Ngan Fol Ko Tin Ni Baadag Got Ni Ngan Rin’ Ma Ra N’uf Jehovah
“Nggu n’uf ni gu be pining e magar ngak.”—PSALM 69:30, NW.
1. (a) Mang fan ni bay rogon ni ngan n’uf Jehovah? (b) Uw rogon ni ngada n’ufed Got ni aram ngada pininged e magar ngak?
JEHOVAH e ir e Got ni th’abi tolang, ma ir e Pilung ko Palpalthib, nge Ani Tasunmiy. Bochan e re n’ey ma bay rogon ni ngan n’uf fithingan nge tin nib m’agan’ ngay. Ra ngan n’uf Jehovah ma be yip’ fan ni ngarni tolangnag, min pining e sorok ngak u daken e thin nge ngongol. Rogon ni ngada rin’ed e re n’eney ni gad be “pining e magar” ngak e ba t’uf ni ngada pininged e magar ngak ni gubin ngiyal’ ko tin ni be rin’ e chiney nge tin ni bayi rin’ nga m’on. Fare lem nib t’uf ni nge yog ngodad e bay ko Revelation 4:11, ya fapi kan u tharmiy nib yul’yul’ e ke lungurad ni gaar: “Somol romad ma Got romad! Ba rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu lemnag mi yad sum ni yad ba fos.” Uw rogon ni ngada n’ufed Jehovah? Gad ra fil murung’agen ma da rin’ed e tin ni baadag ni ngada rin’ed. Ba t’uf ni ngada lemnaged e n’en ni i lemnag fare psalmist u nap’an ni ke yog ni gaar: “Mu fil ngog rogon ni nggu rin’ e tin nib m’agan’um ngay, ya gur e Got rog.”—Psalm 143:10, NW.
2. Uw rogon ni ma rin’ Jehovah ban’en ngak e piin ni ma n’uf fithingan nge piin ni danga’?
2 Rib ga’ fan u wan’ Jehovah e piin yad ma n’uf. Arfan ni ma “taw’athnag e piin ni yad be gayiy Got.” (Hebrews 11:6) Mang taw’ath e re n’en ney? Nap’an ni be meybil Jesus ngak e Chitamangin u tharmiy me yog ni gaar: “Baara’ ira’ e yafas ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Arrogon, piin ni “ra n’uf [Jehovah] ma ma pining e magar ngak” e yad ra “tafanay e fayleng, ma yad ra par u daken ndariy n’umngin nap’an.” (Psalm 37:29, NW) Ma ku reb, e bay e mich riy ni “be’ nib kireb e dariy ban’en nib fel’ nra yib ngak.” (Proverbs 24:20) Ma ngiyal’ ney ni tin tomren e rran, ma rib t’uf ni ngan n’uf Jehovah ndabni adbey e tayim ya bochan e ra thang e girdi’ nib kireb ma ra ayuweg e girdi’ nib mat’aw. “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”—1 John 2:17; Proverbs 2:21, 22.
3. Mang fan ni ngada tiyan’dad ko fare babyor ni Malaki?
3 Yira pirieg e tin nib m’agan’ Jehovah ngay u lan fare Bible, ya bochan ni “urngin e thin ko Babyor nib Thothup e Got e i thagthagnag.” (2 Timothy 3:16, NW) Re Thin rok Got nem e bay boor e thin riy ni be weliy rogon ni ke flaabnag Jehovah e piin ni kara n’ufed nge mang e ke buch rok e piin ni dar rin’ed ban’en ni aram rogon. Ma reb u fithik’ e pi chep nem e ba l’ag ko tin ke buch u Israel u nap’an Malaki ni profet. Sagonapan duw ni 443 B.C.E., u nap’an ni Nehemiah e ir e am nu Judah, me yoloy Malaki fare babyor ni be fek fithingan. Re babyor ney nib gel gelngin ma yira gin ngay e bay boch e thin riy nge boch e yiiy ni “kan yoloy ni be ginangdad e piin ni gad bay ko tomur ko re m’ag ney ni ke taw.” (1 Korinth 10:11) Gad ra tiyan’dad ko fapi thin rok Malaki ma ra ayuwegdad ni ngad fal’ged rogodad ni fan ko “fare rran rok Jehovah nib ga’ ma ma k’aring e marus,” u nap’an ni ra thang e re m’ag ni kireb ney.—Malaki 4:5.
