Um Fal’eg i Lemnag e T’ufeg rok Jehovah Nra Par Ndariy N’umngin Nap’an
“Bay gu lemnag murung’agen urngin e tin kam rin’.”—PS. 77:12, BT.
1, 2. (a) Mang fan nib mich u wan’um nri ma t’ufeg Jehovah e girdi’ rok? (b) Kan sunmiy e girdi’ ni mang e ba t’uf rorad?
MANG fan nib mich u wan’um ni ma t’ufeg Jehovah e girdi’ rok? U m’on ni ngam pi’ e fulweg ko re deer ney, mag lemnag e re dalip i n’en ni baaray: Boor e duw ni i pi’ e pi walag e athamgil nga laniyan’ reb e walag nib pin ni ka nog Taylene ngak ni nge dabki lemnag boch ban’en ndabiyog rok. I yog ni gaar: “Faan gomanga dag t’uf rok Jehovah, ma dab i par ni be puguran e pi n’ey ngog.” Ma Brigitte e yigoo ir ni i chuguliy l’agruw i bitir ni fak u tomuren ni yim’ e pumoon rok. I yog ni gaar: “Rib mo’maw’ ni ngan chuguliy e bitir u lan e biney e fayleng ni Satan e ir e be gagiyegnag, ma ri kub gel e mo’maw’ riy ngak be’ ni faanra yigoo ir ni be chuguliy fak. Machane, ba mich u wan’ug ni gub t’uf rok Jehovah ni bochan e ma pow’iyeg ko ngiyal’ ni ma yib e kireban’ ngog nrib gel ngaug yor. Maku dariy ba ngiyal’ ni ke pag boch e skeng ke yib ngog ndabiyog ni nggu athamgiliy.” (1 Kor. 10:13) Ma Sandra e bay ba mit e m’ar rok ndab ki gol riy. Ere, immoy bayay e convention ni dag leengin reb e walag ngak nriyul’ ni be lemnag rarogon nge magawon rok. I yog figirngin Sandra ni gaar: “Yugu aram rogon nda gu nangew e re walag nem, machane rib gel e felfelan’ ni kug tew ni bochan e n’en ni ke rin’ ni be m’ug riy ni be lemnagmow. Mus nga nochi ban’en ni ma rin’ pi walagdad ngodad u fithik’ e t’ufeg ni ma m’ug riy gelngin nri gad ba t’uf rok Jehovah.”
2 Kan sunmiy e girdi’ ni yad baadag ni ngaur t’ufeged yad ma ngkun t’ufegrad. Machane, ba mom nrayog ni nge mulan’dad ni bochan boch ban’en ni ma buch ndan lemnag ni bod rogon e m’ar, nge magawon ko salpiy, ara darud guyed angin e machib ni gad be tay. Faanra kad tababgad ni ngad lemnaged nda kud t’ufgad rok Jehovah, ma susun ndab da paged talin nib ga’ fadad u wan’ ma gubin ngiyal’ ni bay ni be ‘pi’ gelngidad’ ma be ayuwegdad. Faan gad ra par ni gad ba yul’yul’ ngak ma dabi pagtildad.—Isa. 41:13; 49:15.
3. Mang e ra ayuwegdad ni ngari pagan’dad nrayog ni nge t’ufegdad Jehovah ndariy n’umngin nap’an?
3 Fapi walag ni kad weliyed murung’agrad e rib mich u wan’rad ni ke ayuwegrad Got u fithik’ e pi magawon rorad. Ere, ku arrogodad nrayog ni nge pagan’dad ni bay Got rodad ni be ayuwegdad. (Ps. 118:6, 7) Gad ra weliy ko re article ney rogon ni be m’ug e t’ufeg rok Got ngodad u daken e (1) pi n’en ni ke sunmiy, (2) Thin rok ni kan thagthagnag, (3) meybil, nge (4) fare biyul. Faanra ud fal’eged i lemnag urngin ban’en nib fel’ ni ke rin’ Jehovah ni fan ngodad ma ra ga’ fan u wan’dad gelngin e t’ufeg rok ngodad nge rogon nra par ni manemus.—Mu beeg e Psalm 77:11, 12.
