Gamad E Piin Ni Bay E Michan’ Romad

Yibe Machibnag e Thin nib Fel’ u Milay’ ko Komey u Taiwan

TAIWAN e baga’ ni ma aw e n’uw riy nib fel’ rogon, ma arfan ni gubin e duw ma rayog ni ngan t’ar woomngin e komey ni l’agruw yay u rom. Machane yu ngiyal’, e dabi aw e n’uw u ngal’an, ma ra yim’ awochngin e komey ni kefin i tugul. Faanra buch e n’en ni aray rogon, me mul’an e en tamilay’ fa? Dangay. Manang ni ba t’uf ni nge athamgil. Ra yung yugu reb e awoch ngemu’ ma ra yung e pi n’en ney nga milay’ rok biyay. Faanra daki yib e magawon, ma ani tamilay’ e rayog ni nge kunuy woomngin e komey nib boor. Yu ngiyal’ ma aram e n’en ni ma buch ko fare maruwel ni ngan yung e n’en nib spiritual nge ngiyal’ ni ngan t’ar woomngin.

Ngan Kadan’ ko Mokun Woldug nib Spiritual

U lan in e duw ma Pi Mich rok Jehovah u Taiwan e kara maruweliyed nib elmirin i yung nge t’ar woomngin ko fare awoch ni Thin rok Got nib riyul’ u yu yang ni gowa dabi yib angin riy ngorad. Reb e nam ni be dag ni riyul’ ni aram rogon e Miao-li County. Kan machibnag e re nam nem in e yay ma kemus ni buchuw e girdi’ ni ba adag e machib. Ere duw ni 1973 ma ba wu’ e mabgol ni special pioneer e kan pi’row ni ngar machibgow u rom. Somm’on, ma immoy boch e girdi’ ni kar adaged e thin nib fel’. Machane, de n’uw nap’an ma dakuriy be’ ni ka baadag. Ma gali cha’ ni special pioneer nem kan pi’row nga yugu reb e binaw ni ngar machibgow.

Ma duw ni 1991 ma immoy lagruw e special pioneer ni kan pi’row nga ram. Machane pi n’en ni buch u nap’an ni ur moyew ko re nam nem e be dag ndawori yib e tayim ni ra yib angin e tirok Got u rom. Ke yan in e duw nga tomren, ma fa gali special pioneer e kan pi’row ni ngar machibgow ko yugu reb e binaw ni yibe athapeg ni ra yib angin ngorow u rom. Ere, ke yan e tayim nib n’uw nap’an boch ni dan maruweliy e re binaw nem.

Kan Athamgil Biyay Me Ke Yib Angin

Pul ni September 1998 ma kan dugliy ni ngan gay e binaw nib fel’ u Taiwan u fithik’ e pi binaw u rom ni dawor ni yan ko machib ngay. Uw rogon ni nge yib angin ngorad e re maruwel ney? Sagonapan 40 e temporary special pioneer e kan pi’rad ni ngar maruwelgad ko pi binaw ni dan yan ni ngan machibnag ma boor e girdi’ riy.

Ma pi binaw ni kan mel’eg ni fan ko re maruwel ney e ba muun ngay fa l’agruw i mach nib chuchugur nga Miao-li County. Fa aningeg i walag ni ppin e ur maruwelgad u rom ni dalip e pul ni ngan skengnag ko fel’ e gali binaw nem fa danga’. De n’uw nap’an u tomren ni kar bad nga ram, ma kar yoloyed e report rorad ni ma k’aring e falfalan’ u murung’agen e namba ko girdi’ ni kar pirieged ni baadag e machib. Ma nap’an ni ke mu’ fa dalip i pul ko maruwel rorad u rom ni pioneer, ma ke yoor e girdi’ ni yad be fil e Bible ngorad. Maku kar tababnaged e fol babyor u rom ma reb e piilal ko ulung nib chuchugur nga ram e ma ayuwegrad.

