Ngad Chichiyed Pa’dad Ko Michan’ Rodad!

“Ngak e piin ni ke yog ngorad e michan’ ntaareb rogon fene ga’ fan ko biromad e michan’.”​—2 PETER 1:1.

1. Mang e yog Jesus ni be ginang e pi apostal rok, machane mang e yog Peter ni ke uf ngay?

NAP’AN e re nep i n’em u m’on nra yim’ Jesus me yog ni urngin e pi apostal e ra pag. Peter ni bagayad e ke gaar: “Ra pagem e pi cha’ ney ni yad gubin, mi gag e ri dab gu pagem!” (Matthew 26:33) Machane i nang Jesus ni gathi aram rogon. Aram fan ni yog ku Peter ko ngiyal’ nem ni gaar: “Machane kug yibiliyem ngak Got, i gur Simon ni rogon nib michan’um ngak Got e dabi mul. Ma faan ga ra sul ngog, ma thingar mpi’ e gel nga laniyan’ pi walagem.”​—Luke 22:32.

2. Yugu aram rogon ni kari pagan Peter ngak, ma mang e rin’ ni be dag nib war e michan’ rok?

² Kari pagan’ Peter ni dabi war e michan’ rok, machane ke pag Jesus ko re nep i n’em. Dalip yay ni yog ni de nang Kristus! (Matthew 26:69-75) Nap’an ni ke “sul,” ma dabi siy ni kari mit nga laniyan’ e thin ni yog e Masta rok ngak ni gaar, “mpi’ e gel nga laniyan’ pi walagem.” Ma tin ni ka bay e yafas rok Peter e ke dag ni kari fol ko re thin nem, ma aram e be m’ug riy ko fagali babyor ni ke yoloy ni bay ko Bible.

Fan ni Yoloy Peter e Gali Babyor Rok

3. Mang fan ni yoloy Peter e bin som’on e babyor rok?

³ Sogonapan 30 e duw nga tomren ni ke yim’ Jesus, me yoloy Peter e bin som’on e babyor ngak e pi walagen u Pontus, nge Galatia, nge Cappadocia, nge Asia, nge Bithynia, ni aram e yu gin ni bay ko le’luch nge ngal ko fare binaw ni ka nog e Turkey ngay e chiney. (1 Peter 1:1) Ma dabi siy ni piin ni ke yol Peter ngorad e ba muun ngay e piin ni yad e Jew ni kar manged e Kristiano u nap’an e Pentekost 33 C.E. (Acts 2:1, 7-9) Boor iyad e piin ni Gentile ni yad be magawon ko gafgow nib baga’ ni bochan e piin nib ta togopuluw ngorad. (1 Peter 1:6, 7; 2:12, 19, 20; 3:13-17; 4:12-14) Ere ke yol Peter ngak e pi walag ney ni nge pi’ e athamgil nga lanin’rad. Ba adag ni nge ayuwegrad ni nge yog ngorad “gam’engin e michan’ [rorad], ni aram e kar] thapgad ngak Got.” Ere tin tomur e thin ni yog e gaar: “Um pired nib mudugil e michan’ romed ngak Kristus mi gimed togopuluw ngak fare moonyan’.”​—1 Peter 1:9; 5:8-10.

4. Mang fan ni yoloy Peter e bin l’agruw e babyor rok?

⁴ Ma boch nga tomren miki yoloy Peter e gin l’agruw e babyor ngak e pi Kristiano ney. (2 Peter 3:1) Mang fan? Ya ka bay ban’en ni kab gel e kireb riy ni ke yib ngorad. Boch e girdi’ ni ma un ko ngongol ndarngal e ra guy rogon ni ngar mon’eged e ngongol rorad u fithik’ girdien e ulung mar waliyed yad nga bang! (2 Peter 2:1-3) Miki ginangrad Peter u morngaagen e piin nib ta moning. Ke yoloy ko bin som’on e babyor rok ni “ke chugur nga tungun urngin ban’en,” ma chiney ma bay boch e girdi’ ni be moningnag e re n’em. (1 Peter 4:7; 2 Peter 3:3, 4) Ngad yaliyed e bin l’agruw e babyor rok Peter ma gad guy ko uw rogon ni ke gelnag e pi walag mar pired nib mudugil e michan’ rorad. U lan e re article ney ni bin som’on, ma gad ra weliy guruy ni 1 ko 2 Peter chapter 1.

