Mu Micheg Ni Kam Fl’eg Rogom Ni Fan Ko Rran Rok Jehovah

“Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.”​—MATTHEW 24:44.

1. Mang fan ni baga’ fan e rran rok Jehovah u wan’dad?

RRAN Rok Jehovah e aram e rran ko mahl nge mogothgoth, ara rran ko dumumuw nge gafgow, ara rran ko talumor. “Rran rok Jehovah ni rran ni baga’ fan ni yira tamdag ngay” e ri ra yib nga daken e re m’ag nib kireb ney ni bod rogon ni ke yib e Day ke thang e girdi’ nib kireb u nap’an Noah. Dabiyog ni nge thay be’ ko re rran nem. Machane “gubin e girdi’ ni ra pining e ngochol rok Jehovah e ra magay nib fas.” (Joel 2:30-32; Amos 5:18-20) Ra thang Got e pi toogor rok ma ra ayuweg e girdi’ rok. Be gaar Zephaniah ni be gurgur an’ riy: “Ke chugur e rran rok Jehovah ni rran ni baga’ fan. Ke chugur ma ri be gurgur iyan.” (Zephaniah 1:14) Machane wuin e ra yib e re gechig rok Got ney?

2, 3. Mang fan ni thingar da fl’eged rogodad ni fan ko rran rok Jehovah?

² Be gaar Jesus: “Machane re rran nem nge re awa nem e dariy be’ ni manang e ngiyal’ nra taw riy​—⁠ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:36) Dada nanged e ngiyal’ nra taw riy, ere thingar da folgad ko thin ko Bible ko duw ni 2004: “Mu tedan’med . . . Mu fal’eged rogomed ngam pared.”​—Matthew 24:42, 44.

³ I tamilangnag Jesus fene tomgin ni yira ayuweg e piin ni kar fl’eged rogorad ngan fekrad nga bang ma yugu boch e girdi’ e bay ni pagrad. Be gaar: “Re ngiyal’ i n’em e ra bay l’agruw i pumoon ni yow be maruwel u milay’, ma bay ni fek bagayow nge yan, mi ni pag bagayow. Ra bay l’agruw i ppin ko fen e bil flowa, ni yow be bilig e flowa, ma bay ni fek bagayow nge yan, mi ni pag bagayow.” (Matthew 24:40, 41) Ra taw ko ngiyal’ nem, ma ra uw rarogodad? Gad ra par ni kada fl’eged rogodad, fa gad ra gin ngay ya ke taw e re rran nem, fa? Ra yan uw rogon e pi n’en ni gad ra rin’ e chiney. Gad ra par ni kada fl’eged rogodad ni fan ko rran rok Jehovah e be yip’ fan ni thingar da digeyed laniyan’ e girdi’ ni bay ko ngiyal’ ney, ma ngada ayuwgad ni nge dabi war e michan’ rodad, ma ngada paloggad ko ngongol nib kireb.

Ngada Digeyed Laniyan’ E Girdi’ Ni Kayigi Fel’ Rarogorad U Wan’rad

4. Uw rogon laniyan’ e girdi’ u nap’an Noah?

⁴ Amu lemnag nap’an Noah. Be gaar e Bible: “Michan’ rok Noah ngak Got e ir e ayuweg Noah nge motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni ark fithingan, ni re ark nem e ir e faseg Noah nge girdi’ nu tabinaw rok.” (Hebrews 11:7) Rib gagiyel fare ark. Maku Noah e ir e “tamachib ko tin nib mat’aw.” (2 Peter 2:5) Machane maruwel rok Noah ni be toy e ark nge machib ni ke wereg e de n’igin e girdi’ ni ngar rin’ed ban’en. Mang fan? Ya “yibe abich ma yibe garbod, ma be mabgol e pumoon nge ppin.” Kari mit e piin ni be machibnagrad Noah ko tin ni yad be rin’ nge falfalan’ ni yad be tay ma “da ur nanged e n’en ni bay yib ngorad nge yan i mada’ ko ngiyal’ ni ba aram ni yib e ran nge tharey e fayleng nge fekrad ni yad gubin.”​—Matthew 24:38, 39.

