Pi Flaab Ko Maruwek Ko Pioneer

“Flaab rok Jehovah​—ireram e n’en ni be fel’ rogoy riy, ma dariy e amith riy.”​—PROVERBS 10:22, New World Translation.

1, 2. (a) Mang e yog reb e pioneer u morngaagen e maruwel ko machib nib full-time? (b) Mang fan ni kab gel e falfalan’ nrayog ni nge yib ko piin pioneer ko maruwel ni ngan pingeg e girdi’ ngar manged pi gachalpen Jesus?

BAY e falfalan’ ni kab gel ko bin ni ngam guy be’ ni kam filew e Bible ni ke mang be’ ni ma n’uf Jehovah fa? “Rib fel’ ma ma gelnag e michan’ ni ngan guy gelngin e Thin Rok Got ni ma k’aring e girdi’ ni ngar pingeged e yafas rorad ni nge felan’ Jehovah ngorad.” Aram e n’en ni yoloy reb e pioneer nu Canada ni ke un ko re maruwel nem nib full-time u lan 32 e duw. Ki weliy u morngaagen e re maruwel ney ko pioneer ni gaar: “Dabiyog ni nggu lemnag ni nguu rin’ yugu ban’en. Dabi siy ni dakuriy ban’en nra yibnag e falfalan’ ni aram rogon ngog.”

² Ke taareban’um ngay ni bay e falfalan’ nib gel riy ni ngan ayuweg be’ nge yog e yafas ni manemus ngak? Ma gathi ke mus ni piin pioneer e ma yib e binem e falfalan’ ngorad. Ya urngin e pi tapigpig rok Jehovah e kan tay chilen ngorad ni ngar “pingeged e girdi’ ngar manged pi gachalpen” Jesus, ma yad ma athamgil ni ngar folgad riy. (Matthew 28:19) Machane, piin pioneer e boor e awa ni yad ma tay ko machib, me ere rayog ni nge yoor e falfalan’ rorad ni ngar ayuweged e girdi’ ngar manged pi gachalpen Jesus. Ma ka bay boch e flaab ko piin pioneer. Mu non ko piin pioneer, ma yad ra weliy ngom ni maruwel ko pioneer e aram rogon ni ngam nang e ‘flaab rok Jehovah ni ireram e n’en ni be fel’ rogoy riy.’​—Proverbs 10:22.

3. Mang e ra pi’ e athamgil nga lanin’dad u nap’an ni nguud pigpiggad ku Jehovah?

³ Kan fith ko piin pioneer u yu yang u fayleng ni ngar weliyed u morngaagen e pi flaab ni ke yib ngorad ni bochan ni yad be un ko machib nib full-time. Ngad lemnaged e n’en ni ur rogned. Machane dabi mulan’um ni faanra dabiyog ni ngam un ko machib ni boor ni bochan e m’ar, ara pillibthir, ara yugu boch ban’en. Mu tay fanam iyan riy ni n’en nib baga’ fan e ngan pigpig ku Jehovah ko yafas ni polo’ uw rogon nrayog. Machane ran rung’ag e n’en ni yog boch e pioneer ma ra pi’ e athamgil nga lanin’um ni ngam un ko re maruwel ney nfaanra rayog.

Ma Gapas Lanin’uy ma ma Fel’ Lanin’uy

4, 5. (a) Mang fan ni bay e falfalan’ riy ni ngan wereg e thin nib fel’ ngak yugu boch e girdi’? (b) Uw rogon u wan’ e piin pioneer e maruwel ko machib nib full-time?

⁴ I gaar Jesus, “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Arrogon, bay e flaab riy ni ngan pi’ ban’en. (Proverbs 11:25) Ri aram rogon ni ngan wereg e thin nib fel’ ngak e girdi’. Ya mang taw’ath ni kab fel’ nrayog ni ngad pied ko girdi’ ko bin ni ngan ayuweg nge yog e tamilangan’ rok Got ngak, ni ra pow’iy iyan ko yafas ni manemus?​—John 17:3.

