Kam Fal’eg Rogom ni Fan ko fare Rran rok Jehovah, Fa?
“Fare rran rok Jehovah nib ga’ e ke chugur. Ke chugur ma rib machreg ni be yib.”—ZEFANIAH 1:14, NW.
1-3. (a) Mange be yog e Bible u murung’agen fare rran rok Jehovah? (b) Mang “rran rok Jehovah” e gad be chugur i yan ngay?
FARE rran rok Jehovah e gathi 24 e awa n’umngin i nap’an. Ya ba ngiyal’ ni nge pufthinnag Got e piin nib kireb. Piin ndarur pigpiggad ngak Got e bay rogon ni ngar rusgad ko re rran ney ni ba rran ni ba mu lumor, nge rran ko damumuw, nge mochuch nge magothgoth. (Isaiah 13:9; Amos 5:18-20; Zefaniah 1:15) I yiiynag Joel ni gaar: “Rib gel e gafgow ni bayi fek e re rran nem i yib ya fare rran rok Jehovah e ke chugur, ma ra yib ni bod e magothgoth ni yib rok e En ni Gubin Ban’en ma Rayog Rok!” (Joel 1:15, NW) Machane, nap’an e re rran nib ga’ nem, ma aram e ra ayuweg Got e piin nib “fel’ gum’ircharad.”—Psalm 7:10, NW.
2 Fare thin ni “rran rok Jehovah” e be sor fan ko pufthin rok Got nib thilthil ngal’an. Ni bod ni, reb e “rran rok Jehovah” e yib u nap’an ni fanay Jehovah piyu Babylon ni ngar gotheyed piyu Jerusalem ko duw ni 607 B.C.E. (Zefaniah 1:4-7, NW) Ku reb e pufthin ni ku rayog ni ngan taareb rogonnag ko biney e buch ko duw ni 70 C.E. u nap’an ni fanay Got piyu Roma ni ngar gafgowniged piyu Jew nge Fak Got. (Daniel 9:24-27; John 19:15) Bible e ku be weliy murung’agen reb e “rran rok Jehovah” u nap’an nra ‘mahl nib togopuluw ngak gubin e nam.’ (Zekariah 14:1-3, NW) U daken e thin ni kan thagthagnag ngak apostal Paul me taareb rogonnag e re rran nem ko ngiyal’ ni bay Kristus riy, ni tabab ko ngiyal’ ni Pilung u tharmiy ko duw ni 1914. (2 Thessalonika 2:1, 2) Bochan ni fare rran rok Jehovah e ri be yib nib machreg, ma arfan ni fare yeartext ko Pi Mich Rok Jehovah ko 2007 e rib puluw. Ni fek e re n’ey u Zefaniah 1:14 (NW), ni be gaar: “Fare rran rok Jehovah nib ga’ e ke chugur.”
3 Bochan ni ke chugur fare rran rok Got nib ga’, ma arfan ni chiney e aray e ngiyal’ ni ngad micheged ni kad fal’eged rogodad. Uw rogon nrayog ni ngam fal’eg rogom ni fan ko re rran nem? Mang boch ban’en ni kab t’uf ni ngam rin’ ni fan e nge fel’ rogom ni fan ko re rran rok Jehovah nem?
Mu Micheg ni Kam Fal’eg Rogom
4. Mang fare skeng nth’abi ga’ ni ke fal’eg Jesus rogon riy?
4 I yog Jesus ngak pi gachalpen u daken e yiiy rok u murung’agen e tin tomuren e rran ni gaar: “Ngkum pired ni gubin ngiyal’ ni kam fal’eged rogomed kam pired.” (Matthew 24:44) Nap’an ni yog Jesus e re thin nem, ma ir rok ma ke mu’ i fal’eg rogon ni fan ko fare skeng nib ga’—ni aram e nge yim’ ni fan e nge mang biyul. (Matthew 20:28) Mange rayog ni ngad filed u rogon ni ke fal’eg Jesus rogon?
