“Mu Tedan’med Ko Matanag”!

“Ere fapi n’en ni ku gog ngomed e ku gog ngomed ni gimed gubin, ni aram e be lungug: Mu tedan’med ko matanag.”​—MARK 13:37.

1, 2. (a) Mang e ke fil reb e pumoon u rogon ni nge ayuweg e chugum rok? (b) Fare fanathin ni weliy Jesus u murung’agen fare moro’ro’, ma mang e kada filed riy ni ngan par nib od?

KE chaariy Juan e chugum rok nib tolang puluwon u lan e naun rok. Ke tay e pi n’em u tanggin e bet rok​—nrogon ni be lemnag ni ireray e gin u lan e naun rok nri dabiyog ni ngan iring ban’en riy. Machane, reb e nep’ ko ngiyal’ ni ir nge ppin rok e yow be mol, me yib reb e moro’ro’ me yan nga lan e singgil rorow. Ba tamilang, ni fare moro’ro’ e ri manang ko u uw e nge yan nge gay ban’en riy. Ke chuweg urngin e chugum nib tolang puluwon u tan fare bet nib sasaf’og nib muun ngay fare salpiy ni ke pag Juan u lan fare drawer ko fare table ni bay u tooben fangi bet. Bin migid e rran ni kakadabul, me nang Juan ni kan iring boch ban’en. Dabi pagtalin e n’en ni buch rok ni ke amithnag laniyan’ ni ke fil boch ban’en riy ni: Be’ ni be mol e dabiyog ni nge ayuweg e chugum rok.

² Taareb rogon ko tirok Got ban’en. Dabiyog ni ngad ayuweged e athap rodad nge michan’ rodad nfaanra gadad be mol. Arfan, ni pi’ Paul e fonow ni gaar: “Ere dab ud molod ni bod boch e girdi’; ya nguud pired ni gadad be od ma ba tamilangan’dad.” (1 Thessalonika 5:6) Dag Jesus rogon feni ga’ fan ni ngan par nib od, ni weliy reb e fanathin u murung’agen be’ nib moro’ro’. I weliy murung’agen e n’en ni ra buch ma tomur riy e ra yib ni ir e Tapuf Oloboch, me ginangey ni gaar: “Ere mu fal’eged rogomed ngam pired, ya da mu nanged e chirofen ni bay yib e Somol romed riy. Mu ted fanmed i yan ko re bugithin ney; faan mang e manang e en ntafen e naun e ngiyal’ nra yib e moro’ro’ riy, ma ra i par ni be od nge dabiyog ni yan e moro’ro’ nga naun rok. Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.” (Matthew 24:42-44) Be’ ni moro’ro’ e dabiyog u m’on ko wuin e ra yib. Be athapeg ni ngeb ni dariy be’ ni manang. Taareb rogon ko thin ni ke yog Jesus ni, fare tomur ko re m’ag ney e ra taw ko fare ‘awa ni dad lemnaged ni ngeb riy.’

“Mu Par ni Ga Be Od, Mu Par nib Mudugil e Michan’ Rom”

3. Nap’an ni weliy Jesus reb e fanathin u murung’agen fapi sib ni yad be sonnag ni nge sul e masta rorad u ba madenom ko mabgol, ma uw rogon ni dag nib ga’ fan ni ngan par nib od?

³ Fapi thin ni bay ko fare Gospel rok Luke, e i taarebnag Jesus e piin Kristiano ko fapi sib ni yad be sonnag e masta rorad ni nge sul u ba madenom ko mabgol. Ba t’uf ni nguura pared ni yad be tayan’rad ma nap’an ni ra taw ma yad ba od ma bay rogorad ni ngara ayuweged e cha’ nem. Ma taareb rogon kanawoen ni yog Jesus ni gaar: “En ni Fak e Girdi’ e ra yib u reb e awa ndamur fineyed nra yib riy.” (Luke 12:40) Piin ni kara pigpiggad ku Jehovah u lan boor e duw e rayog ndabkuura lemnaged ni gad be par ko ngiyal’ ni dabni adbey e tayim. Rayog ni ngar lemnaged ni dawori chuchugur ni ngeb e tomur. Machane ireray e lem ni ra fekdad ko gin nib palog ko tirok Got ban’en ma gad be chuchugur iyan ko lem ni ngan yoornag e chugum, nra magawonnagdad ma ra yib e chuchuw ngodad ko tirok Got.​—Luke 8:14; 21:34, 35.

