Uw Rogon ni Ngan Magay nib Fas ko Tomur Ko Re Fayleng Ney?

FARE Bible e be weliy murung’agen e tomur ko re m’ag ney ni aram “fare rran ko damumuw nib gel, nge fare rran ko gafgow nge kireban’, nge fare rran ko yoko’ nge pi n’en ni kan buthug, nge fare rran ko lumor nge romog, nge fare rran ko manileng nge fare rran ni rib lumo-lang.” (Zefaniah 1:15, New World Translation) Mmutrug ni gathi mit ney e rran ni ga ma sap ngay! Machane, i fonownag Peter ni apostal e pi walagen ni Kristiano ni nguura “sonnaged e chirofen nem, ni ir e Rran rok Got, mi yad athamgiliy nrogon nrayog rorad nge papey nge taw ngay - Rofen ni baaram ni bay yik’ lan e lang nge kireb e urngin ban’en ni bay u lan e lang e bayi ranrannag e gowel. Machane ke yog Got ni bay sum e bin nib biech e lan e lang nge bin nib biech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.”—2 Peter 3:12, 13.

De weliy Peter murung’agen e tharmiy nge fayleng nib riyul’ ni ngan gothey. Boch e thin nib chuchugur ngay e be dag ni i weliy Peter murung’agen e “pi tharmiy” nge “fayleng” ni be yip’ fan e pi am ko girdi’ e chiney nge girdi’ ni de mich Got u wan’rad. “Fare rran rok Jehovah” e dabi gothey fare fayleng machane ra “thang e piin ta denen u fayleng.” (Isaiah 13:9, NW) Piin ni “be dololoy ma be gelgel nbochan urngin e tin nib kireb” ni be rin’ e girdi’ ko ngiyal’ ney, ma fare rran rok Jehovah e ri aram fare rran ni ngar magaygad nib fas.—Ezekiel 9:4.

Ere uw rogon, nra magay e girdi’ nib fas ko “fare rran rok Jehovah nib ga’ ma ma k’aring e marus”? “Thin rok Jehovah” ni kan dag ngak reb ko fapi profet rok e ra pi’ e fulweg ko re deer ney ni gaar: “Ri bayib e tayim ni urngin e girdi’ nra pining fithingan Jehovah e ra magay nib fas.” (Joel 1:1; 2:31, 32, NW) Pi Mich Rok Jehovah e yad ba falfalan’ ni ngara ayuweged gur ni ngam nang ko mang fan fare n’en ni ngan pining fithingan Jehovah.