5, 6. (a) Uw rogon ni be ayuwegdad e t’ufeg rodad ngak Got nge girdi’ ni ngad fal’eged rogodad ni fan ko fare rran rok Jehovah nib ga’? (b) Mange n’en ni rin’ Jesus nrayog ni ngan folwok riy u rogon ni ngan t’ufeg e en nib migid ngodad?
5 Ba t’uf Jehovah rok Jesus u polo’ i gum’irchaen maku ba t’uf rok e pi motochiyel rok Jehovah nib mat’aw. I weliy e Hebrews 1:9 murung’agen Jesus ni gaar: “Ma ngongol nib mat’aw e ir e ba t’uf rom ma fanenikam e ngongol nde mat’aw, ereray fan ni Got, ni ir e Got rom, e ke mel’egem, ma ta’ fan ni ke ta’ ngom e ri ka ba ga’ e felfelan’ ni ke yib riy ngom ko felfelan’ ni ke pi’ ngak e piin ni yad be un ngom.” I par Jesus nib yul’yul’ ngak e Chitamangin nu tharmiy ni bochan e ba t’uf rok. Ra ayuwegdad Got ni faan gad ra par ni gad ba yul’yul’ ngak. (Psalm 31:23) Faanra bay e t’ufeg nge yul’yul’ rodad ni aray rogon, ma rayog ni nge ayuwegdad nge bung rogodad ni fan ko fare rran rok Jehovah nib ga’.
6 T’ufeg ngak e girdi’ e aram bang nib gagiyel ko pi fel’ngin Jesus. Arrogon, ke “taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:36) Aram fan ni, machibnag Jesus fare thin nib fel’ ngak e girdi’, ni bod rogon ni ke k’aringdad e t’ufeg ni ngad wereged fare thin u murung’agen fare Gil’ilungun ngak e piin nib migid ngodad. T’ufeg rodad ngak Got nge piin nib migid ngodad e be taydad ni gad ba pasig ni gad e pi tamachib ni Kristiano maku ir e be ayuwegdad ni ngad fal’eged rogodad ni fan ko fare rran rok Jehovah nib ga’.—Matthew 22:37-39.
7. Mang fan nrayog ni ngad felfelan’gad u nap’an ni gad be sonnag fare rran rok Jehovah?
7 Rib fel’ u wan’ Jesus ni nge rin’ e tin nib m’agan’ Jehovah ngay. (Psalm 40:8) Gad ra felfelan’ ni ngad pigpiggad ku Got u polo’ e yafas rodad ni faanra bay e lem rodad ni aray rogon. Gad ra gol ni bod rogon Jesus, ma re n’ey e riyul’ nra yibnag e felfelan’ ngodad. (Acts 20:35) Arrogon, ‘felfelan’ ni ma pi’ Jehovah ngodad e bay i pi’ [gelngidad].’ Ma re felfelan’ nem e ir e ra fal’eg rogodad ni fan ko fare rran rok Got nib ga’.—Nehemiah 8:10.
8. Mang fan ni ngad chugurgad ngak Jehovah u daken e meybil?
8 Meybil nib gel ni i tay Jesus e ir e ayuweg ni nge fal’eg rogon ni fan nga boch e skeng ko michan’ rok. I meybil u nap’an ni yib John i taufenag. Nap’an ni nge mel’eg e pi apostal rok me meybil Jesus ni reb e nep’ nib polo’. (Luke 6:12-16) Mini’ e ra beeg e Bible ma dabi gin nga rogon e meybil ni i tay Jesus ko fare nep’ i n’em u m’on ni nge yim’? (Mark 14:32-42; John 17:1-26) Gur be’ ni gab ta meybil, ni bod rogon Jesus? Mu Meybil ku Jehovah ni gubin ngiyal’, ma dab mu gur ni ngam mu’nag e meybil rom, mu ning e ayuw ko kan ni thothup, ma ga fal’eg rogom ni ngam fol ko re kanawo’ nem u nap’an ni yira pi’ ngom. Ngiyal’ ney ni be chugur i yib fare rran rok Got nib ga’ e ba ga’ fan ni ngari gel e tha’ u thildad e Chitamangidad u tharmiy ko ngiyal’ ney ni ke mo’maw’ e par. Ere, dab da sagaalgad ni ngada chugurgad ngak Jehovah u daken e meybil.—James 4:8.