4. Mang e susun ni nge mich u wan’dad ma aram e n’en nra gelnagdad ni ngad tiyan’dad ko matanag, ma uw rogon ni dag Jesus e re n’en ney?

⁴ Rayog ni ngad filed yugu ban’en ko fare fanathin ni weliy Jesus. Yugu aram rogon ni de nang fapi sib fare awa nra yib fare masta rorad riy, ma ba tamilang ni yad manang fare nep’ nra yib riy. Susun mo’maw’ ni ngar pared nib od ko re nep’ nem nfaanra ur lemnaged ni masta rorad e ra yib u yugu reb e nep’. Machane danga’, ya yad manang ko bin ngan e nep’ e ra yib, ma aram e n’en ni ngari ayuwegrad ni nguur pared nib od. Taareb rogon ko thin nu Bible ni kan yiiynag ni be dag ni gad be par ko tin tomren e rran; machane darogned ngodad fare rran ara awa ni ngari yib e tomur riy. (Matthew 24:36) Bochan ni ba mich u wan’dad ni ba yib fare tomur ma aram e n’en ni be ayuwegdad ni ngad pared ni gad ba od, machane faanra kari l’agan’dad ngay ni kari chuchugur fare rran rok Jehovah ma ri bay gelngidad ni ngad tedan’dad ko matanag.​—Zefaniah 1:14.

5. Uw rogon nrayog ni ngad folgad ko fonow ni pi’ Paul ni “ngan par nib od”?

⁵ I yoloy Paul ngak piyu Korinth me fonownagrad ni gaar: “Mu pired ni gimed ba od, mu pared ni ba mudugil e michan’ romed.” (1 Korinth 16:13, NW) Arrogon, ngan par nib od e ba peth ko ngan par nib mudugil e michan’ rodad ni gadad e Kristiano. Uw rogon ni ngada pared ni gadad ba od? Ngan yoornag e tamilangan’ ko Thin rok Got. (2 Timothy 3:14, 15) Fol Bible ni goo gadad nib yaram ma nguuda uned ko muulung ni gubin ngiyal’ e ra ayuweg ni nge gel e michan’ rodad, ma uda lemnaged ni ke chuchugur fare rran rok Jehovah e aram bang ko michan’ rodad nib ga’ fan. Ere ngad ted e tayim ni ngad sulod nga daken fapi Thin nu Bible ni be dag ni gad be par ko tayim ni ke chuchugur ko tomur ko re m’ag ney ma ra ayuwegdad ni dabda paged talin e tin riyul’ ko tomur ni be yib.a Maku ffel’ ni ngan tiyan’uy ko tin ni be buch ni be lebuguy fapi yiiy u lan e Bible. Reb e walag u Chiyamen e ke yoloy ni gaar: “Gubin ngiyal’ ni gu ra yaliy fare news​—ni murung’agen e mahl, nge duru’, nge cham, nge fayleng rodad ni kan alitnag—​ma be tamilangnag lanin’ug nga feni kari chuchugur fare tomur.”

6. Uw rogon ni dag Jesus nrayog ni dabkun par nib od ko tirok Got u tomren ni ke yan boch e tayim?

⁶ U Mark guruy ni 13, e gad ra pirieg yugu reb e chep ni i fonownag Jesus fapi gachalpen ngay ni ngar pared nib od. Rogon ni yog e re guruy ney, e i taarebnag Jesus e par rorad ko en ni ma matanagiy e mab ni be sonnag ni nge sul e masta rok ko milekag u bayang. En ni ma matanagiy e mab e de nang fare awa ni nge sul e masta rok. Thingari tiyan’ ko matanag. I weliy Jesus murung’agen aningeg e matanag u nap’an ni ra taw fare masta. Fa bin aningeg e matanag e ke tabab ko sogonapan dalip e klok ni kakadabul nge mada’ ko ngiyal’ ni ke m’ug e yal’. Nap’an e bin tomur e matanag, ma kari mom ni ngeb e chuchuw ngak e en ni ma matanagiy e mab. Ka nog ni, fapi salthaw e ma yog ni fare awa u m’on ko madadbiy e aram e bin th’abi fel’ e tayim ni ngan kol e toogor ni dabi nang. Taareb rogon ko re awa ney ni tomur, ni girdi’ nu fayleng ni bay u toobdad e yad be mol nib fel’ rogon, ma sana rib t’uf ni ngad athamgilgad ni ngad pared nib od. (Roma 13:11, 12) Ma arfan ni nap’an ni weliy Jesus e fanathin rok, me suludaken ni be fonownagey ni gaar: “Mu ayuwgad mi gimed tiyan’med . . . Ere mu tedan’med . . . Ere fapi n’en ni ku gog ngomed e ku gog ngomed ni gimed gubin, ni aram e be lungug: Mu tadan’med ko matanag.”​—Mark 13:32-37.

