“Mu Fal’eged Rogomed”—Fare Awa ko Pufthin e Ke Taw!
Thin ni kan weliy ko re article ney e kan fek ko fare babyor ni Keep on the Watch! Ni kan wereg u nap’an fare district convention ni kan tay u ga’ngin yang e fayleng ko duw ni 2004/05.
“Ere mu fal’eged rogomed . . . ya da mu nanged e chirofen ni bay yib e Somol romed riy.”—MATTHEW 24:42.
1, 2. Mang e n’en nib puluw ni i taareb rogonnag Jesus ko wub rok?
MANG e ga ra rin’ nfaanra ga manang ni bay ba moro’ro’ ni be yan ko pi tabinaw ni buguli yoror rom be yan nga naun riy be moro’ro’? Ra ngam ayuweg e piin nib t’uf rom nge pi n’en nib t’uf rom, ma ga ra par ni ga be fal’eg i tiyan’um. Ya moro’ro’ e der ma pi’ e babyor ni nge yog ko mi ngiyal’ e nge yib. Ma yib ni dariy lingan ko ngiyal’ da ni lemnag nra yib.
2 Boor yu ngiyal’, ni i fanay Jesus kanawoen e moro’ro’ ni fanathin. (Luke 10:30; John 10:10) Rogon e pi n’en nra buch ko ngiyal’ ko tomur u m’on ko wub rok ni nge pufthin, me pi’ Jesus e re ginang ney ni gaar: “Ere mu fal’eged rogomed ngam pired, ya da mu nanged e chirofen ni bay yib e Somol romed riy. Mu ted fanmed i yan ko re bugithin ney; faan mang e manang e en ntafen e naun e ngiyal’ nra yib e moro’ro’ riy, ma ra i par ni be od nge dabiyog ni yan e moro’ro’ nga naun rok.” (Matthew 24:42, 43) Ere i taareb rogonnag Jesus e wub rok ko ngiyal’ ni keb ba moro’ro’—ni danir lemnag nra yib.
3, 4. (a) Mang e n’en nib muun ngay ni ngan fol ko ginang ni tay Jesus u murung’agen e wub rok? (b) Mang e deer ni ke bi m’ug?
3 Fare fanathin e ba puluw, ya chirofen nra yib Jesus e dabin nang. Som’on ko re yiiy ney, e gaar Jesus: “Machane re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matthew 24:36) Arfan, ni yog Jesus ko piin ni yad be motoyil ngak ni gaar: “Ngkum pired ni gubin ngiyal’ ni kam fal’eged rogomed.” (Matthew 24:44) Piin kar folgad ko ginang ni tay Jesus, e yugu demtrug e ngiyal’ nra yib ni nge lebguy e Pufthin rok Jehovah ma kar fal’eged rogorad.
4 Ke bi m’ug boch e deer nib ga’ fan ni gaar: Ginang ni tay Jesus e kemus ni fan ngak e girdi’ nu fayleng, fa kub t’uf ko tin riyul’ e Kristiano ni ngar “fal’eged rogorad”? Mang fan nrib t’uf nib gur ni “ngad fal’eged rogodad,” ma mang e n’en nib muun ko re n’ey?
Ba Ginang ni Fan Ngak Mini’?
