Gonop Rok Got Uw rogon Nni Dag E Re N’ey?

“FARE gonop rok fa en nib gafgow e kan dariyfannag, ma dan rung’ag e thin rok.” Ma tomur riy, me weliy Solomon, ni Pilung, reb e thin u murung’agen be’ nib sobut’ machane ir be’ nib gonop ma ir e i ayuweg ni dani gothey reb e mach ni polo’. Machane bay e kireban’ riy, ya “urngin e girdi’ e kara paged talin e re moon nem nib gafgow.”​—Eklesiastes 9:14-16, New World Translation.

Baadag e girdi’ ni yad ma dariyfannag e piin nib gafgow, nyugu aram rogon ni kara rin’ed e tin nib fel’. Kan rin’ e re n’em ku Jesus. I yiiynag Isaiah murung’agen ni gaar: “Kan dariyfannag me palog e girdi’ rok, ma ir e en nni ta’ ni fan ni nge gafgow ma nge yib e m’ar ngak.” (Isaiah 53:3) Boch e girdi’ e yad ma dariyfannag Jesus ya bochan ni gathi be’ ni rib gilbuguwan ma dariy e liw rok ntaareb rogon ko piin ma yog e thin ko ngiyal’ nem. Machane, ba yoor e gonop rok nib gel e palog riy ko tirok e girdi’ ni tadenen. Ma girdi’ ko binaw rok Jesus e de michan’rad ni cha’ ney ni “fak e daykusang” e ke dag e re gonop nem ma be fal’eg boch ban’en ni be dag gelngin nib gel. Machane, ba gel e oloboch riy, ya bochan fapi thin ni kan puthuy ngay u murung’agen Jesus e be yog ni “daki ngongliy boch e maangang u rom, nbochan e de michan’rad ngak.” Ban’en ni ri baga’ fan e de yog ngak e pi cha’ nem!​—Matthew 13:54-58.

Yibe athapeg ni dabda rin’ed e tin nib oloboch ni aram rogon. I yog Jesus ni gaar, “Gonop rok Got e ke m’ug nib riyul’ ko tin kan guy ni ke yib riy”. Piin ni yad be rin’ e maruwel rok Got ma yad be wereg e gonop ni yib u tharmiy e yira nang, ni gathi nbochan e liw rorad ara rarogorad, ya daken e “woomngin nib fel’” ni kar daged​—ni ereram fre michan’ rorad nge tin ni yad ma rin’ nib m’ag ko fare Bible.​—Matthew 7:18-20; 11:19.