⁵ Dabni gin ngay ni piin ni ma un ko machib nib full-time e yad ma weliy morngaagen e falfalan’ nge fel’ laniyan’ ni bochan ni kan lubeg ban’en ko machib. Yog reb e pioneer u Britain ni 64 e duw rok ni gaar, “Gu manang ni dakuriy yugu reb e maruwel ni ra pi’ ngog e falfalan’ ni bod e falfalan’ ni ngan wereg fare thin riyul’ ngak e girdi’.” Reb e ppin u Zaire ni kem’ figirngin e ke weliy ko uw rogon e pioneer u wan’ ni gaar: “Tomren ni yim’ figirngig ni rib t’uf rog ma n’en ni ke fl’eg lanin’ug e ug un ko pioneer. Ya ra gu un ko machib ni boor ma dabkuugu par ni gu be lemnag e n’en ni ke mul u paag. Ke michan’ug ko pi n’en ni micheg Jehovah ma baga’ ni gu ma lemnag ko uw rogon nrayog ni nggu ayuweg e piin ni gu be fil e Bible ngorad ni ngar pingeged e yafas rorad. Tomren ra reb e rran mab fel’ rogon e mol ni gu ma tay, ma ke sug gum’ercha’eg ko falfalan’.”

6. Mang boch ban’en ni ke felan’ boch e pioneer ngay?

⁶ Boch e girdi’ ni ur pioneergad u lan boor e duw e kar uned ko falfalan’ ni ngan machib u yu gin nib palog, mi yad tababnag e ulung, me munmun me ga’ iyan me mang e pi circuit. Susun, u Abashiri, Hokkaido (fa bin th’abi le’luch e donguch u Japan), ma bay reb e walag ni ppin ni ke gaman 33 e duw ni ke un ko pioneer. Ke weliy u morngaagen e yay nsom’on ni ke un ko circuit assembly​—ni fan ko yu Hokkaido ni ga’ngin​—ma ke mus ni 70 e girdi’ ni kar uned ko assembly. Ma chiney? Ke pag 12 e circuit ko re donguch nem, ma bay boor ko 12,000 e publisher. Mu lemnag ko uw fene falfalan’ u nap’an ni ma un ko pi assembly nge convention u taabang boor ni boor e girdi’ ko re donguch nem ni yad ma wereg e thin ko Gil’ilungun Got!

7, 8. Mang e ke felan’ ngay e piin ni kar uned ko pioneer nib n’uw nap’an?

⁷ Ma bay boch e girdi’ ni kar uned ko pioneer u lan boor e duw mi yad falfalan’ ko piin ni ur filed e Bible ngorad ni kar uned ko taufe ma kar mon’oggad ko pigpig ko ulung. U Japan ma reb e walag ni ppin ni ke un ko pioneer u lan mereb e binaw ni ka nap’an e 1957 e ke weliy u morngaagen e ngiyal’ ni ke pi’ e babyor ni Awake! ngak reb e ppin ni be maruwel ko reb e bank. Dawori gaman mereb e pul me un e re ppin nem ko taufe. Ma boch nga tomren me un ko mabgol, ma kar mangew e special pioneer ni yow e pumoon rok. Ma kari falfalan’ fa binem e ppin ni pioneer u nap’an ni be par ko fa bin dalip e binaw ni ke pioneer riy, ma ke yib fare circuit overseer ko re ulung nem nge ppin rok​—ni aram fare ppin ni ur studygow faram!

⁸ Dabni gin ngay ni piin ni kar uned ko pioneer nib full-time e ma lemnag ni aram “ba taw’ath ni rib baga’ fan ma susun ni ngan chaariy,” aram rogon ni yog be’ ni ke gaman 22 e duw ni ke un ko pioneer!

Bay e Mich Riy ni Be Pi’ Jehovah e Ayuw

9. Mang e ma pi’ Jehovah ko pi tapigpig rok ni ir e Ta Ayuw, ma mang fan e re n’ey ngodad?

⁹ Jehovah, ni ir e Ta Ayuw, e ke micheg ni ra ayuweg e pi tapigpig rok, me ayuwegrad ko tirok ban’en nge tin nib t’uf rorad. Ere rayog ni nge yog David ni Pilung ni gaar: “Chiney e kug pillibthir, ni gathi ku gub pagal, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Psalm 37:25) Machane gathi aram e rayog ni ngad siyeged i ayuweg e tabinaw rodad ko tin nib t’uf rorad, ma gathi aram e rayog ni ngad lemnaged ni susun ni nge gol e pi walagdad ni Kristiano ngodad. (1 Thessalonika 4:11, 12; 1 Timothy 5:8) Machane, nap’an ni ke m’agan’dad ngay ni ngad paged fadad ni fan ni nge yoor e pigpig ni gad be tay ku Jehovah, ma dabi pagdad.​—Matthew 6:33.