4. Mang nel’ ban’en ni yibe weliy u Malaki guruy ni 1?
4 Uw rogon ma fare babyor rok Malaki, ni kan yoloy ni ke pag 2,400 e duw kakrom, e ra ayuwegdad e chiney ni gad bay ko fa bin 21 e chibog ni ngada fal’eged rogodad ni fan ko fare rran rok Jehovah nib ga’ ma ma k’aring e marus? Karni weliy ngodad ko fa bin som’mon e guruy ni gonapan e lich ni fen e nel’ ban’en nib ga’ fan uw rogon ni ngada n’ufed Jehovah ma gad pining e magar ngak ni fan ni ngada fel’gad u wan’ ma nge yog ngodad e yafas ni dariy n’umngin nap’an: (1) Ba t’uf e girdi’ rok Jehovah. (2) Thingarda daged ni baga’ fan e tin nib thothup u wan’dad. (3) Be lemnag ni gad ra pi’ ngak e tin th’abi fel’ ni bay rodad. (4) Bin riyul’ e liyor e ngan rin’ u fithik’ e t’ufeg ndariy e lem nib siin riy, ma gathi bochan e chogow. (5) Pigpig ku Got nib fel’ u wan’uy e gathi ban’en ni yima rin’ nib tomal. (6) Ra bagadad ma thingari weliy ban’en ngak Got. Ere, u lan e dalip ni som’mon e article ko fare babyor rok Malaki, e re ngad weliyed reb nge reb e pi n’ennem u nap’an ni gad ra fa’leg i yaliy e Malaki guruy ni 1.
Ba T’uf Rok Jehovah e Girdi’ Rok
5, 6. (a) Mang fan ni Jakob e ba t’uf rok Jehovah? (b) Faan gad ra folwok rok Jakob uw rogon ni ke par nib yul’yul’, ma mang e rayog ni nge yog ngodad?
5 T’ufeg rok Jehovah e kan tamilangnag ko fapi verse ni bin som’mon ko fare babyor ni Malaki. Fare babyor e kan tababnag ko pi thin ni baaray: “Baaray reb e thin: Thin rok Jehovah ni fan ngak yu Israel.” Mi ki yog Got ni gaar: “Gimed ba t’uf rog.” U lan e re verse ney e ki weliy Jehovah boch e thin ni gaar: “Ba t’uf Jakob rog.” Jakob e ir reb e pumoon ni ke mich Jehovah u wan’. Munmun, me thiliyeg Jehovah fithingan Jakob nge mang Israel, me mang chitamangin fare nam nu Israel. Ba t’uf Jakob rok Jehovah ya bochan ni ir be’ ni ke mich Got u wan’. Piin ni immoy u fithik’ e girdi’ ni kara daged e lem ni bod rogon Jakob ni fan ku Jehovah e ku yad ba t’uf Rok.—Malaki 1:1, 2.
6 Faanra ngada t’ufeged Jehovah ma ngada chaggad ko girdi’ rok u fithik’ e yul’yul’, ma ra baud lanin’dad ko thin ni bay ko 1 Samuel 12:22 ni gaar: “Dabi pag Jehovah e girdi’ rok nbochan fithingan nib ga’.” Ba t’uf e girdi’ rok Jehovah rok ma ra munmun ma ra taw’athnagrad ma ra pi’ ngorad e yafas ndariy n’umngin nap’an. Ere rayog ni ngada beeged fare thin ni gaar: “Mu pagan’um ku Jehovah ma ga rin’ e tin nib fel’; mag par u fayleng, ma ga rin’ ban’en u fithik’ e yul’yul’. Maku mu par ni gab falfalan’ ku Jehovah, ma ra pi’ ngom e tin ni baadag gum’irchaem.” (Psalm 37:3, 4) Rogon nib t’uf Jehovah rodad e ba l’ag ko fa bin l’agruw ban’en ni kan tay ko Malaki guruy ni 1 ni fan ngodad.