7. Mang riya’ e riyul’ ni ba’, ma bochan e re n’en ney, ma mang fonow e gad ma bieg u lan e Bible?

⁷ Boor yay u nap’an ni be un Jesus i wereg e machib nge tomren ni kan faseg ko yam’, ni ke k’aring ni ngan tiyan’uy ko matanag. Riyul’, ke chuchugur ni urngin yay ni be weliy e Thin nu Bible u murung’agen e tomur ko re m’ag ney, ma rayog ni ngad guyed ni yibe ginangey ni ngan par nib od ara ngan tiyan’uy ko matanag.b (Luke 12:38,  40; Revelation 3:2; 16:14-16) Ba tamilang, ni chuchuw ko tirok Got e rib gel e riya’ riy. Ba t’uf rodad ni gadad gubin e thin ni be ginangdad!​—1 Korinth 10:12; 1 Thessalonika 5:2, 6.

Dalip e Apostal ni De Yog Rorad ni Nguur Pared nib Od

8. U lan fare milay’ nu Gethsemane, mang e ke rin’ fa dalip i apostal rok Jesus ko thin ni ke yog ngorad ni ngar tiyan’rad ko matanag?

⁸ Rogon ni ngan par nib od e gathi ke mus ni lem nib fel’ e ba t’uf riy, nrogon ni kad guyed ko tin ni rin’ Peter, nge James, nge John. Yad dalip pumoon ni bay e kan ni thothup rorad ni ur folgad ku Jesus u fithik’ e yul’yul’ ma rib t’uf rorad. Yugu aram rogon, u nap’an fare nep’ ko Nisan 14, 33 C.E., ma de yog rorad ni nguur pared nib od. Fa dalip i apostal e kar uned ngak Jesus kar chuwgad ko fare singgil ko thal ni lang ni aram e gin ni kar madenomnaged fare Paluk’af riy, mi yad yan ko fare milay’ nu Gethsemane. U rom e gaar Jesus ngorad riy: “Taganan’ ni keb ngog e rib ga’ ni be chuchugur ni nge lieg. Mpired u roy nguum uned ngog ko mood.” (Matthew 26:38) Dalip yay ni i meybil Jesus nib gel ngak e Chitamangin nu tharmiy, ma dalip yay ni ke sul ngak e pi fager rok me pirieg ni yad be mol.​—Matthew 26:40, 43, 45.

9. Baga’ ni, mang fan ni keb e chuchuw ngak fapi apostal?

⁹ Mang fan ni fa dalip i pumoon nib yul’yul’ e kar kireban’naged Jesus ko re nep’ nem? Bochan kara magargad. Ke n’uw e nep’, sana ke pag lukngun e nep’, ma “dakir yog ni ngar pired nib puf owcherad”. (Matthew 26:43) Yugu aram rogon, me yog Jesus ngorad ni gaar: “Um odgad nguum meybilgag ngak Got, nge siy mpaged gimed ngak e pi n’en ni ma pingeg e girdi’ nge denen. Ya lanin’uy e ba adag, ma dowef e mmeewar.”​—Matthew 26:41.

10, 11. (a) Yugu aram rogon ni ke magar Jesus, ma mang e n’en ni ke ayuweg ni nge par ni ba od u lan fare milay’ nu Gethsemane? (b) Mang e gad ra fil ko n’en ni buch ko fa dalip i apostal u nap’an ni ning Jesus ngorad ni ngar pired ni yad ba od?