10, 11. Mang e ke fil e piin pioneer ko pi n’en ni buch ngorad u morngaagen rogon ni ma pi’ Jehovah e ayuw?

¹⁰ Piin pioneer u ga’ngin e fayleng e yad manang ni ma ayuweg Jehovah e piin ni yad ma ta’ rad u tan pa’. Mu lemnag ba wu’ i mabgol ni yow be pioneer ni kar ranow nga reb e binaw ni ba achig ya ba t’uf rorad e ayuw ko piin ni ra un ko machib. Tomren in e pul, ma ke mo’maw ni ngar piriegew e maruwel, ma ke buch uw e salpiy rorow. Ma aram me yib e bill ko insurance ko karro rorow ni $81. Yog fare walag ni pumoon ni gaar: “De yog ni nggu piew puluwon e re n’em. Ba gel e meybil ni ug tew ko re nep’ i n’em.” Ma bin migid e rran me yib e babyor ngorow ni pi’ reb e tabinaw ni ku yad ba gafgow ko salpiy. Kan weliy u lan fare babyor ni kan sulweg boch e salpiy ko tax ko re tabinaw nem, ma kab boor ko n’en ni ur lemnaged ni ra yib ngorad, ere yad ba adag ni ngar pied boch ko re wu’ i mabgol nem. Ma u lan e re babyor nem ma bay e salpiy riy ni $81! Yog fare walag ni pumoon ni gaar: “Ri dab gu pag talin e re rran nem​—piy u bil’elugunag e ke sak’iy! Ri gamow be pining e magar ko re tabinaw nem ni yad ba gol.” Ma ma tay Jehovah fan e ngongol nib gol ni aram rogon, ya aram rogon ni be fil ngak e pi tapigpig rok ni ngar yodoromgad.​—Proverbs 19:17; Hebrews 13:16.

¹¹ Boor e piin pioneer e ku rayog ni ngar weliyed boch e thin ni aram rogon. Mu fithrad, ma yad ra yog ngom ni dariy biyay ni kan “pagrad.” Be’ ni 72 e duw rok ni ke gaman 55 e duw ni ke un ko pioneer e ke gaar, “Dariy biyay ni ke pageg Jehovah.”​—Hebrews 13:5, 6.

“Reb e Kanawo’ ni Rib Fel’ ni Ngan Chuchugur ku Jehovah”

12. Mang fan ni rib taw’ath e piin ni ma wereg e thin nib fel’?

¹² Ri gad ba taw’ath ni ke yog Jehovah ngodad ni ngad wereged fare thin nib fel’ ko Gil’ilungun Got. Ma lemnag ni gad be maruwel u “taabang”​—ni yugu aram rogon ni gad e piin nde flont​—ma gad be un ko maruwel ni ma ayuweg e yafas ko girdi’. (1 Korinth 3:9; 1 Timothy 4:16) Ma gad be chugur iyan ngak e An Tasunumiydad ni Jehovah u nap’an ni gad ma weliy ngak e girdi’ u morngaagen Gil’ilungun Got, nge nap’an ni gad ma tamilangnag ni ran chuweg urngin e tin nib kireb ban’en, ma nap’an ni gad ma weliy ko girdi’ u morngaagen fadad t’uf rok Got ya ke biyuliydad, nge nap’an ni gad ma pithig e Thin Rok nib fas ma gad weliy e thin ni bay riy ngak e piin nib yul’yul’.​—Psalm 145:11; John 3:16; Hebrews 4:12.

