Ban’en ni Yira Fil ko Palm Tree

“RIB GAMOG mab fel’ yaan.” Aram rogon ni yog reb e babyor ni Bible encyclopedia ni weliy murung’agen fa yu ke gek’iy ni date palm. Nap’an e tayim ko Bible nge chiney, ma yu ke date palm nem e ke fal’eg yaan fare Loway ni Nile u Egypt, maku yad be pi’ e togulul’ nib fel’ ko yochi yang i n’en baaram ni ma tugul e gek’iy riy ko fare Negeb Desert.

Ku bod boor mit e gek’iy ni palm, fare date palm e rib k’ik’iy nga lang. Yu ken e ma n’un’uw nge yan i mada’ko 100 e feet ma yugu ma yib waamngin u lan 150 e duw. Arrogon, fare date palm e rib fel’ yaan u owchey mab pay ni ma yoor waamngin. Ra reb e duw ma boor punug i waamngin ni aram e dates. Ra taab punug ma ba pag e 1,000 dates ni ba’ riy. Rogon murung’agen e dates, ni yoloy reb e tayugang e gaar: “Piin ni ba aram ni . . . kemus ni yad manang e dates ni tin ba aram ni kan gilk’ad ke milik kan tay nga lan ban’en ni bay u kantin, e ba sa mo’maw ni ngar nanged rogon feni fel’ lamen ni baaray ni nga yu gun t’ar min kay ni kab biech.”

Ere rib puluw, ni Bible e i taarebnag boch e girdi’ ko re gek’iy ni palm nem. Faanra ngan fel’ u owchen Got, ma ngan bod fene yoor waamngin e gek’iy ni palm, nge be’ ma nge par nib yal’uw pangin ma thingari i par ni be ngongliy e maruwel nib fel’. (Matthew 7:17-20) Bochan ere n’eney, mu uni fanay yaan e gek’iy ni palm ni uni ker nga dow fa gal tempel ku David nge fa bin nni piliyeg e changar rok Ezekiel nge guy. (1 Kings 6:29, 32, 35; Ezekiel 40:14-16, 20, 22) Arfan, ni faanra nge fel’ e liyor rok be’ u wan’ Got, ma faanem e thingari yog ngak rarogon e gek’iy ni palm nib fel’ u wan’uy. Thin rok Got e weliy ni gaar: “Ani mat’aw e ra puf ni bod e gek’iy ni palm ni ma puf.”​—Psalm 92:12, NW.