Pi’ Ban’en e Rib Tolang Puluwon u Owchen Jehovah

Re babyor ney e kan pi’ nga tochuch ko Pi Mich rok Jehovah u Mozambique:

“Gag reb e pagal ni medlip e duw rog. Ku gu ma un ko skul ni primary. Kug pi’ e salpiy ney ni ke yog ngog ko chugul prok. Kug pi’ ni chuway ni 12,000 e Meticais [$1, U.S.]. Kug pining e magar ku Jehovah ya fare prok ni som’on ni kug chuguliy e ke mang ba dirra. Fare taw’ath ni ke yog ngog e gu baadag ni ngan fanay ni fan ko fare maruwel ko Gil’ilungun Jehovah.

“PS: Ke ayuwegeg e chitamag ni nggu yoloy e re ngi babyor ney.”

Boch e girdi’ e yad ma lemnag ni ngan pi’ ban’en ngak be’ e ba m’ag ko piin ni boor e chugum rorad. Machane, faan gad ra bieg fare thin ni bay u Bible murung’agen fare ppin ni ke yim’ figirngin ni yin’ “l’agruw chi kobre’ nrow nib achig nga lan fare tafen e salpiy,” ma gad ra nang ni faanra pi’ be’ boor ban’en ngak be’, e be dag e re ney ni ir be’ nib gol, machane re n’ey e be yan u rogon e n’en ni bay ko gum’ercha’.​—Luke 21:1-4.

Ra falfalan’ Jehovah ko urngin e taw’ath, ni demtrug feni achichig, nfaanra ke yib e re n’em u gum’ercha’ey ngu fithik’ e t’ufeg. Ma ra taw’athnag Jehovah e girdi’ ni be folwok rok nga feni gol ni baadag ni nge pi’ ban’en ngak be’ ma aram e ngar pied e tayim rorad, nge gelngirad, fa boch e chugum rorad ni fan nga Gil’ilungun.​—Matthew 6:33; Hebrews 6:10.