Ra Falfalan’ E Piin Ni Kar Pared Nib Od!

“Mu sapgad! Bay gub ni bod ba moro’ro’. Ra felfelan’ e en ni ke par ni be od ni ke chuw ko thal ni wuru’ e mad rok.”​—REVELATION 16:15.

1. Mang e ra buch ya ke chugur ni nge taw e rran rok Jehovah?

KE chugur iyib e rran rok Jehovah, ma aram me yib e mahl! I pig i changar rok apostal John me guy e “pi thin ni sum ko pi moonyan’” ni bod yaan e kayruw ni be yan ngak e “pi pilung” ara piin ni ma gagiyegnag e fayleng. Ko mang fan? Ni fan ni “ngar kunuyed yad nga taabang ni fan ko mahl ni fan ko fare rran ni baga’ fan ni Rran rok Got ni Gubin ma Rayog Rok”! Miki gaar John: “Kan kunuyrad nga taabang nga bang ni ka nog yu Har–​Magedon ngay ni thin ni Hebrew.”​—Revelation 16:13-16.

2. Mini’ Gog nu Magog, ma mang e ra buch u nap’an ni ra togopuluw ko girdi’ rok Jehovah?

² Dabki n’uw nap’an ma ra k’aring Jehovah e pi nam ni ngar togopuluwgad ko Babylon nib Gilbuguwan mar thanged, ni aram e pi yuraba’ i teliw nu fayleng ni googsur. (Revelation 17:1-5, 15-17) Ma aram ma Gog nu Magog ni Satan ni Moonyan’ ni kan nin’ nga fayleng, e ra kunuy e tirok ban’en mi yad togopuluw ngak e girdi’ rok Jehovah ni yad be par nib gapas ma be m’ug riy ni yad meewar. (Ezekiel 38:1-12) Machane ra ayuweg Got e girdi’ rok. Aram e ra tabab fare “rran rok Jehovah ni baga’ ma ra k’aring e marus.”​—Joel 2:31; Ezekiel 38:18-20.

3. Mu weliy e pi n’en nra buch ni kan yiiynag ko Ezekiel 38:21-23?

³ Arrogon, ra ayuweg Jehovah e girdi’ rok ma ra thang mit urngin ban’en ko m’ag rok Satan u nap’an e Har–​Magedon, ara Armageddon. Mu bieg e pi thin ko profet u Ezekiel 38:21-23, ma ga yaannag u lanin’um. Ma fanay Jehovah gelngin ni nge yib e rran ko manileng ni boor, nge aw e ayis nib baga’ u lang nga but’, ma ra aw e nifiy nga but’, ma ra wer e m’ar nib ubchiya’. Ke rus e girdi’ u gangin e fayleng ya urngin e tirok Gog ban’en e ra maathukthuk lanin’rad, ni bagayad e be cham ngak bagayad. Ra fanay Jehovah gelngin ni nge ayuweg e girdi’ rok ma urngin e toogor rok fare Got Nth’abi Ga’ e yira thangrad. Nap’an nra m’ay fare “gafgow ni baga’” ma dakuriy ban’en ko m’ag rok Satan ni ke magay. (Matthew 24:21) Ni mus ko ngiyal’ ni yibe thangrad ma piin nib kireb e ra nang ko mini’ e be gechignagrad. Ya Got rodad ni ra gel ngay e begaar: “Bay ra nanged ni gag e Jehovah.” Pi n’en ney nib maluplup e ra buch ko ngiyal’ ney, u nap’an ni ba’ Jesus.

Bay Yib ni Bod ba Moro’ro’

4. Uw rogon nra yib Jesus ni nge thang e re m’ag nib kireb ney?

⁴ Yog Somol Jesus Kristus ni gaar: “Mu sap! Bay gub ni bod ba moro’ro’.” Ra nge arrogon ma ra yib nib tomgin, u ba ngiyal’ ndan lemnag nra yib, u nap’an ni be mol e girdi’. Nap’an nra yib Jesus ni bod ba moro’ro’ ni nge thang e re m’ag nib kireb ney, ma ra ayuweg e piin ni be par nib od. I gaar ngak John: “Ra felfelan’ e en ni ke par ni be od ni ke chuw ko thal ni wuru’ e mad rok, ni bochan e nge dab i yan ndariy e mad u daken ngi i tamra’ u fithik’ e girdi’.” (Revelation 16:15) Mang fan ni baga’ fan e pi thin nem? Ma uw rogon nrayog ni ngad pared nib od ko tirok Got ban’en?

