Nguun Lemnag E Rran Rok Jehovah

“Tin tomur e rran e bay m’ug e girdi’ ni bay ur moninggad ngomed.”​—2 PETER 3:3.

1. Uw rogon e par ko reb e Kristiano ko ngiyal’ ney?

REB e pumoon ni full-time minister ni ke pag 66 e duw e yoloy ni gaar: “Gu ma thamiy ni ke papey gubin ban’en. Gubin ngiyal’ ni gu ma lemnag ni ra yib e Armageddon langleth. (Revelation 16:14, 16) Bod rogon e chitamag nge tutuw rog, gu ma par ni bod rogon ni yog apostal [Peter] ni gaar, ‘nguum ted u laniyan’med e rran rok Jehovah .’ Gubin ngiyal’ ni gu ma lemnag fa bin biech e fayleng ni ke ‘riyul’ ni yugu aram rogon ni dawori buch.’”​—2 Peter 3:11, 12, New World Translation; Hebrews 11:1, NW; Isaiah 11:6-9; Revelation 21:3, 4.

2. Uw rogon ni nguun lemnag e rran rok Jehovah?

² Rogon e thin ku Peter ni “nguum ted u laniyan’med ” e rran rok Jehovah e be yip’ fan ni dabda chuweged u laniyan’dad. Thingar dabda paged talin ni roran nra gathey Jehovah e re m’ag nib kireb ney me lebguy e n’en ni ke micheg u morngagen e fare fayleng nib biech e ke chugur. Thingari riyul’ u wan’dad ma rayog ni ngad guyed ni kari chuchugur ni bay buch. Aram rogon fene riyul’ u wan’ e pi profet rok Got kakrom ma yad ma yog ni ke chugur.​—Isaiah 13:6; Joel 1:15; 2:1; Obadiah 15; Zefaniah 1:7, 14.

3. Mang e ke n’igin ni nge yol Peter u morngaagen e rran rok Jehovah?

³ Mang fan ni ke tay Peter chilen ngodad ni ngad lemniged ni rran rok Jehovah e gowa ra yib ni bod rogon ni kan gaar “langleth”? Ya boor e girdi’ e de michan’rad ni ra yib Kristus ni nge gechignag e piin nib kireb. (2 Peter 3:3, 4) Ere guruy ni 3 ko bin l’agruw e babyor ku Peter ni ngad weliyed morngagen e chiney e ke fulweg Peter e n’en ni yog e pi tatogopuluw ney.

Ba Pong ni Dab Mu Pag Talin

4. Mang e ba adag Peter ni dabda paged talin?

⁴ Rogon fene t’uf pi walagen Peter rok Peter e be dag ko re guruy ney ye piningrad ni “piin nib tuf’ rok.” Ke piningrad ni dab ra paged talin e n’en ni kar filed, me weliy Peter ni gaar: “Pi tafager rog ni gimed ba t’uf rog, . . . Kug guy rogon ni nggu puguran ngomed e pi n’ey ni aram e gu be pug e tafinay romed ni ngam lemniged fapi thin ko profet ni kakrom nge motochiyel ni yib rok Somol ni ir e ma thapegdad ngak Got ni fapi apostal romed e ka rogned ngomed.”​—2 Peter 3:1, 2, 8, 14, 17; Jude 17.

5. Mang e yog boch e profet u morngaagen e rran rok Jehovah?

⁵ Mang “thin ko profet ni kakrom” e ke pi’ Peter e athamgil riy nga laniyan’ e piin ni kar bieged ni dab ra paged talin? Aram e thin ni yad ra un ngak Jesus ko gagiyeg u Gil’ilungun nge morngaagen e pufthin ko piin dariy fan Got u wan’rad. U m’on riy me tamilangnag Peter e pi thin ney. (2 Peter 1:16-19; 2:3-10) Me weliy Jude u morngaagen Enok, ni ir e bin som’on e profet ni ke ginang e girdi’ u morngaagen e pufthin nra tay Got ko piin nib kireb. (Jude 14, 15) Yib yugu boch e profet u tomren Enok, ma dabun Peter ni ngad paged talin e n’en ni ur yoloyed nga but’.​—Isaiah 66:15, 16; Zefaniah 1:15-18; Zekariah 14:6-9.

