Dariy ba Talin e Cham nni Ngongliy nra Maad’ad Ngomed

“Dariy ba talin e cham nni ngongliy nra maad’ad ngom.”​—ISAIAH 54:17.

1, 2. Uw rogon ni be dag e pi n’en ni buch ko Pi Mich Rok Jehovah u Albania nriyul’ e thin ni bay u Isaiah 54:17?

BOCH e duw kafram, u reb e nam u yimuch ni ngek u Europe, e immoy ba ulung ko Kristiano riy ndaur rusgad. Reb e am ko communist nib mich u wan’rad ndariy e Got e rin’ed e tin nrayog rorad ni ngar gafgowniged yad. Machane dariy ba mit e gafgow, ara thin ni googsur nni weliy u murung’agrad ni yog ni talegrad. Mini’ e pi cha’ ney? Aram boch e Pi Mich Rok Jehovah u Albania. Yugu aram rogon nib mo’maw’ rorad ni ngar muulunggad nga taabang ara nga ranod ko machib, machane k’adan’ ni ur tayed e tolangnag me k’aring ni ngan pining e sorok nga fithingan Jehovah. Fa binem e duw ni ke yan u nap’an e madnom ko bin beech e branch ofis rorad, ma reb e Pi Mich ni ke n’uw nap’an ni i par nib yul’yul’ e gaar: “Demtrug e n’en nra gay rogon Satan ni nge rin’, ma gubin ngiyal’ ni be war machane Jehovah e yugu be gel!”

² Urngin e pi n’ey e mich ko n’en ni micheg Got ngak e girdi’ rok u Isaiah 54:17 ni gaar: “Machane dariy ba talin e cham nni ngongliy nra maad’ad ngom; urngin e piin ni yad ra yog ni gab kireb e bay e fulweg riy ni ga ra pi’ ngorad.” Ke micheg chepin e girdi’ ndariy ban’en nra rin’ e fayleng rok Satan nrayog ni nge taleg e pigpig ni be tay e pi tapigpig rok Jehovah Got.

Der Yib Angin e Pi N’en ni Be Athamgil Satan Be Rin’

3, 4. (a) Mang e ba muun ko pi talin e cham rok Satan? (b) Mang kanawo’ e ke micheg ni pi talin e cham rok Moonyan’ e ke aw nib m’ay fan?

³ Pi talin e cham ni kan fanay ni nge taleg e tin nriyul’ e tapigpig e ba muun ngay e machib ni yibe taleg, cham ko yu ulung i girdi’ ngak e Pi Mich, nge boch e Pi Mich ni yibe kalbusnagrad, nge k’aring e ‘wagey u daken e motochiyel.’ (Psalm 94:20) Tin riyul’ riy e, mus ko re ngiyal’ i n’ey ni gad be fil e re article ney ma Pi Mich Rok Jehovah u boch e nam e yibe ‘skengnag’ e yul’yul’ rorad ku Got.​—Revelation 2:10.

⁴ Ni bod ni, reb e branch ofis ko Pi Mich Rok Jehovah e yog ni kemus ni lan taareb e duw, ma 32 yay ni kan cham ngak e pi tapigpig rok Got u nap’an ni yad be machib i yan. Tin ni kub muun ngay, e bay 59 yay ni kan kol boch e Pi Mich​—ni piin nib fel’ yangaren nge piin pilibthir, nge pumoon nge ppin—​ka nin’rad nga kalbus ni bochan e machib ni yad be tay. Boch i yad e kan fek yaan e wol u buguli pa’rad, nge yaarad, min nin’rad nga kalbus ni bod e girdi’ ni kireb. Ma boch i yad e kan k’aring e marus ngorad ni ngan li’rad. Ma reb e nam e, ke pag 1,100 yay ni kan kol e Pi Mich Rok Jehovah riy ka nin’rad nga kalbus, ma yibe bakingnagrad, ara ni pirdiiyrad. Boor ko 200 e pi n’ey e buch ko rorran ni kar muulunggad ni ngar madnomniged fare madnom ko yam’ ni tay Jesus! Yugu aram rogon, ma gelngin Jehovah e ke ayuweg e girdi’ rok ni nge yog ni ranod u fithik’ e pi magawon nib gel ni be yib ngorad, u lan e pi nam ney nge yugu boch e nam. (Zekariah 4:6) Gelngin e fanenikay rok e pi toogor e dabi taleg e piin ni yad be pining e sorok ngak Jehovah. Arrogon, ke mudugil u wan’dad ndariy ba miti talin e cham nrayog ni nge gel ko n’en nib m’agan’ Got ngay.

