Gapas ni Fan ko Fa Bin Biech e Millennium?
KAN tababnag fare International Year for the Culture of Peace u Paris nge New York City ko September 14, duw ni 1999. Kan weliy e re ney ngak e girdi’ u nap’an e muulung ni ka nog General Assembly ko fare United Nations ko duw ni 2000. I Federico Mayor, ni ir faram fare director general ko UNESCO, e ke wenignag u fithik’ e yul’yul’ ni ngan “yarmiy reb e skul ni fan ni ngeb e gapas ma ra m’ay e cham.”
Fare UNESCO e ke yog boch e thin ni “bochan ni ke tabab fare mahl u laniyan’ e girdi’, ku thingari ta’ fare n’en nra ayuweg e gapas ngay.” Mab puluw ko re n’ey, me lemnag fare ulung ni nge tababnag fare skul ko gapas u daken e “ngan fil ban’en, ngan puruy nge ngan pi’ e ayuw.” Ma ke yog Mr. Mayor ni de gaman ni nge “par nib gapas lanin’uy, fa nge mang piin ni ma togopuluw ko mahl, machane nge mang e piin ni ma ayuweg nge sum e gapas.”
Bay e kireban’ riy, fare duw ni 2000 e ri dariy e gapas. N’en ni ke buch ko pi duw ni kefin yan—mab muun ngay e pi n’en ni buch ko duw ni 2000—e be dag ndariy rogon e girdi’ ni nge taleg e mahl nge cham nyugu aram rogon ni kan athamgil ni nge dabi sum.
Machane, fel’ ni dabni pagtalin ni gapas e ba l’ag ko ngan fil ban’en. Sogonapan 2,700 e duw kakrom, ma fare profet ni Isaiah e ke yog ni gaar: “Urngin e pi fakam e yad ra mang piin ni Jehovah e ke skulnagrad, ma ri ra yoor e gapas u fithik’ e pi fakam.” (Isaiah 54:13, New World Translation) Re profet nem e ke guy ni bay yib e tayim ni girdi’ ko urngin e nam e yad ra yan ngar uned ko fare liyor nib machalbog ni fan ku Jehovah ni fan e ngara filed Tirok e kanawo’. Mang angin? “Bay ra pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay. Pi nam e dab kur mahlgad biyay, ma dabkur fal’eged rogorad biyay ni fan ko mahl.” (Isaiah 2:2-4) Mab puluw ko re yiiy nem, ni aram Pi Mich rok Jehovah e yad ma un ko reb e maruwel ni ngan skulnag e girdi’ u ga’ngin e fayleng ma kan ayuweg bokum milyon e girdi’ ni ngar togopuluwgad ko fanenikan u fithik’ e pi nam ni baga’ ni ereram likngin e mahl.
Ma bayi m’ay e pi mahl u tan Gil’ilungun Got, ni ir e ra yibnag e gapas ndariy n’umngin nap’an ma ra dakuriy e magawon u fayleng. (Psalm 72:7; Daniel 2:44) Ma aram’, ma ra lebug e pi thin ko fare psalmist ni gaar: “Mu guyed e pi n’en ni yira ngat ngay ni ke ngongliy u daken e fayleng! Be taleg e pi mahl ni yibe tay u fayleng i yan; be t’ar e gat’ing, ma be kirebnag e sarey, ma be urfiy e pi talin e cham.”—Psalm 46:8, 9.