“Ri Yad Be Sonnag”

“Urngin e pi n’en ni sunmiy Got e ri yad be sonnag e chirofen ni bayi flaabnag Got pi fak.”​—ROMA 8:19.

1. Uw rogon nib taareb rarogon e pi Kristiano ko ngiyal’ ney nge pi Kristiano u nap’an e bin som’on e chibog?

RAROGON e tin riyul’ e Kristiano ko ngiyal’ ney e taareb rogon ko pi Kristiano u nap’an e bin som’on e chibog. Reb e thin ko profet e ke ayuweg e pi tapigpig rok Jehovah ko ngiyal’ nem ngar nanged ko wuin nra m’ug fare Messiah. (Daniel 9:24-26) Re thin ko profet nem e ke yiiynag ni ran thang yu Jerusalem machane der yog ban’en nra tamilangnagan’ e pi Kristiano u m’on riy nge ngiyal’ nran thang e re binaw nem. (Daniel 9:26b, 27) Ku arrogon e pi Bible student u nap’an e bin 19 e chibog ni reb e thin ko profet e ke n’igin ni ngar sonnaged ban’en. Kar lemnaged ni ran pilungnag Kristus ko duw ni 1914 ya ur puthuyed fa “medlip e ngiyal’” ni bay ko Daniel 4:25 nge “fa ngiyal’ ni fan ko piin ni gathi yad piyu Israel.” (Luke 21:24, King James Version; Ezekiel 21:25-27) Boor e thin ni kan yiiynag u lan e babyor rok Daniel, machane dariy reb riy ni be ayuweg e pi Bible student ko ngiyal’ ney ni ngar nanged ko ri wuin ni ran thang e m’ag rok Satan. (Daniel 2:31-44; 8:23-25; 11:36, 44, 45) Machane, ra buch ndabki n’uw nap’an, ya gad be par ko “ngiyal’ ko tomur.”​—Daniel 12:4.a

Thingarni Par ni Yibe Changar u Nap’an e Ngiyal’ ni Ba’ Kristus

2, 3. (a) Mang e n’en nth’abi ga’ fan ni be micheg ni gad be par ko ngiyal’ ni bay Kristus ni kan pilungnag? (b) Mang e ma dag ni thingari par e pi Kristiano ni yad be changarnag ban’en u nap’an e ngiyal’ ni bay Jesus Kristus?

² Rriyul’ ni reb e thin ko profet e ke n’igin ni nge sonnag e pi Kristiano e ngiyal’ nran pilungnag Kristus ko duw ni 1914. Machane fare “pow” ni pi’ Kristus ko ngiyal’ nra moy nge ngiyal’ ntomren e re m’ag ney e aram boch ban’en nra buch. Ma baga’ ni ra m’ug e pi n’ey u tomren ni ke tabab ko ngiyal’ ni ba’. Pi n’en nra buch ni​—mahl, nge uyungol, nge durru’, nge m’ar ni ma af nib machreg, nge danir fol ko motochiyel, nge gafgownag e pi Kristiano, nge ngan machibnag e thin nib fel’ ko Gil’ilungun Got u ga’ngin e fayleng​—pi n’ey e be micheg ni gad be par ko ngiyal’ ni ba’ Kristus ma kan pilungnag.​—Matthew 24:3-14; Luke 21:10, 11.

³ Machane, kenggin e n’en ni yog Jesus ngak pi gachalpen e: “Nguum gayed, nguum pared nib od, . . . nguum changargad.” (Mark 13:33, 37; Luke 21:36) Faanra ngan fl’eg i yaliy e pi thin ney u morngaagen e ngan par ni yibe changarnag ban’en ma be dag ni gathi ke mus ni be weliy Kristus ni ngan changarnag e pow ko tabolngin e ngiyal’ ni ba’. Ya be yog ko pi gachalpen ni ngar pared ni yad be changarnag ban’en u nap’an e ngiyal’ ni ba’. Ere mang e thingari changarnag e pi Kristiano?