13. Mang e yog boch e girdi’ u morngaagen rogon ni ke fel’ thilrad Jehovah ni bochan e kar uned ko pioneer?

¹³ Piin pioneer e boor e tayim ni rayog ni ngar ted u gubin e pul ni ngar filed u morngaagen Jehovah mar weliyed ngak e girdi’. Ma uw rogon ni yad ma lemnag e re n’em ni be ayuweg thilrad Got? Yog reb e piilal u France ni ke pag ragag e duw ni be un ko pioneer ni gaar: “Pioneer e reb e kanawo’ ni rib fel’ ni ngan chuchugur ngak Jehovah.” Ma yugu be’ ko re binaw nem ni ke gaman 18 e duw ni ke kun ko pioneer e ke gaar: “Pioneer e aram rogon nrayog ni ngam ‘pagan’mum ngak Jehovah, ma ga pirieg feni manigil,’ ya reb e rran nge reb e bod ni yibe firgiy ban’en ni aram e nge gel thildad e An Tasunumiydad.” (Psalm 34:8) Reb e walag ni ppin u Britain ni ke gaman 30 e duw ni ke un ko pioneer e ku aram rogon e tafinay rok. Ye gaar, “Kug chugur ku Jehovah ya ba t’uf rog e ayuw ko kan ni thothup rok ni nge pow’iyeg ko machib ni gu be tay. Boor yay ni kari gu thamiy e kan ni thothup rok Jehovah ni be pow’iyeg nga reb e tabinaw ko ngiyal’ nib puluw.”​—Mu taarebnag ko Acts 16:6-10.

14. Uw rogon ni ma yib angin ko piin pioneer ni bochan ni yad ma fanay e Bible nge boch e babyor ni ma weliy e Bible u gubin e rran ngar weliyed ko girdi’?

¹⁴ Boor e pioneer e ke yoor e tamilangan’ rorad ko Thin rok Got ni bochan e gubin e rran ni yad ma fanay e Bible nge boch e babyor ni ma weliy e thin ko Bible riy ni ngar weliyed mi yad fil e thin riyul’ ko Bible ko girdi’. Reb e walag u Spain ni 85 e duw rok e ke gaman 31 e duw ni be un ko pioneer me gaar: “Bochan ni kug un ko pioneer ma ke ayuwegneg ni nggu nang fan e tin nib toar ban’en ni bay ko Bible, ni aram e tamilangan’ ni kug fanay ni nggu ayuweg boor e girdi’ ngar nanged Jehovah nge tin nib m’agan’ ngay.” Reb e walag ni ppin nu Britain ni ke gaman 23 e duw ni be un ko pioneer e ke gaar: “Bochan ni kug un ko machib nib full-time ma aram e ri gu ba adag e ggan ko tirok Got ban’en.” Rayog ni ngan gelnag e michan’ rom u morngaagen e tin ni ke l’agan’um ngay ni faanra ga ra weliy ngak e girdi’ “u murung’agen e re n’en ni ir e ke l’agan’um ngay.” (1 Peter 3:15) Yog reb e pioneer nu Australia ni gaar: “Ke gel e michan’ rog ni bochan ni kug un ko pioneer ya gu ma weliy e tin ni ke l’agan’ug ngay ngak yugu boch e girdi’.”

15. Mang e rin’ boch e girdi’ ni rayog ni ngar uned ko pioneer nguur pared riy, ma mang fan?

¹⁵ Rib tamilang ni pi girdi’ ney ni yad e pioneer e ke mich u wan’rad ni kar mel’eged e pigpig ngak Jehovah ni bay boor e flaab riy. Aram fan ni boor e girdi’ e kar thiliyeged boch ban’en ko par rorad, ma boch e kar paged e maruwel nib tolang puluwon nge par nib fel’ rogon, ni nge yog ni ngar uned ko pioneer ma nguur ul’ul’gad!​—Proverbs 28:20.

Ba Adag Gum’ercha’em ni Nge Yoor Boch e N’en ni Ga Be Rin’?

16, 17. (a) Faan ga be lemnag ko rayog ni ngam un ko pioneer, ma mang e rayog ni ngam rin’? (b) Uw rogon u wan’ boch e girdi’ ni bochan ni dabiyog ni ngar uned ko pioneer?

¹⁶ Tomren ni kam lemnag e n’en ni yog e piin pioneer u morngaagen e maruwel ko pioneer ma sana ga be lemnag ko ra m’ag ngom fa. Faanra er rogon, ma mang ni dab mu non ngak reb e pioneer ni ke fel’ rogon e machib ni be tay? Ku sana ra yib angin ngom ni ngam non ngak reb e piilal ko ulung, ni be’ ni manangem​—salpem, nge rarogom, nge tin nib mil fan ngom ko tabinaw rom. (Proverbs 15:22) N’en ni ra yog e girdi’ e ra ayuwegem ni ngam gonopiy ko rayog ni ngam un ko pioneer fa danga’. (Mu taarebnag ko Luke 14:28.) Faanra rayog ni ngam un ko pioneer ma boor e flaab ni ra yib ngom.​—Malaki 3:10.