MU FAL’EG I LEMNAG E PI N’EN NI KE SUNMIY JEHOVAH
4. Faanra um fal’eg i yaliy e pi n’en ni ke sunmiy Jehovah, ma mang e ga ra fil riy?
4 Faan gad ra yaliy e pi n’en ni ke sunmiy Jehovah ni fan ngodad, ma gur, ra m’ug riy gelngin nri gad ba t’uf rok, fa? Arrogon, ya ke sunmiy urngin ban’en ni bochan nib t’uf e girdi’ rok. (Rom. 1:20) Ke sunmiy e fayleng u reb e kanawo’ nrayog ni nge par urngin ban’en riy nib fas. Machane, gathi kemus ni ke sunmiydad ke taydad nga fayleng, ya ku bay boch ban’en ni ke rin’ ni fan ngodad. Bod nib t’uf ni ngaud abichgad ya nge dab da m’ad. Ere, ke sunmiy e fayleng nrayog ni nge tugul boor mit e woldug riy nrayog ni nge yib e ggan riy ni ngad ked. Ere, aram fan ni gad ma felfelan’ ni ngad abichgad! (Ekl. 9:7) Bay reb e walag ni ka nog Catherine ngak nri baadag ni ma fal’eg i yaliy e pi n’en ni kan sunmiy. Ba ga’ ni baadag ni ma yaliy e pi n’ey u nap’an e ngiyal’ ni baaray ni ke tal ndakir aw e ayis ma ke tabab e woldug ni ngki sul nga rogon bayay u Canada. I yog ni gaar: “Rriyul’ ni yira ngat nga rogon ni ma sum boch ban’en, ni bod rogon e floras ni ke tugul nge arche’ ni ke sul u tomuren ni ke war e garbeb, ni ki mada’ ko nochi arche’ nib achig ni ka nog e hummingbird ngay ni ma yib nga bogi ban’en ni kug tay ni bay gan e arche’ riy u wuru’ e taang ko naun rog. Dabisiy nri gad ba t’uf rok Jehovah ni bochan urngin e pi n’ey ni ke pi’ ni ngad felfelan’gad ngay.” Ri ma felfelan’ e Chitamangidad ni bay u tharmiy ko pi n’en ni ke sunmiy, maku arrogodad ni baadag ni ngad felfelan’gad ko pi n’em.—Acts 14:16, 17.
5. Uw rogon ni ke m’ug e t’ufeg rok Jehovah u rogon ni ke sunmiy e girdi’?
5 Ke sunmiydad Jehovah nrayog ni ngad rin’ed boch e maruwel nib fel’ ma bay angin, ma pi n’ey e ma k’aring e felfelan’ ngodad. (Ekl. 2:24) Ba m’agan’ ngay ni nge sug e girdi’ u fayleng, mi yad par riy, mar suweyed e nig, nge arche’, nge urngin mit e yafas. (Gen. 1:26-28) Ma riyul’ ni ku gad ba t’uf rok Jehovah ni bochan e ke sunmiydad ni bay fel’ngin rodad, ma pi fel’ngin ney e ma ayuwegdad ni ngad folwokgad rok!—Efe. 5:1.
NGE GA’ FAN E THIN ROK GOT U WAN’UM
6. Mang fan nsusun e nge ga’ fan e Thin rok Got u wan’dad?
6 Ke pi’ Got e Thin rok ngodad ni bochan e gad ba t’uf rok. Bay riy e pi n’en nib t’uf ni ngad nanged u murung’agen nge rogon e ngongol rok ko girdi’. Bod ni be weliy e Bible murung’agen rogon ni i ngongol ngak piyu Israel kakrom ni yugu aram rogon ni boor yay nda ur folgad rok. Be yog e Psalm 78:38 (BT) ni gaar: “Got e ma runguy e girdi’ rok. I n’ag fan u wan’ e denen rorad ma de thang owcherad. Ba yoor yay ni i k’adan’ ko damumuw ngi i par nga daken gelngin e damumuw rok.” Faan ga ra fal’eg i lemnag e re thin nu Bible ney ma ra ayuwegem ni ngam nang nri gab t’uf rok Jehovah ma ma lemnagem. Arrogon, rib ga’ fam u wan’ Jehovah.—Mu beeg e 1 Peter 5:6, 7.