Fan e Guruy ni 1

5. Uw rogon ni be fl’eg rogon Peter ni nge weliy boch e magawon ngak e piin ni be poy e babyor rok?

⁵ De weliy Peter ko som’on u morngaagen e pi magawon nib baga’. Ya ke fl’eg rogon ni nge weliy e pi magawon ney u m’on riy me ubing e piin ni be poy e re ke babyor ney ko boch e thin ni ra k’aringrad ngar ted fan e taw’ath rorad ya kar uned ko Kristiano. Ke puguran ngorad ko pi n’en ni micheg Got nge rogon nrayog ni ngan pagan’iy ko pi thin ko profet ni bay ko Bible. Ya ke weliy u morngaagen e ngiyal’ ni i thil ara piliyeg yaan Kristus, ni aram yaan Kristus ni kan pi’ mat’awun ni nge gagiyeg ko Gil’ilungun Got.​—Matthew 17:1-8; 2 Peter 1:3, 4, 11, 16-21.

6, 7. (a) Mang e rayog ni ngad filed ko n’en ni yog Peter nsom’on? (b) Faan gad ra pi’ e fonow, ma mang e ba fel’ ni ngad weliyed u morngaagdad ni ra ayuwegey?

⁶ Bay ban’en nrayog ni ngad filed ko tin som’on e thin ni yog Peter fa? Gathi ra fel’ lanin’uy ni nga un fol ko fonow u m’on riy nfaanra sul u daken e athap rodad ko Gil’ilungun Got fa? Ma uw rogon e pi n’en ni kad uned ngay? Dabi siy ni tomren ni ke yim’ Jesus me weliy Peter u morngaagen e n’en ni ke guy faani piliyeg yaan Kristus ni be gal ramaen ni bay ko Gil’ilungun Got.​—Matthew 17:9.

⁷ Ku mu lemnag ni dabi siy ni ngiyal’ ni ke yoloy Peter e bin l’agruw e babyor rok, ma ke garer iyan e Gospel ku Matthew nge fare babyor ni yoloy apostal Paul ngak piyu Galatia. Ere dabi siy ni goo manang e girdi’ morngaagen e n’en ni ke war Peter riy nge rogon ni ke par nib gel e michan’ rok. (Matthew 16:21-23; Galatia 2:11-14) Machane re n’ey e de n’igin ndabiyog ni nge weliy e thin nib puf rogon. Danga’ ya ke n’igin ni nge gel rogon ni ba adag e girdi’ e babyor rok ya ku yad ma bay e pi n’en ni yad ba meewar riy. Ere nap’an ni ngan ayuweg e piin ni bay e magawon rorad, ma gathi ra fel’ nfaanra ran nog ni ku gad e gathi gad ba flont fa?​—Roma 3:23; Galatia 6:1.

Tin Som’on e Thin ni ma Gelnagey

8. Uw rogon ni fanay Peter fare bugithin ni “michan’”?

⁸ Mu lemnag e n’en ni yog Peter ko som’on. Som’on me weliy u morngaagen e michan’uy, ma be yog ko piin ni be poy e babyor rok ni yad e “piin ni ke yog ngorad e michan’ ntaareb rogon feni ga’ fan ko biromad e michan’.” (2 Peter 1:1) Rogon ni be yog e re bugithin nem ni “michan’” u roy e ma sor fan ko “thin ara ban’en nib mudugil” ma aram e machib ko Kristiano, ni be yog e Bible ni aram “fare thin riyul’.” (Galatia 5:7; 2 Peter 2:2; 2 John 1) Boor yay ni yima yog fare bugithin ni “michan’” ni aram rogon ma gathi yugu reb i fan e pagan’ ku be’ fa ban’en.​—Acts 6:7; 2 Korinth 13:5; Galatia 6:10; Efesus 4:5; Jude 3.