¹⁰ Dariy e maruwar riy, ni ku ke magar Jesus e re nep’ i n’em. Machane, de mol ya ke fanay e re tayim nem ni kab puf rogon ni nge p’eyniy e meybil. In e rran u m’on riy, mi fonownag fapi gachalpen ni ur meybilgad ni gaar: “Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed mi gimed yan mu sak’iygad nga p’eowchen e en Fak e Girdi’.” (Luke 21:36; Efesus 6:18) Faan gad ra fol ko fonow ni pi’ Jesus’ ma gad fol ko meybil ni tay nib fel’ rogon, ma rayog ni nge ayuwegdad e meybil rodad ngak ni yib u gum’irchadad ni ngad pared nib od ko tirok Got.

¹¹ Riyul’, ni ke nang Jesus​—ma dawori nang pi gachalpen ko ngiyal’ nem—​ni dabki n’uw nap’an min kol min li’ ngem’. Tomur ko skeng ni keb ngak e yira tining nga baley e gek’iy nrib gel e amith riy. Ke m’ay i ginang rok Jesus fapi apostal u murung’agen e pi n’en ney, machane dar nanged fan e n’en ni ke yog. Ma arfan, ni kar molod u nap’an ni be par nib od ni be meybil. (Mark 14:27-31; Luke 22:15-18) Taab rogodad ko fapi apostal, ni dowef rodad e ba meewar ma bay boch ban’en ni daworda nanged. Machane, faanra dabiyog ni ngad guyed ni gad be par ko re tayim ney ni thingarda rin’ed ban’en nib gur, ma aram rayog ni ngada molod ko tirok Got. Kemus nfaanra gad be tedan’dad ma rayog ni ngad pared ni gad ba od.

Dalip Felngin nib Ga’ Fan

12. Mang dalip felngin ni ke puthuy Paul ko ngan par ni yibe tiyan’uy?

¹² Uw rogon me yog ni par e lem rodad ni nga i gur i rin’ ban’en? Kad guyed nib ga’ fan e meybil ma nge par e rran rok Jehovah u lanin’dad. Maku, be weliy Paul murung’agen dalip i felngin ni thingarda ubunged. Be gaar: “Ma gadad girdien e rran, ni aram fan ni nguud pired ni gadad ba tamilang ma nga don’ed nga dakendad e michan’ rodad ni bod fa gi wasey ni ma upunguy e salthaw ngongoren ngay nge t’ufeg nge fare urwech ni aram e athap ni ngan thap ngak Got.” (1 Thessalonika 5:8, NW) Ngad lemnaged buchuw e maruwel ko michan’, nge athap, nge t’ufeg ni fan e ngad pired ni gad ba od ko tirok Got.

13. U uw e nge maruweliy e michan’ rodad ma rayog ni ngad pared ni gadad be tiyan’dad?

¹³ Thingari yog ngodad e michan’ nib mudugil ni ba’ Jehovah ma “ra taw’athnag e piin ni yad be gayiy.” (Hebrews 11:6, NW) Bin som’mon, ni ke lebug ko yiiy rok Jesus u murung’agen e tomur ko fa bin som’mon e chibog e ke gelnag e michan’ rodad ni kura lebug e pi n’en ney nib gel ko ngiyal’ ney. Ma michan’ rodad e ra ayuwegdad ni ngarda sonniged fare rran rok Jehovah, ni ke mudugil u lanin’dad ni “[fare yiiy] e bayi m’ug nib riyul’ ndabi sowath.”​—Habakkuk 2:3.

14. Uw rogon ma athap e baga’ fan nfaan gad ra par ni gadad ba od?

¹⁴ Athap nib mudugil e taareb rogon nga “ba yuluy ko fare yaal” nra ayuwegdad ni ngad kadedan’dad ko gafgow nyugu aram rogon nib t’uf ni ngad sonniged ni nge lebug e tin ni ke micheg Got. (Hebrews 6:18, 19) Margaret, ni reb e walag ni ppin ni kan dugliy ni ke 90 e du w rok ma kan taufenag ni ke pag 70 e duw ni ke yan e i yog ni gaar: “Nap’an ni ke chuchugur ni ngem’ e pumoon rog ko cancer ko duw ni 1963, ma kug lemnag ni rib fel’ nfaara yib fare tomur nib papey. Machane chiney e kug nang ni baga’ ni kug lemnag e n’en ni ra fel’ rogog riy. Ngiyal’ nem e dawor da nanged ko u uw ra taw fare maruwel rodad ngay u fayleng ni polo’. Mus ko chiney, ma ka bay boch e binaw ni kafin i tabab fare maruwel rodad riy. Ere gu be felfelan’ ni ke n’uwnag Jehovah e gum’an’ rok.” Ke micheg Paul ni apostal ngodad ni gaar: “Kadan’ e ma [fal’egdad] u wan’ Got, ma fel’ u wan’ ni gadad ma tay e ma yognag e l’agan’ ngodad. Re l’agan’ ney e dabi m’ing lanin’dad riy.​—Roma 5:3-5.