5. Mang e yaram ko pigpig ko tempel u nap’an ni immoy Jesus u fayleng?

⁵ Baga’ ni dabni chuweg e mad rok e matanag ni bochan ni kan pirieg ni be mol ko ngiyal’ ni susun ni be maruwel. Machane aram e n’en ni buch u lan e tempel u Jerusalem u nap’an ni immoy Jesus u fayleng ma bay e pi prist nge yu Levi ni kan yu ulungnagrad ni fan ko pigpig u tempel u Jerusalem. Nap’an e bin 11 e chibog B.C.E. me yarmiy David ni Pilung e pi prist ni yad bokum miriay nge yu Levi ni yad bokum biyu’ min ulunguyrad ni bay 24 e ulung riy. (1 Kronicles 24:1-18) Ra reb e ulung e pag reb e biyu’ e girdi’ riy ni ra be’ ma ra maruwel u tempel ni reb e wik n’umngin nap’an ni l’agruw yay u reb e duw. Machane nap’an fare Madenom ko Nochi Naun ma urngin fa 24 e ulung e ra yib ko maruwel. Maku nap’an e madenom ko Palukaf me yoor e girdi’ ni ra yib ko maruwel.

6. Ma sor fan ko mang e pi thin ney ni yog Jesus ni gaar, “Nge falfalan’ e en ni ke par ni be od nib chuw ko thal ni wuru’ e mad rok”?

⁶ Nap’an ni yog Jesus e pi thin ni baaray ni “Ra felfelan’ e en ni ke par ni be od ni ke chuw ko thal ni wuru’ e mad rok,” ma sana be sor fan ko n’en nib l’ag ko maruwel ko matanag u lan e tempel. Fare Mishnah ko yu Jew e begaar: “Bay dalip yang ni ma par e pi prist riy ni yad ma matanag u lan fare Tempel: u lan fare singgil ni Chamber of Abtinas, ngu gin ni ka nog e  Chamber ko fare Daramram, ngu gin ni kan nog e Chamber ko Hearth; ma piyu Levi e bay ko reliw nge taareb ko yu gin ni baaray ni: lal ko fa lal i garog ko fa gin’en u Temple Mount, ma aningeg ko fa aningeg i tabthung u langgin, ma lal ko fa lal i garog ko fa gin’en u Court ko Temple, ma aningeg u wuru’ ko fa aningeg i tabthung, ma reb u lan fa gin’en ni Chamber ko Maligach, ma reb ko fare Chamber ko Curtain, ma reb u tomur ko fa gin’en ni Mercy Seat [ni bay u wuru’ fa bin tomur e yoror ko fa Gin’en nib Th’abi Thothup]. Ma fa en ni ga’ ko Temple Mount e ra yan nga urngin e yungi n’en ni bay e matanag riy ni be fek e mol’, ma faanra de sak’iy fare matanag nge gaar ngak, ‘Gur fa en ni ga’ ko Temple Mount, nge yib e gapas ngom!’ ma aram e mich ni be mol, ma fa en ni ga’ e ra toy e sog rok ko cha’ nem, ma bay mat’awun ni nge fek e mad rok me urfiy.”​—The Mishnah, Middoth (“Measurements”), 1, paragraphs 1-2, translated by Herbert Danby.

7. Mang fan nib t’uf ko pi prist nge piyu Levi ni ngar pared nib od u nap’an ni yad e matanag u lan fare tempel?

⁷ Piyu Levi nge pi prist e ur pared ni yad ba od u n’umngin e nep’ ko matanag ni nge siy i yib be’ nde biech nga lan e yoror ko tempel. Fa “en ni ga’ ko Temple Mount,” ara “ga’ ko tempel” e ra yan ko urngin fa 24 yu gin’en ni bay e matanag riy ko nep’, me ere ra reb e matanag e thingari par nib od nfaanra dabun ni ngan pirieg nde lubeg e maruwel rok.​—Acts 4:1.