9. Mang fan ni kari felan’ e piin ni gathi yad piyu Israel ko fa pi thin ni yog Peter ko som’on?

⁹ Dabi siy ni ri ba adag e piin ni yad e Gentile e pi thin rok Peter nem. Ya piyu Jew faram e dariy ban’en ni ur rin’ed u taabang ko piin ni Gentile ya ur sapgad ngorad nga but’ ma boch e Jew ni kar uned ko Kristiano e ka yad ba laniyan’ ngorad. (Luke 10:29-37; John 4:9; Acts 10:28) Machane Peter, ni ir e Jew ma ir e apostal rok Jesus Kristus e ke yog ko piin ni be poy e babyor rok​—ni piyu Jew nge Gentile​—e taareb rogon e michan’ rorad ma taareb rogorad.

10. Mang e gad be fil ko n’en ni yog Peter so som’on?

¹⁰ Mu lemnag ni pi n’en ni yog Peter e be fil ban’en ngodad e ngiyal’ ney. Der laniyan’ Got; ya gathi kab fel’ girdien reb e nam u wan’ nga girdien yugu reb. (Acts 10:34, 35; 11:1, 17; 15:3-9) I fil Jesus ni urngin e Kristiano e yad walag, ma susun dariy bagadad ni ra lemnag ni ba tolang ngak bagadad. Pi thin ni yog Peter ko som’on e ku be tamilangnag ngodad ni gad bang ko fare ulung i walag ni bay u gubin yang u fayleng, ni “taareb rogon” feni ga’ fan michan’ rok Peter nge pi apostal.​—Matthew 23:8; 1 Peter 5:9.

Tamilangan’ nge Tin ni Micheg Got

11. Tomren e tin som’on e thin rok, ma mang e ke tamilangnag Peter nib baga’ fan?

¹¹ Tomren e tin som’on e thin ni yog Peter me yoloy ni gaar: “Ngi i ayuwegmed Got ma be pi’ e gapas nga lanin’med nge yan i mus nga rogon.” Uw rogon nrayog ni nge yoor e ayuw rok Got ngodad nge gapas ni be pi’ nga laniyan’dad? “U daken e tamilangan’ u morngaagen Got nge Jesus ni ir e Somol rodad,” aram e fulweg ku Peter. Ma aram me gaar: “Gelngin Got e ke pi’ ngodad urngin e tin ni nge yog ngodad ngad pired ko wok ni ir e mm’agan’ Got ngay.” Machane uw rogon nrayog e pi n’ey ni baga fan ngodad? “Bochan e kad nanged faanem ni ir e ke piningdad ni ngad uned ngak ko flaab ni ba’ rok ma gadad rin’ e tin nib mat’aw ni bod ir.” Ere ke l’agruw yay ni yog Peter ni ba t’uf e tamilangan’ u morngaagen Got nge Fak.​—2 Peter 1:2, 3; John 17:3.

12. (a) Mang fan ni i tamilangnag Peter fene ga’ fan e tamilangan’ nib riyul’? (b) Mang e thingarda rin’ed ma aram ma gad ra un ko tin ni micheg Got?

