Mang Fan Ni Ngan Taufe?

“Marod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad.”​—MATTHEW 28:19.

1, 2. (a) Uw rarogon boch e girdi’ ni kan taufenagrad? (b) Mang boch e deer e kan nog nib l’ag ko taufe?

CHARLEMAGNE ni Pilung ni Frankish e ke towasariy yu ulung i kalbus ni ka nog e Saxons ngorad ni ngan taufenagrad ko duw ni 775-77 C.E. “I pingegrad u fithik’ e towasar ngar manged Kristiano ni kemus ni fithingan’,” aram e n’en ni yoloy John Lord nib historian. Taab rogon nga tomren ni ke mabgol fare pilung nu Russia ni Vladimir I nge fare fak e pilung ni ppin ni Greek Orthodox ko duw ni 987 C.E., me dugliy ni thingari mang “Kristiano” e piin yad ma par u tan pa’. Me motochiyelnag ni ngan taufenag e girdi’ rok ni yu ulung​—min nog ni ngan li’ ko sayden ngem’ e piin dabun ni nge un ngay!

² Aram rogon e taufe nib puluw? Riyul’ ni bay fan e re n’em? Dabisiy ni ngan taufenag e yugu girdi’?

Uw Rogon e​—Taufe?

3, 4. Mang fan ni de puluw ni ngan atngiy ara ngan puog e ran nga lolugey u nap’an e taufe ko Kristiano?

³ Nap’an Charlemagne nge Vladimir I ni u ra towasariyew e girdi’ rorow ni ngar uned ko taufe, ma gali pilung nem e kara rin’ew ban’en nib togopuluw ko Thin rok Got. Riyul’, ni de fel’ nfaanra taufe ngan wereg e ran nga daken be’, ara ngan puog e ran nga lolugey, ara ngan lithag be’ nga ar ni dawor ni fil ngak e thin riyul’ u lan e Bible.

⁴ Mu lemnag ko mang e ke buch u nap’an Jesus nu Nazareth ni ke yan ngak John ni Tataufe ko duw ni 29 C.E. Be taufenag John e girdi’ ko Lul’ ni Jordan. Kar bad ngaram ni yad baadag ni ngan taufenagrad. Ke yog ngorad ni kemus ni ngara sak’iygad u Jordan nge puog boch e ran u lan e lul’ nga lolugrad ara nge atngiy boch e ran nga dakenrad? Mang e ke buch u nap’an ni be taufenag John Jesus? I weliy Matthew ni tomren ni kan taufenag Jesus “me yib u fithik’ e ran nga talang.” (Matthew 3:16) Immoy u fithik’ e ran, ya bochan ni kan lithag nga ar ko fare Lul’ ni Jordan. Taab rogon ko, fa cha’ nu Ethiopia mab eunuch ni kan taufenag u lan “fa gi ran.” Gi ran nem e rib t’uf ya bochan ni fare taufe ni ke un Jesus nge pi gachalpen ngay e kan lithagrad nga fithik’.​—Acts 8:36.

