“Mu Fal’eged Rogomed Ngam Pired”

“Ere mu fal’eged rogomed ngam pired, ya da mu nanged e chirofen ni bay yib e Somol romed riy.”​—MATTHEW 24:42.

1. Uw rogon u wan’ e piin ni kar pigpiggad ku Jehovah nib n’uw nap’an ni ke yoor e duw ni kar pired nib yul’yul’ ngak? Mu weliy boch.

BOOR e tapigpig rok Jehovah ni kar filed e thin nriyul’ u nap’an ni yad bitir. Ma bod rogon facha’ ni ma chuway’ ni ke pirieg e churuwo’ nu l’ugun e yar nrib fel’ me pi’ ni chuway’ urngin ban’en ni ba’ rok, me fek e salpiy riy nge chuw’iy fare churuwo’ ngay, maku arrogon e pi Bible student nem ni kar paged farad mar ognaged e yafos rorad ngak Jehovah. (Matthew 13:45, 46; Mark 8:34) Uw rogon u wan’rad ya ke n’uw nap’an ni kar songad ma dawori lebug e tin nib m’agan’ Got ngay ni fan ko re fayleng ney? De sulan’rad! Ya lem rorad e bod Brother A. H. Macmillan ni ke gonapan 60 e duw ni ke pigpig ku Got ma ke gaar: “Kari mudugilan’ug ni ngguug par nib yul’yul’. Ya aram fan ni bay fan e yafos rog. Ma ka be ayuwegneg ni dab gu rus ko n’en ni bay yib nga m’on.”

2. (a) Mang e yog Jesus ngak pi gachalpen? (b) Mang boch e deer ni gad ra fil u murung’agen?

² Me gur? Demtrug ko in e duw rom, mu lemnag e n’en ni yog Jesus ni gaar: “Ere mu fal’eged rogomed ngam pired ya da mu nanged e chirofen ni bay yib e Somol romed riy.” (Matthew 24:42) Rib tamilang e pi thin nem ma be weliy e thin nriyul’. Ya dada nanged ko wuin nra yib Somol ni nge gechignag e re m’ag nib kireb ney, maku de t’uf ni ngad nanged. Machane ba t’uf ni ngad pared u rogon ni dabi kireban’dad ngay u nap’an nra yib. Ere mang boch e thin u lan e Bible ni ra ayuwegdad ngad pared ni kad fal’eged rogodad? Ma uw rogon ni ke tamilangnag Jesus e re n’ey? Ma mang e mich ni gad be guy ko ngiyal’ ney ni gad be par ko tin tomren e rran ko re fayleng ney?

Ban’en ni be Ginangdad

3. Uw rogon ma girdi’ ko ngiyal’ ney e taareb rogon ko pi girdi u nap’an Noah?

³ U boor e kanawo’ ma girdi’ ko ngiyal’ ney e yad bod e piin ni ur moyed u nap’an Noah. Ngiyal’ nem ma kari sug e fayleng ko cham, ma “gubin ngiyal’ ma ba sug laniyan’ e girdi’ ko tin nib kireb.” (Genesis 6:5) Baga’ ni ke mus ni be lemnag e girdi’ e par u reb e rran nge reb. Machane u m’on ni yibnag Jehovah fare Ran ni ke tharey e fayleng, me pag e tayim ni ngar kalgadngan’rad. I tay chilen ku Noah ni nge machibnagrad, me fol Noah riy​—me mang “tamachib ko tin nib mat’aw” u lan 40 ara 50 e duw. (2 Peter 2:5) Machane de fol e girdi’ rok Noah. Dar fal’eged rogorad. Ere kar mus ni Noah nge tabinaw rok ni kar magaygad nib fos u nap’an ni ke gechignag Jehovah e girdi’ ko ngiyal’ nem.​—Matthew 24:37-39.