Ka Nog e Kireb ko Piin ni Dar Yul’yul’gad

5. Mang boch e thin nde riyul’ nnog nib togopuluw ngak e pi tapigpig rok Jehovah u nap’an e bin nsom’on e chibog?

⁵ I yiiynag Isaiah nra micheg e girdi’ rok Got nde riyul’ e thin nib togopuluw ni yibe weliy u murung’agrad. Kristiano ko bin nsom’on e chibog e boor yay ni yima yog murung’agrad nde puluw, ma yima yograd ni yad e girdi’ ni ma ngongliy e kireb. Fapi thin ko Acts 16:20, 21 e bay rogon ko pi n’ey ni be gaar: “Gali cha’ ney e l’agruw ni’ u Israel ni yow be k’aring e wagey u lan e binaw rodad. Ma yow be yog boch e yalen nib togopluw ko motochiyel rodad, ma gadad yu Roma e dabiyog ni ngad folgad ko tinem e yalen!” Ma ba ngiyal’ e piin ni ma togopuluw ko teliw e ra gayed rogon ni ngar togopuluwgad ngak pi gachalpen Jesus ni lungurad: “Pi girdi’ ney e kar k’aringed e wagey u gubin yang! Ma chiney e kar bad ko binaw rodad. [Yad] be th’ab e motochiyel rok e pilung nu Roma.” (Acts 17:6, 7) Facha’ i Paul ni apostal e nog ni “be magawonnag e girdi’” ma ir e ba ga’ u reb e ulung ni ke k’aring e girdi’ ni nge togopuluw ko am “u gubin yang u fayleng.”​—Acts 24:2-5.

6, 7. Mang reb e kanawo’ ni ma micheg e tin nriyul’ e Kristiano riy nde riyul’ e thin ni yibe weliy nib togopuluw ngorad?

⁶ Rogon riy e, dab da gingad ngay ni tin nriyul’ e Kristiano e ngiyal’ ney e kar pirieged ni yibe yog murung’agrad nde puluw, ma yibe thibthibnagrad nib gel. Mang fan nrayog ni nga nog ni kad micheged nde riyul’ e tin ni yad be yog?​—Isaiah 54:17.

⁷ Pi thin ney ni yima weliy nde riyul’ e ba ga’ ni ma m’ug nde riyul’ nbochan pangin e Pi Mich Rok Jehovah nib fel’. (1 Peter 2:12) Nap’an nra micheg e pi Kristiano ni yad be fol ko pi motochiyel ko nam ma yad be dag nriyul’ ni yad be lemnag rarogon e girdi’, ma pi thin nde riyul’ ni yibe weliy u murung’agrad e ra m’ug nde riyul’. Pangidad nib manigil e be micheg e pi n’ey. Nap’an nra guy e girdi’ ni gad be ul’ul i ngongliy e tin nib fel’, ma ra k’aringrad ngar pininged e sorok ko Chitamangidad ni bay u tharmiy mar nanged rogon kanawoen e yafas nib fel’ ko pi tapigpig rok.​—Isaiah 60:14; Matthew 5:14-16.

8. (a) Yu ngiyal’ ma mang e ba t’uf ni ngad rin’ed nge yog nda ayuweged gadad ko tirok Got ban’en? (b) Yira folwok rok Jesus, ma uw rogon ni gad be micheg nde riyul’ e pi n’en ni yibe yog nib togopuluw ngodad?

⁸ Tin ni kub muun ko ngongol rodad ko tirok Got ban’en e, yu ngiyal’ ma ba t’uf ni ngad rin’ed boch ban’en ngad ayuweged gadad ko tirok Got ban’en. Reb e kanawo’ e nga darod ko pi am nge kourt ni fan e ngan ayuwegdad. (Esther 8:3; Acts 22:25-29; 25:10-12) Nap’an ni immoy Jesus u fayleng, ma i pi’ e fulweg ko piin be togopuluw ngak, me tamilangnag e thin ni googsur ni u rogned. (Matthew 12:34-37; 15:1-11) Gadad ni gad be folwok rok Jesus e gad ma weliy ngak e girdi’ nib tamilang e n’en ni bay u gum’irchadad. (1 Peter 3:15) Manga yigi dab da paged e moning u skul, tabon e maruwel, ara chon e tabinaw nde michan’rad nge taleg ndab kud weliyed e tin nriyul’ u murung’agen e Thin rok Got.​—2 Peter 3:3, 4.