5. Uw rogon ni ma taufenag e girdi’ e piin Kristiano kakrom?

⁵ Thin nu Greek ni kan thiliyeg ni “taufenag,” nge “taufe,” nge yugu boch ban’en, e be yip’ fan ni ngan lithag nga ar ara ngan ta’ nga fithik’ e ran. Fare Smith’s Bible Dictionary e be gaar: “Taufe e ba puluw ma be yip’ fan e ngan ta’ nga fithik’ e ran.” Arfan ni boch e Bible e be weliy murung’agen John ni ani “ma lithag be’ nga ar maku ka nog ni ani ma chulthag be’ nga ar.” (Matthew 3:1, Rotherham; Diaglott interlinear) Fare babyor ni History of the Christian Religion and Church, During the Three First Centuries ni Augustus Neander e yoloy e be yog ni gaar: “Taufe ni un rin’ ko tabolngin e yima lithag be’ nga fithik’ e ran.” Fare babyor nib gilbuguwan u French ni Larousse du XX^e Siècle fithingan (Paris, 1928) e ke yog ni gaar: “Kan taufenag e piin Kristiano kakrom ni yima lithagrad nga fithik’ e ran ni yug ndemtrug e gin ni yira pirieg e ran riy.” Ma fare babyor ni New Catholic Encyclopedia e be yog ni gaar: “Ba tamilang ni taufe ni yima rin’ u lan e Ulung kakrom e yima lithag e girdi’ nga fithik’ e ran.” (1967, Volume II, page 56) Ere chiney, e ra un be’ ko taufe nge mang bagayad e Pi Mich Rok Jehovah ma nge rin’ e re n’ey nib m’agan’ ngay mab muun ngay ni ngan lithag nga fithik’ e ran ni polo’.

Reb i Fan e Taufe nib Biech

6, 7. (a) Fare taufe ni i tay John e fan ko mang? (b) Mang e tin biech ko taufe ni ke un fapi gachalpen Jesus ngay?

⁶ Taufe ni tay John e de taareb fan ko taufe ni i tay pi gachalpen Jesus. (John 4:1, 2) I taufenag John e girdi’ ni ngan dag ngak e girdi’ ni yoor ni kara kalgadngan’rad ko denen rorad nib togopuluw ko fare Motochiyel.a (Luke 3:3) Machane bay ban’en nib biech ko fare taufe ni un pi gachalpen Jesus ngay. Nap’an e Pentekost 33 C.E., me fonownag Peter ni apostal e girdi’ ni yad be motoyil ngak ni gaar: “Mu kalgadngan’med, ma ra bigimed min taufenag nga fithingan Jesus Kristus ni fan ni ngan n’agfan e denen romed.” (Acts 2:37-41, NW) Yugu aram rogon ni be non Peter ngak piyu Jew nge piin proselytes, ma de weliy murung’agen e taufe ni be yip’ fan e kalngan’ ko denen nib togopuluw ko fare Motochiyel; maku de yog ni taufe u fithingan Jesus e be yip’ fan e ngan maluknag e denen.​—Acts 2:10.

⁷ Ngiyal’ nem, e i fanay Peter e bin m’on ko “fapi key ko fare gil’ilungun.” Ni fan ko mang? Ni fan ni ngan bing e wo’ ngak e piin ni be motoyil ko tamilangan’ u murung’agen e kanawo’ ni ke mab ngorad ni nga ranod nga Gil’ilungun e tharmiy. (Matthew 16:19) Bochan ni piyu Jew e kara n’aged Jesus ni ir fare Messiah, ma aram fan ni ngan kalngan’uy ma ngan maruweliy e michan’ ngak e aram e n’en nib biech mab n’en nbaga’ fan ni ngan gay rogon ni nge n’ag Got fan e denen. Rayog ni ngara daged e mich ko re michan’ ney ngak e girdi’ ni yoor ni aram e ngan lithagrad nga fithik’ e ran u fithingan Jesus Kristus. Mu daken e re n’en ney aram e pow ni kar ognaged yad ku Got u daken Kristus. Urngin e girdi’ ni yad baadag ni ngar fel’gad u wan’ Got e thingara daged e mich ni aram rogon nde maruwaran’rad ni ngara ognaged yad ngak Got ni Jehovah, ma ngara uned ko taufe ko Kristiano ni ra dag ni kara ognaged yad ko fare Got ni Th’abi Tolang nde maruwaran’rad.

