Thin rok Jehovah e Ba Fas

Tin Ba Ga’ Fan ko Babyor rok Malaki

FARE tempel ni kan toy bayay e m’ay ni ke pag 70 e duw. Machane, i munmun me meewar piyu Jew ko tirok Got ban’en. Ki mada’ ko prist nra kirebgad. Mini’ e rayog ni ayuwegrad ngar nanged e tin riyul’ u rarogorad me guy rogon nge golnagrad ko tirok Got ban’en? I pi’ Jehovah e re maruwel ney ngak Malaki ni profet.

Ba gel e thin ni yoloy Malaki, ko fa ken ni tomur e babyor ko Bible ni Hebrew ni bay riy e pi yiiy ni thagthagnag Got. Gad ra tayan’dad ko pi thin nem ni yiiynag Malaki ma ra ayuwegdad ngad fal’eged rogodad ni fan ko “fare rran rok Jehovah ni ba ga’ ma ba gel e gafgow riy,” ko ngiyal’ nra yib tomuren e re m’ag ni kireb ney.​—Malaki 4:5, NW.

PI PRIST E ‘KAR K’ARINGED BOOR E GIRDI’ KAR RIN’ED E KIREB’

(Malaki 1:1–2:17)

I yog Jehovah rogon laniyan’ ni fan ngak piyu Israel, ni gaar: “Gimed ba t’uf rog.” Machane pi prist e kar darifannaged fithingan Got. Ni uw rogon? ‘Bochan e yad be tay e ggan ni gathi rib fel’ nga daken e altar’ ma yad be ognag e “gamanman nib marwoth ara ba m’ar” ni fan ko maligach.​—Malaki 1:2, 6-8.

Fapi prist “e kar k’aringed boor e girdi’ kar rin’ed e kireb.” Girdi’ e yad be “thilyeg e tin ni kar micheged ngorad.” Boch e girdi’ e kar leayed e girdi’ nu bang. Ma boch e ke thilyeg e tin ni ke micheg ngak e “re pin ni ke leay ko [ngiyal’] ni baaram ni kab pagel.”​—Malaki 2:8, 10, 11, 14-16, NW.

Fulweg u Boch e Deer ko Bible:

2:2​—Mang kanawo’ e ma fanay Jehovah nge ‘bucheg waathan e [pi] tow’ath’ ko prist ndar fol ko thin rok Got? Ma rin’ Got e re n’ey ni bod ni tow’ath nra wenignag e pi prist nem e ra yib ni buch waathan.

2:13​—Lu’ rok mini’ e ke upunguy e altar rok Jehovah? Lu’ u owchen pi leengiy ni yad ma yib ko tempel rok Jehovah nga u rogned lanin’rad ngak Jehovah. Mange ke k’aring e kireban’ ngorad? Pi figirngirad ni piyu Jew e kar wereged e mabgol rorad nde puluw ko motochiyel, ma kar paged yad ya nge yog nra leengiyed e ppin nu bang ni kab rugod.

Tin Gad Ra Fil Riy:

1:10. Der ma felan’ Jehovah ko maligach rok e pi prist nib chogow, ni yad ma ta’ puluwon ban’en ni ki mada’ ko tin nrib mom e maruwel ni bod e ngan ning e mab ara ngan gal’ e nifiy u altar. Rib ga’ fan ni ngongol rodad ko liyor nib muun ngay e n’en ni gad ma rin’ u nap’an e machib ko Kristiano, e nge k’aring e t’ufeg nde siin ngak Got nge piin buguli yoror rodad, ma ri gathi fan e nge yog ban’en riy ngodad!​—Matthew 22:37-39; 2 Korinth 11:7.

1:14; 2:17. Jehovah e der ma k’adan’ ko sasaliyeb.

2:7-9. Piin kan pi’ e maruwel rorad ni ngaur filed ban’en ko girdi’ u lan e ulung e thingari mudugil u wun’rad ni n’en ni yad be fil e ba puluw ko Thin rok Got, ni fare Bible nib Thothup, nge pi babyor ni ke ngongliy “fare tapigpig nib yul’yul’” nib puluw ko Bible.​—Luke 12:42; James 3:11.