5. Uw rogon ni gadad manang ni fare ginang ni “ngam fal’eged rogomed” e fan ko tin riyul’ e Kristiano?
5 Rib riyul’ ni wub rok Somol e ra bod rogon ba moro’ro’ ngak e girdi’ nu fayleng, ni kar ninged telrad ko fare ginang ko riya’ nra yib riy? (2 Peter 3:3-7) Machane, uw rogon e tin riyul’ e Kristiano? I yol Paul ngak e piin taareb e michan’ rorad ni gaar: “Ya gimed ma ri gimed manang ni Chirofen ni ir e re Rran rok Somol nem e bay taw ni bod be’ nib moro’ro’ ni yib nnep’.” (1 Thessalonika 5:2) Dariy e maruwar riy u wan’dad ni “rran rok Somol” e bay yib. Machane re n’em e ke achignag feni t’uf rodad ni ngad fal’eged rogodad fa? Mu guy ni pi gachalpen e gaar Jesus ngorad: “Ya en ni Fak e Girdi’ e ra yib u reb e awa ndamur fineyed nra yib riy.” (Matthew 24:44) Buchuuw nga m’on riy, u nap’an ni be yog ngak pi gachalpen ni nguu ra ul’ulgad i gay fare Gil’ilungun, me ginangrad Jesus ni gaar: “Ngam fal’eged rogomed ngam pired, ya en ni Fak e Girdi’ e ra yib u reb e awa ndamur fineyed nra yib riy.” (Luke 12:31, 40) Ere gathi rib tamilang ni bay u wan’ Jesus pi gachalpen u nap’an ni ginangey ni gaar: “Ngam fal’eged rogomed”?
6. Mang fan nib t’uf ni ngad ‘fal’eged rogodad’?
6 Mang fan ni ba t’uf rodad ni ‘ngad fal’eged rogodad’? I weliy Jesus ni gaar: “Bay l’agruw i pumoon ni yow be maruwel u milay’, ma bay ni fek bagayow nge yan, mi ni pag bagayow. Bay l’agruw i ppin ko fen e bil flowa, ni yow be bilig e flowa, ma bay ni fek bagayow nge yan, mi ni pag bagayow.” (Matthew 24:40, 41) Piin ni kar micheged ni kar fal’eged rogorad e “yira fek,” ara ni ayuweg, u nap’an ni yira gothey fare fayleng nib kireb. Boch e girdi’ e “yira pag” nge magothgoth nbochan e ngongol ni fel’ ngak ni yad be lek e tin yad baadag. Pi n’en ney e ra un ngay e piin ni kar nanged e tin riyul’ machane dar fal’eged rogorad.
7. Ra dada nanged e ngiyal’ nra yib e tomur ma mang e rayog ni ngada rin’ed?
7 Bochan ni dan nang ko ri wuin e re rran ni tomren e re m’ag ney e ke pi’ e tayim ngodad ni ngad daged ni gadad be pigpig ku Got u fithik’ e lem nib machalbog. Uw rogon? Ya sana bochan ni tomur e ba dake ke n’uw nap’an ma dawori taw. Ba kireban’ ni nga nog, ya boch e Kristiano ni be lemnag ni aray rogon e kar paged e pasig rorad ko pigpig ku Jehovah ni nge war. Machane, bochan ni kada ognaged gadad, ma dakuriy e tuntun rodad ni ngada pied gadad ngak Jehovah ngada pigpiggad ngak nib fel’ u wan’dad. Piin ni yad manang Jehovah e kar nanged ni nga fini tomur min pasig e dabi fel’ u wan’ Got. Ma guy e lem ko girdi’.—1 Samuel. 16:7.
8. Uw rogon ma t’ufeg ngak Jehovah e ra k’aringdad ni ngad fal’eged rogodad?
8 Bochan ni riyul’ ni rib t’uf Jehovah rodad, ma kad pirieged e bin th’abi ga’ e felfelan’ ni gadad be rin’ e tin nib m’agan’ ngay. (Psalm 40:8; Matthew 26:39) Ma gad baadag ni ngad pigpiggad ngak Jehovah ni manemus. Re athap nem e dabi achig fel’ngin nbochan ni ke n’uw boch nap’an ni kad songad nga nap’an ni gad be lemnag. N’en nib th’abi ga’ fan, e ngad fal’eged rogodad nbochan ni ri gadad be sonnag e n’en nra rin’ e rran rok Jehovah nge lebguy e tin m’agan’ ngay. Fadad yul’yul’ ni ri gadad baadag ni ngad felan’naged Got e ra k’aringdad ni ngad fanayed e fonow ko Thin rok ma gad tay Gil’ilungun ni ir e ba m’on ko yafas rodad. (Matthew 6:33; 1 John 5:3) Ngada lemnaged ko uw rogon ma ngan fal’eg rogoy e bay rogon ko tin ni gad be dugliy ban’en nge rogon ni gad ma par ni gubin e rran.
