Deer ko Piin ni Yad Ma Bieg e Pi Babyor

Dalip e Gospel e weliy e non non ni untay u morngaagen Jesus faan ni puog e florida nib tolang puluwon nga daken. Boor e apostal ni ur togopuluwgad ko re n’em, fa goo Judas e ba elmerin ngay?

Gad ra pirieg e pi n’ey ni buch u lan e Gospel ni yoloy Matthew, Mark, nge John. Gad ra guy ma Judas e ir e cha’ nsom’on ko togopuluw, sana ngak boch e apostal ma aram mar uned ngak. Re n’ey ni buch e be dag ko mang fan ni rayog ni falan’dad ni bay aningeg e Gospel ni kan yoloy. Pi n’em ni yoloy e rib riyul’, machane gathi urngin ni taabrogon. Gad ra taarebnag e pi thin nem, ma ra gel me tom’ar boch e nangan’ rodad u rogon ni buch.

Fare thin u lan e Matthew 26:6-13 e yog e gin ni bay​—e tabinaw rok Simon riy ni be’ nib daraw, u Bethany—​machane de yog fithingan fare ppin ni puog e florida nga daken lolugen Jesus. I yoloy Matthew ni gaar: “Me guy pi gachalpen Jesus e n’en ni ke rin’ fare pin mi yad damumuw”. Mi yad fith ni lungurad, Mang fan ni kan adbey e re florida nem ni urngin? Faan mang e n’en ma kan pi’ e re florida nem ni chuway’ nib tolang puluwon mi ni fek e salpiy riy ngan wereg u pa’ e piin ni gafgow.

Thin ni yoloy Mark e ke uneg boor ko pi thin nem. Machane ke uneg ngay ni fare ppin e ir e t’ar fare melor. Immoy e florida u lamun nrib “tolang puluwon ni kan ngongliy ko nard,” ni bod fa tin ni kan fek u India. U lan e pi thin nem, yoloy Mark ni “boch e girdi’ ni ur moyed u rom e ra damumuwgad,” maku me ulul ngay ni gaar, “mi yad puwan’ ngak fare ppin.” (Mark 14:3-9) Ere gali thin nem e be dag ni boor ko taareb e apostal ni ke un ko non non. Machane uw rogon ni tabab e re ney?

John, ni ir e mich ko pi n’em ni buch, e ki yog boch. Ke yog ni fithingan fare ppin e​—Mary, ni walagen Martha nge Lazarus. John e ir e ki uneg e re thin ni baaray ngay, ni rayog ni nga dogned ni ban’en nib fel’ ma gathi ban’en ni ba togopuluw, me gaar: “Me ere fek Maria ba florida nrib tolang puluwon nreb e pint urngin, nni ngongliy ko nard, me puog nga daken e rifrif u ay Jesus nruw raba’ me faley nga piyan lolugen.” Gad ra puthuy e pi thin nem nga taabang, ma rayog ni ngad guyed ni Maria e sana ir e kari puog fare florida, ni yog John ni aram fare florida nrib “tolang puluwon ni kan ngongliy ko nard,” nga daken lolugen nge ay Jesus. John e rib pach e thin rorow Jesus ma arfan ni rayog ni ku ra yib e damumuw ngak ni faanra ni dariy fannag. Kad bieged: “Ma reb i gachalpen Jesus, ni aram Judas Iskariot- ni aram e cha’ ni ir e nge yognag Jesus ngan kol- e gaar: ‘Mang fan nda ni pi’ e re florida nem ni chuway’ ndalip miriay e dola puluwon mi ni wereg u pa’ e piin ni gafgow?’ ”​—John 12:2-8.

Ri arogon, Judas e immoy ni “ ir reb pi gachalpen Jesus,” machane rayog ni ngam guy ni damumuw rok John u roy e be thamiy ni bay be’ u fithik’rad ni be guy rogon ni nge yognag Jesus. Reb e ta tapilyeg thin ni Dr. C. Howard Matheny e weliy e pi thin ni bay u John 12:4: “Fare n’en ni kan nog present participle ngay ni ‘e ke chugur’ [“ara ke chuchugur”] nge fare n’en ni kan nog present infinitive ni ‘nge yognag’ [ara, “ke chuchugur ni nge yognag”] e taab rogon ni be weliy ban’en ara ngongol ni yibe ululiy iyan. Re n’ey e be dag ni fare yognag ni rin’ Judas ngak Jesus e gathi ban’en ni buch e re ngiyal’ i n’em ya re n’em e ni lemnag mii finey u lan boor e rran.” I ulul John ngay me yog ni ke yog Judas e re bugithin ney ni “gathi bochan ni be lemnag e piin ni gafgow, ya bochan ni ir be’ nib moro’ro’ ya ir e ma fek tafen e salpiy rorad ma ma iring boch e salpiy riy.”

Rib puluw ni facha’ i Judas ni ir e ba moro’ro’ ya ir e k’aring ni ngan non non ni bochan e ir e ra yoor boch e salpiy nra iring ni faanra ni pi’ fare florida nchuway min tay e salpiy ni kan fek riy nga lan fare tafen e salpiy ni ma fek. Ngiyal’ nem ni tababnag Judas e non non, ma sana boch e pi apostal e ur chagilgad ngak ngar uned ko gun’gun’. Machane, Judas, e ir e cha’ ni tababnag e non non.