Mang Fan ni Ga Ma Pigpig Ngak Got?

FARE pilung ni bay madgun Got u wan’ e pi’ e re fonow ney bayay ngak fak ni pumoon ni gaar: “Ngam nang fare Got rok e chitamam, mag pigpig ngak u polo’ i gum’ercha’em ngu fithik’ e falfalan’.” (1 Chronicles 28:9, New World Translation) Rib tamilang, ni Jehovah e baadag e pi tapigpig rok ni nga ur pigpiggad ngak nib adag lanin’rad ma ba fel’ u gum’ercha’rad.

GADAD e Pi Mich Rok Jehovah, e rayog ni nga dogned ni som’on nni weliy ngodad e pi n’en ni be micheg e Bible, ma gum’ercha’dad e sug ko falfalan’. Gubin e rran, ma gad be fil ban’en nib biech ni murung’agen e pi n’en ni ke lemnag Got. Faan ri i yoor e n’en ni gad be fil ni murung’agen Jehovah, ma aram ra i gel fedad adag ni ngad pigpiggad ngak “u polo’ i gum’ercha’dad ngo fithik’ e falfalan’ rodad.”

Boor e piin ni kar manged Pi Mich Rok Jehovah ni yad be ulul ko pigpig ku Jehovah ni yad be falfalan’ ngay u numngin nap’an e yafas rorad. Machane, ku bay boch e Kristiano ni ma tabab nib fel’ rogon, me munmun, me ling nga bang u lanin’rad fare n’en ni i re be k’aringrad nga ur i pigpiggad ngak Got. Ke buch e re n’en nem rom? Faanra ke buch rom, ma dabi mulan’um. Falfalan’ ni ma thay e rayog i fulweg. Uw rogon?

Mu Lemnag e Taw’ath Rom

Som’on, e ngam fleg i lemnag e taw’ath rom ni yu rran ni ma yib rok Got ngom. Mu lemnag rogon e pi taw’ath nib fel’ ni ma yib rok Jehovah: pi n’en ni ke sunmiy ni ba yoor mit​—ni fan ngak urngin e girdi’ ni demtrug rogorad ko ba tolang ma boor ban’en rorad fa danga’—​nge rogon ni yu gu ma pi’ e ggan nge garbod, nge rarogon dowey, nge tamilang ko tin riyul’ u Bible, ma bin tha’bi ga’ fan riy e fare taw’ath ni aram fak ni pi’. Yam’ ni tay e ir e fal’eg e kanawo’ ni nge bung rogom ni ngam pigpig ku Got ni dariy ban’en ni be yog lanin’um ngom ni kam rin’ nib kireb. (John 3:16; James 1:17) Faanra gel i lemnag felngin Got, ma aram gelngin ni ra gel fan i fel’ u wun’um Got i yan. Ma aram gum’ercha’em e ra mith mithegem ngam pigpig ngak ni ga be pining e magar ngak ni bochan urngin ban’en ni ke rin’. Ma dariy e maruwar riy ni ga ra lem ni bod rogon ni i lem fare psalmist ni faani yoloy ni gaar: “Boor bogi ban’en ni gur rom e kam ngongliy, O Jehovah ni Got rog, pi maruwel rom ni rib fel’ nge tin kam lemnag ni fan ngomad; dariy be’ ni rayog i taareb nagem ngak. . . . Ke yoor i yoor ni dabiyog ni gu weliy murung’agen.”​—Psalm 40:5, NW

Pi thin ney e yoloy David, ni be’ nib moon ni yafas rok e gathi ban’en ni da immoy e gafgow nge magawon riy. Nap’an ni ka ba pagal, me David e baga’ ni goo mil e i tay, ya fare pilung nib kireb ni aram Saul nge pi matanag rok e u ra gawged ni ngar li’ed nge yim’. (1 Samuel 23:7, 8, 19-23) David e ku bay e tirok e magawon ni ku be guy rogon ni nge maruweliy nge chuw. I yog e pi n’en ney u lan e guruy ni 40 ko Psalm ni gaar: “Kug par nga fithik’ e gafgow ni pire’, kaygi pire’ ndabkiyog i theeg! Denen rog e ke ingeg, ra gu changar ma goo denen rog e gu be guy; ke pire’ nga piyan lolugeg, ma kug par ni ke mulan’ug.” (Psalm 40:12) Arrogon, David e immoy e oloboch rok, machane de m’ay ni gubin. I par ni ke l’eg owchen ko pi kanawo’ ni baaram ni i taw’athnag Jehovah riy, ni demtrug rogon e magawon rok, me ni pirieg ni pi taw’ath nem e rib thil ni ke yoor ko gafgow rok.

Faan ga ra thamiy rom ni ke i ngem e magawon fa ga be lemnag ni dabkiyog i maruweliy rom, ma ba fel’ ni ga ra tal ngam lemnag e pi taw’ath rom, ni bod ni i rin’ David. Dariy e maruwar riy, ni faanra fel’ u wan’um e pi taw’ath nem ma rayog ni mithmitheg nem ngam ognagem ku Jehovah; ma lem ni aram rogon e ku rayog ni ayuwegem ko pi falfalan’ ni mul u paam me riyul’nag ni ga be pigpig ku Got nib falan’ gum’ercha’em ngay.