15. Uw rogon ni ra gelnagdad e t’ufeg ni yugu aram rogon ni gowa ke yan e tayim nib n’uw nap’an ni gad be sonnag ban’en ni ngeb?

¹⁵ T’ufeg rok e Kristiano e ir e felngin ni rib gagiyel ya bochan e ir e def ko urngin ban’en ni gad ma rin’. Gad ra pigpig ku Jehovah ya ba t’uf rodad, ndemtrug e tayim ni ke dugliy ni nge rin’ ban’en riy. T’ufeg ko piin buguli yoror rodad e be k’aringdad ni ngad machibnaged fare thin nib fel’ u murung’agen Gil’ilungun, ndemtrug n’umngin nap’an nib m’agan’ Got ngay ni ngad rin’ed e re maruwel ney nge feni yoor yay ni ngad sulod nga reb e tabinaw. Rogon ni yoloy Paul ni, “dalip ban’en ni ra par ni aram e athap, nge michan’, nge t’ufeg, machane t’ufeg e ir e bin th’abi ga’ fan riy.” (1 Korinth 13:13) T’ufeg e be ayuwegdad ni ngad kadedan’dad ma be ayuwegdad ni ra par ni gad ba od. “[T’ufeg] e ma athapeg urngin ban’en, ma ma kadan’ ko urngin ban’en. T’ufeg e dabi war.”​—1 Korinth 13:7, 8.

“Mu Chichiiy Paam ko N’en ni Bay Rom”

16. Bochan dabda paged ni ngad malmalgad, mang ngongol e susun ni ngad maruweliyed?

¹⁶ Gad be par ko re tayim ney nib ga’ fan ma tin ni be buch u fayleng e ma puguran ngodad ni gad bay ko tungun e tin tomren e rran. (2 Timothy 3:1-5) Chiney e gathi ireray e tayim ni ngad malmalgad ya ireray e tayim ni ngad ‘ayuweged e n’en ni bay rodad.’ (Revelation 3:11) Ma aram e “ngam kol ayuw ngam meybil” ma ngam maruweliy nge gel e michan’, nge athap, nge t’ufeg rom ma ngad daged ni kad fal’eged rogodad ko ngiyal’ nra yib e skeng. (1 Peter 4:7) Bay boor e maruwel rok Somol ni thingarda rin’ed. Gad ra par ni boor e maruwel rodad ko pigpig ku Got ma ra ayuwegdad ni ngarda pared ni gad ba od.​—2 Peter 3:11.

17. (a) Mang fan ni thingar dabi mulan’dad nbochan yu ngiyal’ de yib e n’en ni gad be sonnag? (Mu guy fare kahol ni bay ko page 29.) (b) Uw rogon ni ngad folwokgad rok Jehovah, ma mang flaab e be sonnag e piin ni ngar yodoromgad?