Uw e Be Sor e Yafas Rom Ngay?
9. Mang fan nib t’uf ni nge gur e girdi’ ko fayleng ni ngar nanged fan e ngiyal’ rodad ney?
9 Boor e girdi’ e chiney e kar nanged ni magawon ni ba gel nge bogi n’en ni be buch ni yibe gin ngay e be m’ug ni gubin e rran, ma sana dab ra adaged e gin ni be sor e yafas rorad ngay. Machane, gur yad manang e bin riyul’ i fan rarogon e fayleng? Gur yad manang ni gad be par ko “tomur ko tin nib kireb ban’en”? (Matthew 24:3, NW) Gur yad manang ni fel’ ngak, nge bugel ni be buch, nga ki mada’ ko ngongol ni dubun Got e aram e pow ko ngiyal’ ney ni “tin tomuren e rran”? (2 Timothy 3:1-5) Rib t’uf ni ngar gurgad ni ngar nanged fan urngin e pi n’en ney ma ngar lemnaged e gin be sor e yafas rorad ngay.
10. Mang e thingar da rin’ed ni nge mudugil ni kad fal’eged rogodad?
10 Ma uw rogodad? Urngin e rran ma gad be pirieg e lem nib muun ngay e gin ni ngada maruwelgad riy, nge rogon ni nge fel’ fithik’ i dowdad, nge tabinaw rodad, nge rogon e liyor rodad. Gad manang e n’en ni be yog e Bible, ma gad be athamgil ni ngad folgad riy. Ere arfan, nib fel’ ni ngad fithed gadad ni nge lungudad: ‘Kug pag e magafan’ ko yafas ke pieg nga wuru’ e kanawo’ fa? Kug pag e llowan’ ko fayleng nge rogon ni ma lem, ni nge dugliy e n’en ni nggu mel’eg?’ (Luke 21:34-36; Kolose 2:8) Ba t’uf ni ngad ul’ulgad i dag ni be pagan’dad ngak Jehovah u polo’ i gum’irchadad ma dadi torgad ko tin ni gadad manang. (Proverbs 3:5) Ra aram rogon, ma gad ra par ni kada “chichiiyed pa’dad ko bin riyul’ e yafas”—yafas ni manemus u lan e fayleng rok Got nib beech.—1 Timothy 6:12, 19.
11-13. Mang e gad ra fil ko n’en ni buch (a) u nap’an Noah (b) ngu nap’an Lot?
11 Fare Bible e boor rogon e ginang ni bay riy nrayog ni nge ayuwegdad ni ngad pired ni kad fal’eged rogodad. Mu lemnag e n’en ni buch ko rran rok Noah. Ka aram nga m’on riy, me guy rogon Got ni nge mudugil ni kan pi’ e ginang. Ma girdi’ ni gathi gothon e tabinaw rok Noah, e dar motoyilgad. (2 Peter 2:5) Bochan e re n’ey, me gaar Jesus: “Ra bod e n’en nrin’ ko fa ngiyal’ i n’em nnap’an Noah. Ni bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e Girdi’ riy.” (Matthew 24:37-39) Mang e gad ra fil ko re n’ey? Faanra bay boch i gadad ni nge pag e magafan’ ko tin nu fayleng—ni mus ko tin ni yima rin’—ni nge magawonnagdad ko maruwel rok Got ni ireray e n’en ni ke yog ni nge par nib m’on ko yafas rodad, mab t’uf ni ngarda fal’eged i lemnag rarogodad.—Roma 14:17.
