Ngaum Par ni Ga Be Son!

1, 2. Mang reb e ban’en ni kab kakrom i yib ni ma rin’ e pi tapigpig rok Jehovah?

KAB kakrom i yib ni be son e pi tapigpig rok Jehovah ni ngar guyed ni ke lebug e pi n’en ni kan yiiynag murung’agen u lan e Bible. Bod ni, yiiynag Jeremiah ni yira gothey yu Judah, ma aram e n’en ni buch u nap’an e duw ni 607 B.C.E. u nap’an ni yib piyu Babylon ra gotheyed e re mach nem. (Jer. 25:8-11) Kun thagthagnag nga laniyan’ Isaiah ni nge yiiynag nra chuweg Jehovah e pi Jew u kalbus u Babylon, mi yad sul nga Judah. I yog ni gaar: “Ba felfelan’ e piin ni yad be sonnag Got.” (Isa. 30:18, NW) Ku arrogon Mikah nib mich u wan’ nra riyul’ e pi n’en ni ke yiiynag Got u murung’agen e girdi’ rok kakrom. Ere, aram fan ni gaar: “Bay ug par ni ke l’agan’ug ngak Got ma gu be sonnag.” (Mik. 7:7) Ku boor e chibog ni i par e pi tapigpig rok Got ni yad be sonnag e ngiyal’ nra lebug e pi yiiy ni murung’agen fare Messiah ni kan micheg ara Kristus.​—Luke 3:15; 1 Pet. 1:10-12.a

² Pi tapigpig rok Got e ngiyal’ ney e ku yad be sonnag e ngiyal’ nra lebug boch e yiiy ni murung’agen fare Messiah ndawori lebug. Dabki n’uw nap’an ma ra fanay Jehovah Gil’ilungun fare Messiah ni nge thang e piin ni yad ba kireb me chuweg e girdi’ rok ko re fayleng ney ni be gagiyegnag Satan me taleg urngin mit e gafgow ni be tay e girdi’. (1 John 5:19) Ere, thingar ud pared ni gad be tedan’dad ya gad manang ndab ki n’uw nap’an min thang e re m’ag ney.

3. Faanra ke yoor e duw ni gad be son ni nge yib e tomur, ma mang reb e deer nrayog ni nge sum u lanin’dad?

³ Gadad e pi tapigpig rok Jehovah e gad be athapeg ni ngad guyed e ngiyal’ ni yira rin’ e tin nib m’agan’ Got ngay “u roy u but’ ni bod rogon ni yibe rin’ u tharmiy.” (Matt. 6:10) Machane, faanra ke n’uw nap’an ni kad sonnaged ni nge yib e tomur, ma rayog ni ngad tababgad ni ngad lemnaged ko, ‘Kab puluw ni ngad sonnaged e tomur, fa?’ Ngad guyed e fulweg ko re deer ney.

MANG FAN NI NGAUD PARED NI GAD BE SON?

4. Mang nib ga’ fan ni ngaud pared ni kad fal’eged rogodad?

⁴ Ba tamilang rogon ni be yog e Bible ni ngad lemnaged murung’agen e ngiyal’ ni yira thang e re m’ag ney riy. I yog Jesus ngak pi gachalpen ni ngar ‘fal’eged rogorad ngar pired.’ (Matt. 24:42; Luke 21:34-36) Aram fan nib t’uf ni ngad pared ni gad be sonnag e ngiyal’ nra yib e tomur, ya ke yog Jesus ngodad ni ngad rin’ed e re n’ey! Ba fel’ e n’en ni ke rin’ e ulung rok Jehovah, ya gubin ngiyal’ ni yibe ngongliy boch e babyor ni nge puguran ngodad feni ga’ fan ni ngad ‘sonnaged e chirofen nem, ni ir e Rran rok Got’ ma gad par ni gad be athapeg e pi n’en ni bay ko bin nib beech e fayleng rok Got.​—Mu beeg e 2 Peter 3:11-13.