4. Mang fan nrayog ni ngan nog ni ke yib angin e machib ni i tay Noah, ma uw rogon nib m’ag ko machib ni gad be tay?

⁴ Ke yib angin e machib ni tay Noah? Dab mu turguy u daken urngin e piin ni kar folgad rok. Ya bin riyul’ riy e machib ni tay Noah e ke lebuguy e n’en nra fel’ rogon riy ni yugu demtrug ko uw rogon u wan’ e girdi’. Mang fan? Ya ke yog ko girdi’ ni ngar turguyed ko yad ra pigpig ku Jehovah fa danga’. Ma uw rogon e gin ni ga be machib riy? Mus ni buch uw e girdi’ ni ba adag e machib, ma be yib angin e machib ni ga be tay. Mang fan? Ya ga be wereg e machib, ma ga be ginang e girdi’, me ere ga be lebuguy e n’en ni tay Jesus chilen ko pi gachalpen ni ngar rin’ed.​—Matthew 24:14; 28:19, 20.

Kan Dariy Fannag e Pi Profet rok Got

5. (a) Uw rarogon yu Judah u nap’an Habakkuk ma uw rogon u wan’ e girdi’ fapi thin ko profet? (b) Mang e rin’ yu Judah ngak e pi profet rok Jehovah?

⁵ In e chibog u tomren ni kan tharey e fayleng ko fare Ran, ma ke gel e ubchiya’ ko fare nam nu Judah. Ya kar uned ko liyor ko liyos, nge ngongol nde mat’aw, mar gafgowniged e yugu girdi’, mar lied e girdi’ ngar m’ad. I dugiliy Jehovah Habakkuk ni nge ginang e girdi’ ni faanra dabra kalgadngan’rad, ma ra yib piyu Chaldea ara Babylon ngar gelgad ngorad. (Habakkuk 1:5-7) Machane da i fol e girdi’. Sana kar lemnaged ni gaar, ‘Raay e duw faram ma aram e n’en ni yog Isaiah ni profet, ma dariy ban’en ni ke buch!’ (Isaiah 39:6, 7) Boor e pi tayugang nu Judah ni dariy fan e pi thin nem u wan’rad mar togopuluwgad ko piin ni ta mol’og rok Got. Bay biyay ni kar guyed rogon ni ngar lied Jeremiah ni profet ngem’, ma ke chugur ni nge yim’ machane ke pi’ Ahikam e ayuw ngak. Ma ke damumuw Jehoiakim ni Pilung ko yugu reb e thin ko profet me yog ni ngan li’ Urijah ni profet ngem’.​—Jeremiah 26:21-24.

6. Uw rogon ni ke gelnag Jehovah laniyan’ Habakuk?

⁶ Ku aram rogon nib gel e pi thin ni yog Habakkuk, ma ke dabuy e girdi’ ni bod rogon ni kan dabuy e n’en ni yog Jeremiah, ya ke yiiynag ni dariy be’ nra par u lan fare binaw nu Judah u lan 70 e duw. (Jeremiah 25:8-11) Ere, rayog ni ngad nanged ko mang fan ni ke kireban’ Habakkuk me gaar: “[Jehovah], uw n’umngin nap’an nthingar gu wenig ngom ni ngam ayuwegmad mfin mu rung’ag lungug ngam chuwegmad u fithik’ e gafgow ni yibe tay ngomad?” (Habakkuk 1:2) I runguy Jehovah Habakkuk me pi’ e athamgil nga laniyan’ ko pi thin ney ni gaar: “Dawori taw nga nap’an ni nge yib i m’ug. Machane ngal’an e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3) Ere bay e “ngiyal’ ni ke dugliy” Jehovah ni nge taleg e ngongol nde mat’aw nge gafgow. Ma faara be m’ug riy ni ke sowath, ma susun ni nge dabi mulan’ Habakkuk, ma dabi tal ko maruwel rok. Ya susun ni nge par ni be “sonnag” u gubin e rran. Ya dabi sowath fare rran rok Jehovah!