12 Maku, mu lemnag e n’en ni buch u nap’an Lot. Fare mach ni Sodom, ni ir e gin ni ma par Lot nge tabinaw rok riy ni boor ban’en riy machane ke sug ko ngongol nib kireb. I l’og Jehovah e engel rok ngar gotheyew e re binaw nem. Me yog e gali engel nem ngak Lot nge tabinaw rok ni ngar chuwgad u Sodom ma dab ra sapgad nga tomur. Kar paged fare mach nbochan e thin ni ke yog e engel. Machane, leengin e i par ni be lemnag e naun rok u Sodom. De fol ko thin ni ka nog ngorad, me sap nga tomur, me yim’. (Genesis 19:15-26) I ginangey Jesus ni gaar: “Dab mpaged talin e ppin rok Lot!” Gur, gad be ngongol nib puluw ko re thin nem?—Luke 17:32.
13 Piin ni kar folgad ku Got u nap’an ni ke ginangrad kakrom e kar mageygad nib fas. Ireray e n’en ni buch rok Noah nge tabinaw rok nge Lot nge gali fak ni ppin. (2 Peter 2:9) Gad ra fal’eg i lemnag e thin ni ka nog ngorad, maku arrogodad ni ra athamgil lanin’dad nbochan fare thin ko ngan chuwegey ko gafgow ni bay riy ni fan ko piin nib mat’aw. Re n’em e ra ayuwegdad ni nge gel e pagan’ rodad ni bayi lebug fare n’en ni ke micheg Got ni “bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy.”—2 Peter 3:13.
‘Ngal’an e Pufthin e Ke Taw’!
14, 15. (a) “Fare ngal’an” e pufthin e ba muun ngay e mang? (b) Mang e ba muun ko ‘nge yib madgun Got min pining e sorok ngak’?
14 Nap’an ni gad ra fal’eg rogodad, ma mang e rayog ni ngad athapeged? Fare babyor ni Revelation e be dag ko uw rogon ni nge lebug e tin nib m’agan’ Got ngay ni reb nge reb. Ngan ngongol nib puluw ko tin ni be yog e baga’ fan ma rayog ni ngad daged ni kada ted talpedad. Fare yiiy e be weliy nib tamilang e tin ra buch u nap’an “fare rran rok Somol,” ni tabab u nap’an ni kan ta’ Jesus nga tagil’ u tharmiy ko duw ni 1914. (Revelation 1:10) Fare Revelation e be fal owchedad nga ba engel ni ir e kan pag fan ngak fare “Thin nib Fel’ ni nge weliy ngak e girdi’ nu fayleng.” Me non nib ga’ laman ni gaar: “Nge yib madgun Got ngomed, mi gimed ta’ fan nga feni sorok! Ya ke taw nga nap’an ni nge pufthinnag e girdi’.” (Revelation 14:6, 7) “Ngal’an” e pufthin e ba ngoch nap’an; ni ba muun ngay ngal’an ni yibe weliy murung’agen nge ngal’an ni nge yib e gechig nrogon ni dag e re yiiy nem. Ri ireray e tayim ni gad be par riy e chiney.
15 Chiney, u m’on ni nge taw nga tungun ngal’an e pufthin, ma kan fonownagdad kan gaar: “Nge yib madgun Got ngomed, mi gimed ta’ fan nga feni sorok!” Mang e ba muun ngay? Madgun Got nib fel’ e susun ni nge k’aringdad ni ngad paloggad ko tin nib kireb. (Proverbs 8:13) Gad ra pining e sorok ngak Got, ma ngada motoyilgad ngak ni gad be tayfan nib gel. Ma ngauda beeged e Thin rok, ni fare Bible, u gubin ngiyal’. Dab da dariyfannaged e fonow rok ni ngauda uned ko muulung ko Kristiano. (Hebrews 10:24, 25) Ngada ted fan fare maruwel ni ngan machibnag fare thin nib fel’ ko Gil’ilungun Kristus min un ngay u fithik’ e pasig. Ngauda pagedan’dad ngak Jehovah u gubin ngiyal’ nge polo’ i gum’irchadad. (Psalms 62:8) Bochan ni gad manang ni Jehovah e ir e Th’abi Tolang u Palpalth’ib, ma ngada daged ni ri gad be fol ko thin rok ya ri gad be tay fan. Gur, riyul’ ni bay madgun Got u wan’um ma ga be pining e sorok ngak u gubin e kanawo’?
