“Fare Rran Rok Jehovah Nib Ga’ E Ke Chugur”

“Fare rran rok Jehovah nib ga’ e ke chugur. Ke chugur ma rib machreg ni be yib.”​—ZEFANIAH 1:14, NW.

1, 2. (a) Mang e rran nib ga’ fan ni be sonnag e pi Kristiano? (b) Ma mang boch e deer nib t’uf ni ngad deeriyed, ma mang fan?

BA RUGOD e be felfelan’ ni ri be sonnag ni nge taw e rorran ni nge mabgol. Ba matin nib diyen e ri be athapeg u fithik’ e t’ufeg e rorran ni nge gargeleg fak. Be’ ni ma maruwel ni kari magar e ri be yim’ nbochan ni nge tabab e toffan rok ni ke n’uw nap’an ni be sonnag. Mang e n’en nib taareb rogon rorad? Yad gubin ni yad be sonnag reb e rran nib ga’ fan​—reb e rran nra rin’ ban’en ko yafas rorad. Pi n’en ni yad be thamiy nib gel e ba thil. Fare rran ni yad be sonnag e bayi munmun me taw, ma nap’an nra taw, ma ke fel’ rogorad kar pired.

² Tin riyul’ e Kristiano e chiney e ku aram rogon ni ri yad be sonnag ni nge taw ba rran nib ga’ fan. Ni aram fare “rran rok Jehovah.” (Isaiah 13:9; Joel 2:1; 2 Peter 3:12, NW) Mang fare “rran rok Jehovah” ni bay yib, ma ra yib ma mang e ra rin’ ko girdi’? Maku reb, uw rogon nrayog ni nge mudugilan’dad ni ke fel’ rogodad ni nge taw? Rib ga’ fan ni ngad gayed e fulweg ko pi deer ney e chiney ya mich e be dag feni riyul’ e pi thin ni baaray ko Bible ni gaar: “Fare rran rok Jehovah nib ga’ e ke chugur. Ke chugur ma rib machreg ni be yib.”​—Zefaniah 1:14, NW.

“Fare Rran rok Jehovah nib Ga’”

3. Mang “fare rran rok Jehovah nib ga’”?

³ Mang “fare rran rok Jehovah nib ga’”? U lan e Bible, ma fare thin ni “fare rran rok Jehovah” e be yip’ fan ba ngiyal’ ni ba ga’ fan nra pufthinnag Jehovah e pi toogor rok me gilbuguwan fithingan ni ba ga’. Piin ni dar yul’yul’gad ni yad piyu Judah nge Jerusalem maku arrogon e girdi’ ni kireb ni ma par u Babylon ngu Egypt e yad gubin nra mada’naged ‘pi rran rok Jehovah’ ko ngiyal’ ni yib e pufthin rok. (Isaiah 2:1, 10-12; 13:1-6; Jeremiah 46:7-10) Machane, fa bin th’abi ga’ e “rran rok Jehovah” e ka bay nga m’on. Aram fare “rran” nra pufthinnag e piin ni ur dariyfannaged fithingan. Ra tabab ko magothgoth ni ngan tay ko “Babylon nib Gilbuguwan,” ni urngin e teliw ni googsur u fayleng, me ni mus ko ngan gothey e tin ka bay ko fare m’ag nib kireb u nap’an fare mahl ni Armageddon.​—Revelation 16:14, 16; 17:5, 15-17; 19:11-21.

4. Mang fan ni oren e girdi’ e thingari tamdag ko fare rran rok Jehovah ni be yib nib papey?

⁴ Demtrug ko yad be nang fa danga’, ma oren e girdi’ e thingari tamdag ko re rran ney ni be yib nib machreg. Mang fan? I fulweg Jehovah u daken fare profet ni Zefaniah ni gaar: “Re rran nem e ba rran ko damumuw, ba rran ko mochuch nge gafgow, ba rran ko yoko’ nge magothgoth, ba rran ni ba mu lumor ma ba limolang, ba rran ko manileng nib dib’ag mab lumor.” Rib gel e marus riy! Maku reb, e gaar fare profet: “Bay gu k’aring e mochuch ko girdi’ . . . nbochan e Jehovah e ur denengad nib togopluw ngak.”​—Zefaniah 1:15, 17, NW.