4. Fare pow ni pi’ Jesus e fan ko mang?

⁴ Pi’ Jesus e re thin ko profet nem ni bochan e deer ni kan fith ngak ni gaar: “Wuin e ra yib urngin fapi n’en ni ka mog [pi n’en nra buch u m’on nra thumur e m’ag ko yu Jew], nge n’en nra yib ni nge dag ni ke taw ko ngiyal’ ni bay mub riy nge ngiyal’ ni tomren e fayleng?” (Matthew 24:3) Fare pow ni kan yiiynag e ra tamilangnag e ngiyal’ ni bay Kristus nge pi n’en nra buch u m’on ni ran thang e re m’ag nib kireb ney.

5. Uw rogon ni dag Jesus ni yugu aram rogon ni ra moy u rogon nib spiritual, machane ka bay e “wub” rok?

⁵ I dag Jesus ni nap’an e ngiyal’ ni “ba’” (Greek, pa·rou·siʹa) ma ra yib nib gel gelngin mab rir. Ke weliy u morngaagen e “wub” rok (ni aram e thin nu Greek ni erʹkho·mai), ni gaar: “Ma aram e bayi m’ug e pow ko en ni Fak e girdi’ u lan e lang; ma aram e urngin e ganong nu fayleng ni bay ra yorgad, ma bay ra guyed e en ni Fak e Girdi’ ni be yib nga but’ u daken e manileng ni bay gelngin ma rib galgal ramaen. . . . Baaray ban’en ni ngam nanged rok e gek’iy ni fig. Ngiyal’ nra galunglung papa’ngin ma ke mirerey me tabab yuwan ko puf, ma aram e kam nanged ni ke chugur ni nge taw ngal’an e gowel. Ere ku er rogon ni ngiyal’ ni gimed ra guy e pi n’ey ni urngin ni be m’ug, ma aram e kam nanged ni fare ngiyal’ i n’em ni nge yib [Kristus] e ke chugur, ni aram e nge tabab. . . . Ere mu fal’eged rogomed ngam pired, ya da mu nanged e chirofen ni bay yib e Somol romed riy. . . . Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.”​—Matthew 24:30, 32, 33, 42, 44.

Mang Fan Nra Yib Jesus Kristus?

6. Uw rogon ni ran thang “Babylon nib Gilbuguwan”?

⁶ Yugu aram rogon ni kan pilungnag Jesus Kristus ko duw ni 1914, machane ku thingar ki pufthinnag e re m’ag ney nge girdi’ riy u m’on ni nge gechignag e piin nib kireb. (Mu taarebnag ko 2 Korinth 5:10.) Dabki n’uw nap’an ma ra tay Jehovah nga laniyan’ e pi tayugang ko am ni ngar thanged “Babylon nib Gilbuguwan,” ni aram e pi yuraba’ i teliw ni googsur. (Revelation 17:4, 5, 16, 17) Yog apostal Paul ni ra thang Jesus Kristus mit “faanem nib kireb”​—ni aram e pi tayugang ko Kristendom ni yad e apostate, ni yad bang ko “Babylon nib Gilbuguwan.” I yoloy Paul ni gaar: “Ma aram e bay m’ug faanem nib kireb, mi Somol Jesus e bayi pag athon l’ugun ngak nge li’ ngem’ me kirebnag nga ramaen nib galgal ko ngiyal’ nra moy riy.”​—2 Thessalonika 2:3, 8.