7. Mang fan ni kan turguy ni ran thang yu Jerusalem biyay u nap’an e bin som’on e chibog C.E.?

⁷ Sogonapan 20 e duw u tomren ni ke non Jehovah ngak Habakkuk, ma kan gathey Jerusalem ni aram e tochuch rok yu Judah. Ma boch nga tomren ma kan toy biyay, ma kan yal’uweg e tin nib kireb riy ni ke dabuy Habakkuk. Machane nap’an e bin somon e chibog C.E., ma kan turguy ni ran thang e re binaw nem biyay ya dariy be’ nib yul’yul’ riy. Ma ke runguy Jehovah e piin nib mat’aw me ayuwegrad. Ma yay nem me fanay Jesus Kristus ni profet ni ga’ ni nge wereg e thin. Nap’an e duw ni 33 C.E., me yog Jesus ngak pi gachalpen ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag. Ma aram e piin ni yad bay u lan yu Judea e thingar ra milgad nga daken e pi burey.”​—Luke 21:20, 21.

8. (a) Sana uw rogon e lem ko boch e Kristiano ni bochan e ke n’uw nap’an ni kar songad u tomren ni yim’ Jesus? (b) Uw rogon ni ke lebug e n’en ni i yiiynag Jesus u murung’agen Jerusalem?

⁸ Ma ke yan in e duw ma sana boch e Kristiano u Jerusalem e ur lemnaged ko wuin e ra lebug e n’en ni yiiynag Jesus. Ya mu lemnag e pi n’en ni kar paged. Boch i yad e dar uned ko shiyobay ni bochan e ngar pared ni kar fal’eged rogorad ko yan. Me ere munmun ma ke chuwan’rad riy fa? Kar lemnaged ni yad be n’ag e tayim, ya n’en ni yog Jesus e ba sor fan ko ba ngiyal’ nga m’on ma gathi ngiyal’ nem fa? Nap’an e 66 C.E., ma ke tabab i lebug e pi thin ni yiiynag Jesus ya ke yib e pi salthaw nu Roma mar longobiyed yu Jerusalem. Ma piin ni kar pared nib od e kar poyed fare pow, mar milgad, ma aram e dar uned ko magothgoth ko re binaw nem.

Kan Tamilangnag nib T’uf ni ngan Par nib Od

9, 10. (a) Mu weliy ko thin rom fare fanathin rok Jesus u murung’agen e pi tapigpig ni kar sonnaged ni nge sul e masta rorad ni ke un ko mabgol? (b) Mang fan nib mo’maw ni ngar sonnaged e masta rorad? (c) Mang fan ni thingari gum’an’ e pi tapigpig?

⁹ I tamilangnag Jesus nib t’uf ko pi gachalpen ni ngar pared nib od, me taarebnagrad ko piin ni yad e tapipig ni be sonnag ni nge sul e masta rorad ya ke un ko mabgol. Kar nanged ni ra sul ko nep’​—machane mang awa? Nap’an e bin som’on i ngalan’ e matanag? Fa bin l’agruw? Fa bin dalip? Dar nanged. I gaar Jesus: “Ri yad ra felfelan’ ni faanra piriegrad ni kar fal’eged rogorad kar pired, ni mus ni faanra yib ko lukngun e nep’ ara ke thiliyeg ko lukngun e nep’!” (Luke 12:35-38) Mu lemnag rogon ni be sonnag e pi tapigpig e masta rorad. Gubin ban’en ni kar rung’aged, ma gubin fon ban’en ni kar guyed e ra n’igin ngar lemnaged: ‘Ke yib e masta romad fa?’