5. Mang fan ni bokum milyon e girdi’ e ri yad be athapeg fare rran rok Jehovah?

⁵ Machane, bokum milyon e girdi’ ni ri yad be lemnag e ngiyal’ ni nge taw fare rran rok Jehovah. Mang fan? Yad manang ni aram e ngiyal’ ni ngan thapeg min ayuweg e piin nib mat’aw, ba rran ni Jehovah e ir rok e ngan tay fan ma fithingan nib lingagil e ngan thothupnag. (Joel 3:16, 17; Zefaniah 3:12-17) Ngan rus ko rorran nem fa ngan athapeg ni nge yib e rib ga’ ni be yan u rogon e n’en ni be rin’ e girdi’ ko yafas rorad e chiney. Uw rogon ni ga be sap ko re rran nem ni be yib? Kam fal’eg rogom ni fan ngay? Fare n’en riyul’ ni rran rok Jehovah e ka ri chugur e bay ban’en ni be rin’ ko yafas rom u reb e rran ngo reb e chiney fa?

‘Bay Yib e Piin Tamoning nge Moning Rorad’

6. Uw rogon ni ma sap oren e girdi’ ko fare “rran rok Jehovah,” ma mang fan ni tin riyul’ e Kristiano e darur gingad ko re n’ey?

⁶ Dariy fan ni aram feni gur ere ngiyal’ i n’em, ma oren e girdi’ u fayleng e darur lemnaged fare “rran rok Jehovah” ni be yib. Yad be gosgos ma yad be moningnag e piin ni yad be yog ngorad ni ke chugur ni nge taw. Tin riyul’ e Kristiano e darur gingad ko re n’ey. Darur paged talin fare ginang ni yoloy apostal Peter ni gaar: “Bin som’on e thingar mu nanged ni tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed ni be lungurad, ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!’”​—2 Peter 3:3, 4.

7. Mang e ra ayuwegdad ni ngad pired ni gad be lemnag ni re rran nem e be yib nib gur?

⁷ Mang e ra ayuwegdad ngada paged e lem ni de puluw me yog ni da lemnaged ni re rran nem e be yib nib gur? I yog Peter ngodad ni gaar: “Kug guy rogon riy ni nggu puguran ngomed e pi n’ey ni aram e gu be pug e tafinay nib machalbog u lanin’med. Gub adag ni ngam lemniged fapi thin ni i yog fapi profet ni kakrom ni yad ba thothup, nge motochiyel ni yib rok Somol ni ir e ma thapegdad ngak Got ni fapi apostal romed e ka rogned ngomed.” (2 Peter 3:1, 2) Gad ra tiyan’dad ko pi ginang ni bay ko yiiy ma ra ‘ayuwegdad nge tamilangnagdad.’ Sana kada rung’aged e pi puguran ney ni ke yoor yay, machane ka ri ga’ fan e chiney, ko kafram ni ngad ul’ulgad i tayan’dad ko pi ginang ney.​—Isaiah 34:1-4; Luke 21:34-36.

8. Mang fan ni boor e piin ni yad ma darifannag e puguran nu Bible?

⁸ Mang fan ni boch e girdi’ e ma darifannag e pi puguran ney? I ul’ul Peter ngay nge gaar: “Machane daburad ni ngar tafinayniged e re bugithin ni baaray nib riyul’: kakrom e non Got me sum e pi tharmiy nge fayleng. Me yib e but’ u fithik’ e ran nga lang ni ran yodoromnag, ma ku ran ni fare ran ni yib nge tharey e nam e ir e kirebnag e bin kakrom e fayleng.” (2 Peter 3:5, 6) Arrogon, bay e piin ni dubrad ni nge taw fare rran rok Jehovah. Dubrad ni ngan magawonnag e yafas rorad. Dar adaged ni ngar weliyed ban’en ngak Jehovah nbochan rarogon e yafas rorad ni fel’ ngak! Bod ni yog Peter ni, yad be par ‘nrogon ni yad ba adag.’

9. Mang ngongol e i dag e girdi’ u nap’an Noah nge Lot?

⁹ Bochan e tin ni ‘yad be tafinaynag,’ ma pi tamoning ney e kab fel’ u wun’rad ni ngar darifannaged e n’en ni i rin’ Jehovah ngak e girdi’ kakrom. Jesus Kristus nge apostal Peter e yow l’agruw ni ka rognew murung’agen l’agruw yay ko pi n’en nem, ni fapi “rran rok Noah” nge “pi rran rok Lot.” (Luke 17:26-30; 2 Peter 2:5-9) U m’on ko fare Ran ni tharey e fayleng, ma da i motoyil e girdi’ ko ginang ni i pi’ Noah ngorad. Maku arrogon, u m’on ni gothey yu Sodom nge Gomorrah, rogon ni lemnag fa gal pagel ni figirngin pi fak Lot, “e be thin ni gosgos.”​—Genesis 19:14.