7. Mang fan nsusun e nge ga’ fan e Bible u wan’dad?
7 Thingari ga’ fan e Bible u wan’dad ni bochan e aram e gin ni ma non Got riy ngodad. Faanra ba fel’ e numon u thilin reb e gallabthir nge fak, ma aram e rayog ni nge gel e t’ufeg nge pagan’ u thilrow. Ma uw rogon Jehovah? Yugu aram rogon ndawor da guyed biid maku dawor da rung’aged laman, machane gowa bod ni ma “non” ngodad u daken e Bible. Ere, ba t’uf ni ngaud motoyilgad ngak. (Isa. 30:20, 21) Baadag Jehovah ni nge pow’iydad ni gadad e girdi’ rok ni kad ognaged e yafas rodad ngak, me ayuwegdad ndabi buch ban’en rodad. Ku baadag ni ngad nanged murung’agen nib fel’ rogon me pagan’dad ngak.—Mu beeg e Psalm 19:7-11; Proverbs 1:33.
8, 9. Mang e baadag Jehovah ni ngad nanged? Mu weliy ban’en ni buch ni bay murung’agen u Bible.
8 Baadag Jehovah ni ngad nanged ni gad ba t’uf rok, ma gathi yug ma par ni be sap nga rarogodad ni gad bogi tadenen, ya ku ma yaliy fel’ngidad. (2 Kron. 16:9) Ireray e n’en ni rin’ ngak Jehoshafat ni Pilung nu Judah. Immoy bayay ni dugliy Jehoshafat ban’en nde fel’. I m’agan’ ngay ni nge un ngak Ahab ni Pilung nu Israel ngar chamgow ngak piyu Syria u Ramoth-gilead. Yugu aram rogon ni micheg 400 e profet ni goo bogi ban’en ngak Ahab nra gel ko re cham nem, machane me yog Mikayah ni profet rok Jehovah ngak Jehoshafat ni faanra un ko re cham nem ma ra war. Ere, ni yan ko re mahl nem, min li’ Ahab nge yim’, miki chugur ni nge yim’ Jehoshafat. Nap’an ni sul Jehoshafat nga Jerusalem, me fanay Jehovah Jehu ni fak Hanani ni nge fonownag ko kireb ni ke rin’. Yugu aram rogon me yog Jehu ngak Jehoshafat ni gaar: “Yugu aram rogon, ma bay fel’ngim.”—2 Kron. 18:4, 5, 18-22, 33, 34; 19:1-3, BT.
9 Nap’an ni ka fini tabab Jehoshafat ko gagiyeg ndawori n’uw nap’an, me yog ko pi tolang, nge pi Levite, nge pi prist ni ngar milekaggad i yan u lan fare nam nu Judah ni ngar filed e Motochiyel rok Jehovah ko girdi’. Rib ga’ angin e n’en ni yog ni ngan rin’ ni bochan e k’aring e pi nam ni bay u toobrad ni nge yib madgun Jehovah u wan’rad. (2 Kron. 17:3-10) Riyul’ ni oloboch Jehoshafat, machane de fek Jehovah owchen ko pi n’en nib fel’ ni i rin’ u m’on riy. Re thin ney e be puguran ngodad ni yugu aram rogon ndawor da flontgad, machane faan gad ra athamgil ni ngaud rin’ed e tin nib m’agan’ Jehovah ngay, ma gubin ngiyal’ nra i t’ufegdad.
NGE GA’ FAN E MEYBIL U WAN’UM YA ARAM REB E TOW’ATH
10, 11. (a) Mang fan nrayog ni nga nog ni meybil e aram reb e tow’ath nrib manigil ni ke yib rok Jehovah? (b) Uw rogon nrayog ni nge fulweg Got taban e meybil rodad? (Mu guy e sasing ni bay u tabolngin e re article ney.)
10 Reb e matam nib t’uf pi fak rok e ma tay e tayim ni nge motoyil ngorad u nap’an ni yad be non ngak. Baadag ni nge nang e pi n’en ni bay u lanin’rad nge pi n’en ni be magafan’rad ngay ni bochan e ri ma lemnagrad. Jehovah ni ir e Chitamangidad ni bay u tharmiy e ma motoyil ngodad u nap’an ni gad ra non ngak u daken e meybil. Ma riyul’ ni ireray reb e tow’ath nrib manigil ni bay rodad.