Ngan Ta’ Fan e Tin nib Thothup
7. Mang fan ni ke fanenikay Jehovah Esau?
7 Gad ra bieg Malaki 1:2, 3, u tomren ni ke yog Jehovah ni gaar, “Ba t’uf Jakob rog,” miki weliy ni gaar, “Gu be fanenikay Esau.” Mang fan ni aram rogon? I n’uf Jakob Jehovah, machane Esau ni walagen ni yow athlog e danga’. Maku kan pining Edom ngak Esau. U Malaki 1:4, ma fare binaw ni Edom e kanog ni fare binaw nib kireb, ma girdi’ ni ma par riy e ka nog ni yad ba kireb. Fare ngochol ni Edom (e fan e “Rowrow”) ni kan pi’ ngak Esau u tomren ni ke pi’ mat’awon ni ir e nganni’ ngak Jakob ni fan ni nge yog ngak fare sup nib rowrow. “I dariyfannag Esau mat’awon ni ir e nganni’,” rogon ni yog ko Genesis 25:34. I fonownag Paul ni apostal e pi walagen u lan e ulung ni ngar koled ayuwngirad ni “dariy be’ ni nge un ko darngal ara girdi’ ni ma dariyfannag e tin nib thothup, ni bod Esau, ni bochan taab yay i abich me chuway’ nga mat’awun ni ba rok ni bochan e ir e bin nganni e bitir.”—Hebrews 12:14-16.
8. Mang fan ni Paul e ke taarebnag Esau ku be’ ni be un ko ngongol ni darngal?
8 Mang fan ni ke taareb rogonnag Paul e tin ni ke rin’ Esau ko ngongol ni darngal? Bochan be’ ni bay e lem rok ni taab rogon ku Esau e ra pow’iy e girdi’ ni nge dabi tayfan e tin nib thothup. Wenegan riy, e rayog ni ngani aw ko denen nib gel, ni bod e ngongol ni darngal. Arfan ni, ra bagadad ma rayog ni nge fith ir ni: ‘Yu ngiyal’ ma kan wawliy lanin’ug ni nggu thiliyeg e taw’ath ko Kristiano ni yira pi’ ngog—ni aram e yafas ndariy n’umngin nap’an—ko n’en ni ra m’ay nib papey ni bod rogon e sup u lan e plet? Gu be dariy fannag e tin nib thothup ni dagu naab?’ Kaygi gel ni daki kadan’ Esau ko arar rok ko tin baadag downgin. I yog ngak Jakob ni gaar: “Papeynagem, wenig ngom, mu pi’ buchuw e pi n’ir nib row nggu wa’.” (Genesis 25:30) Bay e kireban’ riy, boch e tapigpig rok Got e bod ni ka rogned e thin ni gaar: “Papey! Mang fan ni ngan son ngan ta’ fan e m’ag pa’?” Fare arar ni ngara uned ko par ko pumoon nge ppin ndemtrug ko mang e ra buch rorad e ke bod ba uw i sup ko mame.
9. Uw rogon ni nge par ni ba’ madgun Jehovah u wan’dad u fithik’ e tayfan?
9 Yibe athapeg ni dabda dariy fannaged e tin nib thothup ya aram e tin ni machalbog, ngan par nib yul’yul’, ko tin spiritual ban’en ni yira pi’ ngodad e dabda paged ni pi n’eney nge mang ir e dariy fannag u wan’dad. Dabda boded Esau, ya ffel’ ni ngada boded Jakob ni be’ nib yul’yul’ me par ni bay madgun Got u wan’ me dag ni ri be tayfan e tin nib thothup ban’en. Uw rogon ni ngada rin’ed ban’en ni aram rogon? Ngada rin’ed e tin ni baadag Jehovah ni ngada rin’ed nib sasaf’og. Re n’ey e ra fekdad ko fa bin dalip ban’en ni kan weliy u Malaki guruy ni 1. Mang e re n’em?
Ngad Pied Ngak Jehovah e Tin Th’abi Fel’