16. Mang fan ni rayog ni ngad dogned ni fare pufthin ni fan ko fare Babylon nib Gilbuguwan nrogon ni yog ko Revelation 14:8 e ke lebug?
16 Revelation guruy ni 14 e ku be weliy boch ban’en nra buch u nap’an ngal’an e pufthin. Fare Babylon nib Gilbuguwan, ni aram e pi yurba’ i teliw ni googsur, e kan weliy ko som’on murung’agen ni gaar: “Me lek e bin migid e engel tomren fa bin som’on ni be gaar, ‘Ke war! Fare binaw nu Babylon nib gilbuguwan e ke war!’” (Revelation 14:8) Arrogon, u rogon ni be changar Got, e ke war fare Babylon nib Gilbuguwan. U lan e duw ni 1919, ma pi tapigpig rok Jehovah ni kan dugliyrad e da ku ura folgad ko fapi machib nge tin ma rin’ fare Babylon, ni ireray e n’en ni ke gagiyegnag girdien e pi nam u lan bokum biyu e duw. (Revelation 17:1, 15) Ere rayog ni ngar fanayed e yafas rorad ngar mon’eged e liyor nib riyul’. Ka nap’an e ngiyal’ nem ma kan rin’ fare maruwel ni ngan wereg fare thin nib fel’ ko Gil’ilungun Got u ga’ngin yang e fayleng.—Matthew 24:14.
17. Mang e ba muun ngay ni ngan chuw ko Babylon nib Gilbuguwan?
17 Gathi kemus e n’en ni bay ko pufthin rok Got ni fan ko fare Babylon nib Gilbuguwan. Ke chuchugur ni ngan thang. (Revelation 18:21) Rib puluw, ni be fonownag e Bible e girdi’ u gubin yang ni gaar: “Mired pi girdieg ngam chuwgad rok [Babylon nib Gilbuguwan] . . . ya thingar dab mu uned ko gechig ni bay nta’ ngak!” (Revelation 18:4, 5) Uw rogon ni ngad chuwgad ko Babylon nib Gilbuguwan? Gathi kemus ni dab kun chag ko teliw ni googsur. Ngongolen e Babylon ni rayog ni nge af ngodad e ku bay u boor e madenom ni ri yi ma rin’ nge yalen, ngu lan e fayleng ni yima pag ngan rin’ e ngongol ko darngal, nge rogon ni yima m’oneg e fafel ara entertainment nib muun ngay e pig, nge ku boch ban’en. Rogon ni ngad fal’eged rogodad, e baga’ fan ni ngongol nge tin baadag gum’irchadad, e ngad micheged riy ni riyul’ ni gadad be par nib dar ko Babylon nib Gilbuguwan u gubin e kanawo’.
18. Bochan e n’en ni yibe weliy ko Revelation 14:9, 10, ma pi Kristiano ni yad be par nib od ko tirok Got e ri yad ma pilo’ ko mang?