9. Uw feni ga’ fan ni ngan tolangnag fithingan Jehovah?
9 Bochan ni ba ga’ fan u wan’ Jesus ni nge tolangnag fithingan Jehovah nib thothup maku aray e n’en ni ayuweg ni nge fal’eg rogon ko pi skeng ni yib ngak. Tin riyul’ riy e, i fil ngak pi gachalpen ni meybil rorad ku Got e thingari un ngay fapi thin ni: “Ngan tay fan fithingam nib thothup.” (Matthew 6:9) Faanra gad baadag ni ngan tolangnag min tay nib thothup fithingan Jehovah, ma gad ra athamgil ni nge dab da rin’ed ban’en nra darifannag fithingan. Angin nra yib e, ra fel’ rogodad ni fan ko fare rran rok Jehovah nib ga’.
Ba T’uf ni Ngam Thilyeg Boch Ban’en u Rarogom?
10. Mang fan nib puluw ni ngad fal’eged i yaliy e yafas rodad?
10 Faanra yib fare rran rok Jehovah gabul, ma kam fal’eg rogom ni fan ngay? Gad gubin nsusun ni ngad fal’eged i yaliyed gadad ngad guyed ko bay ban’en nib t’uf ni ngad thilyeged ko ngongol rodad ara pangidad fa danga’. Gad ra sap nga feni ngoch nge feni tamaruwar e yafas ko girdi’ e chiney, ma gad gubin nib t’uf ni ngad pired ni gad ba od ko tirok Got ban’en ni gubin e rran. (Eklesiastes 9:11, 12; James 4:13-15) Ere chiney e ngad guyed boch ban’en u lan e yafas rodad nib t’uf ni ngad fal’eged i yaliy.
11. Ga ma beeg e Bible rom ni mang e ga be nameg?
11 Reb e n’en nth’abi ga’ fan e fare n’en ni ke tay chilen fare ‘tapigpig nib yul’yul’’ ni aram e nguun beeg e Bible ni gubin e rran. (Matthew 24:45) Rayog ni ngam nameg ni ngam beeg e Bible rom ni nge tabab ko Genesis nge mada’ ko Revelation ni taab yay u gubin e duw mu um fal’eg i lemnag fan. Ga ra beeg gonap’an aningeg guruy u reb e rran, ma rayog ni ngam beeg fa 1,189 i guruy u lan e Bible u reb e duw. Ra reb e pilung nu Israel ma thingari beeg e Motochiyel rok Jehovah “u gubin e rran u n’umngin nap’an e yafas rok.” Ba mudugil ni i rin’ Joshua ban’en ni taareb rogon ko re n’ey. (Deuteronomy 17:14-20; Joshua 1:7, 8) Rib ga’ fan ni nga i beeg e piin piilal u lan e ulung e Thin rok Got ni gubin e rran, ya ma ayuwegrad e re n’ey ni ngar machibgad nrogon nib “yal’uw.”—Titus 2:1.