6. Mang boch ban’en ni yog Kristus nge pi apostal rok ni ma tamilangnag ngodad u morngaagen e rran rok Jehovah?

⁶ Miki yog Peter ko piin ni be poy e babyor rok ni dabra paged talin fapi “motochiyel ni yib rok Somol ni ir e ma thapegdad ngak Got.” I tay Jesus chilen ni gaar: “Mu ayuwgad, m dab mpaged gimed nguum pired ni kayigi yoor ban’en ni gimed be rin’ . . . ya richey mi gimed da’da’ ko re Rran nem ni ke taw ngomed.” “Mu ayuwgad mi gimed tiyan’med, ya da mu nanged e ngiyal’ nra taw ko re ngiyal’ nem.” (Luke 21:34-36, NW; Mark 13:33) Miki yog Peter ni ngan fol ko pi n’en ni yog e pi apostal. Susun, bod ni yoloy apostal Paul ni gaar: “Chirofen ni ir e re Rran rok Jehovah e bay taw ni bod be’ nib moro’ro’ ni yib nnep’. Ere dab ud molod ni bod boch e girdi’, ya nguud pired ni gadad be od ma ba tamilangan’dad.”​—1 Thessalonika 5:2, 6.

Pi N’en ni Ma Ar’arnag e Piin Tatogopuluw

7, 8. (a) Miti mang girdi’ e yad e piin ni ma moningnag e thin rok Got ni ma ginangey? (b) Mang e yog e pi ta moning nem?

⁷ Kan nog faram ni fan ni ke pi’ Peter e re fonow nem e bochan ni ke moningnag boch e girdi’ rogon ni ginangey, ni bod ni rin’ piyu Israel ni ur moningnaged e pi profet rok Jehovah. (2 Kronicles 36:16) Weliy Peter ni gaar: “Bin som’on e thingar mu nanged ni tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed.” (2 Peter 3:3) Yog Jude ni pi n’en ni be ar’arnag e piin ni be moning e be sor fan ko “tin ndariy rogon ngak Got.” Me yog ni yad e “piin bod e gamanman, ma gathi tirok Got ban’en e be gagiyegnagrad.”​—Jude 17-19, NW.

⁸ Pi tamachib ni goo bogi ban’en ni yog Peter ni yad ma “fol ko tin nib golong e ngongol ni be yim’ e dowef rorad ni bochan” e yad boch fa piin ni kar moninggad ma dariy an’rad ko tirok Got ban’en. (2 Peter 2:1, 10, 14) Yad ma moning mi yad fith boch e deer ko pi Kristiano nib yul’yul’ ni gaar: “I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney.”​—2 Peter 3:4.

9. (a) Mang fan ni ba adag e pi ta moning ni ngar dariy fannaged e par nib od ni yibe yog ko Thin Rok Got? (b) Uw rogon ma ra yib angin ngodad ni nguuda lemnaged e rran rok Jehovah?

⁹ Mang fan ni ur moninggad ni aram rogon? Mang fan ni ur rogned ni dabi sul Kristus, ma dariy biyay ni ke rin’ Got ban’en ni nge ayuweg e girdi’ ma dab kaa rin’? Ya faanra yad ra dariy fannag rogon ni ngan par nib od ni arrogon ni bay ko Thin Rok Got, ma pi ta moning ney ni yad bod e gamanman e yad be guy rogon ni nge pag e girdi’ e tirok Got ban’en ma aram ma ra mom ni ngan waliyrad ngar rin’ed e tin ni be ar’arnag dowrad. Re n’ey e susun ni nge k’aringdad ngad pared nib od ko tirok Got ban’en! Nguud ted e rran rok Jehovah u laniyan’dad ma dabda paged talin ni gubin ngiyal’ ma be sap ngodad! Ma aram e ra k’aringdad ngad pigpiggad ku Jehovah u fithik’ e passig ma nguud pared nib machalbog e gafarig rodad.​—Psalm 11:4; Isaiah 29:15; Ezekiel 8:12; 12:27; Zefaniah 1:12.