8. Mang e be yip’ fan e mad ko Kristiano?

⁸ Pi Kristiano ni kan dugliyrad nge piin ni ma un ngorad e thingara pared nib od ko tirok Got ban’en mar pared ni bay e mad rorad ni be yip’ fan ban’en. Aram e pi n’en ni ma micheg ni kan dugliydad ko pigpig ko tempel rok Jehovah nib spiritual. Ma bay rodad e kan ni thothup rok Got fa gelngin, ni nge ayuwegdad ngad lubeged e maruwel rodad ni gad e piin ni ma wereg e thin ko Gil’ilungun Got. Faanra gad ra mol ko maruwel rodad ni gad e pi tapigpig rok Got ma aram ma bay e riya’ riy u nap’an ni ra yib Jesus Kristus, ni ir e Ga’ ko fare tempel nib spiritual. Faanra kad molod ko tirok Got ban’en ko ngiyal’ nem ma yira chuweg e mad rodad ma yira urfeg fagi mad ni be yip’ fan ban’en. Ere uw rogon nrayog ni ngad pared nib od ko tirok Got ban’en?

Rogon Nrayog ni Ngad Pared nib Od

9. Mang fan ni baga’ fan ni ngan fil e Bible nge yugu boch e babyor ko Kristiano?

⁹ Ngan fil e Bible nib mus rogon nge pi babyor ko Kristiano ma ra ayuwegey ni ngan par nib od ko tirok Got ban’en. Gad ra fil e Bible ni aram rogon ma ra ayuwegdad nge bung rogodad ko machib, ma ra ayuwegdad ko magawon, ma ra dag e kanawo’ ni ma yan ko falfalan’ ndabi m’ay biid. (Proverbs 8:34, 35; James 1:5-8) Susun ni ngad filed e Bible nib fel’ rogon ma gad mon’og iyan. (Hebrews 5:14​–​6:3) Ggan nib fel’ ni nga un kay u gubin ngiyal’ e ra ayuwegdad ngad pared nib od ma dabi yib e chuchuw ngodad. Ma rayog ni nge siyeg iyib e malmal ngodad ni bochan nde gaman e ggan ni gad be kay. Ma dariy e tawey rodad ni ngad pared ni de gaman e ggan nib spiritual rodad ma ngad chuchuwgad, ya boor e ggan nib spiritual ni be pi’ Got u daken fare “tapigpig nib yul’yul’ mab gonop” ni kan dugliyrad. (Matthew 24:45-47) Ngan kay e ggan nib spiritual u gubin ngiyal’ u daken e fol babyor ni ra be’ ma goo ir e ma fol babyor ma fol babyor ko tabinaw ma aram rogon nrayog ni ngan par nib od min par nib “michan’uy nib fel’ rogon.​—Titus 1:13.

10. Uw rogon ma pi muulung ko Kristiano nge pi assembly nge convention e ma ayuwegdad ngad pared nib od ko tirok Got ban’en?

¹⁰ Pi muulung ko Kristiano nge pi assembly nge convention e ma ayuwegdad ngad pared nib od ko tirok Got ban’en. Ya ma pi’ e athamgil nga lanin’dad maku aram e rayog ni ‘ra bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.’ Ma ri baga’ fan ni ngad muulunggad u taabang u gubin ngiyal’ ya “gad be guy ni chirofen ni bay yib Somol riy e be chugur.” Kari chugur iyib e rofen nem e chiney. Aram e “rran rok Jehovah,” nge ngiyal’ ni ra dag nib sorok e gagiyeg rok. Faanra baga’ fan u wan’dad e re rran nem​—ma susun ni er rogon​—ma aram e ‘dabda paged e muulung rodad.’​—Hebrews 10:24, 25; 2 Peter 3:10.

