Mi Ngiyal’ E Ba Fel’ Ni Ngan Mil Ngan Chuw

FAYLENG e chiney e ke ga’ ni ke gagiyel e lem ni sorok nge togopuluw nge wawliyan’ e girdi’. Be’ ni ma mil ko pi n’eney e yima lemnag nib meewar fa ba ma rus. Ma rayog ni ngaun i moningnag.

Machane, fare Bible e be tamilangnag ni bay yu ngiyal’ ni faan yira mil ngan chuw ma aram e l’agruw fan yi ba gonop ma ba gel. Ngan micheg nib riyul’ ni aram rogon, ma u m’on ni nge yan pi gachalpen ko machib, me gaar Jesus Kristus ngorad: “Ma ngiyal’ ni yad ra gafgownagmed riy u reb e binaw, e ngam milgad nga reb e binaw.” (Matthew 10:23) Arrogon, pi gachalpen Jesus e ngar guyed rogon ngar milgad ko piin ni yad ra gafgownagrad. Ma dabra rin’ed ban’en ni ngar chamniged e teliw, ni ngar guyed rogon ni ngar pingeged e girdi’ u fithik’ e towasar. Ya yad be fek e thin ko gapas. (Matthew 10:11-14; Acts 10:34-37) Ere dabni pag nge gel e damumuw, pi Kristiano e ngar milgad, nga ranod ngar paloggad ko girdi’ ni be k’aring e damumuw ngorad. Ra aray rogon, me yog ni ra ted lanin’rad nib fel’ maku e ri tay e tha’ ni rib fel’ u thilrad Jehovah.​—2 Korinth 4:1, 2.

Reb e ngongol nib togopuluw ko re n’eney e yira pirieg ko babyor ni Proverbs. Be weliy murung’agen ba pagal ni gowa nge mil, ma de mil ko ngiyal’ nib e lumel ni towasar ngak me lek be’ nib ppin nib ta chuway ngak “ni bod rogon e garbaw ni yib ko gin ngan li’ riy.” Ere angin? Gafgow ni gel ni bochan ni pag ir ko lumel me un e yafas rok ngay.​—Proverbs 7:5-8, 21-23.

Ere uw rogon ni faan ga ra pirieg e towasar ni ngam rin’ e ngongol ko darngal ara mu mada’nag yugu boch ban’en ni ra yib e magawon riy? Rogon ni be yog e thin rok Got, e n’en nib fel’ ngan rin’ e ngam mil, ngam palognigem ko fare ngi n’enem ni papey.​—Proverbs 4:14, 15; 1 Korinth 6:18; 2 Timothy 2:22.