11 Demtrug e ngiyal’ nrayog ni ngad nonad ngak Jehovah u daken e meybil. Ir e Fager rodad ma gubin ngiyal’ ni bay ni nge motoyil ko meybil rodad. Taylene ni faan kan weliy murung’agen e yog ni gaar: “Demtrug ban’en nrayog ni nga mog ngak.” Nap’an ni gad ra weliy ngak Got e pi n’en ni bay u fithik’ i lanin’dad, ma rayog ni nge fulweg taban e meybil rodad u daken reb e thin nu Bible, ara reb e article ko pi babyor rodad, ara fanay reb e walag ni nge pi’ e athamgil nga lanin’dad. Ma rung’ag Jehovah e pi n’en ni gad ma wenignag ngak. Mus ni faanra dariy be’ ni be nang fan rarogodad nib fel’ rogon, machane ir e manang. Pi meybil rodad ni ma fulweg taban e be micheg ndabi war e t’ufeg rok ngodad.
12. Mang fan nsusun e ngaud filed murung’agen e pi meybil ni kan yoloy nga lan e Bible? Mu weliy murung’agen reb e pi meybil ney.
12 Boor ban’en nrayog ni ngad filed ko pi meybil ni kan yoloy nga lan e Thin rok Got. Ere, bay yu ngiyal’ nib fel’ ni ngad weliyed murung’agen e pi meybil ney u nap’an e fol Bible ni tabinaw. Ya faan gad ra fal’eg i lemnag rogon ni i weliy e pi tapigpig rok Jehovah lanin’rad ngak kakrom, ma rayog ni nge ayuwegdad ni ngad mon’oggad u rogon ni gad ma meybil ngak Got. Am lemnag rogon e meybil ni tay Jonah u nap’an ni immoy u lan yin fare nig nib ga’. (Jonah 1:17–2:10) Mu kum sul ngam beeg fare meybil ni tay Solomon ngak Jehovah u nap’an nni madnomnag fare tempel ni ka fini m’ay i toy. (1 Ki. 8:22-53) Ma ga fal’eg i lemnag fare kenggin e meybil ni fil Jesus ngak pi gachalpen. (Matt. 6:9-13) N’en nth’abi ga’ fan ni ngam rin’ e ngaum ‘meybil ngak Got ma ga ning ngak e tin ni nge yog ngom.’ Ya faan ga ra rin’, ma ‘gapas rok Got ndabi chuchugur ni nge nang e girdi’ fan e ra yororiy gum’irchaem nge tafinay rom.’ Ma aram e ra i ga’ fan e t’ufeg rok Jehovah u wan’um nra par ndariy n’umngin nap’an.—Fil. 4:6, 7.
MU DAG NIB GA’ FAN FARE BIYUL U WAN’UM
13. Mang e rayog ni nge rin’ e girdi’ ni bochan fare biyul ni kan pi’?
13 Kan pi’ fare biyul ni maligach nib tow’ath ni bochan e nge “yog e yafos ngodad.” (1 John 4:9) I weliy apostal Paul murung’agen e re kanawo’ ney ni ke dag Got e t’ufeg rok riy ni gaar: “Me yim’ Kristus ni fan ngak e girdi’ nib tagan ko ngiyal’ ni turguy Got. Rib mo’maw’ ni nge pi’ be’ e pogofan rok nge yim’ ni fan ngak be’ nib mat’aw. Sana rayog ni nge pi’ be’ e pogofan rok nge yim’ ni fan ngak be’ nib fel’. Machane Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad.” (Rom. 5:6-8) Fare biyul ni ke pi’ Got e aram e bin th’abi fel’ e kanawo’ ni ke dag riy gelngin nri gad ba t’uf rok, ma re n’ey e ke bing e kanawo’ ko girdi’ ni nge fel’ e tha’ u thilrad Jehovah.
14, 15. Uw rogon fare biyul u wan’ e (a) pi Kristiano ni kan dugliyrad? (b) piin ni yad be athapeg e par u fayleng?
14 Bochan fare biyul, ma bay reb e ulung nib lich girdien ni ma t’ufegrad Jehovah u reb e kanawo’ ni yugu ba thil. (John 1:12, 13; 3:5-7) Bochan ni kan dugliyrad nga gelngin Got nib thothup, ma kar manged “pi fak Got.” (Rom. 8:15, 16) I yog Paul ni pi Kristiano ni kan dugliyrad e ‘kan unegrad ngak Kristus Jesus kan chuwegrad u tan e gechig rok Got ni ngar uned ngak Kristus Jesus ko gagiyeg ko bin nu tharmiy e tamilang.’ (Efe. 2:6) Ke yag e re tagil’ nem ngorad ni bochan e ke ‘ta’ Got e pow rok ngorad ni aram e kar manged girdien ni fan e pi’ gelngin nib thothup ngorad ni yog nra pi’, ni ke mudugil nrayog ngorad e tin ni ke yog Got nra pi’ ngak e tirok e girdi’’ ni aram e, ‘n’en ni ke l’agan’rad ngay, ni ir e be chaariy Got u tharmiy ni fan ngorad.’—Efe. 1:13, 14; Kol. 1:5.