¹² I ginang Peter e “pi tamachib ni goo bogi ban’en” ko guruy ni 2 ni yad ma yog e thin ni “sum rorad” ni ngar bannaged e pi Kristiano. Aram rogon ma yad guy rogon ni ngar waliyed yad ngar sulod ko ngongol ndarngal ni kar talgad riy faram. Ma yib wenegan ni rib kireb ko piin ni kan ayuwegrad u daken “e tamilangan’ u morngaagen fare Somol nge An nra Thapegdad ni Jesus Kristus” ma faani munmun mar uned ko pi ban nem. (2 Peter 2:1-3, 20) Be m’ug riy ni be lemnag Peter ni ngki weliy boch morngaagen e re magawon ney taaboch, me ere ke tamilangnag fene ga’ fan e tamilangan’ nib t’uf ni ngan par nib biech u p’eowchen Got. I weliy Peter ni Got e ke “tow’athnagdad ko pi n’en nib th’abi fel’ ni ke micheg ngodad, ya nge yog ngomed e tin ni ke weliy nra pi’ ngomed me yog ngomed rarogon Got.” Machane ra nge yog e pi n’ey, ni aram bang ko michan’ rodad ma ke yog Peter ni som’on ma thingarda “thaygad ko ar’ar ni ma kirebnigey ni bay u roy u falyeng.”​—2 Peter 1:4.

13. Pi Kristiano ni kan dugliyrad nge girdien “yugu boch e saf” e ke mudugilan’rad ni ngar chichiyed pa’rad ko mang?

¹³ Uw rogon u wan’um e pi n’en ni micheg Got? Bod rogon ni ma lemnag e pi Kristiano ni kan dugliyrad fa? Nap’an e duw ni 1991, ma Frederick Franz, ni ir fare president ko fare Watch Tower Bible and Tract Society, ma ke pag 75 e duw ni ke un ko machib nib fulltime, ma ke weliy ko uw rogon u wan’ e piin ni be athapeg ni ngar uned ku Kristus ko gagiyeg ni gaar: “Gad be chichiiy pa’dad nge mada’ ko bin baaray e awa, ma ka gad ra chichiy pa’dad nge mada’ ko ngiyal’ ni ke lebuguy Got e n’en ni micheg ni ‘ke tow’athnagdad ko pi n’en nib th’abi fel’.’” I par Brother Franz ni kari pagan’ ko n’en ni micheg Got ni ran faseg ko yam’ nga tharmiy, ma ke chichiy pa’ ko re michan’ nem nge mada’ ko ngiyal’ ni yim’ ni ke gaman 99 e duw rok. (1 Korinth 15:42-44; Filippi 3:13, 14; 2 Timothy 2:10-12) Ku arrogon e bokum milyon e girdi’ ni yad be chichiiy pa’rad ko michan’ rorad, mi yad l’ag owcherad ko n’en ni micheg Got ni ra paradisnag e fayleng ma ra par e girdi’ riy ni manemus u fithik’ e falfalan’. Gur bagayad e pi girdi’ ney fa?​—Luke 23:43; 2 Peter 3:13; Revelation 21:3, 4.

Rogon u Wan’uy e Pi N’en ni Micheg Got

14. Mang fan ni yog Peter ni pangin nib fel’ e aram e n’en ni ngan puthuy ko michan’ rodad?

¹⁴ Gad be pining e magar ku Got ko pi n’en ni ke micheg ngodad fa? Faanra er rogon, ma be yog Peter ni susun ni ngada daged. “Ereray fan” (ya ke pi’ Got ngodad e pi n’en ni ke micheg nth’abi fel’), ma aram e susun ni ngad athamgilgad ni ngad rin’ed ban’en. Dabda pared nib fel’ u wan’dad ni ngad pared ko michan’ rodad ma ke mus ni kad nanged fan e thin riyul’ ko Bible. Susun ndabi fel’ u wan’dad ni ngad pared ni ke mus ni ke michan’dad ara ke mus ni kad nanged e thin riyul’ ko Bible. Ya dabi gaman! Sana nap’an Peter ma boch e girdi’ u lan e ulung e ur weliyed u morngaagen e michan’ machane ur uned ko ngongol ndarngal. Ba t’uf ni ngar pared nib machalbog e ngongol rorad, me ere gaar Peter: “Ngam puthuyed pangimed nib fel’ nga rogon ni ke michan’med ngak Kristus.”​—2 Peter 1:5; James 2:14-17.

15. (a) Mang fan ni tamilangan’ e aram e n’en nib migid ni ka nog ni ngan puthuy ko michan’ rodad? (b) Ku mang boch e felngin nra ayuwegdad ngad chichiiyed pa’dad ko michan’ rodad?