Ke M’agan’rad Ngay ma Ri Yad ba Kireb

10. Uw rogon ni micheg Peter nib googsur e n’en ni yog e pi ta moning?

¹⁰ Pi tamoning nem e yad be siyeg i lemnag ban’en nib baga’ fan. Yad ma siyeg ma yad ma guy rogon ni ku ra pag talin e girdi’ e re n’em. Ya mang fan? Ya nge mom ni ngar waliyed e girdi’. Yoloy Peter ni gaar: “Machane, dubrad ni ngar tafinaynaged e re bugithin ni baaray nib riyul’.” Mang fare thin riyul’? “Kakrom e non Got me sum e pi tharmiy nge fayleng. Me yib e but’ u fithik’ e ran nga lang ni ran e yodoromnag, ma ku ran ni fare ran ni yib nge tharey e nam e ir e kirebnag e bin kakrom e fayleng.” (2 Peter 3:5, 6) Arrogon bay biyay ni ke chuweg Jehovah e kireb u fayleng u nap’an ni ke tharey e fayleng ko Day u nap’an Noah, ni aram bbugithin nriyul’ ni weliy Jesus morngaagen. (Matthew 24:37-39; Luke 17:26, 27; 2 Peter 2:5) Ere ke math keru’ ko n’en ni yog e piin ta moning ya urngin ban’en e de par ni ka rogon ni ka nap’an e ngiyal’ ni sum e fayleng riy ke mada’ ko chiney.”

11. Mang boch ban’en ni lemnag e pi Kristiano ni ra buch nib pay ma aram fan ni kan moningnagrad?

¹¹ Sana ke togopuluw e piin ta moning ko pi Kristiano nib yul’yul’ ya ur lemnaged boch ban’en nra buch ma de riyul’. Boch u m’on ni yim’ Jesus, ma pi gachalpen e kar fineyed ni “gagiyeg rok Got e kari chugur ni nge m’ug.” Ma tomren ni kan faseg ko yam’ mu ur fithed ko ran tabab ko Gagiyeg rok Got e chi ngiyal’ nem fa. Maku, sogonapan ragag e duw u m’on ni yoloy Peter e bin l’gruw e babyor rok ma boch e girdi’ e ke “wagagey lanin’rad” ni bochan e “ka nog e re buithin nem” ara kan “yoloy nga babyor ke yan ku be’,” ni be yog ni aram e thin rok apostal Paul ara yugu be’ ni ke yog ni “re Rran nem ni nge yib Jehovah riy e ke taw.” (Luke 19:11, NW; 2 Thessalonika 2:2; Acts 1:6) Machane gathi googsur e n’en ni yog pi gachalpen Jesus, ya ke mus ni kar olobochgad ko ngiyal’ nra yib. Rran rok Jehovah e ra yib!

Rayog ni Ngan Taga’ Nga Daken e Thin Rok Got

12. Mang fan nrayog ni ngan taga’ nga daken e Thin Rok Got ko pi n’en ni kan yiiynag u morngaagen e “rran rok Jehovah”?

¹² Rogon ni kan nog faram ma pi profet u m’on ko ngiyal’ ko Kristiano e kan ginangrad ni ke chugur e rofen ni pufthin rok Jehovah. Ke yib reb e “rran rok Jehovah” ni ba achig ko duw ni 607 B.C.E. ni aram e ngiyal’ ni ke gechignag Jehovah e girdi’ rok ni kar mal’afgad nga orel rok. (Zefaniah 1:14-18) Ma boch nga tomren ma yugu boch e nam nib muun ngay yu Babylon nge yu Egypt, e ke yib e “rran rok Jehovah” ni aram rogon nga dakenrad. (Isaiah 13:6-9; Jeremiah 46:1-10; Obadiah 15) Kan yiiynag ni ran thang e nam ko piyu Jew u nap’an e bin som’on e chibog, ma ke buch e re n’em u nap’an ni yib e pi salthaw nu Roma nga Judea ko duw ni 70 C.E. (Luke 19:41-44; 1 Peter 4:7) Machane be tamilangnag Peter u morngaagen yugu reb e “rran rok Jehovah” ni bay nga m’on ma faanra ran taarebnag ma ra m’ug riy ni kab war fare Day ni ke tharey e fayleng ko re rran nem!