¹⁷ Machane uw rogon e piin nib yul’yul’ ni yad e publisher ni dabiyog ni ngar uned ko pioneer, ni yugu aram rogon ni yad ba adag ni nge yoor e n’en ni yad be rin’ ko machib? Mu lemnag e n’en ni yog reb e Kristiano ni ppin ni be athamgil ni nge chuguliy aningeg e bitir ni goo ir. Be gaar: “Ke kireban’ug, ya kug un ko pioneer kafram, machane chiney ma dabkiyog ni nggu un ko machib ni bod ni kug rin’ kafram.” Ri ma t’ufeg e re ppin ney e pi bitir rok ma ba adag ni nge pi ngorad e tin nib t’uf rorad. Machane ku ba adag ni nge yoor e n’en ni be rin’ ko machib. Ke weliy ni gaar: “Ri ba t’uf rog e machib.” Ku aram rogon yugu boch e Kristiano ni yad ba yul’yul’ ni ba t’uf Got rorad ma aram me k’aringrad ni ngar adaged ni ngar pigpiggad ku Jehovah ‘u polo’ i gum’ercha’rad.’​—Psalm 86:12.

18. (a) Mang e ba adag Jehovah ni ngad rin’ed? (b) Mang fan nsusun ndabi mulan’dad nfaanra dabiyog ni ngad rin’ed urngin ban’en ni gad ba adag ni bochan rarogodad?

¹⁸ Dab mu pag talin ni n’en ni ba adag Jehovah e ngad pigpiggad ngak ko yafas rodad ni polo’. Ma re n’ey e ba thil ku be’ nge be’. Boch e girdi’ e rayog ni ngar thiliyeged boch ban’en ni rayog ni ngar uned ko regular pioneer. Ma boor e girdi’ e ma un ko pioneer ni ayuw yu ngiyal’ ara gubin e pul, mi yad thognag 60 e awa u reb e pul ko machib. Machane kab boor e girdi’ rok Jehovah e yad ma pigpig ko yafas rorad ni polo’ ni yad e publisher ko ulung mi yad machibnag e girdi’ min fil e Bible ngorad. Ere faanra gab m’ar, ara kam pillibthir, ara bay boor ban’en nib mil fan ngom ko tabinaw rom, ara yugu ban’en, ma dabi mulan’um. Ya faanra ga be pi e tin th’abi fel’ ban’en nrayog rom ku Got ma aram e baga’ fam u p’eowchen Got, ni taareb rogon ko piin ni be un ko machib nib full-time!

Urngin e Girdi’ e Rayog ni Nge M’ug Rorad e Pasig ni bod e Pioneer

19. Mang e pasig ko pioneer?

¹⁹ Mus ni dabiyog ni ngam un ko pioneer, ma rayog ni nge m’ug rom e pasig ni bod e pioneer. Ma mang e pasig ko pioneer? Fare Machib Rodad ni Fan ko Gil’ilungun Got ko July 1988 e be gaar: “Aram e lem nib puluw u morngaagen e motochiyel ni ngan machibnag e girdi’ min pingegrad ngar manged pi gachalpen Jesus, maku yi ba adag ni ngan dag e t’ufeg ko girdi’ min lemnagrad, min pag fan, min falfalan’ ni ngan lek luwan’ ay fare Masta, min falfalan’ ko tirok Got ban’en ma gathi tirok e fayleng ban’en.” Uw rogon nrayog ni nge m’ug e pasig rom ko pioneer?

20. Uw rogon nrayog ko piin gallabthir ni ngar daged e passig ko pioneer?

²⁰ Faanra gur e gallabthir ma bay e bitir rom ni ba achig, ma rayog ni ngam skulnagrad ni ngar uned ko pioneer u nap’an ni ngar ilalgad. Faanra ba puluw lanin’um u morngaagen e machib ma aram e rayog ni nge pi’ e athamgil nga lanin’rad ni ngar mon’eged e pigpig ku Jehovah ni aram e n’en nth’abi ga’ fan ko yafas rorad. Rayog ni ngam pining e piin pioneer nge piin ni ma lekag e ulung nge pi ppin rorad nga tafenmed ni aram e rayog ni nge yib angin ngak e pi bitir rom e kanawo’ ni yad ma tay ni yad ba falfalan’ ko machib nib full-time. (Mu taarebnag ko Hebrews 13:7.) Mus ko pi tabinaw ni ke ruw raba’ ko teliw, ma pi gallabthir ni ke mich Got u wan’rad e rayog ni ngar ngongolgad mi yad non nib puluw mi yad ayuweg e bitir rorad ni ngar turguyed ni ngar uned ko machib nib full-time.​—2 Timothy 1:5; 3:15.