Ba T’uf e Tamilangan’ nib Puluw

8. Mang fan ni taufe ko Kristiano e gathi fan ko urngin e girdi’?

⁸ Gathi urngin e girdi’ e bay rogorad ni ngara uned ko Taufe ko Kristiano. I tay Jesus chilen ngak pi gachalpen ni gaar: “Mmarod . . . ma ngam pingeged girdien e pi nam u gubin yang ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup, mi gimed fil ngorad rogon ni nguur folgad ko urngin ban’en ni kug tay chilen ngomed.” (Matthew 28:19, 20) U m’on ni ngan taufenag e girdi’, ma thingari ‘fil ngorad ni ngar folgad u gubin e tin ke tay Jesus chilen ngak pi gachalpen.’ Ma arfan ni, taufe u fithik’ e towasar ngak e piin ni dariy e michan’ rorad ni def riy e aram e tamilangan’ ko Thin rok Got e dariy fan mab togopuluw ko maruwel ni pi’ Jesus ngak pi gachalpen.​—Hebrews 11:6.

9. Mang e be yip’ fan ni ngan taufenagey “u fithingan e Chitamangiy”?

⁹ Mang fan e re n’em ni ngan taufe “u fithingan e Chitamangin”? Re n’em e be yip’ fan ni girdi’ ni nge un ko taufe e ke nang e liw nge mat’awun e Chitamangidad nu tharmiy. Arfan ni kan nang ni Jehovah ni Got e ir e en Tasunmiydad, ma ir e en “Th’abi Tolang u ga’ngin yang e fayleng,” ma fare Pilung ni Th’abi Tolang u Palpalthib.​—Psalm 83:18; Isaiah 40:28; Acts 4:24.

10. Ngan taufenagey ‘u fithingan Fak’ e be yip’ fan e mang?

¹⁰ Ngan taufe ‘u fithingan Fak’ e be yip’ fan ni ngan tay fan e liw rok Jesus ni ir Fak Got ni kari maagirag rok. (1 John 4:9) Piin ni bay rogorad ni ngan taufenagrad e ba mich u wan’rad ni i fanay Got Jesus ni nge “biyuliy boor e girdi’.” (Matthew 20:28; 1 Timothy 2:5, 6) Girdi’ ni kan yarmiy ni nge un ko taufe e ku susun ni nge mich fare “liw nib tolang” u wan’ ni ke tolangnag Got Fak riy.​—Filippi 2:8-11; Revelation 19:16.

11. Mang e be yip’ fan ni ngan taufenagey ‘u fithingan fare kan ni thothup’?

¹¹ Mang e be yip’ fan e taufe ‘u fithingan fare kan ni thothup’? Re n’en ney e be yip’ fan ni girdi’ ni kan yarmiy ni nge un ko taufe e ba mich u wan’ ni fare kan ni thothup e ir fare gelngin Jehovah, ni ke fanay u boch e kanawo’ nib thilthil rogon nib puluw ko tin nib m’agan’ ngay. (Genesis 1:2; 2 Samuel 23:1, 2; 2 Peter 1:21) Piin ni bay rogorad ni ngar uned ko taufe e ba mich u wan’rad ni ke ayuwegrad fare kan ni thothup ni ngara nanged fan “boch ban’en ni tirok Got ni ba toar fan,” ma ngara lebguyed fare maruwel ni ngan machibnag e thin ko Gil’ilungun, ma ngar daged woom’engin e kan ni thothup ni “t’ufeg, nge falfalan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, t’ar laniyan’.”​—1 Korinth 2:10; Galatia 5:22, 23; Joel 2:28, 29.