12. Rran rok Jehovah ni ke chugur e ra k’aringem ni ngam rin’ e mang?
12 Rran rok Jehovah ni ke chugur e ir e ra k’aringem ni ngam un ko muulung ko pi Kristiano u gubin ngiyal’ nge ngam un ko n’en ni yibe rin’ riy u rogon nrayog rom. (Hebrews 10:24, 25) Ga ra rin’ ni aray rogon ma ra ayuwegem ni ngam ga’nag e salap rom ni gur reb e tamachib ko Gil’ilungun ni be gayiy e piin ni nge ayuwegrad nge yog ngorad e yafas ndariy n’umngin nap’an. (Acts 13:48) Sana rayog ni ngam pasig u lan e ulung u yugu boch e kanawo’, ni bod ni ngam ayuweg e piin pilibthir mag pi’ e athamgil nga laniyan’ e piin fel’ yangaren. Rra fel’ e pi n’ey u wan’dad!
Tha’ u Thilmed Boch e Girdi’
13. Mang deer e thingar da fithed gadad riy u rogon e bin nib beech i pangidad?
13 Bochan ni kari chugur e rran rok Jehovah, ma gur ba t’uf ni ngam athamgil nga ‘mun’ nga dakenam e bin nib beech e pangin ni bod rogon e munmad, ni bin nib beech i pangim ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngom’ fa? (Efesus 4:20-24) Nap’an ni ga ra maruweliy e pi fel’ngin Got, ma rayog ni nge guy boch e girdi’ ni gimew be ‘yan e kan ni thothup rok Got u taabang’ ma ga be dag wom’engin e kan ni thothup. (Galatia 5:16, 22-25) Rayog ni ngam dag boch ban’en ni mich riy ni gur nge tabinaw rom e ka mon’ed nga dakenmed e bin nib beech i pangimed? (Kolose 3:9, 10) Bod rogon ni, yi manangem ni bochan e gab gol ma ga ma rin’ e tin nib fel’ ngak e piin taareb e michan’ romed nge ku boch e girdi’? (Galatia 6:10) Ga ra beeg ni gubin e rran e thin rok Got ma ra ayuwegem ngam maruweliy nge yog ngom e pi fel’ngin Got ni ir e ra fal’eg rogom ni fan ko fare rran rok Jehovah.
14. Mang fan thingari yibilay be’ e kan ni thothup u nap’an ni be maruweliy e t’ar laniyan’?
14 Ma uw rogon ni faanra ba pay ni ga ma damumuw ma kam nang ni ba t’uf ni nguum t’ar lanin’um? Re fel’ngin ney e reb fapi wom’engin nrayog ni nge sunumiy e kan ni thothup u lanin’um. Ere, mu yibilay ni nge yib fare kan ni thothup ngom, ni nge puluw ko thin rok Jesus ni gaar: “Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed. Gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare kan ni thothup ngak e piin ni yad ra ning ngak!”—Luke 11:9-13.
15. Mang e thingar mu rin’ ni faanra bay e magawon u thilmew reb e walag?
15 Sana bay boch e magawon ni ke sum u thilmew reb e walag. Faanra aram rogon, ma ngam athamgiliy nge fel’ e tha’ u thilmew, nge yog ni yib e gapas nge taareban’ nga lan e ulung. (Psalm 133:1-3) Mu fol ko fare fonow rok Jesus ni bay u Matthew 5:23, 24 ara Matthew 18:15-17. Faanra ba sowath ni ga ma n’ag fan e kireb ku be’ ma ngam gur ni ngam yal’uweg e lem rom. I yoloy Paul ni gaar: “Um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.”—Efesus 4:25, 26, 32.
16. Mang boch e kanawo’ nib t’uf e runguy riy u lan e mabgol?
16 U lan e mabgol e ba t’uf ni ngan dag e runguy ma yu ngiyal’ ma ra t’uf ni ngan n’ag fan e kireb. Faanra ba t’uf ni nge gel e t’ufeg nge runguy rom ngak e en mabgol rom, ma ngam athamgil ngam rin’ e re n’ey u daken e ayuw rok Got nge Thin rok. Gur, bay ban’en nib t’uf ni ngam rin’ ngam fol ko fare thin ko 1 Korinth 7:1-5 ya nge yog nim achignag e mochuch ma ga polo’ ko dab kun yul’yul’? Mmudugil ni ireray bang ko yafas ni ba t’uf ni en ni figirngiy ara en leengiy e ngari ‘sumunguy’ riy.