5. Mang fan nib t’uf ni ngad pared e ngiyal’ ney ni kad fal’eged rogodad?

⁵ Yugu aram rogon nib t’uf ko pi Kristiano ni ur moyed u nap’an e bin som’on e chibog ni ngar sonnaged e rran rok Jehovah, machane ku arrogodad e ngiyal’ ney nrib ga’ fan ni ngkud sonnaged e re rran nem. Mang fan? Ya gad be par ko ngiyal’ ni bay Kristus riy. Ka nap’an e duw ni 1914 ni be m’ug e pow riy nriyul’ ni bay Jesus ni be gagiyeg. Bod ni ke yiiynag Jesus nre fayleng ney e be gel e kireb riy i yan ma yibe machibnag fare thin nib fel’ ni murung’agen Gil’ilungun Got u ga’ngin yang e fayleng. Re n’ey e be yip’ fan ni gad be par ko “ngiyal’ ni ke chugur nga tomuren e re m’ag ney.” (Matt. 24:3, NW; 7-14) Bochan nde yog Jesus n’umngin nap’an e re ngiyal’ i n’em, ma aram fan nib t’uf ni ngad pared ni kad fal’eged rogodad ni gad be sonnag e tomur.

6. Mang fan ni gad manang nra gel e kireb u roy u fayleng u nap’an ni gad ra chugur i yan nga tungun e re m’ag ney?

⁶ Sana rayog ni ngad fithed ni nge lungudad: Gathi “ngiyal’ ni ke chugur nga tomuren e re m’ag ney” e be yip’ fan ba ngiyal’ ni ka bay boch nga m’on nra gel boch e kireb ko pi n’en ni bay u roy u fayleng? Riyul’ ni be yog e Bible ni gubin ban’en nra gel e kireb riy u nap’an e “tin tomren e rran.” (2 Tim. 3:1, 13; Matt. 24:21; Rev. 12:12) Ere, gad manang ni gubin ban’en u roy u fayleng e chiney ni ke gel e kireb riy, ma nap’an ni gad ra chugur boch i yan nga tungun e re m’ag ney ma rra gel boch e kireb riy i yan.

7. Mang e be yog e Matthew 24:37-39 u murung’agen e pi n’en nra buch u fayleng u nap’an e tin tomuren e rran?

⁷ Machane, ga be lemnag ma uw e ra taw gelngin e kireb ngay u m’on nra yib “fare gafgow ni ba ga’”? (Rev. 7:14) Ga be lemnag ni gubin e nam u roy u fayleng ni yira mahl riy, ma ra yan i par gubin e girdi’ ndakuriy e ggan ni ngar ked, ma urngin e tabinaw ni ke yib e m’ar ko girdi’ riy, fa? Faanra buch ni aray rogon mab mudugil ni mus ngak e piin nde mich u wan’rad ni gad bay ko tin tomuren e rran ni yad ra yog nriyul’ ni be lebug e pi yiiy u Bible. Machane, i yog Jesus ni yooren e girdi’ e ‘dab ra nanged’ ni bay. Ra bagayad ma ka be ulul i rin’ e pi n’en ni ma rin’, ma yug yad ra gin ma ke taw fare rran rok Jehovah. (Mu beeg e Matthew 24:37-39.) Ere, be tamilangnag e Bible ndabi gel e kireb u fayleng nge yan i taw nga reb e dodow nra k’aring gubin e girdi’ ni nge mich u wan’rad ni ke chugur e tomur.​—Luke 17:20; 2 Pet. 3:3, 4.

8. Mang e ke tamilang u wan’ e piin ni yad be fol ko fare fonow ni pi’ Jesus ni aram e ngar ‘fal’eged rogorad ngar pired’?

⁸ Machane, fare pow ni weliy Jesus murung’agen e weliy ni bochan e nge ayuweg pi gachalpen ni ngar nanged e ngiyal’ ni yad bay riy. Ere, thingari lebug e pi n’en ni bay ko re pow ney u reb e kanawo’ nra guy pi gachalpen Jesus ma yad ra nang nthingar ra folgad ko n’en ni yog Jesus ni aram e ngar ‘fal’eged rogorad ngar pired.’ (Matt. 24:27, 42) Ma aram e n’en ni kar rin’ed ni ka nap’an e duw ni 1914. Ka aram nap’an i yib ni be lebug e pi n’en ni bay ko re pow ney. Ere, ba tamilang ni gad be par ko “ngiyal’ ni ke chugur nga tomuren e re m’ag ney.” Kan dugliy n’umngin nap’an e re ngiyal’ i n’em ma ra buch e pi n’ey riy nge yan i taw nga nap’an ni kan thang e re m’ag nib kireb ney.