13. Mang e buch kakrom ni be dag nib mmutrug ni ra taw ko tomur ko re m’ag ney?

¹³ Weliy Peter u morngaagen e re ngiyal’ i nem ni bayi yib ni gaar: “Machane ka re bugithin nem rok Got.” Ka fini mu’ i yog ni i “non Got,” ma fare fayleng kakrom u m’on ni yib fare Day me “yib e but’ u fithik’ e ran nga lang ni ran e yodoromnag.” Re n’ey e kan weliy morngaagen u Bible ko ngiyal’ ni sunumiy Got e fayleng, ma bochan e re n’ey ma ke yog ni nge yib e Day nge tharey e fayleng ko ngiyal’ ni yog Got e re bugithin nem. I ul’ul’ Peter ngay ni gaar: “Machane lan e lang nge re fayleng ney ni ba’ e chiney e ka re bugithin nem rok Got e ir e ke tay ndabi kireb nge yan ni mada’ ko ngiyal’ ni nge yib e nifiy i kirebnag. Ke tay Got ndabi kireb ni fan ko chirofen ni bay ni pufthinnag e girdi’ nib kireb nge mu’ min kirebnagrad.” (2 Peter 3:5-7; Genesis 1:6-8) Rayog ni ngad taga’gad nga daken fa yu bugithin ni yog Jehovah! Ra yibnag e tomur ko “lan e lang nge re fayleng ney”​—ni aram e re m’ag ney​—u nap’an e rran rok nib gel e damumuw rok! (Zefaniah 3:8) Ma wuin e re n’em?

Yibe Sonnag e Ngiyal’ ko Tomur

14. Mang fan nrayog ni nge mich u wan’dad ni gad be par ko ngiyal’ ni ka nog ni “tin tomren e rran” ngay?

¹⁴ Ba adag pi gachalpen Jesus ni ngar nanged ko wuin ni ra yib e ngiyal’ ntomren e fayleng, me ere ur fithed ngak ni lungurad: “Mog ngomad e n’en nra yib ni nge dag ni ke taw ko ngiyal’ ni bay mub riy nge ngiyal’ ni tomren e re m’ag ney?” Be m’ug riy ni yad ba adag ni ngar nanged e ngiyal’ nra thumur e m’ag ko piyu Jew, machane fulweg ni pi’ Jesus e sor fan ko ngiyal’ nran thang e ‘lan e lang nge fayleng’ ko ngiyal’ ney. I yiiynag Jesus ni ra yib boch ban’en ni bod e mahl ni baga’, nge uyungol, nge durru’, nge m’ar, nge bugel. (Matthew 24:3-14; Luke 21:5-36) Ka nap’an e duw ni 1914, ma kad guyed ni be lebug e re pow nem ni yog Jesus ni aram e pow ko “tin tomren e rran ko re m’ag ney” nge ku fa pi n’en ni yog apostal Paul ni ra tamilangnag e ngiyal’ ni “tin tomren e rran.” (2 Timothy 3:1-5) Rriyul’, kari gel e mich riy ni gad be par ko ngiyal’ ntomren e re m’ag ney!

15. Mang e rin’ boch e Kristiano ni yugu demtrug e n’en ni yog Jesus?

¹⁵ Ri ba adag e Pi Mich Rok Jehovah ni ngar nanged ko wuin nra yib e rran rok Jehovah. Bochan ni ri yad be sonnag e rofen nem ma yu ngiyal’ mar sananaged e ngiyal’ nra yib. Machane bochan ni ur yodoromgad ma ur boded pi gachalpen Jesus kakrom ni dar tedan’rad ko n’en ni yog e Masta rorad ngorad ni yog ni “da mu nanged e ngiyal’ nra taw ko re ngiyal’ nem.” (Mark 13:32, 33) Piin ta togopuluw e ur moningnaged e pi Kristiano nib yul’yul’ ya ur rogned e ngiyal’ nra yib ma de yib. (2 Peter 3:3, 4) Machane, yog Peter ni ra yib e rran rok Jehovah ko ngiyal’ ni ir e ke turguy.

Ba T’uf e Lem nib Puluw ko Lem Rok Jehovah

16. Mang thin ni bay e gonop riy ni ngan fol riy?

¹⁶ Ba t’uf rodad ni nge puluw e lem rodad ko lem rok Jehovah nib sor fan ko tayim, ya arrogon ni yog Peter ngodad ni gaar: “Machane pi tafager rog ni gimed ba t’uf rog, dab mpaged talin e re bugithin ni baara’: rogon ko changar rok Jehovah e dariy ban’en nib thil u thilin taareb e rran nge bbiyu’ e duw, ya l’agruw ni taareb rogon u wan’.” Rib ngoch e yafas rodad ya ke mus ni 70 fa 80 e duw n’umngin nap’an! (2 Peter 3:8; Psalm 90:4, 10) Ere faanra be m’ug riy ni ke sagaal Got ni nge lebuguy e tin ni ke micheg, ma ba t’uf ni ngad folgad ko pi thin ni yog e profet rok Got ni baara’: “Bay mu lemnag nib sowath [fare ngiyal’ ni kan dugliy], machane ngam sonnag; ya ra yib i m’ug ko ngiyal’ ni kan dugliy, ma dabi sowath.”​—Habakkuk 2:3.