¹⁵ Tomren ni ke weliy morngaagen e ngongol nib fel’ me weliy Peter nel’ i felngin ni ba t’uf ni ngan puthuy nga rogon ni ke michan’dad ngak Kristus. Ba t’uf e pi felngin ney ya nge yog ni ngad “pared nib mudugil u fithik’ e michan’ rodad ngak Kristus.” (1 Korinth 16:13) Piin ni yad e apostate e ur ‘tunguyed fan’ e thin ko Bible ni ‘ngar weliyed’ ur wereged e “machib ni yigoo ban,” ma aram me yog Peter ni tamilangan’ e baga’ fan ni gaar: “Mi gimed puthuy e tamilangan’ nga pangimed nib fel’.” Me migid me gaar: “Mi gimed puthuy ko tamilangan’ romed e t’ar laniyan’; mi gimed puthuy e k’adan’ ko t’ar laniyan’ romed; mi gimed puthuy ko k’adan’ romed e yan nga laniyan’ Got; ma yan nga laniyan’ Got ni gimed be tay e ngam puthuyed ngay rogon nib t’uf bigimed rok bigimed nrogon e piin ni kar walaggad u daken Kristus; ma rogon nib t’uf bigimed nrogon e piin ni kar walaggad u daken Kristus e ngam puthuyed e t’ufeg ngay.”​—2 Peter 1:5-7; 2:12, 13; 3:16.

16. Mang e ra buch nfaanra yira puthuy e pi felngin ni yog Peter ko michan’ rodad, ma ku mang e ra buch nfaanra dabni puthhuy ngay?

¹⁶ Ra diin nfaanra ngan puthuy e medlip i n’en ney ko michan’ rodad? Gaar Peter: “Faanra bay e pi n’ey romed ni pire’ ma gimed ra passig mi gimed t’ar womengin ni fan ko tamilangan’ nib riyul’ u morngaagen e Somol rodad i Jesus Kristus.” (2 Peter 1:8, NW) Machane ki yog Peter ni gaar: “En ndariy e pi n’ey rok e rib ngoch e changar rok ndabiyog ni nge guy ban’en, ma ke pag talin ni kireb ni i ngongliy kakrom e ka ni maluknag rok ke chuw.” (2 Peter 1:9) Mu tiyan’um ngay ni ke thiliyeg Peter fare bugithin ni “gur” nge “gadad” ku “be’,” nge “ir,” nge “rok.” Boch e girdi’ e mmalmit, ma yad ma pag talin ban’en, ma yad ba alit, machane de yog Peter ni aram rogon e piin ni be poy e re thin ney.​—2 Peter 2:2.

Ke Gelnag Pi Walag

17. Mang e ke n’igin ni nge wenig Peter ni nga un fol ko “pi n’en ney”?

¹⁷ Sana bochan ni ke tamilang u wan’ nib mom boch ni ngan bannag e tin nib biech e girdi’ me pi’ Peter e athamgil nga laniyan’rad ni gaar: “Pi walageg ni girdien Kristus, mu guyed rogon ngam athamgilgad nge yib fan e pong ni ke tay Got ngomed, nge rogon ni ke mel’egmed nguum pired riy; faan gimed ra rin’ ni aray rogon ma ri dabiyog ni ngam thaygad.” (2 Peter 1:10; 2:18) Pi Kristiano ni kan dugliyrad ni yad ma puthuy ko michan’ rorad fa medlip i n’en ney e yad ra flaab ya gaar Peter: “Ereray kanawoen me yog nni pi’ mat’awmed ni aram e gimed ra yan nga lan e gin’en ni bayi par ndariy n’umngin nap’an, ni aram e gin’en ni suwon e Somol rodad i Jesus Kristus, ni ir e en ni ma thapegdad ngak Got.” (2 Peter 1:11) Girdien “yugu boch e saf” e rayog e yafas ni manemus ngorad u fayleng u tan pa’ Gil’ilungun Got.​—John 10:16; Matthew 25:33, 34.