17. Mang boch ban’en nsusun ni nge rin’ be’ ni faanra ke denen nib ubchiya’?
17 Uw rogon ni faanra kam denen nib ubchiya’? Mu gur ngam rin’ boch ban’en nge yog ni puf fare magawon. U fithik’ urngin e pi n’ey, mag ning e ayuw ko piin piilal ni Kristiano. Meybil rorad nge fonow rorad e ra ayuwegem nge fel’ rogom bayay ko tirok Got ban’en. (James 5:13-16) Mu meybil ku Jehovah nriyul’ ni kam kalngan’um. Faanra dab mu rin’ e re n’ey ma ga ra par ni ga be lemnag ni gur e gab kireb ma rayog ni nge magawonnag e nangan’ rom. Re n’ey e buch ku David, machane uw feni fel’ ni ke fel’ laniyan’ bayay ni bochan e ke wenig ku Jehovah! I yoloy David ni gaar: “Ba felan’ e cha’ ni ke n’ag Got fan e denen rok, ni kireb rok e ke thang Got. Ba felan’ e en ndakir yog Somol ngak ni be rin’ faanem e kireb; ma kar wergow urngin mit e sabanban.” (Psalm 32:1-5) Ma n’ag Jehovah fan e denen rok e piin ni kar denengad ma riyul’ ni kar kalgadngan’rad.—Psalm 103:8-14; Proverbs 28:13.
Mu Par ni Gathi Gur Bang ko Fayleng
18. Susun e nge uw rogon e fayleng u wan’dad?
18 Dariy e maruwar riy ni ga be sap nga m’on ko bin nib beech e fayleng ni ke micheg e Chitamangidad nu tharmiy. Ere uw rogon ni ga ma sap ko re fayleng ney ni be par e girdi’ riy nib dar ku Got? Satan ni ir e “be gagiyegnag e girdi’ nu fayleng,” e de yog rok ni nge gagiyegnag Jesus Kristus. (John 12:31; 14:30) Dabi siy ni dabum ni nge gagiyegnagem fare Moonyan’ ara re fayleng ney, ere mu fol ko fare thin rok apostal John ni gaar: “Dabi t’uf romed e tin ni ba’ u roy u fayleng ara n’en nib mil fan nga fayleng.” Ireray e bin nib fel’ e kanawo’ ya, “re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”—1 John 2:15-17.
19. Pi Kristiano ni fel’ yangarad e yibe tay chilen ngorad ni ngar nameged e mang?
19 Ga be ayuweg pi fakam ni ngar pired ‘ndar kirebnagrad e kireb nu fayleng’? (James 1:27) Baadag Satan ni nge kol pi fakmed ni bod rogon be’ ni be l’eg e nig. Boor e pi ulung ni kan fal’eg ni fan e nge k’aring e piin fel’ yangaren ni ngar m’aggad ko fayleng rok Satan. Machane pi tapigpig rok Jehovah e ke mil farad ko fare ulung nra magey nib fos u tomuren e re m’ag ney nib kireb. Ere pi Kristiano ni fel’ yangaren e thingar ni pi’ e athamgil nga lanin’rad ni nguur ‘maruweliyed e maruwel rorad ni fan ngak Somol.’ (1 Korinth 15:58) Gallabthir ni Kristiano e ba t’uf ni ngar ayuweged pi fakrad ngar nameged e pi n’en nra pi’ e yafas ngorad nib felfelan’ ni ma pining e sorok ngak Got me ayuwegrad ngar fal’eged rogorad ni fan ko fare Rran rok Jehovah.