17. Yugu aram rogon ni ke pag nap’an ni be ul’ul’ iyan e tin tomren e rran machane mang e rayog ni nge michan’dad ngay?

¹⁷ Mang fan ni ke ul’ul’ iyan e re m’ag ney ni ke pag nap’an u wan’ e girdi’? Bay fan ko re n’em ya ke weliy Peter e bin migid ni gaar: “Dawori sowath Jehovah ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9, NW) Ma lemnag Jehovah e n’en nib fel’ ni fan ko urngin e girdi’. Ba adag ni nge ayuweg e pogofan ko girdi’ ya arrogon ni yog ni gaar: “Dagu adag ni ngug guy reb e tadenen ni nge yim’. Ku gub adag ni ngug guy ni ke tal ndakir denen nge par nib fos.” (Ezekiel 33:11) Ere rayog ni nge mich u wan’dad ni ra yib e tomur ko nigyal’ nib puluw ni nge lebuguy e tin nib m’agan’ e An Tasunumiydad ngay ni ir be’ nib gonop mab ta marunguy!

Mang e ra Yan nga Bayang?

18, 19. (a) Mang fan ni ke turguy Jehovah ni nge thang e re m’ag ney? (b) Uw rogon ni weliy Peter u morngaagen e tin tomren e rran ko re m’ag ney, ma ri mang e yira thang?

¹⁸ Bochan ni rib t’uf Jehovah rok e piin ni yad ma pigpig ngak, ma aram fan ni ra chuweg urngin e piin ni ma magawonnagrad. (Psalm 37:9-11, 29) Bod rogon ni weliy Paul faram miki weliy Peter ni ra yib fare magothgoth ko ngiyal’ ndan nang: “Ya chirofen ni Rran rok Jehovah e bayi taw ni bod rogon ba moro’ro’. Chirofen nem e bay yan nga bayang lan e lang ni be falgar lingan, ma urngin e tin ni bay u lan e lang ban’en ni bayi yik’ nge m’ay nga bayang, ma fayleng nge urngin e tin ni ba’ riy e bayi gagiyel.” (2 Peter 3:10; 1 Thessalonika 5:2) De chuw lan e lang nge re fayleng ney u nap’an ni yib fare Day ni ke tharey e fayleng, me ere ku dabi chuw u nap’an e rran rok Jehovah. Ere mang e ra “yan nga bayang,” ni aram e ran thang?

¹⁹ Pi am ko girdi’ ni yad be gagiyegnag e girdi’ ni bod “lan e lang” e yad ra chuw maku arrogon fare “fayleng” ni aram e girdi’ ndariy fan Got u wan’rad. Ma fare n’en ni “falgar lingan” e sana be sor fan ko rogon fene pay ni ra thumur lan e lang. Ma “urngin e tin ni ba’” u fayleng e ma sor fan ko girdi’ nib kireb ma “bay kireb,” ni aram e ran thang mit. Ma fare “fayleng” nib muun ngay “urngin e tin ni ba’ riy,” e “bayi gagiyel.” Ya ra tamilangnag Jehovah e ngongol nib kireb ko girdi’ u nap’an ni ra thang e re m’ag nib kireb ney ya aram puluwrad.

Nguum Yiluy Owchem ko Athap Rom

20. Susun uw rogon e par rodad ni bochan e tamilangan’ u morngaagen e pi n’en ni bay nga m’on rodad?

²⁰ Ke chugur ko ngiyal’ nra buch e pi n’ey, me ere yog Peter ni susun ni nge par “pangidad nib thothup ma kad pied gadad nga pa’ Got, ma gad sonnag e chirofen nem, ni ir e rran rok Jehovah, ma gad athamgiliy nrogon nrayog rodad nge papey nge taw ngay.” Dariy e maruwar riy! “Rofen ni baaram ni bay yik’ lan e lang nge kireb e urngin ban’en ni bay u lan e lang e bayi ranrannag e gowel!” (2 Peter 3:11, 12) Bochan nrayog ni gabul ma ra tabab e pi n’ey me ere susun ni aram e n’en nra gagiyegnag urngin ban’en ni gad ma rin’ nge tin ni gad be finey ni ngad rin’ed.