18. Mang fan ni par Peter ni “gubin ngiyal’ ma be puguran” boch ban’en ko pi walag?

¹⁸ Ba adag Peter ni nge yog e re taw’ath nem ko pi walag. Ke yoloy ni gaar: “Ereray fan ni gubin ngiyal’ ni bay ug puguran ngomed e pi n’ey, ni yugu aram rogon ni kam nanged ma kam pired ni gimed mmudugil u fithik’ e tin ni ir e ba riyul’ ni kam nanged.” (2 Peter 1:12) Ke fanay Peter fare bugithin ni Greek ni ste·riʹzo, ni piliyeg ni “mmudugil” ma kan piliyeg ni “gelnag” u nap’an ni yog Jesus ku Peter ni gaar: “Mpi’ e gel nga laniyan’ pi walagem.” (Luke 22:32) Sana fan ni ke fanay Peter e re bugithin nem e bochan ni de pag talin e n’en ni tay e Somol rok chilen ngak. Ere gaar Peter: “Gu be finey ma mmat’aw ni nguug puguran e pi n’ey ngomed u n’umngin i nap’an ni ku gub fos. Ya gu manang ndab ki n’uw nap’an mu gu tay i iram e re dowef rog ney nra yim’.”​—2 Peter 1:13, 14.

19. Miti mang ayuw e ba t’uf rodad ko ngiyal’ ney?

¹⁹ Yugu aram rogon ni ke gol Peter ye yog ko piin be poy e babyor rok ni yad “mmudugil u fithik’ e tin ni ir e ba riyul’,” machane ke tamilang u wan’ ni rayog ni nge kireb rogon nib mich Kristus u wan’rad. (1 Timothy 1:19) Manang ni dabki n’uw nap’an ma ra yim’, me ere ke gelnag laniyan’ pi walag ye weliy boch ban’en nrayog ni ngar sulod nga daken taaboch ni nguur pared nib gel ko tirok Got ban’en. (2 Peter 1:15; 3:12, 13) Ku arrogon gadad ko ngiyal’ ney ma ba t’uf ni ngan puguran ngan’dad u gubin ngiyal’ e pi n’en nra ayuwegdad ngad pared nib mudugil ko michan’ rodad. Demtrug ko gad mini’ ara uw n’umngin nap’an ni kad uned ko tin riyul’, ma dabiyog ni ngad paged i poy e Bible u gubin ngiyal’, nge fol babyor, nge ngan un ko muulung. Boch e girdi’ e ma tawey ko muulung mi yad yog ni kar magargad ara ke mus ni yibe sul nga daken taareb e thin u nap’an e pi muulung ara gathi rib fel’ rogon e welthin ni yibe pi’, machane i nang Peter ko uw fene pay ni rayog ni nge mul e michan’ ku be’ nfaanra ke pag rogon ni be pagan’ ngak.​—Mark 14:66-72; 1 Korinth 10:12; Hebrews 10:25.

Fan ni Nge Mudugil e Michan’ Rodad

20, 21. Uw rogon ni ke gel e michan’ ku Peter nge piin ni ur poyed e babyor rok ni bochan e n’en ni ke guy faani pig ramaen Jesus, maku arrogodad ko ngiyal’ ney?

²⁰ Michan’ rodad e bay ko bogi yat fa thin ni kan tunguy nib fel’ rogon fa? Be gaar Peter: “Dagu torgad nga bogi yat ni girdi’ e sunumeg nggu weliyed ngomed murung’agen gelngin e Somol rodad ni Jesus Kristus nge wub ni bay tay. Ya gguyed nga owchemed fene sorok.” Peter, James, nge John e ur moyed Jesus u nap’an ni ke pig e changar rorad mar guyed ni bay u Gil’ilungun Got. Weliy Peter ni gaar: “Gamad bay u rom me ta’ Got ni Chitamangiy fan Jesus Kristus me piliyeg ramaen downgin nge galgal ko ngiyal’ ni baaram ni yib ba lam ngak, ni yib rok e en ni Th’abi Flaab ni be gaar e re lam nem, ‘Ereray Fakag nrib t’uf rog, ni kari felan’ug ngak.’ Gamad e gu rung’aged e re lam nem ni be yib u tharmiy ngomad nga but’ ko ngiyal’ ni baaram ni gamad ba’ rok u daken fare burey nib thothup.”​—2 Peter 1:16-18.