Uwfeni Ga’fan ni Ngan Kalngan’uy Min Pig i Chel Ngak Got

12. Uw rogon ni taufe ko Kristiano e ba l’ag ko ngan kalngan’uy?

¹² De un ngay fa en ni dariy e denen rok i Jesus, ma taufe e be yip’ fan ni ke fel’ be’ u wan’ Got nrogon nib l’ag ko kalngan’. Nap’an ni kada kalgadngan’dad, ma ngari kireban’dad, n’en ni kada rin’ed ara ban’en ni de yog rodad ni ngada rin’ed. Piyu Jew ko fa bin som’mon e chibog ni yad baadag ni ngara falfalan’naged Got e thingara kolgadngan’rad ko denen nib togopuluw ku Kristus. (Acts 3:11-19) Boch e girdi’ ni gathi yad piyu Israel u Korinth ni ke michan’rad e kara kolgadngan’rad kar talgad ko ngongol ni darngal, ma dabkura meybilgad ko liyos, ma dabkura iringed ban’en, nge yugu boch e denen nib ubchiya. Bochan ni kara kolgadngan’rad, ma kan “biechnagrad” u daken rachaen Jesus; ma kan “thothupnagrad,” ara kan keegrad, ni fan ni ngara pigpiggad ku Got; ma “kan mat’awnagrad” u daken fithingan Kristus ngu daken e kan ni thothup rok Got. (1 Korinth 6:9-11) Kalngan’uy e ir ban’en ni baga’ fan ni ngan rin’ ni fan ni nge yog e nangan’ nib fel’ ma ra pi’ Got e lem ni dabki kireban’uy nbochan e denen.​—1 Peter 3:21.

13. Murung’agen e taufe, ma mang e ba l’ag ko ngan pig i chel ngak Got?

¹³ Ngan pig i chel ngak Got e thingarni rin’ u m’on ni ngada uned ko taufe ngad manged e Pi Mich rok Jehovah. Ngan pig i chel ngak Got e aram e n’en ni nge rin’ be’ ni lem rok ni ke dugliy u polo’ i gum’irchaen ni nge fol rok Jesus Kristus. Girdi’ ni aram rogon e kara n’aged e ngongol rorad kakrom mi yad turguy ni ngar rin’ed e tin nib mat’aw u owchen Got. U lan fare Bible, ma thin ni Hebrew nge Greek ni fan ko conversion e be yip’ fan e ngan pi’ keru’uy, ara ngan pig i chel. Re ngongol ney e be yip’ fan ni ngan digey e kanawo’ nib kireb min chel ngak Got. (1 Kings 8:33, 34) Rogon ni ngan pig i chel ngak Got e ba t’uf ni “ngan ngongliy e pi n’en ni be m’ug riy ni kan kalngan’uy.” (Acts 26:20) Ba t’uf ni ngada digeyed e liyor ni googsur, ma ngada ngongolgad nrogon nib puluw ko motochiyel rok Got, ma ngada pigpiggad ku Jehovah ni yigoo ir u fithik’ e yul’yul’. (Deuteronomy 30:2, 8-10; 1 Samuel 7:3) Bochan ni kada thiliyeg e lem rodad, nge tin ni gad be nameg, nge wok rodad ma rayog ni ngada pig i chelgad ngak Got. (Ezekiel 18:31) Gad ra “chel” ko ngiyal’ ni pangidad nib kireb e kan thiliyeg ko pangidad nib biech.​—Acts 3:19; Efesus 4:20-24; Kolose 3:5-14.

Ngan Ognagey u Fithik’ e Yul’yul’ e Baga’fan

14. Rogon ni ke ognag pi gachalpen Jesus yad e be yip’ fan e mang?

¹⁴ Pi gachalpen Jesus e thingara ognaged yad ku Got u m’on ni ngara uned ko taufe. Ngan ognagey e be yip’ fan ni kan kieg ni fan ko n’en nib thothup. Ri baga’fan e re n’en ney arfan ni thingar dogned ngak Jehovah u daken e meybil e n’en ni kada dugliyed ni nguud pigpiggad ngak ndariy n’umngin nap’an. (Deuteronomy 5:9) Riyul’, ni gathi kada ognaged gadad ko reb e maruwel ara ngak e girdi’ ya kada ognaged gadad ku Got.