21. Mang e ra yan nga luwan e lan e lang nge fayleng ni bay ko ngiyal’ ney?

²¹ Bin migid me weliy Peter ko mang e ra yib nga luwan fa binem e m’ag me gaar: “Machane ke yog Got ni bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” (2 Peter 3:13; Isaiah 65:17) Rayog e toffan ko re ngiyal’ i n’em! Kristus nge fa piin ni yad 144,000 ni ra un ngak ko gagiyeg e yad fa “bin nib biech” e “lan e lang” ara am, ma piin ni ra magay nib fas u tomren e re fayleng ney e yad fa “bin nib biech e fayleng.”​—1 John 2:17; Revelation 5:9, 10; 14:1, 3.

Nguun Par ni Yib Od mab Machalbog e Gafarig

22. (a) Mang e ra ayuwegdad ngad pared nib machalbog ma dariy thibngidad ko tirok Got ban’en? (b) Mang riya’ e ke ginangey Peter u morngaagen?

²² I ul’ul’ Peter ngay ni gaar: “Pi tafager rog, n’umngin nap’an ni gimed be par ni gimed be sonnag e re rran nem e nguum athamgiliyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got. Mu lemniged e gum’an’ rok e Somol rodad, ni aram e tayim ni be pi’ ngomed ni ngam guyed rogon ni ngkam thapgad ngak.” Rayog ni ngad pared nib mmachalbog ma dariy thibngidad nfaanra gad ra par ni gad be sonnag e rran rok Jehovah ma gad lemnag e gum’an’ rok Got ni aram e tayim ni be pi’. Machane bay e riya’! I ginangey Peter ko fa pi n’en ni ke yoloy “walagdad i Paul nib t’uf rodad . . . Ba’ boch ban’en u lan e babyor rok nib mo’maw’ ni ngan nang fan, ni girdi’ ndar nanged fan nge girdi’ ndar mudugilgad e yad be tunguy fan ngar weliyed, ni bod rogon e n’en ni yad be rin’ nga yu thal e thin ni bay u lan e babyor nib thothup; ni aram e yad e kar girngiyed e gechig nga dakenrad ni aram e bay ni kirebnagrad.”​—2 Peter 3:14-16.

23. Mang fonow ni pi’ Peter ko tomur?

²³ Pi tamachib ni goo bogi ban’en e ur tunguyed fan e pi n’en ni ke yoloy Paul u morngaagen e runguy rok Got, ni aram e tawey rorad ni ngar uned ko ngongol nde yalen. Sana aram e n’en ni be lemnag Peter u nap’an ni ke yoloy ni gaar: “Machane gimed e pi tafager rog e goo kam nanged e re bugithin ney. Ere mu gonopiyed gimed, nge dabiyog ni waliymed nga bayang e oloboch ni be tay e piin ndariy fan e motochiyel u wan’rad ngam thaygad ko gin ni kam pired riy ndabi buch ban’en romed riy.” Nge mu’ ma ke yoloy ko tomur ni gaar: “Somol rodad i Jesus Kristus ni ir e ke thapegdad ngak Got e ngi i ayuwegmed nguum mon’oggad i yan ma gimed be nang i yan.”​—2 Peter 3:17, 18.

24. Susun uw rogon e lem ko urngin e pi tapigpig rok Jehovah?

²⁴ Ba tamilang ni ba adag Peter ni nge gelnag pi walagen. Ba adag ni urngin e girdi’ me taareb e lem rorad ko facha’ ni 82 e duw rok me ir e Mich ni ke gaar faram: “Gu ma par ni bod rogon ni yog fare apostal, ‘nguum ted u laniyan’med e rran rok Jehovah .’ Gubin ngiyal’ ni gu ma lemnag fa bin biech e fayleng ni ke ‘riyul’ ni yugu aram rogon nu dawori buch.’” Ngad pared ko yafas rodad ni aram rogon.

Uw Rogon ni Ga Ra Fulweg?

◻ Mang fan fare thin ni “nguun lemnag” e rran rok Jehovah?

◻ Pi ta moning e yad ma dariy fannag e mang, ma mang fan?

◻ Mang fan ni ma moningnag e pi tatopuluw e pi Kristiano nib yul’yul’?

◻ Ba t’uf rodad ni ngad pared ni gad be lemnag e mang?

[Sasing ko page 30]

Nguun lemnag e rran rok Jehovah . . .

[Sasing ko page 31]

. . . nge fa bin ni biech e fayleng ni bay yib u tomren