²¹ Nap’an ni guy Peter, nge James, nge John e re n’em ma dabi siy ni ke riyul’ Gil’ilungun Got u wan’rad! Ere gaar Peter: “Aram fan ni kari pagan’mad ko thin rok Got ni i weliy fapi profet. Ba fel’ ni ngam tiyan’med ko pi thin nem, ya bod ba magal ni be mat ramaen u fithik’ e lumor nge yan i mada’ ko Rofen nem ni bayi puf e woch, ma aram e bayi tamilangnag ramaen e fasuran lanin’med.”​—2 Peter 1:19; Daniel 7:13, 14; Isaiah 9:6, 7.

22. (a) Ku mang e ba t’uf ni ngad tedan’dad ngay? (b) Uw rogon ni rayog ni ngad tedan’dad ko thin ko profet?

²² Ra par lanin’dad u fithik’ e lumor nfaanra dariy e tamilang ko thin ko profet. Machane faanra ra tiyan’ e pi Kristiano ngay ma aram e kar pared ni yad be tiyan’ ko rofen ni bayi puf e woch me yib fare “fasuran” ni aram Jesus Kristus ni be gal ramaen ya bay u Gil’ilungun Got. (Revelation 22:16) Uw rogon nrayog ni ngad tedan’dad ko thin ko profet e ngiyal’ ney? Ngad filed e Bible ma gad fl’eg rogodad ko pi muulung, ma gad un ko boch ban’en u nap’an e muulung, ma gad ‘fl’eg i lemnag e pi n’ey ma gad tiyan’dad ngay.’ (1 Timothy 4:15, NW) Ra nge par e thin ko profet ni bod ba magal ni be mat ramaen u “fithik’ e lumor” (u gumercha’dad), ma thingarda paged ni nge pow’iydad​—ko pi n’en ni gad ma ar’arnag, nge lanin’dad, nge tin ni gad ba adag, nge tin ni gad ma nameg. Ba t’uf ni ngad pared ni gad be fil e Bible ya arrogon ni yog Peter ko tin tomur e thin ni yog ko guruy ni 1 ni gaar: “Dariy bbugithin ni yog e profet ni sum u laniyan’ be’, ya fare kan ni thothup rok Got e yib i ying ngak e girdi’ ngar weliyed e thin ni ke yib rok Got ngorad.”​—2 Peter 1:20, 21.

23. Fa bin som’on e guruy ko 2 Peter e ke fl’eg rogon e girdi’ ko mang?

²³ Bin som’on e guruy ko fa bin l’agurw e babyor ni yoloy Peter e k’aringdad ni ngad chichiyed pa’dad ko michan’ rodad. Ma chiney ma gad ra weliy boch ban’en ni kan nog ko bin migid e thin. Bin migid e thin e ra weliy e pi thin ko guruy ni 2 ko 2 Peter, ya ke weliy fare apostal u morngaagen e pi ngongol nde yalen ni yib nga lan e pi ulung.

Ka Ga Manang?

◻ Mang fan ni tamilangnag Peter rogon fene ga’ fan e tamilangan’ nib riyul’?

◻ Mang fan ni pangin nib fel’ e aram e n’en ni kan nog ni som’on ni ngan puthuy ko michan’ rodad?

◻ Mang fan ni ke par Peter ni gubin ngiyal’ ma be puguran ngak pi walagen boch ban’en?

◻ Mang e yog Peter ni aram fan nrayog ni nge mudugil e michan’ rodad?

[Sasing ko page 16]

Pi n’en nib meewar Peter riy e de n’igin ni nge n’ag e michan’ rok