15. Mang fan ni piin ni kan yarmiy ni ngara uned ko taufe e susun ni ngan lithagrad nga fithik’ e ran?

¹⁵ Nap’an ni kada ognaged gadad ngak Got u daken Kristus, ma aram e gad be dag ni kada dugliyed ni ngada fanayed e yafas rodad ni ngada rin’ed e tin nib m’agan’ Got ngay nrogon ni kan dugliy u lan e Bible. Rogon ni ngan dag ni ke ognag e girdi’ e yafas rok, e susun ni ngan lithag e cha’ nem nga fithik’ e ran, ni bod rogon Jesus ni kan taufenag u lan fare Lul’ ni Jordan ni aram e pow ni ke pi’ ir ku Got. (Matthew 3:13) Kan nang ni i meybil Jesus u nap’an e re rran nem ni rib ga’fan.​—Luke 3:21, 22.

16. Uw rogon ni ngada daged e falfalan’ rodad nrogon nib puluw u nap’an ni kada guyed e girdi’ ni kan taufenagrad?

¹⁶ Nap’an ni ke un Jesus ko taufe ma aram e ngiyal’ nib ga’ fan machane rib falfalan’. Ere ku aram rogon e taufe ko Kristiano ko ngiyal’ ney. Faan gad ra guy e girdi’ ni kara daged ni kara ognaged yad ku Got, ma rayog ni ngada waywaygad u fithik’ e tayfan ma ngad dogned boch e thin nib fel’ ngorad ni fan ni ngada daged ni gad ba falfalan’. Machane, ngan tolul nib ga’ lamay, nge ngan falger, nge boch ban’en ni aram rogon e dabni rin’ ni fan ni ngan tayfan feni thothup e re n’en ney ni yibe dag e michan’. Gad ra dag e falfalan’ rodad u fithik’ e tayfan.

17, 18. Mang e ra ayuwegey ni ngan nang ko bay rogon e girdi’ ni nge un ko taufe fa danga’?

¹⁷ De taab rogon ko piin ni ma atngiy e ran nga daken e piin bitir ara ma towasariy e girdi’ ni yu ulung ndawori tamilangan’rad ko thin nu Bible ni ngara uned ko taufe, Pi Mich Rok Jehovah e der ma towasariy be’ ni nge un ko taufe. Riyul’, ni dabra taufenaged e piin ni dariy rogorad ko tirok Got. U m’on ni nge mang be’ tamachib ko thin nib fel’ ma dawori un ko taufe, ma piin piilal ni Kristiano e susun ni ngar micheged ni ke nang e cha’ nem kenggin e machib nu Bible, ma be fanay e yafas rok nib puluw ngay, ma ra fulweg fapi deer ni ke mudugil ni baaray, “Riyul’ ni ga baadag ni ngam mang bagayad e Pi Mich Rok Jehovah?”

¹⁸ Baga’ ni, nap’an ni be un e girdi’ ko fare maruwel ni ngan wereg e thin ko Gil’ilungun u fithik’ e yul’yul’ me yog ni baadag ni nge un ko taufe, ma piin piilal ni Kristiano e ra non ngorad ma ngara nanged ni yad e piin ni ke michan’rad ni kara ognaged yad ku Jehovah ma kara folgad ko tin ni baadag Got ni ngara rin’ed ma rayog ni ngan taufenagrad. (Acts 4:4; 18:8) Rogon ni ra fulweg e girdi’ fapi deer ni ke pag 100 oren ma ra ayuweg e re n’ey e piin piilal ni ngar nanged ko riyul’ ni pi cha’ nem e kara folgad ko n’en ni be yog e Bible ni nge rin’ e piin ni ngara uned ko taufe. Boch i yad e dariy rogorad ere dabni pagrad ni ngara uned ko taufe.

Bay Ban’en ni Be Talegnem?