¹⁰ Ma faanra ke yib fare masta u nap’an e bin l’agruw i ngalan’ e matanag, ni aram mereb e kolok nge mada’ ko ragag nge l’agruw nnep’? Ma ra par urngin e tapigpig nib od ni kar fal’eged rogorad ni mus ko fa tin ni kar tababgad ko maruwel nri kakadabul, fa ra mol boch i yad? Ma mang ni ke sul fare masta u nap’an e bin dalip i ngalan’ e matanag ko nep’​—ni aram e ragag nge l’agruw e kolok nnep’ nge mada’ ko dalip e kolok nkakadabul? Ra chuwan’ boch e tapigpig me mulan’rad ni bochan e ke sowath e masta rorad?a Ke mus ni piin ni be par nib od u nap’an ni ke taw fare masta e ra felfelan’. Ma ra puluw ngorad e pi thin ko Proverbs 13:12 ni be gaar: “Faanra i mun e yar u ban’en ma ra k’aring e kireban’, me mulan’uy, machane faanra yog e n’en ni be lunguy e manga yigi yog, me yib e l’agan’.”

11. Uw rogon ni nge ayuwegdad e meybil ni nguud pared nib od?

¹¹ Nap’an ni be m’ug riy ni ke sowath, ma mang e ra ayuweg pi gachalpen Jesus ni ngar pared nib od? Nap’an ni yad bay u lan fare milay’ ni Gethsemane u m’on ni kan kol Jesus me yog ngak dalip e apostal rok ni gaar: “Um odgad nguum meybilgad ngak Got, nge siy mpaged gimed ngak e pi n’en ni ma pingeg e girdi’ nge denen.” (Matthew 26:41) Me Peter e ir bagayad e pi apostal ma in e duw nga tomren, me yog ngak e pi Kristiano ban’en ni aram rogon. I yoloy ni gaar: “Ke chugur nga tungun urngin ban’en. Thingar um pired ni gimed be filmunguyan’med ma gimed be tiyan’med, nge yog ni um meybilgad.” (1 Peter 4:7) Ere ba tamilang ni susun ni nge meybil e pi Kristiano u fithik’ e pasig u gubin ngiyal’. Rriyul’, ni ba t’uf ni nguud weniggad ku Jehovah ni nge ayuwegdad nguud pared nib od.​—Roma 12:12; 1 Thessalonika 5:17.

12. Uw rogon e thil u thilin e ngan sananag ban’en nge ngan par nib od?

¹² Ki gaar Peter: “Ke chugur nga tungun urngin ban’en.” Uw fene chugur? Dabiyog ko girdi’ ni ngar nanged e rran nge awa. (Matthew 24:36) Ma de puluw ko Bible ni ngan sananag u murung’agen e re n’em, machane susun ni ngan par ni yibe sonnag. (Mu taarebnag ko 2 Timothy 4:3, 4; Titus 3:9.) Mang reb e kanawo’ ni rayog ni ngad pared ni gad be sonnag e ngiyal’ ko tomur? Faanra ngad tedan’dad ko pi n’en ni be micheg ni ke chugur ko tomur. Ere ngad lemnaged nel’ i ban’en ni be micheg ni gad be par ko ngiyal’ ni tin tomren e rran ko re fayleng ney.

Nel e Mich Riy

13. Uw rogon ni be micheg e thin ni yiiynag Paul u 2 Timothy chapter 3 ni gad bay ko ngiyal’ ni “tin tomren e rran”?

¹³ Som’on ma gad be guy ni ke lebug e thin ni i yiiynag apostal Paul u murung’agen e “tin tomren e rran.” I yoloy Paul ni gaar: “Tin tomren e rran e ri bay mo’maw ni ngan par nrogon e tin riyul’ ni girdien Kristus. Ya bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wun’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wun’rad, ma yad ba uf; ma bayi t’uf e fafel rorad me tomur Got u wun’rad; ma bay ur dake yad be liyor ngak Got, machane bay ra pied keru’rad nga gelngin. Mu tiyem u urel rok e pi girdi’ nem. Ma girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad.” (2 Timothy 3:1-5, 13) Gathi ke lebug e pi thin ko profet ney ko ngiyal’ ney? Kari mus ni piin ndubrad ni ngar nanged e thin nriyul’ e ra yog ni danga’!b

14. Uw rogon ni be lebug e pi thin ko Revelation 12:9 ko ngiyal’ ney, ma mang e ra buch ngak Moonyan’ ni dabki n’uw nap’an?