7. Nap’an nra yib fa en ni Fak e girdi’ nib rir, ma uw rogon e pufthin nra tay?

⁷ Dabki n’uw nap’an ma ra pufthinnag Kristus e girdi’ ko pi nam u daken e ngongol rorad ngak pi walagen u fayleng. Kan yoloy ni gaar: “Ngiyal’ nra yib e en ni Fak e girdi’ riy ni ke pilung, ni ke un urngin e pi engel ngak, e bay par nga tagil’ nib pilung, ma urngin girdien e pi nam nu fayleng ni bay ni kunuyrad nga p’eowchen. Me ere weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik e kaming. Bayi tay e saf nga ba’ ni mat’aw rok, me tay e kaming nga ba’ ni gilay’ rok. . . . Bayi gaar fare pilung [ngak e saf], ‘Ngari gog ngomed, yu ngiyal’ ni um rin’ed e pi n’ey ni fan ngak bagayad e pi cha’ney nth’abi sobut’ u fithik’ e pi cha’ ni pi walageg ney e kam rin’ed ngog.’ . . . Ma [pi kaming] e bay ni pi’rad ko gechig ndariy n’umngin nap’an; ma piin ni yad mmat’aw e bay ranod ko yafos ndariy n’umngin nap’an.”​—Matthew 25:31-46.

8. Mang e weliy Paul u morngaagen e ngiyal’ nra yib Kristus ni nge pufthinnag e piin dar folgad ku Got?

⁸ Fare fanathin u morngaagen e saf nge kaming e be dag ni Jesus e ra gechignag urngin e piin ndar ma folgad rok Got. I yog Paul ko pi walag ni be un ko gafgow ni “bayi chuweg e gafgow romed e piin ni gimed be gafgow, ma ku er rogon ni bay rin’ ngomad. Ra rin’ e re n’ey ko ngiyal’ nra m’ug Somol Jesus u lan e lang ni ke yib u tharmiy ni yad e pi engel rok nib yargel, nge nifiy ni be daramram, ni nge gechignag e piin nde t’uf rorad ni ngar nanged murung’agen Got nge piin ndarir folgad ko thin nib fel’ ni yib rok Got ni murung’agen e Somol rodad i Jesus. Bay ra gafgowgad ko gechig ni ngan pi’ ngorad ni aram e gafgow ni ngar tiyed ndariy n’umngin nap’an, ma kan ta’rad nga bayang ndab ra uned ko gin ni bay Somol riy ma dab ra guyed gelngin Got nib th’abi fel’, ya re Rran ni baaram nra yib ni nge yog urngin e girdi’ rok e sorok ngak, me tay urngin e girdi’ nib mich u wun’rad fan.” (2 Thessalonika 1:7-10) Boor ban’en nib fel’ e bay nga m’on rodad, me ere gathi susun ni ngad pared nib gel e michan’ rodad ma ngad pared ni gad be changarnag e ngiyal’ nra yib Kristus riy?

Yibe Sonnag e Ngiyal’ Nra M’ug Kristus

9, 10. Mang fan ni be sonnag girdien fachi ulung u fayleng e ngiyal’ nra m’ug Jesus Kristus?

⁹ “Ngiyal’ nra m’ug Somol Jesus u lan e lang ni ke yib u tharmiy” e gathi ke mus ni ra pi’ e gechig ko piin nib kireb ya ku ra tow’athnag e piin mat’aw. Tin ni ka bay ko pi walagen Kristus ni kan dugliyrad u fayleng e sana ra un ko gafgow u m’on ko ngiyal’ nra m’ug Kristus, machane yad ba falfalan’ ni bochan e ke l’agan’rad ko par u tharmiy. I yoloy Peter ngak e pi Kristiano ni kan dugliyrad ni gaar: “Ngam felfelan’gad ni gimed be un ko gafgow ni i tay Kristus, nge yog ni ngar mu felfelan’gad ko ngiyal’ ni bay yib i m’ug ni be galgal ramaen.”​—1 Peter 4:13.

¹⁰ Piin ni kan dugliyrad e ke mudugilan’rad ni ngar pared nib yul’yul’ nge yan i mada’ ko ngiyal’ ni ra ‘ulunguyrad Kristus ngak’ ma bochan e “michan’ rorad ni kan sikengnag” ma aram e “ran nog e sorok ngorad, me yog e flaab ngorad min ta’ farad ko chirofen nra yib i m’ug Jesus Kristus riy.” (2 Thessalonika 2:1, NW; 1 Peter 1:7) Kan weliy u morngaagen e pi Kristiano ni kan dugliyrad ma yad ba yul’yul’ ni gaar: “Murung’agen Kristus e kari mudugil u lanin’med, ma urngin e tow’ath ni ma pi’ Got e goo ke pi’ ngomed, ma gimed be sonnag e Somol rodad i Jesus Kristus ni nge yib i m’ug.”​—1 Korinth 1:6, 7.