19. Rogon ni yibe guy ko John 6:44, ma chon mini’ e bay mat’awrad ni yad ra un ku Jesus?

¹⁹ Sana piin ni kan towasariyrad ni ngara uned ko taufe ni yu ulung e ka nog ngorad ni yad ra yim’ ma nga ranod nga tharmiy. Machane murung’agen e piin ni ma lek luwan ay Jesus, e yog ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub.” (John 6:44) I pingeg Jehovah fa 144,000 e girdi’ nga ranod ngak Kristus mi yad un ngak ngar pared u Gil’ilungun u tharmiy. Taufe u fithik’ e towasar e ri dabi thothupnag be’ ni ra un ko re gin’en ney ko yaram rok Got.​—Roma 8:14-17; 2 Thessalonika 2:13; Revelation 14:1.

20. Mang e ra ayuweg e piin ndawora uned ko taufe?

²⁰ Baga’ ni nap’an lukngun e pi duw ni 1930, ma boor e girdi’ ni yad be athapeg ni ngara magaygad nib fas ko “fare gafgow ni baga’” ma ngara pared u fayleng ndariy n’umngin nap’an e kara uned ko “yugu boch e saf” rok Jesus. (Revelation 7:9, 14; John 10:16) Bay rogorad ni ngara uned ko taufe ya bochan kara puluwnaged e yafas rorad ko thin rok Got ma kar t’ufeged Got u ‘polo’ i gum’ircharad, nge yafas rorad, nge gelngirad, nge lanin’rad.’ (Luke 10:25-28) Yugu aram rogon ni yugu boch e girdi’ e kara nanged ni Pi Mich Rok Jehovah e yad be ‘pigpig ku Got u daken e ayuw ko kan ni thothup ngu fithik’ e tin riyul’,’ ma dawora folgad ko tin ni ke rin’ Jesus ni ke un ko taufe ni fan ni ngar daged ngak e girdi’ e t’ufeg rorad ngak Got nib riyul’ nge pigpig ni karimus ni fan ku Jehovah. (John 4:23, 24; Deuteronomy 4:24; Mark 1:9-11) Meybil u fithik’ e yul’yul’ mab tamilang u murung’agen e re n’en ney nib ga’ fan ni ngan rin’ e sana aram e n’en nib t’uf rorad ni nge k’aringrad nga gelngin ni ngar folgad ko thin rok Got u polo’ i lanin’rad, ma der maruwan’rad ni ngara ognaged e yafas rorad ku Jehovah Got, min taufenagrad.

21, 22. Mang fan ni boch e girdi’ e yad ba sasagaal ni ngara ognaged yad mab sasagaal ni ngara uned ko taufe?

²¹ Boch e girdi’ e dawora ognaged yad ma dawor ra uned ko taufe nbochan e kara tiyan’rad ko boch ban’en u fayleng ara yad be athamgil ni nge yoor e chugum rorad ma aram e ke buchuw e tayim rorad ni fan ko tirok Got ban’en. (Matthew 13:22; 1 John 2:15-17) Uw feni falfalan’ e pi cha’ nem nfaan yad ra thiliyeg e lem rorad nge tin ni yad be nameg! Yad ra chuchugur ku Jehovah ma ra ayuwegrad ni nge sug lanin’rad ko tirok Got, ma ra ayuweg ni nge chuw e magafan’ rorad, ma ra yib e gapas nga lanin’rad nge falfalan’ nbochan kara rin’ed e tin nib m’agan’ Got ngay.​—Psalm 16:11; 40:8; Proverbs 10:22; Filippi 4:6, 7.

²² Boch e girdi’ e ka rogned nib t’uf Jehovah rorad machane dar ognaged yad ma dar uned ko taufe ya bochan yad be lemnag ni aram e kanawo’ ni ra puf rogorad rok Got. Machane ra bagadad ma susun ni nge weliy ban’en ngak Got. Nap’an ni kada rung’aged e thin rok Jehovah ma aram ke mil fan ban’en ngodad. (Ezekiel 33:7-9; Roma 14:12) Piyu Israel kakrom ni yad e ‘girdi’ ni kan mel’egrad,’ e kan gargelnagrad nga reb e nam ni kan ognag ku Jehovah, ma arfan ni ke mil fan ngorad ni ngara pigpiggad ngak u fithik’ e yul’yul’ nrogon nib puluw ko motochiyel rok. (Deuteronomy 7:6, 11) Dariy e girdi’ e chiney ni kan gargelnag u reb e nam ni aram rogon, machane faanra kan fil e thin nu Bible ngodad nrogon, ma susun ni ngada ngongolgad nib puluw ngay u fithik’ e michan’.