10. Mang e rin’ Jehovah ngak e piin da ur tedan’rad?

¹⁰ Dariy e thil riy ko chiney. Machane, mu guy e n’en ni rin’ Jehovah ngak e piin dar tedan’rad: “Bay gu sap ngak e piin kar elniged yad ma be lungurad u lanin’rad, ‘dabi rin’ Jehovah e n’en nib fel’ ma dabi rin’ e n’en nib kireb.’ Ma fel’ rogon rorad e bay ni iring u fithik’ e yargel ma naun rorad e bay ni n’ag nge maadab. Ma bay ra toyed e naun ma dab ra pared ngay; ma bay ra yunged yungi grape ma dab ra unumed e wain riy.” (Zefaniah 1:12, 13, NW) Girdi’ e bay ur ul’ulgad i rin’ e maruwel rorad ni ka yad “ma rin’” ni yu rran, machane dabi yib angin e maruwel nga pa’rad nib gel nib n’uw nap’an. Mang fan? Ya bochan ni rran rok Jehovah e ra taw nib tomgin, ma demtrug oren e fel’ rogon nu fayleng ni bay rorad ma dabiyog ni nge ayuwegrad.​—Zefaniah 1:18.

‘Ngaun Sonnag’

11. Mang fonow e thingar da ted u lanin’dad?

¹¹ De taareb rogon ko fayleng nib kireb ni ke liyegdad, thingar ud ted ngan’dad fare ginang ni yoloy fare profet ni Habakkuk ni gaar: “Dawori taw nga nap’an ni nge yib i m’ug. Machane ngal’an e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3) Ku ra ke m’ug e re rran nem ni gowa ke sowath u rogon e lem rodad nde flont, ma thingar uda nanged ni Jehovah e de sowath. Rran rok e bay yib u ngal’an ni ngeb, u ba awa ni der finey e girdi’ nra yib riy.​—Mark 13:33; 2 Peter 3:9, 10.

12. Mang e n’en ni yog Jesus, ma mang e ba thil ko re n’ey nge tin be rin’ pi gachalpen Jesus nib yul’yul’?

¹² I fal’eg Jesus i weliy feni ga’ fan ni ngaun sonnag e rran rok Jehovah, me yog u m’on ni ki mada’ ngak boch pi gachalpen ni bay dab kur lemnaged nib gur e re rran nem ni be yib. I yog u m’on murung’agrad ni gaar: “Ma faanra ir reb e tapigpig nib kireb, ma ra gaar u wan’, Masta rog e kab n’uw nap’an mfini sul, ma aram me tabab i pirdiiy e pi tapigpig ni yad, ma be un ngak e piin ni yad ba ta muun rrum ko abich nge muun rrum. Ma aram e bayi reb e rran me sul fare masta rok fare tapigpig nder finey nra sul riy ngu ba ngiyal’ nde nang; ma aram e bayi theth’ab fare masta faanem nnochiyang min uneg ko n’en ni ngan rin’ ngak fapi cha’ ni yad ma dake modingniged yad.” (Matthew 24:48-51) Ba thil ko fare tapigpig nib yul’yul’ mab gonop ni be par nib yul’yul’ i lemnag feni gur e re rran nem ni bay yib. Fare tapigpig nib yul’yul’ mab gonop e be par ni be son ma ke micheg ni ke fal’eg rogon. Ke tay Jesus ni ir e nge mil fan “urngin ban’en rok ngak” u roy u fayleng.​—Matthew 24:42-47.

Ba T’uf ni Ngan Gurgur

13. Uw rogon ni yog Jesus feni ga’ fan ni ba t’uf ni ngaun lemnag ni ngan gurgur?

¹³ Rib ga’ fan ko pi Kristiano ko bin m’on e chibog ni nguur pired ni yad be lemnag nib gur e re rran nem ni be yib. Ba t’uf rorad ni ngar milgad nib papey u Jerusalem u nap’an ni yad ra guy fare mach ni “ke longobiy yu raba’ i salthaw”. (Luke 21:20, 21) Re n’em e buch ko duw ni 66 C.E. Mu guy rogon ni yog Jesus nib ga’ fan ni nge gur e lem ko piin Kristiano ngiyal’ nem ni gaar: “En ni bay u daken e chigiy ko naun rok e dakuriy nap’an ni nge luw nga but’ nge fek e chugum rok u naun rok. Ma en ni bay u milay’ e thingari dabi sul nga naun rok nge fek wuru’ e mad rok.” (Matthew 24:17, 18) Bochan ni be dag e chep ni yu Jerusalem e dariy ban’en ni buch rorad u lan aningeg e duw, ma mang fan ni piin ni Kristiano e ba t’uf ni ngar gurgad ngar folgad ko thin rok Jesus ko duw ni 66 C.E.?