11. Mang e be rin’ e pi Kristiano ni kan dugliyrad u nap’an ni yad be sonnag e ngiyal’ nra m’ug Jesus Kristus?

¹¹ Piin ni kan dugliyrad e taareb lanin’rad Paul ko thin ni ke yoloy ni gaar: “Gu be tafinaynag ni gafgow ni gadad be tay e chiney e dabi chuchugur ni nge taareb rogon ko flaab ni dawor da guyed ma be sonnagdad.” (Roma 8:18) Michan’ rorad e de tor nga daken e yu ngiyal’ ni kan sumarnag. Ya yad ma par ni boor e maruwel ni yad be tay ko pigpig ku Jehovah, ma yad be dag e kanawo’ ni nge fol girdien “yugu boch e saf” riy. (John 10:16) Pi girdi’ ney ni kan dugliyrad e goo yad manang ni ke chugur nga tungun e re m’ag nib kireb ney, ma yad ma fol ko n’en ni yog Peter ni gaar: “Mu faleged rogon lanin’med ni ngam ngongolgad. Mi gimed tiyan’med ngarim l’agedan’med ko tow’ath ni yira pi’ ngomed ko ngiyal’ nra yib i m’ug Jesus Kristus.”​—1 Peter 1:13.

“Tin ni Sunmiy Got e ri Yad be Son”

12, 13. Uw rogon ma be par e girdi’ nib “m’ay fan,” ma mang e ke l’agan’ girdien yugu boch e saf ngay?

¹² Ma girdien yugu boch e saf e ku yad e bay ban’en ni ri yad be sonnag fa? Ri arrogon. Ya tomren ni weliy Paul morngaagen e athap ko piin ni ke fakayrad Jehovah ni yad pi “fak” ma yad ra “un ngak Kristus ngar fanayed e tin ni ke tay Got ni fen” ko Gil’ilungun u tharmiy, ma aram me gaar: “Urngin e pi n’en ni sunmiy Got e ri yad be sonnag e chirofen ni bayi dag Got pi fak. Ya tin ni sunmeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”​—Roma 8:14-21; 2 Timothy 2:10-12.

¹³ Bochan ni denen Adam ma urngin pi fak e be un ko par nib “m’ay fan” ya ni gargelnagrad ni yad e sib ko denen nge yam’. Ma de yog ni ngar pithiged yad ko re n’em. (Psalm 49:7; Roma 5:12, 21) Ri ba adag girdien yugu boch e saf ni ngar “pared ni gathi yad e sib rok e wod”! Machane u m’on nra buch e re n’em ma thingari buch boch ban’en ni ke dugliy Jehovah u rogon nib m’ag ko yu ngiyal’ nge ngalan’ ni ke turguy.