9. Mang fan nthingar da pared ni gad be sonnag e ngiyal’ nra yib e tomur ko re m’ag nib kireb ney?

⁹ Ere, mang fan ni nga i par e pi Kristiano e ngiyal’ ney ni yad be sonnag e ngiyal’ nra yib e tomur riy? Gad be son ni bochan e gad be fol ko n’en ni yog Jesus Kristus nthingar da rin’ed. Maku gad be guy e pow riy ni bay Jesus e chiney ni be gagiyeg. Gathi ke mich u wan’dad ni ke chugur e tomur ni bochan e gad boch e girdi’ ni yug yira yog ban’en ngodad me mich u wan’dad, ya kad guyed e mich riy u Bible. Ere, aram fan ni gad be par ni gad be tedan’dad, ma gad ba od ni gad be sonnag e ngiyal’ nra yib e tomur ko re m’ag nib kireb ney.

UW N’UMNGIN NAP’AN NI NGAD SONGAD?

10, 11. (a) Mang e fal’eg Jesus rogon pi gachalpen ni fan ngay? (b) Mang e yog Jesus ngak pi gachalpen ni ngar rin’ed ni faanra yad be lemnag ni ke pag nap’an ma dawori yib e tomur? (Mu guy e sasing ni bay u tabolngin e re article ney.)

¹⁰ Boor i gadad e ke yoor e duw ni be sonnag e re ngiyal’ i n’em. Machane, dab da paged e re n’ey ni nge meewarnag lanin’dad nge dab kud songad. Ba t’uf ni ngad fal’eged rogodad ni fan ko ngiyal’ nra yib Jesus riy ni nge thang e re m’ag ney. Dab mu pagtalin ni puguran Jesus ngak pi gachalpen ni gaar: “Mu ayuwgad mi gimed tiyan’med, ya da mu nanged e ngiyal’ nra taw ko re ngiyal’ nem. Susun e be’ nib moon ni digey e tabinaw rok me yan ko milekag, me pag fan urngin ban’en ngak e pi tapigpig rok, nra bagayad ma maruwel rok; me yog ngak e en ni ma matanagiy e mab ni nge tiyan’ ko matanag. Ere mu tedan’med, ya da mu nanged e ngiyal’ nra sul e en ntafen e naun riy: ko nep’, fa lukngun e nep’, fa chochol e nimen, fa kakadbul. Ya nga yugum gingad ni ke taw ma dabi piriegmed ni gimed be mol! Ere fapi n’en ni ku gog ngomed e ku gog ngomed ni gimed gubin, ni aram e be lungug: Mu tedan’med ko matanag!”​—Mark 13:33-37.

¹¹ Nap’an ni nang pi gachalpen Jesus ni ke tabab Jesus ko gagiyeg ko duw ni 1914, ma aram mar nanged ni ke chugur e ngiyal’ nra yib e tomur riy. Ere, ra fal’eged rogorad ni fan ko re ngiyal’ i n’em ni aram e ra yoornaged e tayim rorad ni fan ko fare maruwel ni machib. I yog Jesus nrayog ni nge yib ko ngiyal’ ni ke “chochol e nimen, fa kakadbul.” Faanra buch ni aram rogon, ma mang e ba t’uf ni nge rin’ pi gachalpen? I yog ngorad ni gaar: “Mu tedan’med ko matanag!” Ere, yugu aram rogon ni gad be lemnag ni ke n’uw nap’an ni kad songad, ma gathi be yip’ fan ni kab n’uw nap’an mfini yib e tomur ara dabi yib u nap’an ni ka gad ba fas.