11. Mang fan nrayog ni ngan nog ni maruwel ko Kristiano e baga’ fan ko par ni yib od ko tirok Got ban’en?

¹¹ Ngan un ko machib ko Kristiano nib fel’ rogon ma ra ayuwegey ni ngan par nib od ko tirok Got ban’en. Faan gad ra passig i un i wereg fare thin nib fel’ u gubin ngiyal’ ma ra ayuwegdad ngad pared nib od. Bay boor e kanawo’ nrayog ni ngad weliyed ko girdi’ u morngaagen e Thin Rok Got, nge Gil’ilungun, nge tin nib m’agan’ ngay. Rib fel’ ni ngan un ko machib u mit e tabinaw iyan, min sul ngak e girdi’ ni ba adag e machib, min fil e Bible ko girdi’ ko pi babyor ni Tamilagan’ ni ma Pow’iy Iyan ko Yafas ni Manemus. Piin piilal u Efesus kakrom e ur micheged ni ke machibnagrad Paul “u fithik’ e girdi’ ni yoor ngu lan e tabinaw rorad iyan.” (Acts 20:20, 21) Ma bay boch e Pi Mich Rok Jehovah ni yad ba yul’yul’ machane yad mm’ar me ere dabiyog ni ngar uned ko machib ni boor machane yad ma gay rogon ni ngar weliyed ko girdi’ u morngaagen Jehovah nge Gil’ilungun ma ma yib e falfalan’ ngorad ni bochan.​—Psalm 145:10-14.

12, 13. Ko mang fan nsusun ni ngad siyeged e abich nge muun rum nib pag rogon?

¹² Ngan siyeg i rin’ ban’en nib pag rogon e ra ayuwegey ni ngan par nib od ko tirok Got ban’en. Nap’an ni weliy Jesus u morngaagen e ngiyal’ ni ba’ me yog ko pi apostal rok ni gaar: “Mu ayuwgad, ma dab mpaged gimed nguum pired ni baga’ ni mur ni ke pag rogon nge muun rrum e gimed be muruwliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal.” (Luke 21:7, 34, 35) Madbul nge chinggaw e de puluw ko motochiyel ko Bible. (Deuteronomy 21:18-21) Proverbs 23:20, 21 e begaar: “Dab um chag ngak e girdi’ ni tamuun rrum, ara piin ni yad ma abich nge pag rogon. Pi tamuun rrum nge piin ni yad ma abich nge pag rogon e ra yib e gafgow ngorad. Faanra ke mus ni n’en ni ga be rin’ e ga be abich ma ga be mol, ma dabi n’uw nap’an ma ga chuw ko mad ni ke kaday ma ke mogchoth.”​—Proverbs 28:7.

¹³ Ma rayog ni nge n’igin nge chuchuw be’ fa nge malmal ni nge rin’ e tin m’agan’ Got ngay ni yugu aram rogon gathi aram fene elmirin ni ke pag rogon e abich nge muuun rum. Dabi siy ni ra sum boch ban’en nra k’aring e magafan’uy ni ma sor fan ko magawon u tabinaw, ara m’ar, fa yugu boch ban’en. Machane gad ra falfalan’ nfaanra gad ra mon’eg e tirok Gil’ilungun Got ko yafas rodad ma ngad pagedan’dad ku Chitamanidad nu tharmiy ni nge pi’ e tin nib t’uf rodad ngodad. (Matthew 6:25-34) Ya ra danga’ ma ra aw e “re rran nem” nga dakendad ni bod e “wup,” ni sana wup ni bay e wal riy, ni bod rogon fapi wup ni ma k’aring e gamanman ngar bad ngay, min kolrad. Dabi buch e re n’ey ngodad nfaanra gad ra par nib od, ni be tamilang u wan’dad ni gad be par ko “ngiyal’ ko tomur.”—Daniel 12:4.

14. Mang fan ni susun ni ngad meybilgad u fithik’ e yul’yul’?

¹⁴ Meybil u fithik’ e yul’yul’ e ku aram ban’en nra ayuwegey ngan par nib od ko tirok Got ban’en. I yiiynag Jesus reb e thin me gaar: “Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed mi gimed yan mu sak’iygad nga p’eowchen e en ni Fak e girdi’.” (Luke 21:36) Arrogon, ngad yibilayed ni nguuda pared ko ba’ rok Jehovah ma gad par nib fel’ u wan’ Jesus, ni ir e en ni Fak e girdi’ u nap’an nra yib ni nge gothey e re m’ag nib kireb ney. Ere ‘nguuda pared nib od ni gad be meybil’ ni fan ngodad nge fan ko pi walagdad.​—Kolose 4:2; Efesus 6:18-20.