Jerusalem​—“Ban’en nib Tomal”

9. Bin ngan e Jerusalem e be yip’ fan fare ‘n’en nib tomal’ ni bay u Zekariah 12:3, ma mini’ owchen ni bay u fayleng?

⁹ Yiiy rok Zekariah e dag fan ni ke togopuluw fapi nam ngak e tin nriyul’ e Kristiano. Am guy e Zekariah 12:3 (NW) ni gaar: “Nggu gagiyegnag nra yib ba ngiyal’ ni Jerusalem e ra mang ban’en nib tomal ngak urngin e girdi’.” Bin ngan e Jerusalem e be sor fan e re yiiy ney ngay? Fare yiiy rok Zekariah u murung’agen yu Jerusalem e be sor fan ko fare “Jerusalem nu tharmiy,” ni fare Gagiyeg nu tharmiy ni kan pining fapi Kristiano ni kan dugliyrad ngay. (Hebrews 12:22) Ka buchuuw ko re ulung ney e ka bay u fayleng. Yad nge piin ni yad ni fare “yugu boch e saf” e yad be yog u taabang ngak e girdi’ ni ngar bad nga tan Gil’ilungun Got e chiney ni ka bay e tayim riy. (John 10:16; Revelation 11:15) Uw rogon e re n’ey u wan’ e pi nam? Ma mange re miti ayuw ni ma pi’ Jehovah ngak e tin nriyul’ e tapigpig rok e ngiyal’ ney? Ngad guyed nib fel’ rogon fan e Zekariah guruy ni 12. Faan gad ra rin’ ni aray rogon ma rayog ni nge mudugil u wan’dad ‘ndariy ba talin e cham nni ngongliy nra gel’ ngak e piin ni kan dugliyrad nge piin ni yad be maruwel u taabang.

10. (a) Mang ni yibe cham ngak e girdi’ rok Got? (b) Mang e ke buch ko piin ni kar gayed rogon ni ngar chuweged fare ‘n’en nib tomal’?

¹⁰ Zekariah 12:3 (NW) e be dag ni fare nam e kan “guruy nib gel.” Uw rogon ni ke buch e re n’ey? Ke yog Got ni thingar ni machibnag fare thin nib fel’ ni murung’agen fare Gil’ilungun. Rib ga’ fan u wan’ e Pi Mich Rok Jehovah fare maruwel ko machib. Machane, ngan weliy ni kemus ni fare Gil’ilungun e ir e athap rok gubin e girdi e “ban’en nib tomal” ngak e pi nam. Yad ma gay rogon ni ngar chuweged ni aram e yad ma magawonnag e pi tamachib ko Gil’ilungun. Fapi nam ni yad be magawonnag fare maruwel ni ngan machibnag murung’agen fare Gil’ilungun e ke “magur dowrad nib gel,” ke math’ yu yang riy. Mus nga murung’agrad ma ke kireb u nap’an ni kar tamra’gad ni bochan e tin ndar yog rorad. Dabiyog ni ngar th’abed gulungan e tin nriyul’ e tapigpig, nib ga’ fan u wan’rad ni ngar machibnaged fare “thin ndabi math biid” ni murung’agen Gil’ilungun Got u m’on ni nge mus e re m’ag ni kireb ney. (Revelation 14:6) Nap’an ni guy e cham ni yibe tay ngak e pi tapigpig rok Jehovah, ma reb e matanagen e kalbus u ba nam u Africa e gaar: ‘Gimed be m’aynag fan e n’en ni gimed be rin’ gimed be gafgownag e pi girdi’ ney. Dab ra paged e michan’ rorad. Kemus ni yad be yoor i yan.’