Pi Muulung ko Ulung e Rayog ni Pi’ e Ayuw

Ma n’en ni kub chag ngay e baaray ni nga u da fal’eged i lemnag felngin Jehovah, ma kub t’uf ni nga uda chaggad e pi walagdad ni Kristiano ni pumoon, nge ppin, nge pi fel’ yangaren ni piin ni ba t’uf Got rorad ni kar turguyed u wan’rad ni ngar pigpiggad ngak. Pi n’en ni ur rin’ed e rayog ni nge k’aringdad ngad maruwelgad u polo’ u lanin’dad ko pigpig ngak Jehovah. Maku wub ni ra ud tayed nga Kingdom Hall e ku ra pi’ e athamgil ngorad.

Gad manang, ni gad ra sul nga tabinaw u tomuren e maruwel u reb e rran fa baaray ni ke kireb e tafinay rodad ni bochan boch e magawon ma, ke tomal lanin’dad ni nga ku darod da uned ko muulung u Kingdom Hall. Ma aram e yu ngiyal’ i n’en nem, e thingar digel niged gadad, ‘nge gel e dowef rodad,’ ni aram e ngad folgad ngad rin’ed e n’en konog u taabang nge gadad e Kristiano.​—1 Korinth 9:26, 27; Hebrews 10:23-25.

Faanra buch e re n’en nem, me e re rayog ni ngad lemnaged ni de t’uf Jehovah rodad? Aram e danga’. Pi Kristiano ni kakrom ni ke n’uw naprad ko kristiano ni rib gagiyel ni rib t’uf Got rorad e ku u ri maruwelgad nib gel nga ur athamgilgad nga u rin’ed tin nib magan’ Got ngay. (Luke 13:24) Apostal Paul e ir bagayad e pi Kristiano nem. Baaray rogon i weliy rogon e lem rok ni gaar: “Gu manang nu fithik’ag, ni aram, e fithik’ e ufin u dowag, e dariy ban’en ni be par riy nib fel’; ya gelngig ni nga u gu athapeg ban’en e bay rog, ma gelngig ni nga gu maruweliy ban’en nib fel’ e dariy. Ya n’en nib fel’ ni gu be athapeg e dagur rin’, ma n’en nib kireb ni dagur athapeg e aram e n’en ni gu ma rin’.” (Roma 7:18, 19, NW) Me yog ngak piyu Korinth ni gaar: “Ere, chiney, ni gu be garareg fare thin nib fel’, e dariy rogog ni nga gu uf, ya ban’en ni kan tay nga dakennag ni nga gu rin’. . . . Faan gu ra rin’ e re n’en ney nib m’agan’ug ngay, ma bay e taw’ath rog; ma faan gu ra rin’ ni de gaaran’ug ngay, ma ku taareb rogon ya bagaf i maruwel ni kan pag gafalen ngog ni nga gu rin’.”​—1 Korinth 9:16, 17, NW.

Paul e ku bod rogon bochi gadad, ni ku ma yib ngan e tin nib kireb ni magawonnag laniyan’ ni nge rin’ e tin nib mat’aw. Machane, mu cham nib elmerin nib togopuluw ko pi lem ni kireb nem, ma baga’ ni boor yay, ni ir e ma gel. Machane, gathi rin’ e re n’en ney u gelngin. I yoloy ni gaar: “Ya gubin ban’en ma bay gelngig riy nbochan faanem ni ir e pi’ gelngig.” (Filippi 4:13, NW) Jehovah, e ir e cha’ ni pi’ gelngin Paul, maku rayog ni nge pi’ gelngim ngam rin’ e tin nib mat’aw ni faan ga ra ning e ayuw rok. (Filippi 4:6, 7) Ere mu rin’ “mu cham nib gel nbochan e michan’,” ma ra taw’ath nagem Jehovah.​—Jude 3, NW.

Gathi ngam cham ni goo gur rom. U lan e ulung ko Pi Mich Rok Jehovah, ma pi Kristiano ni piin piilal, ko ulung ni ke n’uw naprad ni ku yad be ulul ko fare “cham ni fan ko michan’” e kar fal’eged rogorad, kar pired ni ngar ayuweged gur. Faan ga ra yib ngak reb e piin piilal ni nge ayuwegem, ma ri ra maruweliy nib elmerin ni nge “non nge pi’ e fonow” ngom. (1 Thessalonika 5:14) Ni rogon e n’en ni be nameg e nge par “ni ke bod bangi n’en ni ngan mith nga fon ko nifeng nge bangi n’en ni ngan mith ngay ko n’uw nib gel.”​—Isaiah 32:2, NW.

“Got e t’ufeg,” ma baadag e pi tapigpig rok ni nga u ra pigpiggad ngak u fithik’ e t’ufeg. (1 John 4:8) Faanra t’ufeg rom ngak Got e ba t’uf ni ngan gelnag, ma ngam man u kanawo’ nib puluw, ngam rin’ ni bod ni ke m’ay i yoloy ko som’on. Ga ra falfalan’ ni faan ga ra rin’.