da pied keru’dad ngak Got u nap’an ni yira skengnag e michan’ rodad.
1:10-12. Baadag e pi engel ni ngar nanged fan e thin riyul’ ni ke yoloy e pi profet rok Got kakrom nib toar fan u murung’agen e ulung ko Kristiano ni kan dugliyrad. Machane, pi n’ey e ke tamilang fan u nap’an ni tabab Jehovah ni nge ngongol ni fan ko fare ulung. (Efe. 3:10) Gur, gathi thingar da folgad ko tin ni rin’ e pi engel ma ngad fal’eged i gay e ‘tin nib toar fan rok Got’?—1 Kor. 2:10.
2:21. Ra ngad folwokgad rok Jesus Kristus, ma thingari m’agan’dad ngay ni ngad uned ko gafgow nge mada’ ko yam’ ni fan e ngad tolangnaged e gagiyeg rok Jehovah.
5:6, 7. Gad ra pag e magafan’ rodad nga daken Jehovah, ma ra ayuwegdad ni nge m’on e bin riyul’ e liyor ko yafas rodad ko bin ni nge magafan’dad ko tin ra buch ko bin migid e rran.—Matt. 6:33, 34.
‘RRAN ROK JEHOVAH E BAYI TAW’
(2 Pet. 1:1–3:18)
I yoloy Peter ni “dariy bbugithin ni yog e profet ni sum u laniyan’ be’ ya fare kan ni thothup rok Got e yib i ying ngak e girdi’ ngar weliyed e thin ni ke yib rok Got ngorad.” Gad ra tiyan’dad ko thin ni ke yog e pi profet ma ra ayuwegdad rok e “pi tamachib ni goo bogi ban’en” nge boch e girdi’ nib kireb.—2 Pet. 1:21; 2:1-3.
I yog Peter ni nap’an e tin tomren e rran ma ra moy e girdi’ nra i “moningnagdad.” Machane “rran rok Somol e bayi taw ni bod rogon ba moro’ro’.” Me museg Peter e babyor rok u ba fonow ni fan ngak e piin ‘yad be sonnag e chirofen nem.’—2 Pet. 3:3, 10-12.
Fulweg u Boch e Deer ko Bible:
1:19—Mini’ fare “fasuran,” ma wuin e ke m’ug, ma uw rogon ni gad ra nang ni ke buch e re n’ey? Fare “fasuran” e Jesus Kristus ni be gagiyeg u Gil’ilungun. (Rev. 22:16) Nap’an e duw ni 1914, me mang Pilung ni pow riy ni ke chugur ni nge yib e bin nib beech e rran. Yaan Jesus ni thil e be dag rogon e flaab nge gagiyeg rok ni be micheg ni thin rok e riyul’. Yira tiyan’uy ko re thin ney ma ra pi’ e tamilang nga gum’irchadad, ma gad ra nang ni ke m’ug fare Fasuran.
2:4—Mange ‘Tartarus,’ ma mingiyal’ e nin’ e pi engel ni kireb e ngaram? Tartarus e bod ba kalbus ni kemus ni engel e kan ta’ ngay—gathi girdi’. Ba dodow ni ke par lanin’uy u fithik’ e lumor ko tin nib m’agan’ Got ngay. Pi engel ni ka nin’rad ngay e dakuriy e athap rorad ko gabul nge langlath. I yin’ Got e pi engel nib kireb nga Tartarus u nap’an Noah, ma yad ra par ni aram rogon nge ni mada’ ko ngiyal’ ni yira thangrad riy.
3:17—Mange be yip’ Peter fan u nap’an ni yog ni ‘kar nanged’? I weliy Peter murung’agen e tamilangan’ ni kan pi’ ngak nge boch e girdi’ ni kan thagthagnag ngorad kar yoloyed nga Bible. Bochan nre tamilangan’ nem e bay e gin ni mus riy, ma pi Kristiano kakrom e dar nanged urngin ban’en nra buch ko gabul nge langlath. Kemus ni kar nanged e tin nib ga’ nra buch riy.
Tin Gad Ra Fil Riy:
1:2, 5-7. Gad ra athamgil ni nge gel e michan’ rodad nge k’adan’ nge yul’yul’ ku Got ma gathi kemus ni gad be mon’og ko tamilangan rodad u murung’agen Got nge Jesus,’ ya ku ra ayuwegdad ndabi ‘war e michan’ rodad’ ara nge dab kud yul’yul’gad.—2 Pet. 1:8.
1:12-15. Rogon ni nge mudugilan’dad ko ‘tin riyul’,’ e ba t’uf ni nguun puguran ngodad u nap’an e muulung nge fol Bible ni goo gadad nge beeg Bible.
2:2. Thingar da kol ayuwgad nge dabi kirebnag e ngongol rodad Jehovah nge ulung rok.—Rom. 2:24.
2:4-9. Bochan e n’en ni kad nanged ni i rin’ kakrom ma ke mudugilan’dad ni manang Jehovah “rogon ni nge ayuweg e piin ni yad ma fol rok ko gafgow ni ma yib ngorad nge rogon ni nge tay e piin nib kireb u tan e gechig rok nge yan i mada’ ko chirofen ni bayi pufthinnagrad Got” riy.
2:10-13. Yugu aram rogon ni piin ‘yad ba flaab,’ ni aram e piin piilal e bay thibngirad ma yu ngiyal’ e yad ma oloboch, ma thingar dab dogned e thin nib kireb u murung’agrad.—Heb. 13:7, 17.
3:2-4, 12. Yira tiyan’uy ko “fapi thin ni i yog fapi profet ni kakrom ni yad ba thothup, nge motochiyel ni yib rok Somol” ma ra ayuwegdad ndab da paged talin ni fare rran rok Jehovah e ke chugur.
3:11-14. Bod e piin ni yad be sonnag e re rran nem, thingar da (1) pired nib ‘thothup e ngongol’ rodad, ngi i par nib klin dowdad nge lem rodad nge gafarig rodad nge tha’ u thildad Got; (2) min yoornag e maruwel ni bay rogon ko “pigpig ku Got,” ni bod fare maruwel ni ngan wereg e machib min pingeg e girdi’ ngar manged pi gachalpen Jesus; (3) ma ngaud athamgilgad ndabi ‘af’ ngongolen e fayleng ngodad; (4) nga i par ni ‘de alit lanin’dad,’ ni aram e ngad rin’ed urngin ban’en ndariy e lem nib kireb riy; (5) mab ‘gapas,’—ni aram e nge aw e gapas u thildad Got, nge pi Kristiano nge ku boch e girdi’.