23, 24. Mang lem nde mudugil e susun dabi taleg e girdi’ ni nge un ko taufe?

²³ Bochan ni be lemnag boch e girdi’ ni de gaman e tamilangan’ rorad ma aram fan ni yad ba sasagaal ni ngara uned ko taufe. Machane, gad gubin e ka bay boor ban’en ni thingarda filed ya bochan ni ‘girdi’ e dabiyog rorad ni ngar nanged fan e tin ke rin’ e bin riyul’ e Got ni ka nap’an ko tabolngin nge mada’ ko tungun.’ (Eklesiastes 3:11) Mu lemnag fare eunuch ni be’ nu Ethiopia. Bochan ir be’ ni kan pingeg, ma aram bay e tamilangan’ rok ko Thin nu Bible, machane dabiyog ni nge fulweg urngin e deer u murung’agen e tin nib m’agan’ Got ngay. Machane, tomren ni fil murung’agen e yaram rok Jehovah ni fan ni nge ayuweg e yafas ko girdi’ u daken e maligach ni pi’ Jesus, ma ka chingiyal’ nem me un fare eunuch ko taufe.​—Acts 8:26-38.

²⁴ Boch e girdi’ e be maruwaran’rad ni ngara ognaged yad ya bochan ni yad be rus ni richey ma dabiyog rorad. Monique ni 17 e duw rok e ke gaar: “Gu be sasagaal ni nggu un ko taufe ya gu be rus ni dabiyog ni nggu lebuguy e tin ni kug ognag.” Machane faan gad ra pagan’dad ku Jehovah u polo’ i gum’irchadad, ‘ma ra fal’eg rogon e kanawo’ rodad.’ Ma ra ayuwegdad ni “nguu darod u kanawoen e tin riyul’” ni gadad e pi tapigpig rok nib yul’yul’ ni kad ognaged gadad ngak.​—Proverbs 3:5, 6; 3 John 4.

25. Mang boch e deer nib t’uf ni ngan weliy e chiney?

²⁵ Urngin e duw ma bokum biyu’ e girdi’ ni kara ognaged yad mi yad un ko taufe nbochan ni kar pagedan’rad ku Jehovah ma rib t’uf rorad. Ma ba mudugil ni urngin e tapigpig rok Got ni kara ognaged yad e yad baadag ni ngara pared nib yul’yul’ ngak. Machane, biney e tayim ni gad be par riy e ba mo’maw’, ma gad ma mada’nag e skeng ko michan’ rodad nib thilthil. (2 Timothy 3:1-5) Mang e rayog ni ngada rin’ed ma rayog ni ngada rin’ed e maruwel nrogon ni kada ognaged gadad ku Jehovah? Aram e n’en ni gad ra weliy ko bin migid e article.

[Footnote]

Ka Ga Manang?

• Uw rogon ni yima taufenag e Kristiano?

• Mang tamilangan’ e ba t’uf ni nge yog ngak be’ ma rayog ni nge un ko taufe?

• Mang boch ban’en ni ngan rin’ ma rayog ni ngan un ko taufe ko tin riyul’ e Kristiano?

• Mang fan ni boch e girdi’ e yad be sasagaal ni ngara uned ko taufe, machane sana uw rogon ma rayog ni ngan ayuwegrad?

[Pictures on page 24]

Ga manang ko mang e be yip’ fan ni ngan taufenagey ‘u fithingan e Chitamangiy, nge Fak, nge fare kan ni thothup’?