5. Uw rogon laniyan’ e girdi’ nu Sodom u nap’an Lot?

⁵ Ku arrogon u nap’an Lot. Be gaar e Bible: “Urngin e girdi’’ nra pired ni yad be abich ma yad be garbod, ma yad be chuway’ ma yad be fol chuway’ ko chugum, ma yad be woldug ma yad be dimow naun. Ma chirofen ni chuw Lot u lan e binaw nu Sodom e yib e nifiy nge sulfur u lang nga daken yu Sodom ni aw ni bod e n’uw nge li’ e girdi’ riy ni yad gubin.” (Luke 17:28, 29) Tomren ni yog e engel ngak Lot ni ra yib e riya’ me non Lot ngak e fagali pagal ni yow ra mabgol fa gali rugod ni fak Lot me yog ngorow e riya’ ni be yib. “Mi yow finey ni be thin ni gosgos.”​—Genesis 19:14.

6. Mang boch e lem ni nge dab da uned ngay?

⁶ Rogon e girdi’ u nap’an Noah nge Lot e ku arrogon e girdi’ u nap’an e “wub rok e en ni Fak e Girdi’.” Arrogon e thin rok Jesus. (Matthew 24:39; Luke 17:30) Ma riyul’ ni ngiyal’ ney e kaygi fel’ rarogon e girdi’ u wan’rad. Thingar da ayuwgad ni nge dabi af e re lem nem ngodad. Dariy e kireb riy ni ngada falfalan’gad ko abich nge garbod ni yira tay nrogon. Ku arrogon e mabgol ni aram e yalen ni tay Got. Machane faan manga ke mang e pi n’en ney e tin ni baga’ fan u wan’dad me migid e machib nge tirok Got ban’en, ma rayog ni nga nog ni kada fl’eged rogodad ni fan ko fare rran rok Jehovah ni yira tamdag ngay, fa?

7. Mang deer ni ngada fithed gadad u m’on ni gad ra un nga ban’en, ma mang fan?

⁷ Be gaar apostal Paul: “Daki yoor e tayim ni ke magey, chiney i yan nga m’on e pumoon ni kar mabgolgad e ngar pired ni gowa dawor ra mabgolgad.” (1 Korinth 7:29-31) Ke lich e tayim ni ka bay ni ngada rin’ed fare maruwel ni ke pi’ Got ngodad ni ngada machibnaged morngaagen Gil’ilungun Got. (Matthew 24:14) Be fonownag Paul e piin ni yad mmabgol ni dab ra m’oneged e ani mabgol rorad me migid tirok Gil’ilungun Got. Ere ba tamilang ni yog Paul ni dabi par lanin’dad ni kayigi fel’ rarogodad u wan’dad. Be gaar Jesus: “Ere ngam m’oneged u wun’med e gagiyeg rok Got nge tin nib m’agan’ ngay ni ngam rin’ed.” (Matthew 6:33) Ere nap’an ni gad ra turguy ban’en ara gad ra tabab ko reb e maruwel ma thingar da fithed, “Mang wenegan e re n’en ney ko yafas rog ni gu be m’oneg Gil’ilungun Got?”

8. Mang e ngada rin’ed ni faanra ke m’on u wan’dad e tin ni gad ma rin’ ko yu rran?

⁸ Uw rogon ni faan manga kada pirieged ni kada mitgad ko tin ni yima rin’ ko yu rran ma de m’on e tirok Got ban’en u wan’dad? Dariy ban’en nib thil ko yafas rodad nge yafas rok e girdi’ nu lan binaw ni dar nanged e machib nu Bible ma dar wereged e machib u morngaagen Gil’ilungun Got, fa? Faan manga arrogon, ma thingar da yibilayed e re n’en ney. Rayog rok Jehovah ni nge yal’uweg lanin’dad. (Roma 15:5; Philippi 3:15) Rayog rok ni nge ayuwegdad ni ngada m’oneged Gil’ilungun, ma ngada rin’ed e tin nib mat’aw ma ngada rin’ed e tin nib mil fan ngodad ni ngada rin’ed.​—Roma 12:2; 2 Korinth 13:7.