Bayi M’ay e Tayim

15. Mang angin e pigpig ni gad be tay ni gad e tamachib ko tin mat’aw?

¹⁵ Nap’an ni gad be sonnag e rorran rok Jehovah ma dabi siy ni gad ba adag ni ngad rin’ed urngin ban’en nrayog rodad ko pigpig ngak. Ma faan gad ra yibilay e re n’ey ma ran bing e “kanawo’ ngodad nrayog ni ngad ngongliyed e maruwel riy ni baga’ ma ra yib fan.” (1 Korinth 16:8, 9) Ngiyal’ ni ke dugliy Got e ra pufthinnag Jesus e girdi’ ma ra kiegrad, ma piin nib mat’aw ni yad e “saf” e ran pi’ e yafas ni manemus ngorad ma piin ni yad e “kaming” e ra un ko math mit. (John 5:22) Gathi gadad e gad ra kieg e saf ko kaming. Machane maruwel ni gad be tay ko machib ko tin nib mat’aw e be ayuweg e girdi’ nrayog ni ngar mel’eged ni ngar pigpiggad ku Got min pi’ e yafas ngorad u nap’an ni “ra yib Jesus nib rir.” Kari ngoch numngin nap’an ni ka bay me ere ri baga’ fan ni ngad gayed e girdi’ nib elmirin ni piin ni “ba adag ni ngar pared ndariy n’umngin nap’an.”​—Matthew 25:31-46; Acts 13:48.

16. Mang fan ni susun ni ngad passiggad i machibnag e thin ko Gil’ilungun Got?

¹⁶ Nap’an Noah me m’ay e tayim ko fayleng, maku arrogon nra m’ay e tayim ko re m’ag ney. Ere nguuda passiggad i machibnag e thin ko Gi’ilungun Got. Be yib angin e machib ni gad be tay, ya gubin e duw ma bokum miriay e girdi’ e be un ko taufe ya kar ognaged yad ku Got. Ma yad be un ko ulung rok Jehovah ni​—“yad girdien, mi yad fare ran’ i saf rok.” (Psalm 100:3) Bay e falfalan’ riy ni ngan un ko fare maruwel ko machib ko Gi’ilungun Got ya aram e ma pi’ e athap ko girdi’ u m’on nra taw ko “fare rran rok Jehovah ni ra k’aring e marus”!

17, 18. (a) Nap’an ni gad ma un ko machib, ma mang e ra rin’ boch e girdi’? (b) Mang e ra aw nga daken e piin ta moningnagdad?

¹⁷ Bod Noah, ni be tay Got tangidad ma be ayuwegdad. Arrogon, pi girdi’ nge fapi engel ni ur feked yaan e girdi’, nge pi Nefilim e ur minmingad ko n’en ni machibnag Noah, machane de tinna’ ngay. Ngiyal’ ney ma boch e girdi’ e ra minmin ya gad be tamilangnag e mich riy ni gad be par ko ngiyal’ ni “tin tomren e rran.” (2 Timothy 3:1-5) Moning ni aram rogon e kan yiiynag u lan e Bible u morngaagen e ngiyal’ nra moy Kristus ye gaar Peter: “Tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed ni be lungurad, “I yog faram ni ra moy, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney.’”​—2 Peter 1:16; 3:3, 4.

¹⁸ Boch e girdi’ ko ngiyal’ ney ni ma moningnagdad e ma gaar: ‘Dariy ban’en ni ke thil ka nap’an ni sum e fayleng ke mada’ ko chiney. Yafas e ma ulul iyan, ma ma un e girdi’ ko abich nge garbod, ma yad ma un ko mabgol nge chugul bitir. Ma mus ni faanra ba’ Jesus ma dabi pufthinnag e girdi’ ko ngiyal’ ni gu ba’.’ Ri gathi aram rogon! Faanra dabra m’ad ko yugu boch ban’en u m’on riy ma dabi siy ni ra yib fare rran rok Jehovah nga dakenrad me thangrad, ni bod rogon fare Ran ni yib me tharey e fayleng me thumur fare mfen nib kireb u nap’an Noah.​—Matthew 24:34.

Nguun Par nib Od!