14, 15. Mang nib ga’ fan ko Kristiano ko bin m’on e chibog ni dab ra sagaalgad ni ngar milgad u nap’an ni yad ra guy yu Jerusalem ni ke longobiy yu raba’ i salthaw?

¹⁴ Aram rogon nriyul’ ni salthaw nu Roma e de gothey yu Jerusalem nge ni taw ko duw 70 C.E., ma pi duw ni baaram u thilin e gathi ba gapas. Danga’! Pi duw nem e ba sug ko bugel nge cham. Be’ nib moon ni ma yoloy e chep e weliy rarogon yu Jerusalem e ngiyal’ nem e i “mahl e girdi’ nib gel e marus riy ma boor e racha’ ni map’ riy, nib chagil ngay e ngongol ni kireb ndariy e runguy riy.” Pumoon nib fel’ yangaren en fekrad ni nga ra gelnaged matanagin e nam, ma ngar feked talin e cham, ma ngar uned ko salthaw. Ura fol mahlgad ni gubin e rran. Ma piin ni dar pi’ e ayuw e yibe sap ngorad ni yad e piin toogor. Faan manga par e piin Kristiano nib n’uw boch nap’an u lan e re mach ney, ma yad ra pirieg ni yad bay u bang nrib gel e riya’ riy.​—Matthew 26:52; Mark 12:17.

¹⁵ Thingar da nanged ni gaar Jesus “piin ni yad bay u Judea,” ma gathi kemus ni piin bay u Jerusalem, e ngar milgad. Rib ga’ fan e re n’ey ya in e pul ni kar chuwgad u Jerusalem, miki sul e salthaw nu Roma bayay nga kur mahlgad. Som’on, ma yu Galile en kol ko duw ni 67 C.E., ngemu’ me bin migid e duw min kol yu Judea. Re n’ey e yib angin ni gafgow nib gel u ga’ngin yang fare nam. Maku arrogon ni ki gel e mo’maw’ riy ngak be’ u Jew ni nge mil u Jerusalem. Fare garog ko mach e kan matanagey, ma en nra guy rogon ni nge mil e yira lemnag ni ke digey piyu Jew nge un ngak piyu Roma.

16. Mang ngongol e ba t’uf ko Kristiano ko bin m’on e chibog nbochan e nge dab ra m’ad ko gafgow ko ngiyal’ nem?

¹⁶ Gad ra lemnag urngin e pi n’ey, ma rayog ni ngada nanged fan ni i fal’eg Jesus i weliy feni ga’ fan e gur ko re ngiyal’ nem. Piin ni Kristiano e ngi i fel’ u wan’rad ni nguura gafgowgad ma dab ra paged yad ngar mulgad nbochan e chugum ko fayleng. Thingari m’ag u wan’rad, ni wod rogon ni “gowa nga rogned e kefel’ ko urngin e chugum [rorad]” nbochan ni ngar folgad ko ginang ni ke yog Jesus. (Luke 14:33, NW) Piin nra gurgad ngar folgad ngar milgad nga barba’ e Jordan e ra fosgad.

Ngaud Pared ni Gad Be Lemnag ni Kari Chugur e Re Rran Nem

17. Mang fan nib t’uf ni ngad lemnaged ni kari chugur e re rran nem?

¹⁷ Pi yiiy u lan e Bible e be dag nib tamilang ni gadad be par nib chuchugur nga tungun urngin ban’en. Dariy ba ngiyal’ ni bod e ngiyal’ ney, ma ba t’uf ni ngauda lemnaged ni kari chugur e re rran nem. Ba salthaw u nap’an ni ke aw e gapas e der thamiy e marus nge riya’ ko cham. Machane, bochan e re n’ey, ma der lemnag ni nge par ni ke fal’eg rogon min pining nib tomgin ni nge yan ko mahl, me yan ni de fal’eg rogon, ni bay e riya’ riy. Taareb rogon e re n’ey ko tirok Got ban’en. Faanra dab da lemnaged ni kari chugur e re rran nem, ma dabiyog ni ngad pared ni kad fal’eged rogodad u nap’an nra yib e cham ngodad, ma gad gin ni ke taw fare rran rok Jehovah ngodad. (Luke 21:36; 1 Thessalonika 5:4) Faanra bay e ‘piin ni dakurur folgad rok Jehovah’ ma chiney e ireray e ngiyal’ ni ngar gayed Jehovah bayay.​—Zefaniah 1:3-6; 2 Thessalonika 1:8, 9.

