Mang Pagfan e Bat’uf ni Fan ni Nge Yog e Nangan’ nib Biech?

“KA nog ko am ni nge fek fare salpiy ni R$20,000.” Ireray kenggin e thin ni kefin ni m’ug ko fare Shimbung nu Brazil ni Correio do Povo. Fare article e i weliy murung’agen e tin ni buch rok Luiz Alvo de Araújo, ni reb e mailman ko binaw rok, ni ke pi’ bangi binaw rok ni chuway ko am. Tomren ni ke sayinnag e babyor ni be dag ni am e ra fana’ fare binaw rok, ma ke gin Luiz u nap’an ni ke nang ni fare salpiy ni kan pi’ ngak e ke pag R$20,000 (approximately $8,000, U.S.) u puluwon ni kan weliy!

Rogon ni ngan sulweg fare salpiy ni kan pi’ ngak nib pag urngin ya kan oloboch e ba mo’maw’ ni ngan rin’. Tomren ni ke guy rogon ni nge guy girdien e am ma de yib angin, min nog ngak Luiz ni nge fek reb e lawyer min pithig fare magawon u court. “Ba tamilang ni bay be’ ni ke oloboch, ma bochan ke sagaal ya mo’maw’ ni ngan gay e oloboch riy, ma dakuriy be’ ni manang rogon ni ngan pithig fare magawon,” ma rogon ni yog fare tapuf oloboch ni ir e motochiyelnag e am ni nge fek fare salpiy ni fan ni ngan pi’ puluwon boch ban’en me yog ni gaar. “Kemus ni chiney ni kug guy e magawon ni aram rogon.”

Luiz, ni ir bagayad ko Pi Mich Rok Jehovah e ke weliy ni gaar: “Nangan’ rog ni kan skulnag ko Bible e dabug ni nggu chaariy e n’en ni gathi tirog. Susun ni nggu sulweg e salpiy.”

Boor e girdi’ ni ma lemnag ni aram e lem ni yira ngat ngay ara dabiyog ni ngan nang fan. Machane Thin rok Got e be dag ni fapi Kristiano nib riyul’ e ri baga’fan u wan’rad ni ngan ayuweg me par nib biech e nangan’ rorad nrogon ni yad ma rin’ ban’en ni fan ko am. (Roma 13:5) Pi Mich Rok Jehovah e ke mudugil lanin’rad ni ngar ayuweged yad me par nib ‘yul’yul’ e nangan’ rorad ma ur rin’ed urngin ban’en u fithik’ e yul’yul’.’—Hebrews 13:18.