12. Mang e fith Habakkuk ngak Jehovah, ma mang e fulweg ni pi’ Jehovah ngak?

¹² Am lemnag Habakkuk ni profet ni faani yog Got ngak ni nge yiiynag murung’agen e ngiyal’ ni yira gothey yu Jerusalem riy. Immoy boch e profet ni yad ba m’on rok ni ur yiiynaged murung’agen e re n’ey u lan boor e duw. Ere, nap’an ni yib Habakkuk ma “tin nib yal’uw e ka ni pingeg nga bang, ke yan i aw ni girdi’ ni kireb e kar gelgad ngak e piin ni yad mmat’aw.” Ere, dariy e maruwar riy ni aram fan ni fith Habakkuk ni gaar: “Somol, uw n’umngin nap’an nthingar gu wenig ngom ni ngam ayuwegmad?” Yugu aram rogon nde yog Jehovah ngak Habakkuk e ngiyal’ nra buch e re n’em riy, machane i micheg ngak ni “dabi sowath.” Miki yog ngak ni nga i par ni ‘be sonnag’ e re ngiyal’ i n’em.​—Mu beeg e Habakkuk 1:1-4; 2:3.

13. Mang e rayog ni nge lemnag Habakkuk? Mang fan nde fel’ ni nge lem ni aram rogon?

¹³ Mu susunnag ni ke mulan’ Habakkuk me gaar u wan’: ‘Ke yoor e duw ni kug rung’ag murung’agen yu Jerusalem ni ngan gothey. Uw rogon ni faanra kab n’uw nap’an mfini buch e re n’ey? Faanra aray rogon, me ere dariy rogon ni nggu ulul i weliy ni ke chugur ni ngan gothey e re mach ney. Bayi mang boch e girdi’ e ra weliyed murung’agen e re n’ey.’ Faan gomanga lem Habakkuk ni aram rogon, ma ra kireb e tha’ u thilrow Jehovah maku rayog ni nge yim’ u nap’an nra yib piyu Babylon ra gotheyed yu Jerusalem!

14. Mang fan nrayog ni nge pagan’dad ndabi yan i aw nib m’ay fan e son ni gad be tay?

¹⁴ Nap’an ni gad ra yan nga lan fa bin nib beech e m’ag, ma gad ra sul ngad lemnaged urngin e pi n’en ni be buch e chiney ko tin tomuren e rran, ma gad ra guy ni gubin e pi n’en ni kan yiiynag ni goo ke buch. Ma nap’an ni gad ra fal’eg i lemnag rogon e pi n’en ni ke buch ma ra gelnag e pagan’ rodad ngak Jehovah nge pi n’en ni ke micheg ni ka bay ni nge lebug. (Mu beeg e Joshua 23:14.) Ku ra taw ko ngiyal’ nem ma gad ra pining e magar ngak fare Got ni ir e ma dugliy ‘ngal’an boch ban’en nge pi rran’ riy ni i par ma be puguran ngodad ni ngaud pared ma dab da paged talin ni “ke chugur nga tungun urngin ban’en.”​—Acts 1:7; 1 Pet. 4:7.

BAY BAN’EN NTHINGAR DA RIN’ED U NAP’AN NI GAD BE SON!

15, 16. Mang fan ni fare maruwel ni machib e aram e n’en nth’abi ga’ fan ni ngad rin’ed e ngiyal’ ney?

¹⁵ Gad manang nra i par e ulung rok Jehovah ma be puguran ngodad nib t’uf ni ngad pigpiggad ngak Got u fithik’ e pasig ni bochan e dab ki n’uw nap’an ma ra thang e re m’ag ney. Gathi kemus ni yima puguran e pi n’ey ngodad ni bochan e ngad tedan’dad ko pigpig ni gad be tay ngak Got, ya ku yima puguran ngodad ni bochan e ireray e ngiyal’ ni be lebug e pi n’en ni bay ko fare pow ni be dag ni bay Kristus e chiney ni be gagiyeg. Ere, mang e ba ga’ fan ni ngad rin’ed ko ngiyal’ ney ni gad bay riy? Ireray e ngiyal’ ni ngad m’oneged e Gagiyeg rok Got nge tin nib m’agan’ ngay ni aram e ngad machibnaged fare thin nib fel’ u fithik’ e pasig!​—Matt. 6:33; Mark 13:10.

