Yad Ba Gonop u Reb e Kanawo’

BAY bbugithin ni yima yog u Nigeria ni gaar: “Ba gonop e piilal, machane piin bitir e ku yad ba gonop u reb e kanawo’.” I riyul’ e re bugithin ney u wan’ reb e piilal ni Kristiano u Nigeria ni Edwin fithingan.

Reb e rran me guy Edwin bochi kahol ni wasey u tan e tebel rok u tabinaw.

Me fith dalip i bitir ni fak ko mini’ e arorad ni fen?

Me yog bagayad ni Emmanuel fithingan, ni ir e fen. Miki yog ni chi kahol nem ni lal e inch n’umngin nge radan e ke tay ni fan ko ayuw ni yima pi’ ko maruwel ko Pi Mich Rok Jehovah u fayleng i yan. Miki gaar: “Kug lemnag ni nggu chamiy bochi reb e kahol ya faanra da gu chuw’iy ban’en nggu wa’ ko salpiy ni kan pi’ ngog, mu gon’ e ngaram, ya gathi gubin e rran ni gu ma yan nga Kingdom Hall.”

Immoy bochi reb e kahol ko chitamangin Emmanuel ni i chaariy e salpiy ngay ni fan ko district convention. Ma faani yib reb e magawon nib tomgin min fanay fare salpiy ngay. Ere ke lemnag Emmanuel ni binem e salpiy ni nge chaariy e dab kun fanay nga reb e ban’en. Aram fan ni fek bangi kobre’ i yan ngak be’ ni ma weldnag e wasey ni nge chamiy bochi kahol riy ndabiyog ni ngan bing. Nap’an ni nang faen ni ma weld fan fachi kahol, ma aram me ngongliy reb ni fen Emmanuel ko ta taban e wasey. Ma aram miki yog Michael ni lal e duw rok ni nga kun chamiy bochi reb ngak.

Kari gin Edwin ko n’en ni ke rin’ fapi bitir ni fak, ere fithrad ko mang fan e pi kahol nem ni kan ngongliy. Me fulweg Michael ni gaar: “Ya gu baadag ni nggu pi’ e ayuw!”

Aram nap’an nde nang e gallabthir rok fagali pagal nge Uchei ni walagrow nib pin ni mereb e duw rok, ni ur chaariyed bang ko salpiy ni yima pi’ ngorad ni ngar chuw’iyed ban’en ngay ni ngar ked. Mang e ke rin’ ma kar nanged ban’en ni aram rogon? Nap’an ni yog ni ngar koled e salpiy, ma aram mi i pi’ e gallabthir rorad e salpiy ngorad ni nga ron’ed ko gin ni yima yin’ e salpiy ngay u Kingdom Hall. Ere, riyul’ ni ke fol fapi bitir ko n’en ni kan fil ngorad.

Nap’an ni sug fapi kahol, ma aram min bing. Urngin e salpiy ni immoy riy e yira thilyeg ko salpiy ni Meriken ma $3.13. Machane, binem e salpiy e ba ga’ ko nam rorad ni bochan e yooren e girdi’ e sogonap’an urngin e salpiy ni ma yog ngak u reb e duw e 300 e dolla. Ayuw ni aray rogon ni yima pi’ e ma ayuweg e maruwel ni machib ni ma tay e Pi Mich Rok Jehovah u 235 e nam.