2:10, 11. Jehovah e baadag ni pi tapigpig rok e manga yigi ga’ fan u wun’rad fare fonow ni ngaun mabgol ni rogon e mabgol “ni ma tay e piin ni girdien Kristus.”​—1 Korinth 7:39.

2:15, 16. Tin riyul’ e tapigpig e ngar ted fan e m’ag ko mabgol rorad u nap’an ni ka yad ba pagel.

‘FA BIN RIYUL’ E SOMOL E BAY YIB KO TEMPEL ROK’

(Malaki 3:1–4:6)

“Yugu bay mu gingad ma ke yib fare Somol [Jehovah Got] ko tempel rok” ni yow fa “en tamol’og ko fare m’ag [Jesus Kristus].” Got e, ‘bay yib ngorad ni nge pufthinnagrad’ ma bayi welthin nib togopluw ngak e piin ni yad be rin’ urngin mit e kireb. Maku reb, e “bay bake babyor rok ni kan yoloy” ngay murung’agen e piin ni bay madgun Somol u wan’rad.​—Malaki 3:1, 3, 5, 16.

Fare rran ‘ni be yik’ ni bod ba tafen e nifiy’ e bayi yib me longuy urngin e piin ni kireb. U m’on ni nge yib e re rran nem, ma bay ni pi’ ba profet ni nge “fulweg e pi matam nge pi bitir nga taabang.”​—Malaki 4:1, 5, 6.

Fulweg u Boch e Deer ko Bible:

3:10​—Fare n’en ni ngan fek i yib urngin e “taab guruy u ragag guruy,” ara n’en ni kan thognag ara tithing, e aram e kad pied urngin rodad ngak Jehovah? Fare Motochiyel rok Moses e kan pag nbochan e yam’ ni tay Jesus, ere n’en ni kan thognag ara tithing e daki t’uf ni ngan rin’. Machane, n’en ni kan thognag ara tithing e bay ban’en ni be yip’ fan. (Efesus 2:15) Der yip’ fan ni ngad pied urngin ban’en rodad. Aram rogon ni taab guruy u ragag guruy e yima pi’ ni gubin e duw, ma gad e gad ma pi’ e urngin rodad ngak Jehovah nri taab yay​—u nap’an ni yira ognagey ngak ma gad micheg u nap’an e taufe ko ran ni ngan chulthigey nga ar. Re ngiyal’ i n’em i yan nga m’on e, urngin ban’en ni bay rodad e ke mil fan ngak Jehovah. Machane, ki pagdad ni ngad mel’eged bang ko n’en ni bay rodad​—fare taab guruy u ragag guruy ni be yip’ fan ban’en—​ni ngad fanayed ko pigpig rok. Ni aram e rogon nrayog u rarogodad nge rogon nrayog u gelngidad. Pi maligach ni gad ma ognag ngak Jehovah e ba muun ngay e tayim, nge gelngiy nge pi n’en ni yibe fanay ko maruwel ko machib nge ngan pingeg e girdi’ nge mang gachalpen Jesus. Ma kub muun ngay e ngan un ko pi muulung ko Kristiano, nge ngaun yan ni nang salpen pi walagdad nib m’ar nge pilibthir, ma gad pi’ e salpiy ni ayuw ko bin riyul’ e liyor.

4:3​—Mang kanawo’ e ra ‘gel’ e pi tapigpig rok Jehovah riy ngak e piin nib kireb? Girdi’ rok Got u fayleng e gathi ngar “gelgad ngak e piin nib kireb,” ni ngar uned ko pufthin rok ngorad. Ya rogon riy, e be yip’ fan ni ngar pied yad ni polo’ ngar uned ko fare madnom ko kan gel ni yira tay u tomuren ni ra mus e fayleng rok Satan.​—Psalm 145:20; Revelation 20:1-3.

4:4​—Mang fan ni ngad ‘lemniged . . . fapi motochiyel rok Moses’? Re motochiyel nem e daki t’uf ni nge fol e Kristiano riy, machane i dag “yaan e tin nib fel’ ni bay yib.” (Hebrews 10:1) Arfan, ni faan gad ra tayan’dad ko Motochiyel rok Moses ma ra ayuwegdad ngad guyed rogon ni be lebug e pi n’en ni kan yoloy ngay. (Luke 24:44, 45) Maku reb, e fare Motochiyel e bay riy “yaan ngongolen e pi n’en ni bay u tharmiy.” Ra un fil ma ba ga’ fan ni faanra ngada nanged fan e pi n’en ni ma fil e Kristiano ngak e girdi’ nge rogon e ngongol riy.​—Hebrews 9:23.

