Marwoth e Ma Yib Ngak Boor e Girdi’

CHRISTIAN, ni ma par u bayang e nam u Africa, e kol e salthaw u gelingrad ngar towasariyed ni nge un ko salthaw, machane me siyeg ni nge fol rorad ni bochan e thin nu Bible-​e ke skulnag laniyan’. Me fek fapi salthaw i yan nga tagil’ e salthaw ni aram e gin, ni tomuren ni kan pirdiiy riy ni aningeg e rran, me boyochnag bagayad ay. Me guy Christian rogon nge thap nga ba aspital, machane dabki fel’ ay ni ngan th’ab u tan bugun ngan n’ag. Maku bayang u Africa, e musko bitir ni kab bitir ma bay boch ni kukuni th’ab pa’ fa ay ni ke th’ab e girdi’ ni tatogopuluw ko am. Me mus u Cambodia nge ni mada’ ko Balkans, miki mus u Afghanistan nge ni taw nga Angola, e fapi donmach ni yima ke’yag u arow e yugu be th’eth’ab pa’ nge ay e girdi’ ma be marwothnagrad ni bitir nge piilal ni taareb rogon

Maku ba muun ngay e maadad ni elmirin nib tomgin nge m’ar ni bod e m’ar ko suga. Maku e ri tay e yub u toobey i yan e ku rayog ni ngaki kirebnag bang u dowey ngan marwoth. Bogi tabinaw ni yad ba buguli yoror u lan ba mach u len ni Ngek u Europe, e bod ni, boch e bitir riy e yibe gargeleg ni baani mat’aw i bugun pa’rad nga but’ e dariy. Yugu bochi yang i n’en nib thuthuw e bay u tan bugun i pa’rad. Mich riy ni bebi m’ug e bochan genes u dowey ni ke kireb ni bochan e yub ko chemical. Gathi ba lich e girdi’ e goo ka bay pa’rad nge ayrad machane e kar marwothgad ni bay boch ban’en ni dabkiyog rorad ni yugu demtrug rogon ko yaf fa boch e magawon. Ya, riyul’ ni, marwoth e yi manang ndariy e gin nge mus riy.

Yugu demtrug ko mang tapgin, ma marwoth e ma gafgownigey. Junior e m’ath ay nge mul u lan bugun ko ba’ ni gil’ay u nap’an ni 20 e duw rok. Faani taaboch me gaar: “Boor yay ni gu ma magawon ko kireban’. Boor yay ni gu ma yor ni bochan ni dabkiyog ni nge sul ayig. Daku gu nang e n’en nga gu rin’. Ma ke wagey lanin’ug.” Machane, de n’uw nap’an, me gagiyel ni ke thil rogon e lem rok Junior. Me tabab i fil e Bible me fil boch ban’en ni gathi kemus ni ayuweg ni nge bung rogon ko par rok nib math ay yaki yog reb e athap ngak ni rib manigil ni aram e falfalan’ gabul nge langleth u roy u fayleng. Faanra gur be’ ni kam marwoth ma ga ra adag ni nge yog boch e re athap nem ngom?

Faanra arrogon, me ere wenig ngom mu bieg e bin migid e article. Ma gamad baadag ni ngam changarnag e pi Scripture ni kan pi’ e namba riy u lan e Bible rom ni bochan ni nge yog ni gur rom e ngam guy e pi n’en ni ra rin’ e en Tasunmiy ni fan ko piin kar filed e tin nib m’agan’ ngay mar puluwnaged ko yafas rorad.