Mu Sap Nga Tomren fare Rran rok Jehovah nib Ga’
20. Mang fan nsusun e nguud lemnaged murung’agen e yafas ni manemus ni gubin ngiyal’?
20 Rayog ni ngam sonnag fare rran rok Jehovah u fithik’ e gapas ni faanra gubin ngiyal’ ma ga be lemnag e yafas ni manemus. (Jude 20, 21) Rayog ni ngam sap nga m’on ko yafas ndariy n’umngin nap’an u Paradis, ma aram e ra yog ngom fare athap ni nge sul dowdad nge pagal bayay nge tayim ni boor ni ngam nameg boch ban’en ni ngam rin’ nge boch ban’en ni ngam nang u murung’agen Jehovah. Rayog ni ngam fil murung’agen Jehovah ndariy n’umngin nap’an ni bochan e girdi’ e ngiyal’ ney e tin ni yad manang u murung’agen e maruwel rok Got e ‘ri buchuuw.’ (Job 26:14) Ireray reb e athap nib manigil!
21, 22. Mang boch ban’en nra um weliyed e piin ni kan fasegrad ko yam’?
21 U Paradis e piin ni kan fasegrad ko yam’ e rayog ni ngar weliyed boch ban’en ngodad u murung’agen e kakrom. Ra moy Enok u rom nra weliy ngodad rogon ni par nda i rus nga i weliy e thin rok Jehovah ngak e girdi’ nde mich Got u wan’rad. (Jude 14, 15) Me Noah e ra weliy rogon ni ngongliy fare arke. Abraham nge Sarah e yow ra weliy rogon e lem rorow u nap’an nra chuwgow ko flaab rorow u Ur mu ur pirew u lan e tento. Am lemnag Esther ni be weliy rogon ni ayuweg e girdi’ rok me kirebnag e liyeb rok Haman ko n’en ni nge rin’ ngorad. (Esther 7:1-6) Kum lemnag Jonah ni be weliy murung’agen fa dalip i rran ni immoy u lan yin fare nig nib ga’ ara John ni Ta Taufe ni be weliy murung’agen rogon e lem rok u nap’an ni taufenag Jesus. (Luke 3:21, 22; 7:28) Rib manigil ni ngan fil e pi n’ey!
22 U nap’an nra Gagiyeg Jesus u lan fare Biyu’ i Duw, ma rayog ni ngam ayuweg e piin ni kan fasegrad ko yam’ ni ngar ‘pirieged fare tamilangan’ rok Got.’ (Proverbs 2:1-6) Ngiyal’ ney, e rib gel e felfelan’ riy ni gad ra guy e girdi’ ni ke yog e tamilangan’ ngorad u murung’agen Jehovah Got mar folgad riy! Machane am lemnag e felfelan’ rom boch ngaram u nap’an nra tow’athnag Jehovah e athamgil ni ga ra tay ni ngam fil boch ban’en ngak e piin ni ur moyed kakrom mar folgad riy!
23. Mang e thingari mudugil u wan’dad ni ngad rin’ed?
23 Pi n’en ni ma fel’ rogodad riy ni gad e girdi’ rok Jehovah e ngiyal’ ney e dabiyog ni ngad theeged. (Psalm 40:5) Ma gad ba felfelan’ ko pi n’en ni be pi’ Got ngodad. (Isaiah 48:17, 18) Demtrug rarogodad, ma ngad pigpiggad u polo’ i gum’irchadad u nap’an ni gad be sonnag fare rran rok Jehovah nib ga’.
Uw Rogon ni Ga Ra Fulweg?
• Mang “fare rran rok Jehovah”?
• Uw rogon nrayog ni ngam micheg ni kam fal’eg rogom ni fan ko fare rran rok Jehovah?
• Mang boch ban’en nib t’uf ni ngad thilyeged u rarogodad e chiney ni ke chugur fare rran rok Got nib ga’?
• Mang e ga be sap ngay boch nga m’on u tomuren fare rran rok Jehovah?