Mu Athamgil Ni Nge Dab Mu Chuchuw

9. Rogon e thin u Revelation 16:14-16, mang fan ni thingar da ayuwgad ni nge dab da chuchuwgad?

⁹ Fare thin ko profet ni be weliy morngaagen fare “mahl ni fan ko fare rran ni baga’ fan ni Rran rok Got ni Gubin ma Rayog Rok” u Armageddon e ku be yog ni boch e girdi’ e dab ra pared ni yad ba od. Be gaar Somol ni Jesus Kristus: “Mmotoyilgad! Bay gub ni bod ba moro’ro’. Ra falfalan’ e en ni ke kar ni be od ni be ayuweg e mad rok, ni bochan e nge dab i yan ndariy e mad u daken ngi i tamra’ u fithik’ e girdi’.” (Revelation 16:14-16) Fare mad ni be weliy morngaagen e be yip’ fan e n’en ni be tamilangnag ni gad e Kristiano ni Mich Rok Jehovah. Kub muun ngay e maruwel rodad ni gad ma wereg e machib u morngaagen Gil’ilungun Got nge ngongol rodad ni gad e Kristiano. Faan manga gad ra mol ara dab da rin’ed e maruwel rodad ma rayog ni ngan chuweg e mad rodad ara ngan fek rodad e n’en ni ma tamilangnag ni gad e Kristiano. Bay e tamra’ riy maku bay e riya’ riy. Ere thingar da ayuwgad ni nge dab da chuchuwgad ara malmalgad. Mang e rayog ni ngada rin’ed ni ngada ayuwgad riy?

10. Uw rogon ni ma ayuwegdad e poy Bible u gubin e rran ni ngada pared ni gad be od?

¹⁰ Boor yay ni be yog e Bible ni thingar da pared ni gad ba od ma gad be tayan’. Susun, be yog e Gospel ni gaar: “Mu tedan’med” (Matthew 24:42; 25:13; Mark 13:35, 37); “Mu fal’eged rogomed ngam pired” (Matthew 24:44); “mu ayuwgad mi gimed tiyan’med” (Mark 13:33); “ngam fal’eged rogomed ngam pired” (Luke 12:40). Tomren ni yog apostal Paul ni ra yib e rran rok Jehovah ko ngiyal’ ni dab ni lemnag ni ra yib riy me yog ngak e girdi’ nib mich u wan’rad ni gaar: “Ere dab ud molod ni bod boch e girdi’; ya nguuda pired ni gadad be od ma ba tamilangan’dad.” (1 Thessalonika 5:6) U lan e bin tomur e babyor ko Bible e i yog Jesus Kristus ni ra yib nib tomgin ni gaar: “Dab ki n’uw nap’an mu gub.” (Revelation 3:11; 22:7, 12, 20) Boor e pi profet nu Hebrew ni kar weliyed morngaagen ma kar ginanged ni ra yib e chirofen e pufthin ni rran ni baga’ fan rok Jehovah. (Isaiah 2:12, 17; Jeremiah 30:7; Joel 2:11; Zephaniah 3:8) Gad ra bieg e Thin Rok Got ni Bible ni gubin e rran ma gad fl’eg i lemnag e pi n’en ni kada bieged ma ra ayuwegdad ni nguuda pared ni gad be tayan’.

