Athap ni Fan ko Piin ni Kar M’ad​—Uw Rogon Nrayog ni Ngari Mich u Wan’um?

Gur, de puluw ni ngan lemnag nra taw nga ba ngiyal’ ma ra fas e piin ni kar m’ad? Gathi aram rogon ni i lemnag apostal Paul. Nni thagthagnag nga laniyan’ ni nge yoloy ni gaar: “Faanra l’agan’ rodad ngak Kristus e ke mus ni fan ko biney e tamilang, me ere susun e gadad e piin ni ngari kireban’uy ngodad u roy u fayleng. Machane bin nib riyul’ e ka ni faseg Kristus ko yam’ [“ni ir e som’on u fithik’ e piin ni kar m’ad ni yira fasegrad,” NW], ni aram e mich riy ni piin ni kar m’ad e bay ku ni fasegrad ko yam’.” (1 Korinth 15:19, 20) Ba mich u wan’ Paul ni yira faseg e piin ni kar m’ad ko yam’. Ma fas ko yam’ ni tay Jesus e ir e micheg nriyul’ e re n’ey. (Acts 17:31) Aram fan ni yog Paul ni Jesus e ir e “som’on u fithik’ e piin ni kar m’ad ni yira fasegrad,” ya ir e som’on ni kan faseg ke yag e yafas ndariy n’umngin nap’an ngak. Ere, faanra Jesus e som’on, me ere ba tamilang ni ku bay boch e girdi’ ni ku yira fasegrad nga tomuren.

Ku baaray reb i fan nrayog ni ngari mich fare athap ko fas ko yam’ u wan’um. Jehovah e ir e Got ko tin riyul’. ‘Got e der ma ban.’ (Titus 1:2) Dawori ban Jehovah, maku dariy biid nra ban. Ere gur, rayog rok ni nge micheg nra faseg e piin ni kar m’ad, miki dag nrayog ni nge rin’, ngemu’ ma dabi lebguy e n’en ni ke micheg? Ri dabiyog ni nge rin’ ban’en ni aram rogon!

Mang fan ni ke bing Jehovah e kanawo’ nrayog ni ngan faseg e piin ni kar m’ad boch nga m’on? Bochan e t’ufeg rok. I fith Job ni gaar: “Faanra yim’ be’, ma gur ku rayog ni ngki fos bayay? Ma aram e bay mu pong, mu gu fulweg, ma bay gu fel’ u wan’um. Ga be yim’ ni bochan e tin ni kam sunumeg.” (Job 14:14, 15, NW) Ba mich u wan’ Job nnap’an nra yim’ ma ra adag e Chitamangin ni bay u tharmiy ni nge faseg ko yam’. Ere gur, ke thil Got? Ke yog ni gaar: “I gag e Somol ma ri dab gu thil.” (Malaki 3:6) Ka be athapeg Got ni nge guy e piin ni kar m’ad ni kar fasgad, ma yad be par ni ke fel’ fithik’ i dowrad ma yad ba felfelan’. Ireray e n’en ni ma yim’ be’ ni bochan ni nge buch u tomuren nra yim’ fak nrib t’uf rok. Machane, n’en nib thil riy e gad manang ni Got e bay gelngin ni nge rin’ urngin e tin nib m’agan’ ngay.​—Psalm 135:6.

Ra pi’ Jehovah gelngin Fak ni nge felfelan’nag e piin ni ke kireban’rad ni bochan e ke yim’ be’ nib t’uf rorad. Ma uw rogon e fas ko yam’ u wan’ Jesus? U m’on ni faseg Jesus Lazarus ko yam’, me guy gelngin e kireban’ ni tay fagali ppin ni walagen nge pi fager rorad, ma aram “me yor Jesus.” (John 11:35) Ku immoy bayay ni mada’nag Jesus be’ nib pin nu Nain ni ke yim’ figirngin ma kki yim’ e taare pagel ni fak. Ere, faani guy Jesus e re ppin nem “me taganan’ ngak me gaar ngak fare pin, ‘Dakumur yor.’” Ma ka chingiyal’ nem me faseg fare pagel ni fak fare pin. (Luke 7:13) Ere, ri ma runguy Jesus e piin ni ke kireban’rad ni bochan e ke yim’ be’ nib t’uf rorad. Ma rib gel e felfelan’ nra tay u nap’an nra chuweg e kireban’ ni be tay e girdi’ u ga’ngin yang e fayleng me k’aring e felfelan’ ngorad!

Bay ba ngiyal’ ni ke kireban’um ni bochan e ke yim’ be’ nib t’uf rom, fa? Sana rayog ni ngam lemnag ni yam’ e aram reb e magawon ndariy e puf riy. Machane, bin riyul’ riy e bay e puf ko re magawon ney, ya ra faseg Got e girdi’ u daken Fak. Dab mu pagtalin ni baadag Got ni ngam guy e re n’ey ni ke buch. Baadag nnap’an nra faseg e piin ni kar m’ad ni yad ba t’uf rom, ma ga bay u rom ni ngam mada’nagrad mi gimed gumuchmuch nga taabang. Am susunnag ni gimed be weliy e pi cha’nem e n’en ni ngam rin’ed e ngiyal’ nem ni ke yag e yafas ndariy n’umngin nap’an ngomed, ma dakuriy e ngiyal’ ni ku ra yan bigimed nga bang!

Lionel ni faan kan weliy murung’agen faram e yog ni gaar: “Munmun mug fil murung’agen e fas ko yam’. Som’on e ba mo’maw’ ni nge mich e re n’ey u wan’ug, ma da i pagan’ug ngak e piin ni ur weliyed murung’agen e pi n’ey ngog. Machane, nap’an ni gu yaliy e Bible mfin gguy nib riyul’ e pi n’ey! Dabkiyog ni nggu son nge taw ko ngiyal’ ni ngguy e tutuw rog bayay.”

Ga baadag ni ngkum nang boch? Rib felfelan’ e Pi Mich Rok Jehovah ni ngar daged ngom ko Bible rom fan nib mich u wan’rad nra boch nga m’on ma yira faseg e piin ni kar m’ad.a