10. Uw rogon ma fapi prist e kara dariyfannaged e tebel rok Jehovah?
10 Fapi Prist nu Judah ni yad be pigpig u lan fare temple nu Jerusalem e dar ognaged e bin th’abi fel’ e maligach ngak Jehovah. Malaki 1:6-8, NW e be yog ni gaar: “‘Be’ nib moon e ma liyor ko chitamangin, ma be’ ni ma pigpig e ma liyor ko masta rok. Ere faanra gag e chitamangimed, ma ba uw e liyor ngog? Ma faanra gag e bin ga’ e masta, ma ba uw madgug u wan’med?’ Jehovah ko pi salthaw e ke yog ngomed, O fapi prist ni gimed be gathibthibnag fithingag.” Me fith fapi prist ni gaar, “Uw rogon ni kug gathibthibnag fithingam?” “Kam ted nga daken e altar rog e flowa nib alit,” me fulweg Jehovah ni aram rogon. “Uw rogon ni kug alit gur?” me fith fapi prist ni aram rogon. Ere ke yog Jehovah ngorad ni gaar: “Bochan kam mogned ni: ‘Fare table rok Jehovah e ban’en ni dariyfan.’” Fapi prist e kara daged ni yad be dariyfannag e tebel rok Jehovah u gubin ngiyal’ ni ngara ognaged e maligach ma bay thibngin, ma ra gaargad: “Dariy e kireb riy.”
11. (a) Mang e ke yog Jehovah u murung’agen e pi maligach nib kireb? (b) Uw rogon ma girdi’ ni urngin e kara denengad?
11 Me weliy Jehovah murung’agen e pi maligach nem nib kireb ni gaar: “Mpied reb ni aram rogon ngak e en ni ir e am romed ngam guyed. Gur ra falan’ ngomed ara ayuwegmed u ban’en?” Danga’, dabi falan’ e en ni ir e am rorad ko re taw’ath nem. Ri dabi falan’ e en Ma Gagiyegnag e Palpalthib ko fapi maligach ni bay thibngin! Ma gathi ke mus ni fapi prist e kara rin’ed e tin kireb. Riyul’, ni kara dariyfannaged Jehovah ya yad e kara ognaged fapi maligach. Machane dariy ban’en nib kireb ni ke rin’ e girdi’ riy? Riyul’ ni Danga’! Ya yad e kara mel’eged fapi gamanman nib malmit, ni ke kireb ay, mab m’ar ma kara feked ngar pied ngak fapi prist ngar pied ni maligach. Aram e denen nib ga’!
12. Uw rogon ni kan ayuwegdad ni ngada pied e tin th’abi fel’ ngak Jehovah?
12 Gad ra pi’ ngak Jehovah e tin th’abi fel’ ma ireray e kanawo’ ni ngada daged ni riyul’ ni ba t’uf Got rodad. (Matthew 22:37, 38) De taareb rogon ko fapi prist nib kireb u nap’an Malaki, ma ulung rok Jehovah e ngiyal’ ney e be wereg e thin ni kan fek u Bible nra ayuwegdad ni ngada n’ufed Jehovah ma nguuda pininged e magar ngak ma aram ngada folgad ko tin baadag Got ni ngada rin’ed. Ba peth ko re n’ey fa aningeg e n’en ni rayog ni ngad filed ban’en riy ni bay ko Malaki guruy ni 1.
Liyor ni Riyul’ e T’ufeg e Ma K’aring, Gathi Chugow
13. Mang e ke rin’ fapi prist ni be m’ug ni lem ni chogow e ke k’aringrad?
13 Fapi prist u nap’an Malaki e yad ba siin, dariy t’ufeg rorad, ma kaygi gel e chogow rorad ko salpiy. Uw rogon ni kada nanged e re n’em? Malaki 1:10 e be yog ni gaar: “‘Maku mini’ e aromed e ra ning fapi mab? Ma dabmu k’oreg e nifiy u daken e altar rog—ndariy fan. Jehovah ko pi salthaw e ke yog ni gaar, Dariy’ e Falfalan’ rog ngomed,’ me ulul ngay ni gaar, ‘ma de falan’ug ko maligach ni kam pied.’” Arrogon, fapi prist nib siin e kara n’iged e salpiy ni fan ko maruwel rorad u tempel nib mom, ya kara ninged e salpiy ni puluwon e maruwel rorad ni ngan ning e mab nge ngan k’oreg e nifiy u altar! Arfan ni de falfalan’ Jehovah ko pi maligach ni kar pied ngak!