18, 19. Mang e ra ayuwegdad ni ngaud lemnaged e “chirofen nem ni ir e rran rok Jehovah”?

¹⁸ Arfan ni yog Paul ni apostal ngodad ni ngarda lemnaged “e chirofen nem ni ir e rran rok Jehovah”! Uw rogon nrayog ni ngan rin’ e re n’ey? Reb e kanawo’ e aram e “pangimed e nge par nib thothup ma kam pied gimed nga pa’ Got.” (2 Peter 3:11, 12) Yira par ni yibe rin’ e pi n’ey ma rayog ni ayuwegdad ni ngad pared ni kad fal’eged rogodad u m’on ni nge taw fare “rran rok Jehovah.” Fare thin nu Greek ni kan piliyeg ni “ngan lemnag” e be yip’ fan ni “ngan papey”. Dabiyog ni ngad papeynaged e ngiyal’ ni ka ba’ nge taw ko fare rran rok Jehovah. Machane, nap’an ni gad be sonnag e re rran nem, ma ra yan e re tayim nem nib papey ni faanra gad be tedan’dad ko pigpig rodad ku Got.​—1 Korinth 15:58.

¹⁹ Faan gad ra fal’eg i lemnag e Thin Rok Got nge pi n’en ni be puguran ngodad riy ma aram e rayog ni ngad rin’ed e re n’ey nri gad be​—“athapeg nib gel (athapeg ma nge gur) e ngiyal’ nra yib” e re rran nem, arrogon, ngauda “athapeged ni gubin ngiyal’.” (2 Peter 3:12, The Amplified Bible; The New Testament, ni yoloy William Barclay) Tin nib muun ko pi puguran ney e yiiy ni boor ni gathi ke mus ni be weliy murung’agen fare rran rok Jehovah ya ku be weliy murung’agen e pi tow’ath ni nra yib ngak e piin ni ‘yad ra sonnag Jehovah.’​—Zefaniah 3:8.

20. Mang fonow e susun ni ngad ted nga lanin’dad?

²⁰ Chiney e riyul’ ni ireray e ngiyal’ ni ngad ted nga lanin’dad fare fonow ku Zefaniah ni profet: “U m’on ni ra yib e damumuw rok Jehovah nga dakenmed ni bod e nifiy, ngu m’on ko chirofen ko damumuw rok Jehovah, mu gayed Jehovah gimed e piin nib sobut’an’ nu fayleng ni gimed ma fol ko pi motochiyel rok. Mu gayed e tin nib mat’aw ban’en, mu gayed e sobut’an’. Ma sana rayog ni mmithgad u nap’an fare rran ko damumuw rok Jehovah.”​—Zefaniah 2:2, 3, NW.

21. Mang e n’en ni nge mudugilan’ girdien Got ngay ni ngar rin’ed u nap’an e duw ni 2007?

²¹ Ere, uw feni rib m’ag fare thin nu Bible ni kan mel’eg ni fan ko duw ni 2007 ni: “Rran rok Jehovah nib ga’ e ke chugur.” Riyul’ u wan’ girdien Got ni “ke chugur, ke chugur ma rib machreg ni be yib.” (Zefaniah 1:14, NW) “Ma dabi sowath.” (Habakkuk 2:3) Ere nap’an ni gadad be sonnag e re rran nem, ma manga yugu da pared ni gad be od ko pi rran ni gad be par riy, ma ud lemnaged ni pi yiiy ney e ke chugur ni nge lebug!

Rayog ni Ngam Fulweg?

• Mang fare “rran rok Jehovah nib ga’”?

• Mang fan ni boor e piin ni darur tedan’rad nga feni gurgur e ngiyal’ nem?

• Mang fan nib t’uf ni nge rin’ e pi Kristiano ko bin nsom’on e chibog ban’en nib papey?

• Uw rogon ni ngad ayuweged gadad ma rayog ni ngaud lemnaged ni kari chugur e re rran nem?

[Blurb on page 7]

Fare thin nu Bible ni fan ko duw ni 2007 e: “Rran rok Jehovah nib ga’ e ke chugur.”​—Zefaniah 1:14, NW.

[Pictures on page 4, 5]

Bod rogon e rran ku Noah, ma piin ni ma moning e yad ra gin u nap’an nra rin’ Jehovah ban’en

[Picture on page 6]

Fapi Kristiano e thingar rin’ed ban’en nib gur u nap’an nra guyed yu Jerusalem “ni ke longobiy e salthaw”