11. Mang fan nib t’uf ni ngada filed e Bible ni fan e ngada pared ni gad be od?

¹¹ Arrogon, fol Bible e ra ayuwegdad ni nguuda pared ni gad be od maku ra ayuwegdad e pi babyor ni ke fl’eg fare “tapigpig nib yul’yul’ mab gonop”! (Matthew 24:45-47) Ma faanra nge yib angin e fol babyor ni gad be tay ma thingar da rin’ed ni gubin ngiyal’ ma gad be mon’og riy. (Hebrews 5:14; 6:3) Thingar da filed e tin toar e machib ni be yip’ fan e ggan nib el. Mo’maw’ ni ngan pirieg e tayim ni fan ko fol babyor e ngiyal’ ney. (Efesus 5:15, 16) Machane dabi gaman ni ke mus ni ngan fil e Bible ara pi babyor ni ma weliy fan e Bible ko ngiyal’ ni gad ba adag. Ya thingar da filed e Bible ko ngiyal’ ni kan duguliy ni fan ni nge “fel’ rogon e michan’ rodad” ma nguuda pared ni gad be od.​—Titus 1:13.

12. Uw rogon ni ma ayuwegdad e pi muulung nge pi assembly ni ngada pared ni nge dab da chuchuwgad?

¹² Ku ma ayuwegdad e pi muulung ko Kristiano nge pi assembly rodad ni nge dab da chuchuwgad. Uw rogon? Ma ayuwegdad ko pi fonow ni ke yog ngodad. U lan e pi muulung ney e yima puguran ngodad ni ke chugur e rran rok Jehovah, fa? Pi muulung ko Kristiano ni gad ma tay ko yu wik e ma ayuwegdad ni “nge bagadad me pi’ e athamgil nga laniyan’ bagadad ma be dag ngak nib t’uf rok ma be rin’ e tin nib fel’ ngak.” Re n’en ney ni nge bagadad e be pi’ e athamgil nga laniyan’ bagadad e ra ayuwegdad ni nguuda pared ni gad be od. Ere aram fan ni ka nog ngodad ni nguuda muulunggad, “ngari gel ni fan e gimed be guy ni Chirofen ni bay yib Somol riy e be chugur.”​—Hebrews 10:24, 25.

13. Uw rogon ni ma ayuwegdad e machib u mit e tabinaw ni ngada pared ni gad ba od?

¹³ Maku nap’an ni gad ra un ko machib u mit e tabinaw ma yib e ayuw ngodad ni ngada pared ni gad be od. Bay yugu reb e kanawo’ nrayog ni ngada tedan’dad ko bin ni ngada weliyed ngak yugu boch e girdi’ fapi pow ko ngiyal’ ney nge fan e pi pow nem, fa? Nap’an ni gad ra guy e piin ni gad be fil e Bible ngorad ni yad be mon’og ma yad be fol ko tin ni yad be fil ma ra gurguran’dad, fa? Be gaar apostal Peter: “Mu fal’eged rogon lanin’med ni ngam ngongolgad. Mi gimed tiyan’med. (1 Peter 1:13) “Gubin ngiyal’ ma nguum muruwliyed e maruwel romed ni fan ngak Somol” e ban’en ni ra ayuwegdad ni nge dab da chuchuwgad.​—1 Korinth 15:58.

Mu Palog Ko Pi Ngongol Nrayog Ni Nge Kirebnag E Michan’ Rodad

14. Mang boch e ngongol ni ke weliy Jesus morngaagen ni ngada ayuwgad riy u Luke 21:34-36?

¹⁴ Nap’an ni yog Jesus e pi pow ko wub rok ma ki ginangdad. Be gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be muruwliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal. Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed mi gimed yan mu sak’iygad nga p’eowchen e en ni Fak e Girdi’.” (Luke 21:34-36) Rib puluw e thin rok Jesus ni be weliy e pi n’en ni ma lek e girdi’: mur ni ke pag rogon, nge chingaw, nge rogon e par ni yima magafan’uy ngay.