15 Yooren e piin ni kar daged ko ngongol rorad ni ke mich fare biyul u wan’rad e ke mab e kanawo’ ngorad ni ngar manged fager rok Jehovah. Ma ra boch nga m’on ma ku yira pofrad ni ngar manged pi fak Got mar pared ndariy n’umngin nap’an u Paradis u fayleng. Ere, rriyul’ ni ke m’ug gelngin e t’ufeg rok Jehovah ngodad u daken fare biyul ni ke pi’. (John 3:16) Faanra gad be athapeg e yafas ndariy n’umngin nap’an u fayleng maku gad be ulul ni ngad pigpiggad ngak Jehovah u fithik’ e yul’yul’, ma rayog ni nge pagan’dad nra ayuwegdad ni ngari fel’ e par rodad u lan e bin nib beech e fayleng. Ere, rib puluw ni ngad daged nib ga’ fan fare biyul u wan’dad, ya aram e bin th’abi fel’ e kanawo’ ni ke dag Got gelngin fadad t’uf rok!
MU DAG NIB T’UF JEHOVAH ROM
16. Faanra ud fal’eged i lemnag urngin e kanawo’ ni ke dag Jehovah riy ni gad ba t’uf rok, ma mang angin nra yib ngodad?
16 Dabiyog ni ngad theeged urngin ban’en ni ke rin’ Jehovah ni fan ngodad ni be m’ug riy ni gad ba t’uf rok. I tang David ni fare psalmist ni gaar: “Got, rib mo’maw’ ni nggu nang fan e lem rom; ya pire’ ni ba’! Ra nggu theeg ma pire’ ko yan’.” (Ps. 139:17, 18) Faan gad ra fal’eg i lemnag urngin e kanawo’ ni ke dag Jehovah riy ni gad ba t’uf rok, ma ra k’aringdad ni ngari t’uf rodad ma gad pi’ e tin th’abi fel’ rodad ngak.
17, 18. Mang boch e kanawo’ nrayog ni ngad daged ngak Got nriyul’ nrib t’uf rodad?
17 Boor e kanawo’ nrayog ni ngad daged riy ngak Jehovah nib t’uf rodad. Bod ni gad ma dag nib t’uf Got rodad u daken fare maruwel ni gad ma tay ni aram e gad ma machibnag murung’agen Gil’ilungun Got ko girdi’ u fithik’ e pasig. (Matt. 24:14; 28:19, 20) Maku reb e, faan gad ra par ni gad ba yul’yul’ u fithik’ boch e skeng ni ma yib ngodad, ma aram e ra m’ug riy nriyul’ nib t’uf Jehovah rodad. (Mu beeg e Psalm 84:11; James 1:2-5.) Mus ni faanra rib gel e skeng ni ke yib ngodad, ma rayog ni nge pagan’dad ni manang Got e gafgow ni gad be tay ma ra ayuwegdad ni bochan e ba ga’ fadad u wan’.—Ps. 56:8.
18 T’ufeg rodad ngak Jehovah e ma k’aringdad ni ngad fal’eged i lemnag e pi n’en ni ke sunmiy ni yira ngat ngay. Gad ma dag nib t’uf Got rodad mab ga’ fan e Thin rok u wan’dad ni bochan e gad ma tedan’dad ni ngaud filed e Bible. Ku gad ma meybil ngak Jehovah ni gubin ngiyal’ ni bochan e ba t’uf rodad ma gad baadag ni ngari fel’ e tha’ u thildad. Maku reb e, nap’an ni gad ra fal’eg i lemnag fare biyul ni maligach ni ke pi’ Got ni fan ko denen rodad, ma ri ku ma gel feni t’uf rodad. (1 John 2:1, 2) Ireray boch e kanawo’ ni gad ma dag riy ngak Jehovah nrib ga’ fan e t’ufeg rok u wan’dad nra par ndariy n’umngin nap’an.