Report Ko Piin Ma Wereg Murung’agen Gil’ilungun Got

“Kam Diliiy e Namba nde Puluw”

U LAN yu Johannesburg, u South Africa, me Leslie nge Caroline e u ra thilthil gow ko machib u telefon ngak e girdi’ ni dakir maruwel ko am ni yad ma par u reb e binaw ni bay e matanag ni ma par ko garog riy. Ba lich e girdi’ ni yow ma pirieg ni bay u tabinaw maku gathi ri yad baadag e machib ko kristiano, ere ri athamgil laniyan’ Caroline u nap’an ni fulweg be’ ni ppin e dengwa rok.

Me fith Caroline ni gaar: “I gur e Mrs. B—?”

Me non ba lam nib gol mab sumunguy “Ah, danga’,” “I gag e Mrs. G—. De puluw e namba ni kam diliiy.”

Ma ke rungaag nib sumunguy lungun ni ke non, me gaar Caroline: “Ere mu son, nga gog ngom e n’en gu be lemnag ni nga gog ngak Mrs. B—.” Me tabab nge weliy murung’agen fare tawaath ko fare Gagiyeg rok Got ni bay yib. Tomuren ni kar nonow karognew rogon ni ngan yan ni pi’ ngak fare babyor ni Mang e Ba T’uf ni Ngad Rin’ed Ku Got?, me fith Mrs. G— ngak fare pin ni gaar: “Ma mu son, mang e teliw rom?”

Me fulweg Caroline ni gaar, “Gamad e Pi Mich rok Jehovah.”

“Ah, danga’, gathi baanir e teliw! dagur lemnag ni gu baadag ni nga gu guyem.”

Miki non Caroline, ngak “Mrs. G—ni gaar,” “ka aram nap’an ni yib ke gaman 20 e minit, ni kugu weliy boch ngom murung’agen e bin th’abi fel’ e athap ni gu be yog ngom u Bible, e n’en ni dabki n’uw nap’an me rin’ e Gagiyeg ku Got ni fan ko girdi’. Ma ri gab falfalan’ ni ga be rungaag e pi n’eney​—ni kar mu falfalan’—​ma ga baadag ni nga ku mu nang boch. Mang e n’en ni ri ga manang u murung’agen e Pi Mich rok Jehovah? Faan gomanga kam m’ar, ma ga ra yan ngak be’ nib ta fal’eg e masin? Mang ni dabmu pageg nga gog ngom ko mang e n’en nib mich u wan’ e Pi Mich rok Jehovah?”

Ma daki non nib n’uw boch nap’an me gaar: “Ere sana sorom. Bay mub. Machane ngam lemnag ni, ri dabiyog ni ngam pingegneg!”

“Mrs. G—, ri dabiyog rog ni nga gu pingegnem ni ku ra gu baadag ni nga gu rin’,” maku dabiyog. “Kemus ni goo Jehovah e rayog rok ni nge rin’ e binir.”

Ere rogon ni nge pi’ fare ke babyor e yan i aw nib fel’ rogon, miki m’agan’ Mrs. G— (Betty) ngay ni ku yira yan bayay. Ma nap’an niki sul Caroline biyay, me yog Betty ngak ni ke non ngak boch e ppin u nap’an ni yad bay u dining room ni kar nonow reb e Mich rok Jehovah. Mar fithed ni, “Uw rogon ni kam rin’ e binir?” mar daged u pa’rad ndariy ban’en nrayog ni ngara rin’ed nfaanra aram e n’en ni baadag, me lungurad ni gaar: “Pi cha’ nir e de mich Jesus u wan’rad!”

Me gur Caroline nge puguran ku Betty reb e n’en nib ga’ fan ni kuur weliyew u murung’agen e Gagiyeg rok Got.

Me fith Caroline ni gaar, “Mini’ e ra mang Pilung?”

Me fulweg Betty ni gaar, “Mog, ir Jesus.”

Me gaar Caroline, “Arrogon.” Ma aram me weliy ngak ni Pi Mich rok Jehovah e ba mich u wan’rad ni Jesus e fak Got, ma de taareb rogon ku Got ni bod ni ir bang ko fare Trinitas.​—Mark 13:32; Luke 22:42; John 14:28.

Tomuren in yay nni sul ngak, ma ke mudugil ni yugu aram rogon ni ke m’ug, ni ke falfalan’, ma Betty e ke gafgow ko m’ar. Riyul’, ya ke cancer ma ke rus ni bayi yim’. Me gaar, “Gu be athapeg ni faan ma nga gu rungaag e pi n’eney fa tinef e duw ni ke yan ma ra yog ngog e biromed e michan’.” Me fal’eg Caroline laniyan’ ni i dag boch e thin ngak u Bible ni be weliy ni yam’ e bod ni kan mol ni bay kun od u nap’an e fas ko yam’. (John 11:11, 25) Rib ga’ fan e re n’eney ngak Betty, ni chiney e be falfalan’ ko fol Bible rok ni ke mudugil ngal’an. Kemus ni ke war nbochan e m’ar, ma aram fan ni der yog ni nga i un ko muulung u Kingdom Hall.

Me yog Caroline ni gaar: “Kari gunang ni pi engel e yad be pow’iy e re maruwel ney. I Betty e ni ‘oloboch min diliiy e namba rok,’ ma akuyugu mu lemnag, ni ke gaman e 89 e duw rok!”​—Revelation 14:6.