15. Mang fan ni ngada ayuwgad ko abich ni ke pag rogon, nge muun rrum ni ke pag rogon?

¹⁵ Abich ni ke pag rogon nge muun rrum ni ke pag rogon e ba togopuluw ko machib ko Bible ma thingar da paloggad riy. Be gaar e Bible: “Dab um chag ngak e girdi’ ni tamuun rrum, ara piin ni yad ma abich nge pag rogon.” (Proverbs 23:20) Ma ku bay e riya’ ko abich nge garbod ni de pag rogon. Ya rayog ni nge chuchuw be’ ara nge malmal. Be gaar e proverb u Bible: “Be’ nib malmal e ra t’uf rok ban’en ni nge yog ngak, machane ri dabiyog ni nge yog ngak.” (Proverbs 13:4) Be’ ni aram rogon e ba adag ni nge rin’ e tin nib m’agan’ Got ngay, machane de yog ngak e tin ni ba adag ni bochan e der tayan’ ngay.

16. Uw rogon ni rayog ni nge dabi magafan’dad ni bochan e pi magawon ko tabinaw?

¹⁶ Mang boch ban’en ko re tamilang ney ni yima magafan’ ngay ni be weliy Jesus morngaagen? Aram e pi magawon rodad ni bod e maruwel ni fan e nge yog e tin nib t’uf ko girdien e tabinaw. Machane dab da paged e pi n’en ney ni nge tomalnag lanin’dad! I fith Jesus: “Mini’ e aromed nrayog ni ku ra mun in e rran ngak ko biney e tamilang ni faanra i magafan’ ngay?” Ere i fonownagrad ni gaar: “Ere dabi magafan’’ be’ nge gaar: U uw e bay yib e ggan rog riy? Ara n’en ni nggu garbod ngay? Ara mad ni nggon’? (Ereray e pi n’en ni gubin ngiyal’ ma be nameg e piin ni yugu boch e kan e yad be meybil ngorad.) Chitamangimed ni bay u tharmiy e manang ni pi n’ey ni urngin e dabi siy ni nge yog ngomed.” Gad ra m’oneg Gil’ilungun Got u wan’dad ma nge pagan’dad ngay ni ra pi’ Jehovah e tin nib t’uf rodad ma ra ayuwegdad ni nge dabi magafan’dad ma ngada pared ni gad be tayan’.​—Matthew 6:25-34.

17. Uw rogon ni ra magafan’dad ni bochan e chogowen e chugum?

¹⁷ Ku rayog ni nge magafan’dad ni faanra m’on e chugum u wan’dad. Boor e magawon rok boch e girdi’ ni bochan e yad be chuway’ ni yad be tay ni malfith. Yugu boch e girdi’ e kan wawliyrad ni bochan e yad ba adag ni nge yog boor e salpiy ngorad ni papey. Yugu boch e girdi’ e yad ma guy rogon ni nge yoor e skul rorad ya yad ma lemnag ni aram e kanawo’ ni nge yog e salpiy ngorad riy, machane ku ir reb e wup. Riyul’ ni rayog e maruwel ngak e piin ni bay e skul rorad. Machane kub riyul’ ni ke mul e michan’ rok boch e girdi’ ni bochan e yad be fanay urngin e tayim rorad ni fan e nge yog e tin ni baga’ e skul. Bay e riya’ riy ni ngan lek e skul nib tolang e chiney ni ke chugur e rran rok Jehovah! Be gaar e Bible: “Machane piin ni yad ba adag ni nge yoor e salpiy ngorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma girngiy e girdi’ ko tagan mi yad malog.”​—1 Timothy 6:9.

18. Mang e thingar da nanged ni fan e nge dabi girngiydad e chogowen e chugum?

¹⁸ N’en ni ra ayuwegdad ni nge dab ni girngiydad e chogowen e chugum e aram e nge yog rodad ni ngada nanged e tin nib mat’aw nge tin nib kireb u nap’an ni gad ra turguy ban’en. Rayog ni ngada nanged e n’en nib thil ko mat’aw nge kireb ni faan gad ra fil e machib ni ir e “ggan nib el ni piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:13, 14) Maku ban’en ni ra ayuwegdad ni ngada turguyed ban’en nrogon e ngada “mel’eged e tin ni ir e ba th’abi ga’ fan.”​—Filippi 1:10.

