Pi N’en Ma Kirebnag e Gek’iy

UNAP’AN e Bible, ma gek’iy e yima ta’ ni n’en nib ga’ fan. Bod rogon, ni faani chuwiy Abraham bangi ban’en ni ngan k’eyag leengin, i Sarah riy ni rib t’uf rok, ma gek’iy e kub muun ko re babyoren e chuway’ ko gi binaw nem ni ngan pi’.​—Genesis 23:15-18.

Ku arrogon e chiney, gek’iy e ri kub ga’ fan, ma ke ga’ ni n’en be rin’ e pi nam e yad be guy rogon ni ngan ayuweg e yu ulung i gek’iy. Fare ke babyor ni State of the World 1998 e be gaar: “Aram rogon ni boor e girdi’ ko tin nu lel’uch e nam ni yad be lemnag e yu ulung i gek’iy ko yungin baaray nib gel e yal’ riy ma der aw e ayis riy, ma sana da ra nanged ni tin baaram e yu ulung i gek’iy nib fel’ gelngin e gawel nge garbeb riy ko nam rorad nib th’abi yoor yang e bay riy e ir e ke magawon u fithik’ urngin mit e yu ulung i gek’iy.” Mang e n’en be yan ni nge kirebnag e yafas ko yu ulung i gek’iy ni ba’ ko pi nam ko le’loch ni aram yu Europe nge len i le’loch yu Meriken? Boor e girdi’ e be lemnag ni bochan ni yibe li’ e gek’iy ni nge tamilang, machane ku bay boch ban’en ni der gagiyel ni be li’ e gek’iy, ni ta’ taab ken. Bogi mang? Nifeng nib alit nge n’uw ni bay e acid riy. Pi n’en nib alit e rayog ni nga i warnag e gek’iy ni sasafog, ma aram me momnag ko pi n’en ni ma kirebnag e gek’iy nge misilpig.

U lan boor e duw ni ke yan, ma girdi’ ni ma guy ni nga i par nib fel’ rogon toobey i yan nge pi n’en ba’ riy nge pi n’en nib fel’ ko girdi’, nge piin kub ga’ fan u wan’rad e pi n’eney e ka rogned feni t’uf ni ngan ayuweg e ecosystem ko fayleng. U lan e pi duw ko 1980, u tomuren ni ke fil e pi scientists nu Chiyamen e n’en ni ma rin’ e nifeng nib alit nge n’uw ni ba’ acid riy ko girdi’ nge gin ni yad ma par riy, ma ra pirieged ni: ‘Faanra dabni rin’ ban’en, ma ra ni gonapan e duw ni 2000, ma girdi’ e bayi par ni kemus nu lan e sasing nge kachido e bay ur guyed yaan e loway riy ni yad baadag yaan.’ Gad be falfalan’, ya gelngin e fayleng ni ma biechnag ir ma ke yog ni nge par e yu ulung i gek’iy ni yugu aram gelngin e magothgoth ni kan nog ni yibe ta’ ngay.

Machane, ra munmun i yan, me Got e ir e baga’ ni bayi ayuwegdad nge pi n’en bay u fayleng. “Ir e be pi’ e n’uw u lan e lang be yib nga daken e pi burey” nge “ma gagiyegnag e pan be tugul ni fan ngak e pi gamanman, ma ke gagiyegnag e woldug be tugul ni fan ngak e girdi’.” Ma ke micheg ni “ke taw nga nap’an ni ngan kirebnag e piin ni kar kirebnaged e fayleng.” (Psalm 104:13, 14; Revelation 11:18) Uw feni manigil e ngiyal’ nem ni girdi’ nu fayleng e rayog ni ngar falfalan’gad ni manemus u ba fayleng ni dakuriy e alit riy!​—Psalm 37:9-11.