14. Uw rogon ni ran “dag pi fak Got” ma uw rogon ni ran pithig e girdi’ “ndabkura pired ni yad e sib rok e wod”?

¹⁴ Ya som’on ma thingari ‘dag’ Got e tin ni ka bay ni girdien fachi ulung ni yad “pi fak.” Mang fan e re n’ey? Ngiyal’ nib m’ag rok Got ma ra tamilangnagan’ girdien yugu boch e saf ni ke m’ay i “dugliy” girdien fachi ulung ma kan rirnagrad ni ngar uned ngak Kristus ko gagiyeg. (Revelation 7:2-4) “Pi fak Got” ni kan fasegrad ko yam’ e ku ra yira ‘dag’ rad u nap’an ni yad ra un ngak Kristus mi yad gothey e m’ag rok Satan nib kireb. (Revelation 2:26, 27; 19:14, 15) Ma aram, nap’an fare Biyu’ e Duw ko Gagiyeg Rok Kristus ma ku yira ‘dag’ rad ni yad e pi prist ni ra yibnag angin e biyul’ ni pi’ Jesus ni maligach ni fan ko “tin ni sunmiy Got.” Ma angin nra yib riy e ran pithig e girdi’ ndabkura pared ni “yad e sib rok e wod” ma munmun mi yad un ko “flaab rok pi fak Got.” (Roma 8:21; Revelation 20:5; 22:1, 2) Rib fel’ e re n’em ni bay nga m’on rorad me ere dabni gin ngay ni girdien yugu boch e saf e ri yad be “sonnag e ngiyal’ nra dag Got pi fak”​—Roma 8:19.

Gum’an ni be Tay Jehovah e ra Ayuweg e Girdi’ Ngar Thapgad Ngak

15. Mang e susun ri dabda paged talin u morngaagen e yu ngiyal’ ni ke turguy Jehovah ni nge rin’ ban’en?

¹⁵ Jehovah e ir e An ni ma dugliy Ngal’an. Ra yan i aw nib flont rogon ni ke dugliy e ngiyal’ nra buch boch ban’en. Sana gathi be buch boch ban’en u rogon ni gad ba adag. Machane, rayog ni nge mich u wan’dad ni ra lebug urngin ban’en ni ke yog Got nra rin’. (Joshua 23:14) Sana be pag ba ngiyal’ nib n’uw nap’an ma gathi aram rogon ni kad lemnaged. Machane ngad athamgilgad ni ngad nanged fan e kanawo’ rok ma ngad n’ufed e gonop rok. I yoloy Paul ni gaar: “Ri baga’ e flaab rok Got! Ma rib toar e gonop rok nge llowan’ rok! Mini’ e rayog ni nge weliy rogon ni ma turguy Got ban’en? Mini’ e manang rogon kanawoen ni ma maruwel? Ni bod rogon ni be yog e babyor nib thothup ni be gaar: ‘Mini’ e manang laniyan’ [Jehovah, NW]? Mini’ e rayog rok ni nge fonownag?’”​—Roma 11:33, 34.

16. Chon mini’ e ra yib angin ngorad ni bochan e gum’an’ ni be tay Jehovah?

¹⁶ I yoloy Peter ni gaar: “Pi tafager rog, n’umngin nap’an ni gimed be par ni gimed be sonnag e re Rran nem [ni ran thang e bin kakrom e “tharmiy” nge “fayleng” min tay e “bin nib biech e tharmiy” nge “bin nib biech e fayleng” rok Got nga luwan] e nguum athamgiliyed ngam pired ni gimed machalbog, ma dariy thibngimed u p’eowchen Got ma ngam pired nib aw e gapas u thilmed Got. Mu lemniged e gum’an’ rok e Somol rodad, ni aram e tayim ni be pi’ ngomed ni ngam guyed rogon ngkam thapgad ngak.” Bochan ni ke gum’an Jehovah ma ku rayog ko bokum milyon e girdi’ ni ngar magaygad nib fas ko fare “rran rok Jehovah” ni bayi yib ni bod “ba mororo’.” (2 Peter 3:9-15) Maku bochan ni be gum’an’ u puluwdad ma rayog ni ngad ‘ngongolgad ni ba’ madgun Got u wun’dad mu ud t’ongad ko marus nge mada’ ko ngiyal’ ni kad thapgad ngak Got.’ (Filippi 2:12) Yog Jesus ni thingarda ‘tedan’dad ngodad’ ma ngad pared nib “od” ma aram e nge felan’ Got ngodad ma gad yan ngad “sak’iygad nga p’eowchen e en ni Fak e girdi’” ko ngiyal’ nra yib ko pufthin.​​—Luke 21:34-36; Matthew 25:31-33.

