Report Ko Piin Ni Ma Wereg E Thin U Murung’agen Gil’ilungun Got

Tabinaw nib Falfalan’ e Ke Ayuweg Yugu Boch e Girdi’ ni Ngar Chuchugurgad ku Got

KE taw’athnag Jehovah Joseph me ga’ e gonop nge llowan’ rok. (Acts 7:10) Me “fel’ u wan’ Farao nge piin ntolang e tin ni ke yog Joseph ni ngan rin’ ni bochan.”​—Genesis 41:37.

Taabrogon ko ngiyal’ ney, ya ma pi’ Jehovah e gonop nge llowan’ ngak girdien u daken e fol Bible ni yad ma ta’. (2 Timothy 3:16, 17) Re gonop nge llowan’ ney e ra yib wom’engin nib fel’ riy nfaanra ngan fol ko fonow nni fek u Bible. Baga’ ni ‘ba fel’ u wan’ e piin ni ma guy e ngongol rorad nib fel’, ma n’en ni buch u Zimbabwe e ra dag ni riyul’ ni aray rogon.

• Reb e ppin e immoy be’ ni yow ba buguli yoror ni Pi Mich rok Jehovah. Yugu aram rogon ni cha’ nem e dabun e Pi Mich, machane baadag e ngongol rorad, ma n’en ni ri baadag e rogon e par rorad u tabinaw. Ke guy ni en figirngiy nge leengin e rib fel’ thilrow ma pi bitir rorow e ri yad ma fol rorow. Ma n’en ni ke guy e rib fel’ u wan’ ni aram e en figirngiy ni rib t’uf leengin rok.

Girdi nu yu yang ko yalen u Africa e ma mich uwan’rad ni faanra bay en ni figirngiy nib t’uf leengin rok ma susun ke fanay fare pin ni leengiy e falay ni fan ni ngari “adag” figirngin. Ere ke yan fare pin nge gu’ fa en leengiy ni ir e Mich me fith ngak, ni gaar: “Wenig ngom, rayog ni ngam pi’ ngog fare falay ni kam pi’ ngak figirngim nge yog ni adageg figirngig ni bod gur ni gab t’uf rok figirngim?” Me fulweg fare Mich, ni gaar: “Arrogon, gabul ko mathigyal’ e bay gub mu gu fek e re n’em nggu pi’ ngom.”

Me taw ko bin migid e rran, me yan fare walag nge guy fare ppin ni buguli yoror rok ni be fek e “falay” rok. Be mang e re n’em? Ereram fare Bible nge fare babyor ni Knowledge That Leads to Everlasting Life. Tomren ni kan weliy boch ban’en ko fare babyor ni Knowledge u tan fare kenggin ni “Building a Family That Honors God,” me gaar ngak fare ppin: “Ereray fare ‘falay’ ni gamow be fanay figirngig ma ra bagamow mab ‘adag’ bagamow, ma ereray tapgin ni ra bagamow ma rib t’uf rok bagamow.” Kan tababnag e fol Bible, mab papey ni ke mon’og fare ppin min taufenag ni nge dag ni ke ognag ir ku Jehovah.

• L’agruw e special pioneer ni kan pi’row ni ngar ayuwegew reb e ulung ni ba achichig ni bay ko gin nib chuchugur ko mathil u Zimbabwe ngu Mozambique u lerni lel’uch e dar unew ko machib u mit e tabinaw iyan u lan l’agruw e wik. Mang fan? Ya bochan ni ma yib e girdi’ ngorad ni ngar motoyilgad ko n’en ni yow ma weliy. Bagayow e ke weliy murung’agen e n’en ni ke buch, ni gaar: “Mereb e mile palgin ni gamow ma milekag riy u gubin e wik ni nggu filew e Bible ngak fa en ni baadag e machib. Ba mo’maw’ ni nggu tawgow ko re gin’en nem. Thingar gu warow u but’ u fithik’ e bar, ma thingar gu th’abew e pi lul’ nib gel ni ran riy e ma taw nga bil e l’ugunmow, Mab muun ngay ni nggu ayuwegew ni dabi mul nga but’ e pi mad nge sus ni kug tew nga daken lolugmow, nge mu’ ma nggu chuwgow biyay nga mad romow u tomren ni kug tawgow nga barba’.

“Piin ni buguli yoror rok e pi cha’ nem ni baadag e machib e ba fel’ u wan’rad fanmow pasig. Ma be’ u fithik’ fa piin ni kar guyed gamow e ir fa en ni ga’ ko teliw rorad. Me gaar ngak pi gachalpen: ‘Gathi gimed baadag ni ngam pared nib pasig ni taabrogon ko gali pumoon nem ni yow e Mich rok Jehovah?’ Ma bin migid e rran, ma boor ko girdi’ rok e kar bad nga naun romow ni ngar nanged ko uwrogon ma gamow be par ni gamow be kadan’mow. Maku, ulan l’agruw e wik nga tomren, ma ke yoor i yoor e girdi’ ni kar bad ni ngar guyed gamow arfan ni dabkiyog ni nggu lithew e ggan romow ni nggu wayew!”

Ma bagayad ko fa piin ni kar bad ngar guyed e gali pioneer nem u lan e re l’agruw e wik nem e aram fare ga’ ko teliw rorad. A mu lemnag ko uw feni falfalan’ e gali pioneer nem u nap’an ni ke yog e cha’ nem ni nge un ko fol Bible!