“Bochane Tamilang ni Yib Rom Ma Rayog ni Nggu Guyed e Tamilang”

TAMILANG e aram e n’en ni baga’ ni gad ma dariyfannag nge mada’ ko ngiyal’ ni ke math e gamig ma ke aw e lumor nib tomgin nga urngin ban’en u toobdad. Gad ba falfalan’ ya fare “tafen e gamig” rodad u tharmiy​—ni fare yal’—​e ri ba mudugil. Ma bochan e tamilang ni ma yib ko yal’, ma rayog rodad ni ngada guyed ban’en, ma gad ma abich, ma gad ma pogofan, ma gad be par nib fas.

Ma bochan ni ba t’uf fare tamilang nge yog ni par ban’en nib fas, ma dabda gingad ngay ya thin ni bay ko Genesis e be yog ni keb fare tamilang ko fa bin som’mon e rran u nap’an ni yibe sunmiy ban’en. “Me non Got ni gaar: ‘Nge tamilang.’ Me tamilang.” (Genesis 1:3) Girdi’ ni ke mich Got u wan’rad ni bod David ni Pilung e kari tamilang u wan’rad ni Jehovah ir tabolngin e yafas nge tamilang. “Gur tabolngin e yafas,” aram e n’en ni yoloy David. “Bochan fare tamilang ni yib rom ma rayog ni nggu guyed e tamilang.”​—Psalm 36:9.

Thin rok David e rayog ni nge yip’ fan e bin riyul’ e tamilang nge fare tamilang ni be yip’ fan ban’en. Fare babyor ni Encyclopædia Britannica e be yog ni gaar: “Fare tamilang e ri ir tapgin ma rayog ni ngada guyed ban’en.” Me ulul ngay ni gaar: “Kab boor e tamilangan’ ni nge mit ko man’ey ko girdi’ ni bochan e pi n’en ma guy lan owchedad ni faan ra ngan taarebnag ko yugu boch e thamtham rodad.” Bochan boor ko fapi tamilangan’ rodad ni be tor nga daken fare taw’ath nni pi’ ngodad ni aram rayog ni ngada guyed ban’en​—mab t’uf e tamilangan riy ni fan e nge maruwel nib fel’ rogon—​ma ku kan fanay u lan e Bible fare tamilang nrogon ni be yip’ fan ban’en.

Arfan, ke yog Jesus ngak pi gachalpen ni gaar: “I gag e tamilang ko girdi’ nu fayleng. En nra i lekeg e ke yog e tamilang ko yafos ngak ma dabki yan u fithik’ e lumor biid.” (John 8:12) Fare tamilang ni be yip’ fan ban’en ni ke yog Jesus ngorad e aram e thin riyul’ ni i machibnag ngorad, ni rayog ni nge pi’ e tamilangan’ ko lem nge gum’irchaen e girdi’ ni be motoyil ngak. Tomren ni ke yan fapi duw ni ke gel e lumor ko tirok Got banen, ma fini tamilang u wan’ pi gachalpen Jesus e tin nib m’agan’ Got ngay ni fan ko girdi’ nge fare athap ko gil’ilungun. Ri aram e “tamilang ko yafas,” ya bochan e re tamilangan’ ney e ra pow’iyey ko yafas ni manemus. “Baara’ ira’ e yafos ndariy n’umngin nap’an,” aram e n’en ni yog Jesus u nap’an ni be meybil ngak e Chitamangin nu tharmiy ni gaar, “ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Manga yigi dabda dariyfannaged e re tamilangan’ ko tirok Got ban’en ney!