¹⁴ Bin l’agruw, ma gad be guy wenegan ni yib nga fayleng ni bochan kan nin’ Satan nge pi moonyan’ rok u tharmiy nga but’, ni rogon ni be yog u Revelation 12:9. Be gaar: “Mi nin’ fare dragon nri ba ga’ nga wuru’ e tharmiy! I ir fare porchoyog ni ke kakrom, ni kan tunguy fithingan ni Moonyan’, ara Satan, ni ir faanem ni bannag e girdi’ nu fayleng ni polo’. Mi nin’ u lang nga daken e fayleng, nib muun urngin e pi engel rok ngak.” Ma aram fan ni ke gafgow e fayleng. Rriyul’, ni ke gel e gafgow ko girdi’ ni ka nap’an e 1914. Miki yog fare thin ko Revelation ni nap’an ni kan nin’ Moonyan’ nga fayleng, ma manang ni “daki n’uw nap’an ni nge par.” (Revelation 12:12) Ngiyal’ ney ma be cham Satan ngak pi gachalpen Kristus ni kan dugliyrad. (Revelation 12:17) Ma dabi siy ni kad guyed wenegan e cham ni be tay Satan ko ngiyal’ ney.c Machane dabki n’uw nap’an ma ran nin’ Satan nga lan e low ni bochan e nge “dabkiyog ni nge bannag girdien e pi nam.”​—Revelation 20:1-3.

15. Uw rogon ni ma micheg e thin ko Revelation 17:9-11 ni gad bay ko ngiyal’ ko tomur?

¹⁵ Bin dalip, ma gad be par ko ngiyal’ ni bay fa bin meruk e “pilung” ni ku ir e bin tomur ni kan weliy murung’agen u Revelation 17:9-11. I weliy apostal John u murung’agen medlip e pilung ni be yip’ fan medlip e am nu fayleng​—Egypt, Assyria, Babylon, Medo-Persia, Greece, Roma, nge fagali am ni Anglo-American. Miki guy e “bin meruk e pilung” ni yib ko “fa medlip nem nsom’on.” Re pilung ney ni bin meruk​—aram e bin tomur ni ke guy John—​ma ba sor fan ko fare United Nations. Be weliy John ni re pilung ney ni bin meruk e ra “yan ni ngan li’ ngem’,” ma daki weliy u murung’agen boch e pilung ni ra yib u tomur.d

16. Uw rogon ma fare lik’ay rok Nebukadnezzar u murung’agen ba liyos e be micheg ni gad be par ko tin tomren e rran?

¹⁶ Bin aningeg, ma gad be par ko ngiyal’ ni ba puluw nga ay fare liyos ni ke lik’aynag Nebukadnezzar. I weliy Daniel ko mang fan e re lik’ay nem u murung’agen ba liyos ni baga’ ni bod yaan e girdi’. (Daniel 2:36-43) Bay aningeg yang ko re liyos nem nib wasey ni be yip’ fan e pi am nu fayleng nib gel, ma lolugen e bin som’on e am (ni aram yu Babylon) nge yan i mada’ nga ay nge buguli ay (ni be yip’ fan e pi am nib gel ko ngiyal’ ney). Ma goo ke m’ug urngin e am nib sor fan ko re liyos nem. Gad be par ko ngiyal’ nib sor fan nga rifrifen ay e re liyos nem. Ma dan weliy u murung’agen yugu boch e am nra yib u tomur.e