14. Mang fan ni rayog ni nga dogned ni t’ufeg e ir e ke k’aring e Pi Mich rok Jehovah?
14 Fapi prist ni tadenen u Jerusalem kakrom ni kara daged ni yad ba siin ma ke mus ni yad e yad ma lemnaged yad e ri be puguran ngodad ni, rogon ni yog e Thin rok Got, ni girdi’ nib siin e dabiyog ngorad e gin nsuwon Got nrogon ni yog e Thin rok Got. (1 Korinth 6:9, 10) Gadra fal’eg i lemnag e tin ni rin’ fapi prist ni kemus ni yad e yad ma lemnag rogon ni nge yog boch ban’en ngorad ma ra gelnag e tayfan rodad ko fare maruwel ni ngan wereg e machib ni be rin’ e Pi Mich Rok Jehovah u ga’ngin yang u fayleng. Ireray e maruwel ndariy puluwon; ri dabda ninged e salpiy ni fan ko urngin ban’en ni gad ma rin’ nib l’ag ko maruwel ni ngan wereg e machib. Danga’, “gathi gad ma pi’ e thin rok Got ni chuway.” (2 Korinth 2:17, NW) Taab rogon ku Paul ma ra bagadad e rayog ni nga dogned u fithik’ e yul’yul’ ni gaar: “Dariy ban’en ni gog ngomed ni ngam pied ngog ko ngiyal’ ni baaram ni ug machibnag ngomed e Thin Nib Fel’ ni yib rok Got.” (2 Korinth 11:7) Mu lemnag ni ke falfalan’ Paul ni “wereg fare thin nib fel’.” Ma ireray e fa bin lal ban’en ni bay ko Malaki guruy ni 1.
Pigpig Ku Got Gathi Ban’en nib Tomal
15, 16. (a) Uw rogon u wan’ fapi prist fare maruwel ni ngan pi’ e maligach? (b) Uw rogon ni ma pi’ e Pi Mich rok Jehovah e maligach rorad?
15 Fapi prist u Jerusalem kakrom ndariy e michan’ rorad e kara lemnaged ni fare maruwel ni ngan pi’ e maligach e aram e maruwel ni ma k’aring e chachalban. Aram e maruwel nib tomal u wan’rad. Rogon ni yog ko Malaki 1:13, me yog Got ngorad ni gaar: “Ke lungmed ni ke chalbmed ko pi n’ey ni urngin. Ma gimed be mitrogonag p’ethungmed ngog.” Fapi prist e kara mit rogon niged p’ethunrad, ara kara gathibthibnaged e tirok Got nib thothup. Ri ngada meybilgad ni nge dabda boded yad. Yibe athapeg ni ngada daged e lem ni kan tay nib tamilang ko thin ni bay ko 1 John 5:3 ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngada rin’ed. Ma tin ke yog ni ngada rin’ed e gathi rib mo’maw’.”
16 Ngada pied e maligach ngak Got u fithik’ e falfalan’ ma ri dabda lemnaged ni aram e maruwel ni ma k’aring e chachalban mab tomal. Yibe athapeg ni ngada folgad ko thin ni kan yiiynag ni gaar: “Gimed gubin, nge lungumed ngak [Jehovah], ‘Yibe athapeg ni ngam n’agfan e denen; ma ngam adag e tin nib fel’, ma aram nggu pied e maligach ngom u dap’ i l’ugun’mad ni bod e garbaw ni pumoon.’” (Hosea 14:2) Fare bugithin ni “dap’ i l’ugunmad ni bod garbaw ni pumoon nni pi’ maligach” e be yip’ fan e maligach nib spiritual ni aram e thin ni gad ma yog ni yibe pining e sorok ngak Jehovah nge tin nib m’agan’ ngay. Hebrews 13:15 e be yog ni gaar: “U daken [Jesus Kristus] ma ngada pied e maligach ngak Got ni gubin ngiyal’ ni aram woom’ngin e dap’ i luguney ni aram e ngan machibnag ngak e girdi’ murung’agen fithingan.” Uw feni falan’dad ya fapi maligach rodad nib spiritual e gathi kemus ban’en ni yima rin’ ndariyfan, machane gad be dag riy e t’ufeg rodad ngak Got u polo’ i gum’irchadad! Re n’ey e ra fekdad ko fa bin nel’ ban’en ni rayog ni ngada filed u Malaki ko guruy ni 1.
Ra Be’ Ma Nge Weliy Ban’en Ngak Got
17, 18. (a) Mang fan ni ke bucheg Jehovah waathan “e en ni ma rin’ ban’en u fithik’ e sasalap”? (b) Mang e de lemnag e piin ni ma rin’ ban’en u fithik’ e sasalap?