11. Uw rogon ndawori thilyeg Got e n’en ni ke micheg ni bay ko Zekariah 12:4?

¹¹ Mu beeg e Zekariah 12:4, NW. Ke micheg Jehovah nra malmitnag me “balyangan’nag” e piin ni yad be cham ngak e pi tamachib ni fan ko Gil’ilungun. Dawori thilyeg e n’en ni ke yog. Ni bod ni, reb e nam ni kan taleg e machib riy, e piin ni be togopuluw e de yog rorad ni ngar taleged ndab ki yog e ggan ni tirok Got ban’en ngak e girdi’ rok. Mus nga reb e shimbung ma ke yog ni i fanay e Pi Mich Rok Jehovah e balloon ni ngar feked e babyor riy nga daken e nam! Ke m’ug e mich riy nriyul’ e n’en ni ke micheg Got ni fan ngak e pi tapigpig rok nib yul’yul’ ni gaar: “Gu ra pithig owcheg ma gubin e os ko girdi’ ni gu ra malmitnag.” Bochan ni ke malmitnagrad e damumuw, ma fapi toogor ko Gil’ilungun Got e dakur nanged e n’en ni ngar rin’ed. Machane, ke mudugil u wan’dad ni ra ayuweg e girdi’ rok ni yad ba ulung me ayuwegrad ko tin nib t’uf rorad.​—2 Kings 6:15-19.

12. (a) Uw rogon ni ke tababnag Jesus e nifiy u nap’an ni yib nga fayleng? (b) Uw rogon ni ke k’aring fare ulung ni kan dugliyrad e nifiy ko tirok Got ban’en, ma mang angin?

¹² Mu beeg e Zekariah 12:5, 6, NW. “Faen ga’ nu Judah” e be yip’ fan e piin ni yad be ayuweg e girdi’ rok Got. Ke tay Jehovah e pasig nga laniyan’ e pi girdi’ ney ni fan ko tin nu fayleng ban’en u tan Gil’ilungun. Immoy ba ngiyal’ ni yog Jesus ngak pi gachalpen ni gaar: “Ku gub ni nggu tay e nifiy ko fayleng.” (Luke 12:49) Riyul’ ni tababnag ba nifiy ni be yip’ fan ban’en. Gil’ilungun Got e aram e n’en nth’abi ga’ fan ni i machibnag Jesus u fithik’ e pasig. Re n’ey e un tugthinnag nib gel u lan e nam rok piyu Jew. (Matthew 4:17, 25; 10:5-7, 17-20) Taareb rogon nga “ba th’ib ni yibe lith u fithik’ yu ke gek’iy ma bod ba mol’ ni be yik’ u fithik’ ba ulung i grain ni kafin ni th’ab,” piin ni yad be lek luwan ay Kristus ko ngiyal’ ney e yad be daramramnag urngin ban’en ni be yip’ fan ban’en. Fare Babyor ko 1917 ni The Finished Mysterya (Ke M’ay fare N’en ni Dan Nang Fan) e ri dag rarogon e sabanban ko piyu yurba’ i teliw ni Kristendom. Re n’ey e k’aring e damumuw ko pi tayugang’ ko pi yurba’ i teliw. Dawori n’uw nap’an, ma fare Kingdom News No. 37 ni kenggin e, “Teliw ni Googsur e Ke Chugur ni Nge Mus!” e boor e girdi’ ni ke k’aringrad ni ngar dugliyed lanin’rad ko ngar togopuluwgad ara ngar folgad ko fare Gil’ilungun Got.

Kan Ayuweg “Fapi Tento nu Judah”

13. Mang e be yip’ fan fapi thin ni “fapi tento nu Judah,” ma mang fan ni be ayuweg Jehovah e piin ni yad bay riy?

¹³ Mu beeg e Zekariah 12:7, 8, NW. Kakrom u Israel mab gagiyel e tento ni ireram ban’en ni ba ga’ ni ma fanay e piin ni ma gafaliy e saf nge pi ta milay’. Pi girdi’ ney e yad e som’on nra buch ban’en rorad maku yad e ku ra t’uf e ayuw rorad ko som’on ni faanra yib reb e nam ko cham ko mach nu Jerusalem. Fare thin ni “fapi tento nu Judah” e be dag ni tin ni ka bay ko fachi ulung ni kan dugliyrad ni yad bay e ngiyal’ ney e yad bay u bang nrayog ni nge buch ban’en rorad, ma gathi lan e mach ndariy e riya’ riy. U rom e yad be ayuweg e tin nib m’agan’ Got ngay ni fan nga Gil’ilungun fare Messiah. Jehovah e ra ayuweg “fapi tento nu Judah ko som’on” ni bochan e ireray e pi cha’ nra puluwegrad Satan u nap’an e cham rok.