¹⁷ I yoloy Jeremiah ni gaar, “Jehovah e ir e foth rog,” me ulul ngay ni gaar, “ma arfan ni gu be sonnag. Jehovah e ba fel’ ngak e en ni be l’agan’ ngak, nge fare yaal ni ma gay Got. Ffel’ e en nra sonnag e ayuw rok Jehovah ni ke thab gulungan.” (Lamentations 3:24-26, NW) Boch i gadad e be son ndawori n’uw nap’an. Ma boch e girdi’ e ke yan boor e duw ni yad be sonnag nra ayuwegrad Jehovah ngar thapgad ngak. Machane, uw feni ngoch nap’an e re tayim ney nfaanra ngan taarebnag ko tayim ni bay yib ndariy n’umngin nap’an! (2 Korinth 4:16-18) Ma ngiyal’ ni gad be sonnag e tayim ni ke dugliy Jehovah, rayog ni ngad maruweliyed ni nge yog ngodad boch fapi felngin e Kristiano nib ga’ fan ma ngad ayuweged yugu boch e girdi’ ni ngara rin’ed ban’en u nap’an ndawori m’ay e gum’man’ rok Jehovah ma ngar folgad ko tin riyul’. Ere yibe athapeg ni ngad tedan’dad ko matanag ni gadad gubin. Ngad folwokgad rok Jehovah ma ngad gum’an’gad, ma ngad pininged e magar ko fare athap ni ke pi’ ngodad. Ma nap’an ni gad be par nib od u fithik’ e yul’yul’, manga yigi uda chichiiyed pa’dad ko fare athap rodad ni yafas ni manemus. Ma aram, pi yiiy ney ni be micheg ban’en e ra riyul’ ngodad ni gaar: “[Jehovah] ra tolangnigem ma ga tafanay e fayleng. U nap’an ni yira thang e piin nib kireb, ma ga ra guy.”​—Psalm 37:34, NW.

[Footnotes]

Uw Rogon ni Ngam Pi’ e Fulweg?

• Uw rogon ni gelnaged e michan’ rodad ni fare tomur ko re m’ag ney e ke chuchugur?

• Mang e n’en ni yira fil ko n’en ni rin’ Peter, nge James, nge John?

• Mang dalip e felngin ni ra ayuwegdad ni ngad tiyan’dad ko matanag ko tirok Got?

• Mang fan ni ireray e tayim ni ‘nguuda chichiyed pa’dad ko tin ni bay rodad’?

[Box/Picture on page 29]

“Nge Felan’ e En Be Par ni Be Sonnag Ban’en.”​—Daniel 12:12

Susun en ni ma matanag e be sananag ni be lem reb e moro’ro’ ni nge iring boch ban’en u naun ni be matanagiy. Nap’an ni nep’, ma fa cha’ ni ma matanag e ri be motoyil nga urngin ban’en nra chub ni be dag ni keb fare moro’ro’. Urngin e awa ma be athamgil ni nge motoyil nga ban’en me guy nib fel’ rogon. Mom ni ngan nang ko uwrogon ni ra oloboch u ban’en ni gathi ir ya lingan e nifeng ni be aw ko gek’iy ara lingan ban’en ni ke thingeg e gatuw nga but’.​—Luke 12:39, 40.

Rayog ni nge buch ban’en ni taareb rogon ko piin ni “ri yad be sonnag e Somol rodad i Jesus Kristus ni nge yib i m’ug.” (1 Korinth 1:7) Fapi apostal e kara lemnaged ni ‘ra fulweg Jesus fare gil’ilungun Israel nga rogon’ ni dabi n’uw nap’an u tomren ni kan faseg ko yam’. (Acts 1:6) Boch e duw nga tomren, ma fapi Kristiano u Thessalonika e susun ni ngan puguran ngorad murung’agen e wub rok Jesus ko gagiyeg ni bay yib nga m’on. (2 Thessalonika 2:3, 8) Yugu aram rogon, pi n’en ni yibe lemnag kakrom ni aram e pow ko rran rok Jehovah nde riyul’ e de k’aring fapi gachalpen Jesus ni ngar paged fare kanawo’ ni be pow’iyey ko yafas ni manemus.​—Matthew 7:13.

Ngiyal’ ney, ma lem ni ke war boch nbochan e gowa ke sasagaal ni ngeb fare tomur ko re m’ag n’ey e susun dabi k’aringdad ni dabkuuda tedan’dad ko matanag. Rayog ni nge fol e en ni ma matanag ni be par nib od ko pow nde riyul’, machane thingari par ni be tiyan’ ko matanag! Ireray e maruwel rok. Aram rogon e piin Kristiano.

[Picture on page 26]

Kari mich u wan’um ni ke chuchugur e rran rok Jehovah?

[Pictures on page 27]

Fapi muulung, nge meybil, nge fol babyor nib fel’ e ra ayuwegdad ni ngad pared ni gad ba od

[Picture on page 30]

Ni bod Margaret, manga yugu da tiyan’dad ko matanag u fithik’ e gum’man’ ngu fithik’ e pasig