21. (a) Uw rogon nrayog ni ngad ted tanggin e piin ni be un ko pioneer? (b) Mang e rayog ni nge rin’ e piin piilal ni ngar pied e athamgil nga laniyan’ e piin pioneer?

²¹ U lan e ulung ma rayog ni ngad ted tanggin e piin ni be un ko pioneer. Susun, rayog ni ngam athamgil ni ngam marow reb e pioneer ko machib, ko ngiyal’ ni be yan goo ir fa? Ga ra pirieg ni “ra fel’ rogom ko michan’ rorad ma ra fel’ rogorad ko michan’ rom.” (Roma 1:11, 12) Faanra gur e piilal, ma rayog ni ngam rin’ boor ban’en ni ngan pi’ e athamgil nga laniyan’ e piin pioneer. Nap’an ni ma puruy e piin piilal ma susun ni ngar lemnaged e tin nib t’uf ko piin pioneer u gubin ngiyal’. Nap’an ni ke mulan’ reb e pioneer ara ke yib e magawon ngak, ma dab mu pay ni ngam mog ni nge tal ko pioneer. Yu ngiyal’ ma ba t’uf ni ngan nog e re n’em, machane dab mu pag talin ni maruwel ko pioneer aram reb e taw’ath ni be chaariy fa en ni be pigpig nib full-time. Sana ke mus ni ba t’uf ni ngan pi’ e athamgil nga laniyan’ ara ngan fonownag boch fa ngan ayuweg u ban’en. Fare branch ofis ko Society u Spain e ke yoloy ni gaar: “Nap’an ni ma pi’ e piin piilal e athamgil nga laniyan’ e girdi’ ni ngar uned ko pioneer, mi yad tay tanggin e pi pioneer ko machib, ma yad gafaliyrad nib fel’ rogon, ma ra gel e falfalan’ ko piin pioneer, mi yad lemnag ni ba farad, ma yad ul’ul’ ngay ni yugu aram rogon ni ke yib e magawon ngorad.”

22. Ngiyal’ ney nib baga’ fan ma mang e susun ni nge mudugilan’dad ngay ni ngad rin’ed?

²² Gad be par u ba ngiyal’ nib baga’ fan ko girdi’. Ke pi’ Jehovah ngodad e maruwel ni ran ayuweg e yafas ko girdi’ ni ngad lubeged. (Roma 10:13, 14) Demtrug ko rayog ni ngad uned ko re maruwel ney nib full-time ko pioneer fa danga’, ma ngad daged ni gad ba pasig ko pioneer. Nguud pared ni gad ba pasig ma ngad paged fadad. Nge mudugilan’dad ni ngad pied ku Jehovah e n’en ni ke ning ngodad​—ni ngad pigpiggad ngak u polo’ e yafas rodad. Ma dabda paged talin ni nap’an ni gad ma pi’ urngin ban’en nrayog rodad, ma demtrug ko bod rogon e chi kobre nrow ku fare ppin ni kem’ figirngin, ara bod rogon fare florida ku Maria nib tolang puluwon, ma aram e gad be pigpig ko yafas rodad ni polo’, ma ma chaariy Jehovah e pigpig ni gad ma tay ngak u polo’ e yafas rodad!

Ka Ga Manang?

◻ Mang fan ni bay e falfalan’ ko maruwel ko machib nib full-time?

◻ Mang e ke nang boor e pioneer u morngaagen rogon ni ma ayuweg Jehovah e pi tapigpig rok?

◻ Uw rogon u wan’ e piin pioneer e machib ni yad ma tay ni be ayuweg thilrad Jehovah?

◻ Uw rogon nrayog ni ngam dag ni gab pasig ko pioneer?

[Sasing ko page 17]

Ba gel e falfalan’ ni ma yib ko piin pioneer u nap’an ni yad ma pingeg e girdi’ ngar manged pi gachalpen Jesus

[Sasing ko page 17]

Ra yib angin ko bitir rom ni ngar chaggad ko piin ni ma maruwel nib full-time ko machib ko Gil’ilungun

[Sasing ko page 17]

Rayog ni nge pi’ e piin piilal e athamgil nga laniyan’ e piin pioneer ko machib