14. Uw rogon ni ma ayuweg Jehovah e piin ni yad bay u lan “fapi tento nu Judah” nge dab ra dol’gad?

¹⁴ Arrogon, n’en ni i buch kakrom e be micheg ni be ayuweg Jehovah e pi girdi’ ney ni owchen ni kan dugliyrad ni fan ko fare Gil’ilungun ni yad bay u lan e “tento” rorad u daken e ted.b I tayrad ni dar “dol’gad” ni aram e ke tayrad ni yad ba gel ma darur rusgad ni bod rogon David, ni fare salthaw ni pilung.

15. Mang fan ni ra chuweg Jehovah “gelngin e pi nam,” ma mingiyal’ e ra rin’ e re n’ey?

¹⁵ Mu beeg e Zekariah 12:9, NW. Mang fan nra gay Jehovah rogon ni nge “chuweg gelngin e pi nam”? Bochan ni gubin ngiyal’ ni yad be togopuluw nga Gil’ilungun fare Messiah. Maku bochan ni yad be gafgownag e girdi’ rok Got, ma yad bay ko gin nra pufthinnagrad Got riy. Dabki n’uw nap’an ma girdi’ rok Satan ni yad bay u fayleng e yad ra cham ngak e tin nriyul’ e tapigpig rok Got u fayleng, ni ir e ra k’aring fare n’en ni bay u Bible ni ka nog ni Har–Magedon. (Revelation 16:13-16) Fare Tapufthin Nth’abi Ga’ e ra ayuweg e pi tapigpig rok me tolangnag fithingan u fithik’ urngin e pi nam.​—Ezekiel 38:14-18, 22, 23.

16, 17. (a) Mang fare ‘n’en ni be ayuweg e pi tapigpig rok Jehovah’? (b) K’adan’ ni gad ra tay ko cham nra yibnag Satan ngodad e mich ko mang?

¹⁶ Dariy reb e talin e cham rok Satan nrayog ni nge warnag e michan’ fa pasig ko girdi’ rok Got u ga’ngin e fayleng. Fare gapas ni ma yib ngodad ni bochan e kad nanged ni ma ayuwegdad Jehovah u gelngin, e ir e ‘n’en ni ma ayuweg e pi tapigpig rok Jehovah.’ (Isaiah 54:17) Dariy be’ nrayog ni nge fek’ nge chuw rodad fare gapas nge flaab rodad ko tirok Got ban’en. (Psalm 118:6) Ra ulul Satan i fek e togopuluw i yib ngodad me gay rogon ni ngki k’aring e gafgow ngodad. K’adan’ ni gad be tay u fithik’ e yul’yul’ e aram e mich riy nriyul’ ni bay gelngin Got rodad. (1 Peter 4:14) Fare machib u murung’agen Gil’ilungun Jehovah e yibe wereg u ga’ngin yang e fayleng. Bod rogon e pi n’en ni yibe fanay ni talin e cham, ni be fanathinnag ni “gawul” ni boor ni aram e togopuluw ni yibe tay ko girdi’ rok Got. Machane u daken gelngin Jehovah ma pi tapigpig rok e be yog nra gelgad ko pi malang ney mar m’aynaged fan. (Zekariah 9:15, NW) Tin ni ka bay ko fachi ulung nge piin ni yad be chag ngorad e dabiyog ni ngan talegrad!

¹⁷ Gad be sap nga m’on ko ngiyal’ ni yira chuwegdad ko cham rok fare Moonyan’. Gad ba felfelan’ ya gad manang ni ‘dariy ba talin e cham nni ngongliy nra maad’ad ngodad, ma urngin e piin ni yad ra yog ni gad ba kireb ma rayog ni ngad micheged ni yad ba oloboch’!

[Footnotes]

Uw Rogon ni Ga Ra Fulweg?

• Mang e be dag ni dariy angin fapi talin e cham rok Satan?

• Uw rogon ni ke mang fare Jerusalem nu tharmiy “ban’en nib tomal”?

• Uw rogon ni ma ayuweg Jehovah “fapi tento nu Judah”?

• Nap’an ni be chugur e Armageddon, ma mang e kari l’agan’um ngay?