18 Thin ni bay ko Revelation 14:9, 10, e ku kan weliy boch ban’en u murung’agen ‘fare rran ko pufthin’. Reb e engel e be gaar: “En nra ta’ fan me meybil ngak fare gamanman nge yaan ni kan ngongliy nliyos me thapeg fare pow nga daken peri’ ara nga daken e rifrif u pa’, e ir e ra unum e wain rok Got, ni wain ko damumuw rok.” Mang fan? “Fare gamanman nge yaan ni kan ngongliy nliyos” e be yip’ fan e gagiyeg rok e girdi’, ni der ma tayfan e gagiyeg rok Jehovah nth’abi tolang. Pi Kristiano ni yad be par nib od ko tirok Got e yad ma kol ayuw ni dabi gagiyegnagrad e piin ni darur ted fan e gagiyeg nth’abi tolang rok Jehovah ni bin riyul’ e Got ko lem nge ngongol rorad. Pi Kristiano e kar nanged ni kan sunumiy fare Gil’ilungun Got u tharmiy, ma ra thang urngin e gagiyeg rok e girdi’, ma ra par ndariy n’umngin nap’an.—Daniel 2:44.
Dab Mu Lemnag ni Kab Palog e Tomur!
19, 20. (a) Nap’an ni gad be chuchugur i yan ko tomur ko tin tomren e rran, dabisiy ni nge rin’ Satan e mang? (b) Mang e thingar da rin’ed?
19 U nap’an ni gad be chuchugur i yan ko tomur ko tin tomren e rran, ma ra yoor i yan e magawon nge tin ma wawliy lanin’dad. U nap’an ni ka gad be par ko re m’ag n’ey ni ke kakrom ma kad gafgowgad nbochan ni daworda flontgad, ma ka ma yib ngodad e magawon ni bod e m’ar, nge pilibthir, ma ma yim’ e piin nib t’uf rodad, ma yima amithnag lanin’dad, ma ma mulan’dad u nap’an ni bay e girdi’ ni ma dariyfannag e maruwel ni gad ma machibnag e Thin rok Got, nge kub boch ban’en. Dab mu pag talin ni ri baadag Satan ni nge fanay boch e magawon ndab kuuda machibnaged fare thin nib fel’ ara nge dab kuuda pared ni gad be fol ko motochiyel rok Got. (Efesus 6:11-13) Gathi ireray e tayim ni ngad lemnaged ni gad be par ko tayim ni kab palog e tomur!
20 Manang Jesus ni boor e magawon ni ra yib ngodad ni nge k’aringdad ngad talgad ko pigpig ku Got, ere ke fonownagdad ni gaar: “Ere mu fal’eged rogomed ngam pired, ya da mu nanged e chirofen ni bay yib e Somol romed riy.” (Matthew 24:42) Ere, ngada tedan’dad ngauda nanged e gin gad bay riy ko tayim. Ngada kol ayuwgad nga boch ban’en ni ma fanay Satan ni nge warnagdad ko thin riyul’ ara ngada talgad. Ngada dugliyed u lanin’dad ni ngada machibnaged fare thin nib fel’ ko Gil’ilungun Got u fithik’ e pasig ngu fithik’ e yul’yul’. Ngarda tedan’dad ni gad be fol ko thin rok Jesus ni be ginangey ni gaar: “Mu fal’eged rogomed.” Gad ra rin’ ni aram rogon, ma gad be pining e sorok ngak Jehovah ma gad ra un ko girdi’ ni bay e athap rorad ni nge yog ngorad e pi flaab ndariy n’umngin nap’an.
Uw Rogon ni Ngam Pi’ e Fulweg
• Uw rogon ni ngad nanged ni thin ni ke yog Jesus ni ‘ngan fal’eg rogoy’ e fan ko tin riyul’ e Kristiano?
• Mang boch ban’en u Bible e rayog ni nge ayuwegdad ni ngada “fal’eged rogodad”?
• Mang fare rran ko pufthin, ma mang e kan fonownagdad ni ngad rin’ed u m’on ni nge mus?
[Picture on page 5]
Ke taareb rogonnag Jesus e wub rok nga ba moro’ro’
[Picture on page 6]
Ke chuchugur ni ngan gothey fare Babylon nib Gilbuguwan
[Pictures on page 7]
Ngada dugliyed u lanin’dad ni ngad machibgad u fithik’ e pasig ngu fithik’ e yul’yul’