¹⁶ I yog reb e walag nib pin ni gaar: “Faan gad ra machibnag fare thin nib fel’ ni murung’agen Gil’ilungun Got, ma . . . rayog ni ngad ayuweged e girdi’ ndab ra m’ad u nap’an ni yira gothey e re fayleng ney nge pi n’en ni bay riy.” Manang e re walag ney feni ga’ fan ni ngan ayuweg e yafas ko girdi’ ni bochan e bay reb e barkow ni ka nog e Wilhelm Gustloff ngay ni pil u maday u nap’an e duw ni 1945 ni ur moyew e pumoon rok riy. Ma yow l’agruw e piin nra mageygad ni yad ba fas u nap’an ni pil e re barkow nem. Nap’an nra buch ban’en ni aray rogon, maku rayog ni nge dabi puluw rogon ni nge lem be’ me m’oneg boch ban’en nde ga’ fan. I yib ngan’ e re walag nem be’ nib pin ni i yor ma be gaar: “Tarangku rog! Tarangku rog! Nge churuwo’ rog! Gubin e churuwo’ rog ni bay u lan e singgil ko barkow. Dakuriy ban’en rog!” Machane, bay boch e girdi’ ko re barkow nem nra guyed ni n’en nib ga’ fan ni ngan rin’ e aram e ngan ayuweg e yafas ko girdi’ ko re barkow nem. Ere, ra paged fan e yafas rorad ni ngar ayuweged e yafas rok boch e girdi’ ni immoy ko re barkow nem. Ku arrogon e ngiyal’ ney ni ke par e yafas ko girdi’ nga thatharen e riya’. Ere, gad ma athamgil u rogon nrayog rodad ni ngad ayuweged e girdi’. Ma gad manang feni ga’ fan fare maruwel ni machib ni gad be rin’. Ere, ba t’uf ni ngad athamgilgad u rogon nrayog rodad ni ngad ayuweged e girdi’ ya nge yag nra mageygad ni yad ba fas u nap’an ni yira thang e re m’ag ney.

17. Mang boch i fan nsusun e nge mich u wan’dad nrayog ni nge yib e tomur nib tomgin u ba ngiyal’ ndan lemnag?

¹⁷ Pi n’en ni be buch u fayleng e be tamilangnag ni be lebug e pi yiiy u Bible e chiney ma kari chugur nga tungun e re m’ag nib kireb ney. Ere, susun e dab da lemnaged ni kab n’uw nap’an mfini buch e re n’ey. Ya gad be sonnag “fa ragag i gagey” nge “fare gamanman” ni kan weliy murung’agen ko Revelation 17:16 ni nge chel nge cham ngak fare Babylon nib Gilbuguwan, ara pi yurba’ i teliw ni googsur u fayleng. Dab da paged talin ni Got e ra ‘ta’ nga lan gum’ircha’rad’ ni ngar rin’ed e re n’ey. Ma gad manang nrayog ni nge buch e re n’ey nib tomgin u ba ngiyal’ ndan lemnag! (Rev. 17:17) Dabki n’uw nap’an min thang e re m’ag ney. Ere, ba fel’ ni ngad folgad ko n’en ni yog Jesus ni faani gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be muruwliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed . . . ni bod rogon ba wup ni pangthal.” (Luke 21:34, 35; Rev. 16:15) Ere, ngad athamgilgad ngaud pared ni gad be tedan’dad ma gad ba pasig ko pigpig ni gad be tay ngak Jehovah, me pagan’dad ngak nra “ayuweg e piin ni yad be sonnag.”​—Isa. 64:4, NW.

18. Mang deer e gad ra weliy e fulweg riy ko bin migid e article?

¹⁸ Nap’an ni gad be sonnag e ngiyal’ ni yira thang e re m’ag nib kireb ney riy, ma ngad folgad ko fapi thin ni yog Jude ni ir reb i gachalpen Jesus ni be gaar: “Gimed e pi tafager rog, e nguum gelniged gimed ko mich romed nib th’abi thothup. Um meybilgad ngak Got u fithik’ gelngin fare Kan ni Thothup [“gelngin Got nib thothup,” NW], um pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafos ndariy n’umngin nap’an ngomed ni bochan e be runguymed.” (Jude 20, 21) Machane, uw rogon ni ngad daged ni gad be par ni gad be sonnag e ngiyal’ nra yib fa bin nib beech e fayleng rok Got riy? Aram e n’en ni gad ra weliy ko bin migid e article.