17 Girdi’ nib fas u nap’an Malaki e susun ni nge weliy ban’en u murung’agen e n’en ni ma rin’, ere ku arogodad. (Roma 14:12; Galatia 6:5) Arfan ni, Malaki 1:14 e be yog ni gaar: “Nge kireb waathan e en nra sasalyeb nge li’ ba gamanman ni pumoon [ni bay thibngin] u fithik’ e yu ran’ i gamanman rok me micheg me pi’ reb e gamanman ni bay thibngin ngak Jehovah ni maligach.” Girdi’ ni bay yu ran’ e gamanman rok e gathi ke mus ntaareb e gamanman rok—ni bod ni, ke mus taareb e saf e bay rok be’—ere dabiyog ni nge mel’eg. Rogon ni nge mel’eg be’ e gamanman ni fan ko maligach, ma dabi mel’eg e gamanman nib malmit, nge gamanman nib marwoth, ara mm’ar. Faanra ke mel’eg e gamanman ni bay thibngin, ma be dag e re n’ey ni ke dariyfannag e yaram rok Jehovah ko maligach, ya bochan ni girdi’ ni bay yu ran’ i gamanman rok e mmutrug nrayog rok ni nge pirieg reb u fithik’ e gamanman rok ndariy thibngin ni aram rogon!
18 Ere, ri bay tapgin ni ra bucheg Jehovah waathan e en ni ke rin’ ban’en u fithik’ e sasalap, fa cha’ ni bay e gamanman rok nib fel’ machane ke fek reb—ara sana ke girngiy e—gamanman nib malmit, ara ke kireb ay, ara gamanman nib m’ar nge pi’ ngak e prist ni fan ko maligach. Machane, dariy ban’en nib achichig ni be dag ni immoy reb e prist ni ke weliy murung’agen e motochiyel rok Got ni be dag ni fapi gamanman ni bay thibngirad e dabiyog ni ngan pi’ maligach. (Leviticus 22:17-20) Girdi’ nib fel’ e lem rok e manang ni bay ban’en nra buch rorad nfaanra ngara guyed rogon ni ngar pied ban’en u fithik’ e sasalap nge taw’ath ni aram rogon ngak e en ni am rorad. Machane bin riyul’ riy e kara rin’ed ban’en ngak e en ni ir e Pilung ko Palpalthib i Jehovah, ni kab ga’ ko urngin e am ko girdi’ ni dabi chuchugur. Malaki 1:14 e be yog ni gaar: “‘Yi gag e Pilung ni ga’,’ Jehovah ko pi salthaw e ke yog ni aram rogon, me ulul ngay ni gaar, ‘ma fithingag e ba yib madgun ngak gubin e nam.’”
19. Mang e gad be sonnag, ma mang e thingarda rin’ed?
19 Gadad ni gadad e pi tapigpig rok Got, e gad be sonnag fare rran ni urngin e girdi’ e nguura n’ufed Jehovah. Re ngiyal’ nem, ma “fare fayleng e ra sug ko tamilangan’ rok Jehovah ni bod e day ni ke sug ko ran.” (Isaiah 11:9) Chiney, ma ngada athamgilgad ni ngada folgad ko tin ni baadag Jehovah ni ngada rin’ed ni aram ngada folwokgad ko fare psalmist ni ir e i yog ni gaar: “Bay ug pining e magar ngak ni aram e gu be weliy murung’agen nga feni sorok.” (Psalm 69:30) Bochan e re n’em, ma ka bay boch e fonow ni pi’ Malaki ni riyul’ nra ayuwegey. Arfan fa gal nni migid e article, e ri ngada tiyan’dad nga yu yang ko fare babyor ni Malaki.
Ka Ga Manang?
• Mang fan ni ngada n’ufed Jehovah?
• Mang fan ni fapi maligach ni kan pi’ u nap’an Malaki e dabun Jehovah?
• Uw rogon ni ngada pied e maligach ngak Jehovah ni be pining e sorok?
• Susun mang e ra k’aringey ni fan ko bin riyul’ e liyor?
[Picture on page 5]
Yiiy rok Malaki e ba l’ag ko tayim rodad
[Picture on page 6]
Dariy fan u wan’ Esau e tin nib thothup
[Picture on page 7]
Fapi prist nge girdi’ e kara pied e maligach nib kireb
[Picture on page 8]
Pi Mich rok Jehovah u ga’ngin yang e fayleng e kara pied e maligach dariy puluwon ni fan ni ngan pining e sorok’