19. Susun uw rogon u wan’dad e maruwel ni gad be tay ni ngad pingeged e girdi’ ngar manged pi gachalpen Jesus?

¹⁹ Faanra kad ognaged gadad ku Jehovah, ma dabda molod ni bochan e lem nde puluw. Ereray e ngiyal’ ni ngan par ni yib od, min maruweliy e micha’uy ko thin ko profet, ma ngan lebuguy e n’en ni kan tay chilen ngodad ni ngad “pingeged e girdi’ u gubin e nam ngar manged pi gachalpen Jesus.” (Matthew 28:19, 20) Be chugur iyan ko ngiyal’ nra thumur e re m’ag ney me ere dakuriy reb e maruwel ni kab fel’ ko bin ni ngan pigpig ku Jehovah Got u tan e gagiyeg rok Jesus Kristus ma gad un i machibnag “fare thin nib fel’ ko Gil’ilungun Got” u gangin e fayleng u m’on nra taw ko tomur.​—Matthew 24:14; Mark 13:10.

20. Mang kanawo ni tay Kaleb nge Joshua, ma mang fan ngodad?

²⁰ Boch e girdi’ rok Jehovah e ur pigpiggad ngak u lan bokum e duw ma boch e ur pigpiggad ngak u n’umngin nap’an e yafas rorad. Ni mus ni faanra ka fin da uned ko bin riyul’ e liyor, ma nguuda boded Kaleb ni girdi’ nu Israel ni ke “lek Jehovah ni mus rogon.” (Deuteronomy 1:34-36) Yow Joshua e i m’agan’gow ngay ni ngar ranow ko fare Binaw ni Kan Micheg u tomren ni chuw yu Israel u Egypt. Machane baga’ ni piin nib ilal nu Israel e dariy e michan’ rorad me ere ur pared ni yad be milekag u daken e ted u lan 40 e duw mi yad yim’. Ma Kaleb nge Joshua e ur unew ko re gafgow nem, machane munmun mi yow yan nga lan fare binaw ni kan micheg ngorad. (Numbers 14:30-34; Joshua 14:6-15) Faanra gad ra ‘lek Jehovah ni mus rogodad riy’ ma gad par nib od ko tirok Got ban’en, ma aram ma gad ra un ko falfalan’ u lan e fayleng nib biech ni ke micheg Got nra’ pi’ ngodad.

21. Mang e ra yog ngodad nfaanra gad par nib od ko tirok Got ban’en?

²¹ Rib gagiyel e mich riy ni gad be par ko ngiyal’ ko tomur ma kari chugur e rran rok Jehovah. Gathi ereray e ngiyal’ ni ngan chuchuw ma ngan tal i rin’ e tin m’agan’ Got ngay. Yira flaabnagdad ni ke mus nfaanra gad ra par nib od ko tirok Got ban’en ma ngad pared ni gad be chuw ko mad ni be yip’ fan ni gad e Kristiano nge pi tapigpig rok Jehovah. Nge mudugilan’dad ni nguud “pared nib od, ma gad ba mudugil u fithik’ e michan’ rodad, ma gad ngongol ni bod e piin pumoon, ma da pared ni gad ba gel.” (1 Korinth 16:13) Gad e pi tapigpig rok Jehovah ere nguud pared nib mudugilan’dad ma dabda rusgad. Ma aram ma gad un ko piin ni kar ted talperad ko ngiyal’ nra yib fare rran rok Jehovah, ya gad be pigpig u taabang ko piin nib falfalan’ ya yad be par nib od.

Mang e Fulweg Rom?

◻ Mang e be yip’ fan e yu thal ni wuru’ e mad rodad, ma uw rogon nrayog ni ngad pared ni gad ba chuw ngay?

◻ Mang boch e kanawo’ nrayog ni ngad pared nib od ko tirok Got ban’en?

◻ Mang fan ndabda gingad ngay ni yira moningnagdad, ma susun uw rogorad u wan’dad?

◻ Susun uw rogon u wan’dad e maruwel rodad ko tin tomren e rran in ngad pingeged e girdi’ ngar manged pi gachalpen Jesus?

[Blurb ko page 16]

Pi Kristiano ni bay e kan ni thothup rok Got rorad ni nge ayuwegrad ngar lubeguyed e maruwel nib mil fan ngorad

[Sasing ko page 15]

Ke mudugilan’um ni ngam par nib od ko tirok Got ban’en ma ga par ni gab chuw ko mad rom?