Dalip u fithik’ e pi walag ni ppin nem e kar rogned nib tamilang ni yad baadag ni ngar ululgad i ayuweg e “pi awoch ni kefin i tugul” ni kab meewar ma be mon’og i yan. Arfan ni kan dugliy ni l’agruw ko pi cha’ nem e ra mang permanent special pioneers, ma reb e ra maruwel ni regular pioneer u rom. Reb e piilal ko ulung nib chuchugur nga ram e ke yib ni nge ayuwegrad. Ke pag 60 e girdi’ e kar uned ko welthin ni fan ko yoor ni kan pi’ ko re binaw nem. Chiney ma fare ulung nib chuchugur ngorad e be ayuweg e re ulung nem nib biech ni fan e ngar ted e pi muulung ko Madenom ma de un ngay e pi fol babyor. Dabi n’uw nap’an nga m’on ma yira fal’eg reb e congregation nib biech ko re binaw nem.

Gum’an’ e Ke Yibnag e Pi Taw’ath nga Yu Yang u Taiwan

Boch e binaw e ku aram e n’en ni ke buch riy. U I-lan County ni bay u northeast ko fare donguch, e kan tababnag e Fol Babyor ko Ulung ko fare binaw ni ke yib e piin ni temporary special pioneer ngay ni ngar machibgad riy.

Reb e balayal u nap’an ni yad be machib u mit e tabinaw, ma fare temporary special pioneer e ke mada’nag reb e pumoon ni kab pagal me dag ngak reb e handbill nni yoloy ngay murung’agen e pi muulung ni kan yarmiy ni fan ko ulung. Ma chingiyal’ nem me fith ni gaar: “Rayog ni nggub gabul ni balayal’ ni nggu un ko muulung? Faanra rayog, ma mit i mang e mad ni nggu chuw ngay?” Re pioneer ney e be ayuweg fa meruk i girdi’ ni be fil e Bible u tabinaw u gubin e wik. De n’uw nap’an nga tomren ma boor u fithik’ e piin ni ma fil e Bible e yad be lemnag ni ngar manged e publisher ni fan ni ngar machibnaged fare thin nib fel’, ma yad be nameg ni ngar uned ko taufe nga m’on.

Reb e ppin ni ku ma par ko re binaw ney e ke yan boor e duw ni ma yan nga galesiya rorad machane de yog ni nge pirieg be’ ni ra fil e Bible ngak. Nap’an ni ke rung’ag murung’agen e fol Bible ni kan yarmiy, me athamgil ni nge un ngay. Kan pi’ athamgil nga laniyan’ ni ra fil e n’en ni yira weliy u m’on ndawori taw e tayim ni kan duguliy. Ma nap’an ni taw fa en temporary special pioneer ni nge fil e Bible ngak, ma ke guy ni ke rin’ fare ppin e n’en ni “kan nog ngak ni nge rin’ ” ya ke chuwiy reb e notebook me yoloy ngay e pi deer ko n’en ni kan duguliy ni yira weliy. Ngemu’ ma ke yoloy e fulweg ko urngin e deer. Maku ke yoloy nga notebook rok urngin e thin nu Bible ni ka nog e cited scriptures ngay. Ma nap’an ni ke yib fare walag ni ppin ni ngar filew e Bible ko yay ni somm’on, ma ke muu fare ppin i fal’eg rogon fa dalip i lesson!

Ku aram e n’en ni ke buch ko binaw nu Dongshih fithingan u central Taiwan. Piin ni temporary special pioneer e kara wereged e pi brochure ni ke pag 2000 urngin u lan dalip e pul ni kara machibgad u rom. Ma nap’an e bin dalip e pul, ma ke taw ko 16 e piin ma fol Bible u tabinaw ni yad ma ayuweg. Nap’an ni yib e duru’ nga central Taiwan ko September 21 duw ni 1999 ma ke kirebnag e re binaw nem, machane boch e girdi’ ni ba adag e machib e ke par ni yad be mon’og iyan ko tirok Got, yugu aram rogon ma thingara milekaggad u lan taareb e awa ni fan ni ngar uned ko muulung ko Kingdom Hall ni ir e bin ba th’abi chuchugur ngorad. Arrogon, ba t’uf ni ngan gum’an’ ya aram rogon ma rayog ni ngan t’ar woomngin nib boor, ndemtrug ko aram woomngin e woldug ara woomngin e tirok Got.

[Map on page 30]

(For fully formatted text, see the publication)

CHINA

Taiwan Strait

TAIWAN

[Credit Line]

Mountain High Maps® Copyright © 1997 Digital Wisdom, Inc.