17. Uw rogon ma machib ni gad be tay u murung’agen Gil’ilungun Got e be micheg ni gad e par ko ngiyal’ ko tomur?

¹⁷ Bin lal’, ma gad be guy e machib ni yibe wereg u ga’ngin e fayleng, ni aram e n’en ni yog Jesus ni ra buch u m’on nra taw ko tomur. I gaar Jesus: “Ma re thin rok Got ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Re thin ko profet nem e be lebug ko ngiyal’ ney nib mus rogon. Rriyul’, ka bay yu yang u fayleng ndawor ni wereg e machib riy, ma sana ra taw ko ba ngiyal’ nga m’on ma ra bing Jehovah e kanawo’ ni ngan wereg e machib ko yungi n’em. (1 Korinth 16:9) Machane de yog e Bible ni ra son Jehovah nge mada’ ko ngiyal’ ni kan machibnag urngin e girdi’ u fayleng ni ta taareb. Ya ran machibnag fare thin nib fel’ nge mada’ ko ngiyal’ ni ke dugliy Jehovah ni kan rin’ nib fel’ rogon. Ma aram e ra taw ko tomur.​—Mu taarebnag ko Matthew 10:23.

18. Mang e be m’ug riy ni ra buch ku boch e girdi’ ni kan dugliyrad ko kan ni thothup u nap’an nra tabab fare gafgow ni baga’, ma mang e be micheg e re n’ey?

¹⁸ Bin nel’, ma be lich iyan e piin ni kan dugliyrad nriyul’ ni yad pi gachalpen Kristus, ni yugu aram rogon ni ra moy boch i yad u fayleng u nap’an nra tabab fare gafgow ni baga’. Baga’ ni piin ni kan dugliyrad ko kan ni thothup e goo kar pillibthirgad, ma be lich iyan e piin ni kan dugliyrad nriyul’. Ma ke yog Jesus u murung’agen fare gafgow ni baga’ ni gaar: “Ke lichnag Got e pi rran nem; ya faan mang e dabi rin’ ni aram rogon, ma dariy be’ nra fos. Machane bayi lichnag Got e pi rran nem ni bochan e piin ni girdien ni ke mel’egrad.” (Matthew 24:21, 22) Ere ba tamilang ni boch e piin ni kan “mel’egrad” e yad ra moy u fayleng u nap’an nra tabab fare gafgow ni baga’.f

Mang e Bay Nga M’on?

19, 20. Mang fan ni ri baga’ fan ko ngiyal’ ney ni ngad pared nib od ma ngad fal’eged rogodad?

¹⁹ Mang e bay nga m’on rodad? Bay boch ban’en ni yira gin ngay ni ra buch. I ginang Paul ni gaar, “Chirofen ni ir e re Rran rok Jehovah nem e bay taw ni bod be’ nib moro’ro’ ni yib nnep’.” Ki weliy u murung’agen e pi llowan’ ko fayleng ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad!.” Ma aram me yog Paul ni gaar: “Ere dab ud molod ni bod boch e girdi’; ya nguud pired ni gadad be od ma ba tamilangan’dad.” (1 Thessalonika 5:2, 3, 6) Rriyul’ ni piin ni ma pagan’ ngak e pi ulung ko girdi’ ni nge yibnag e gapas nge pagan’ e yad be pi’ keru’rad ko tin riyul’. Girdi’ ni aram rogon e yad be mol!

²⁰ Ra taw ko tomur ko re m’ag ney nib tomgin. Ere ngam par ni ga be sonnag e rran rok Jehovah. Ya i yog Got ngak Habakkuk ni gaar: “Dabi sowath”! Rriyul’, ri baga’ fan ko ngiyal’ ney ni nguud pired nib od.

[Footnotes]

Ka Ga Manang?

• Mang boch e thin ko Bible nra ayuwegdad ni ngad pared nib od?

• Uw rogon ni i tamilangnag Jesus nib t’uf ni ngad pared nib od?

• Mang fa nel’ i ban’en ni ma micheg ni gad bay ko tin tomren e rran?

[Pictures on page 21]

Ke chugur ni nge gaman nel’ i ragag e duw ni i pigpig A. H. Macmillan ku Jehovah

[Picture on page 22]

I taarebnag Jesus pi gachalpen ko pi tapigpig ni be par nib od