Uw Rogon Me Chuw E Marwoth

A YUGU mu lemnag owchen e piin malmit nra guy ban’en, tel e biling e rung’ag urngin e lingan, ma blowthen e en maay e ma welthin mbe tang u fithik’ e falfalan’, ma rifrifen ay e magutgut e ke gel ke yog ni i yanyan! Gadad be non, ni gathi gadad be weliy murung’agen e tin rayog ko falay nge llowan’, ya murung’agen angin e wub rok Got ni fan e nge ayuweg e girdi’. Ke mu’ i yog ko Bible ni gaar: “Re ngiyal’ i n’enem ma owchen e piin nib malmit e bayi puf, ma tel e piin ni biling e dabki man. Re ngiyal’ i n’enem ma magutgut e bay ur forgad ngalang ni bod e stag, ma blowthen e ani der ma non e bay i tolul ngalang u fithik’ e falfalan’.” (Isaiah 35:5, 6, New World Translation) Machane uw rogon me riyul’ u wan’dad ni ra yib i m’ug nib riyul’ e pi n’ey ni kan yiiynag ni yira ngat ngay?

Som’mon, ma nap’an ni immoy Jesus Kristus u fayleng, ma riyul’ ni i golnag e girdi’ ko urngin mit e m’ar nge marwoth. Maku e ri tay, ni oren e pi maangang ni rin’ e boor e girdi’ ni mich riy​—ni ku arrogon e pi toogor rok. Rriyul’, ya bay ba ngiyal’, ni piin togopuluw ni der mich u wan’rad e u ra fal’eged i gaweg murung’agen be’ ni ke golnag ni bochan ni nge dab nog e sorok ngak Jesus. Machane ri taganan’rad, ya urngin e n’en ur rin’ed e i micheg e pi maangang nem ni i rin’. (John 9:1, 5-34) Ma tomuren ni ki fal’eg Jesus reb e maangang ni dabiyog ni nga nog ni de riyul’, me lungurad ni ke kankanan’rad: “Mang e ngada rin’ed, ya ke yoor e maangang ni ke ngongliy e re moon nem?” (John 11:47) Ma yu girdi’, e yugu aram rogon, ma gathi yad bod e pi cha’ nem ya ke yoor i yad e ke michan’ ngak Jesus.​—John 2:23; 10:41, 42; 12:9-11.

Maangang ni Rin’ Jesus​—Yibe Dag u M’on Rogon ni Faseg e M’ar u Polo’ e Fayleng

Pi maangang ni i rin’ Jesus e ku boor fan gathi kemus ni nge micheg ni Jesus e ir fare Messiah nge ir Fak Got. Ya ku be dag kenggin e michan’ ko pi n’en ni ke micheg e Bible ni girdi’ ni ra fol e yira golnagrad gabul nge langleth. Demtrug ko ba miti mang magawon e be gafgow e girdi’ riy, ma ra golnagrad Jesus ni dariy e amith riy, ma ba papey, ma dariy puluwon. Mang e rin’ e girdi’ ni bochan e pi n’ey? Pi n’en ni yoloy Mattew ni guy nga owchen e ka be ulul i yan ni ki gaar: “Ma faani guy fapi girdi’ ni ke welthin e piin nda i yog ni ngar uned ko numon, nge piin ni yad marwoth ni kar sulod nga rogorad, nge piin ni yad mmugutgut ni kar uned ko yan, nge piin ni yad mmalmit ni ke yog ni kar guyed ban’en mi yad ngat ngay; ma aram mi yad yog e sorok ngak fare Got nu Israel.” (Matthew 15:30, 31) Aray fan ni boor e girdi’ ni kar marwothgad, ni kar nanged e re athap ney ni kan yiiynag ma ke k’aring e lu’ u owcherad ni lu’ ko kireban’ ke piliyeg ke mang lu’ ko Falfalan’.