4:5, 6​—Mini’ e be dag ‘Elijah ni profet’ yaan? Ka nog ko som’on ni “Elijah” e bayi maruwel nge fulweg urngin ban’en nga rogon, ni aram e nge fal’eg rogon laniyan’ e girdi’. U lan e bin som’on e chibog ko C.E., me micheg Jesus Kristus John ni ma Taufe ni ir “Elijah.” (Matthew 11:12-14; Mark 9:11-13) Piin ntaareb rogon ngak e ngiyal’ ney e kan pi’ keb “u m’on ndawori taw e re Rran nem rok Somol, ni ba ga’. . . ma ba gel e gafgow riy.” Elijah e ngiyal’ ney e ri dariy be’ ya “fare tapigpig nib yul’yul’ mab gonop.” (Matthew 24:45) Re ulung ney ko piin Kristiano ni kan dugliyrad e ke n’uw nap’an ni kar maruwelgad nib elmerin ni yad be maruwel ni ngar fulweged e girdi’ nga rogorad ko tirok Got ban’en.

Tin Gad Ra Fil Riy:

3:10. Ra dabiyog rodad ni ngad pied e tin th’abi fel’ rodad ngak Jehovah ma dabiyog ngodad e tow’ath rok.

3:14, 15. Bochan ngongolen e pi prist nib kireb, ma aram me lemnag piyu Jew ni pigpig ngak Got e gathi rib ga’ fan. Piin ni yad be yog e thin u lan e ulung ko Kristiano e thingari fel’ pangirad ngan folwok riy.​—1 Peter 5:1-3.

3:16. Ma chaariy Jehovah babyoren e piin bay madgun rorad ma yad ba yul’yul’ ngak. Yad bay u wan’ ma ra tayrad ni yad ba fas u nap’an nra museg fare fayleng nib kireb rok Satan. Ere, ri dab da meewargad ni kad dugliyed ni ngad pired ni gad ba yul’yul’ ku Got.​—Job 27:5.

4:1. Rorran ni ngan weliy e tin kuun rin’ ngak Jehovah ma ‘pa’ngin nib ga’’ nge “lik’ingin” e taareb rogon e n’en ni yow ra mada’nag ko tomur​—bitir e taareb rogon e gechig rorad ko gallabthir. Rib gel e maruwel rok e gallabthir ngak pi fakrad ni kab bitir! Matam nge matin ni Kristiano e thingar ra maruweliyew nib gel ngar parew ni yow ba fel’ u wan’ Got.​—1 Korinth 7:14.

“Ngeb Madgun e Bin Riyul’ e Got”

Mini’ e yira ayuweg ko re “Rran nem rok Somol, ni ba ga’. . . ma ba gel e gafgow riy”? (Malaki 4:5) I gaar Jehovah: “Gimed e piin ni gimed be fol rog e gelngig ni ma ayuwegey ma ma matanagiyey e bay yib nga dakenmed ni bod e yal’, me golnagmed ni bod ramaen e yal ni ma yib. Ri bay mfelfelan’gad ni bod rogon pi fak e garbaw nni bing e chum rorad nga ranod nga wuru’.”​—Malaki 4:2.

“Fare yal’ ni ma mat’awnigey,” ni Jesus Kristus, e be gal ramaen nga daken e piin nri bay madgun fithingan Got rorad, ma yad ba fel’ u wan’ Jehovah. (John 8:12) Ma yad e “kiy ra golnagrad”​—ko tirok Got e chiney ma yira golnagrad ni polo’ ni dowef, tafinay nge lem ko birok Got e fayleng ni beech. (Revelation 22:1, 2) Ri yad ra felfelan’, mar ngongolgad ni “bod pi fak e garbaw nni bing e chum rorad.” Bochan e re tow’ath nem ma ngad folgad ko fonow rok Solomon ni Pilung ni gaar: “Nguum par ni ba’ madgun Got u wan’um ma ga be fol ko thin rok, ya kari mus fan ni sunmiy Got e girdi’.”​—Eklesiastes 12:13.