19. Mang e thingar da rin’ed ni faanra ke tamilang u wan’dad nib lich e tayim rodad ni fan ko tirok Got ban’en?

¹⁹ Gowa ra malmit be’ ni faanra un ko chogowen e chugum ya dariy e tayim rok ni fan ko tirok Got ban’en. Uw rogon ni ngada fl’eged i yaliy rarogodad ya nge dab da awgad ko wup ko chogowen e chugum? Thingar da lemnaged u fithik’ e meybil rogon ni nge mom boch e par rodad. Be gaar Solomon ni Pilung nu Israel kakrom: “Ba athibthib e yomol ni be tay e ani tapigpig ni yugu demutrug ko boor ara ba lich e tin ni ra kay; machane fapi chugum rok e ani boor ban’en rok e dabi pag faanem ni nge mol.” (Ecclesiastes 5:12) Ngan ayuweg fapi chugum ni de t’uf rodad e ma fek boor e tayim rodad nge gelngidad, fa? Ya ra yoor ban’en ni fadad ma thingar da fl’eged ara ngada chariyed ara ngada ayuweged. Ra fel’ rogodad ni faanra nge mom boch e par rodad ma ngada paged boch e chugum rodad, fa?

Ngada Fl’eged Rogodad Ngada Pared U Gubin E Kanawo’

20, 21. (a) Mang e ke micheg apostal Peter u morngaagen e rran rok Jehovah? (b) Mang boch e maruwel ni gad ra un ngay ni fan e ngada micheged ni kada fl’eged rogodad kada pared ni fan ko rran rok Jehovah?

²⁰ Ke thumur e tayim u nap’an Noah, ma ku ra thumur e tayim ni fan ko re m’ag ney. I micheg apostal Peter ngodad ni gaar: “Ya chirofen ni Rran rok Somol e bayi taw ni bod rogon ba moro’ro’. Chirofen nem e bay yan nga bayang lan e lang ni be falgar lingan, ma urngin e tin ni bay u lan e lang ban’en ni bayi yik’ nge kireb, ma fayleng nge urngin e tin ni ba’ riy e bay chuw.” Fare lan e lang e be yip’ fan e pi am nib kireb, ma fare fayleng e be yip’ fan e girdi’ nu fayleng ni gathi girdi’ rok Got​—ma dabiyog rok e re lan e lang nem nge re fayleng nem ni nge par ni bochan e dumumuw rok Got. I tamilangnag Peter rogon ni rayog ni ngada fl’eged rogodad ngada pared ni fan ko re rran nem ni gaar: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got, mi gimed athamgiliy nrogon nrayog romed nge papey nge taw ngay!”​—2 Peter 3:10-12.

²¹ Ngada uned ko pi muulung ko Kristiano ma ngada machibnaged fare thin nib fel’ e aram boch e pangiy nib fel’. Ngada uned ko re maruwel nem u polo i gumercha’dad ni gad be sonnag e rran ni baga’ fan ni rran rok Jehovah ni gad be son u fithik’ e gum’an’. “N’umngin nap’an ni gadad be par ni gadad be sonnag e re Ran nem e nguuda athamgiliyed ngada pared ni gadad mmachalbog ma dariy thibngidad u p’eowchen Got ma ngada pired nib aw e gapas u thildad Got.”​—2 Peter 3:14.

Ka Ga Manang?

• Mang fan ni ngada fl’eged rogodad ngada pared ni fan ko rran rok Jehovah?

• Mang e thingar da rin’ed ni faanra ke m’on u wan’dad e tin ni gad ma rin’ ko yu rran?

• Mang e ra ayuwegdad ni nge dab da chuchuwgad?

• Mang boch e ngongol ni ngada paloggad riy, ma uw rogon?

[Pictures on page 10, 11]

De naab e girdi’ u nap’an Noah ni ra yib e gechig​—me gur?

[Picture on page 12]

Rayog ni nge mom boch e par rom ni fan e nge yoor boch e tayim rom ni fan ko tirok Got ban’en, fa?