Nguud Sonniged U Fithik’ e Gum’an’

17. Mang e yog apostal Paul ni susun ni ngad ted nga gum’ercha’dad?

¹⁷ Yog Paul ko pi walag nib spiritual ni “gathi pi n’en ni yibe guy nga owchey e ir e ke l’agan’rad ngay, ya pi n’en ndanir guy nga owchey.” (2 Korinth 4:16-18) Ya ba adag ni dariy ban’en nra n’igin nde gagiyel e taw’ath ni bay nga m’on rorad ni aram e par u tharmiy. Demtrug ko gad e pi Kristiano ni kan dugliy ara girdien yugu boch e saf, ma nguud lemniged fare athap nib fel’ ni bay nga m’on rodad ma dabda paged gadad. Nguud ‘sonniged u fithik’ e gum’an’,’ ma gad micheg ni “gathi gadad e piin ni kar pied keru’rad ngak Got kar maloggad; ya gadad e ke michan’dad ngak Kristus kad thapgad ngak Got.”​—Roma 8:25; Hebrews 10:39.

18. Mang fan nrayog ni nge pagan’dad ku Jehovah ni nge turguy e nap’an nge ngal’an nra rin’ boch ban’en?

¹⁸ Rayog ni nge pagan’dad ku Jehovah ngad paged ni nge turguy e nap’an nge ngal’an. Ya ra lebug e tin ni ke micheg ma “dabi sowath” u rogon ni ke turguy. (Habakkuk 2:3) Ma n’en ni yog Paul ku Timothy e bay fan ngodad. I gaar: “Ri gu be ta’ chilen ngom u p’eowchen Got nge Kristus Jesus ni ir e bayi pufthinnag urngin e girdi’, ni piin ni ka yad ba fos nge piin ni kar m’ad: ere bochan e wub rok nge gagiyeg rok ma aram fan ni gu be ta’ chilen ngom ni ngam machibnag e thin rok Got ko girdi’ ndemtrug ko kari mab e kanawo’ ngom fa dawor. . . ma ga rin’ e maruwel rok e tamachib ko thin nib fel’ ni yib rok Got, ma ga ngongliy urngin e maruwel ni kan pi’ ngom nrogon e tapigpig rok Got.”​—2 Timothy 4:1-5.

19. Ke turguy Jehovah ni ereray e ngiyal’ ni ngan rin’ e mang ma mang fan?

¹⁹ Yafas ko girdi’ e ba l’ag ngay​—ni yafas rodad nge piin buguli yoror rodad. I yoloy Paul ni gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Ba ngoch e tayim ni ka bay ko re m’ag nib kireb ney. Nap’an ni gad be sonnag e tin nib fel’ ni bay nga m’on rodad ma dabda paged talin ni ereray e ngiyal’ ni ke turguy Jehovah ni nge wereg e girdi’ rok fare thin nib fel’ u morngaagen Gil’ilungun. Thingar nrin’ e re maruwel nem u rogon ni ba adag Got. “Ma aram,” e gaar Jesus, “mfini taw nga tomren e fayleng.”​—Matthew 24:14.

[Boch e Thin nra Tamilangnag Murung’agen]

Ngan Sul Nga Daken

◻ Uw rogon nib taareb rarogodad ko pi Kristiano u nap’an e bin som’on e chibog ni fan ko yu ngiyal’ ni kan sumarnag?

◻ Mang fan ni thingari par e pi Kristiano ni yad be “changarnag ban’en” ko ngiyal’ ni bay Kristus?

◻ Mang fan ni ri be sonnag e girdi’ e ngiyal’ nran “dag pi fak Got”?

◻ Mang fan nrayog ni ngad pagedan’dad ku Jehovah ni nge turguy e nap’an nge ngal’an ni nge rin’ boch ban’en?

[Sasing ko page 14]

Thingari par e pi Kristiano ni yad ba od ni yad be sonnag e wub rok Kristus

[Sasing ko page 16]

Ma par girdien fachi ulung ni boor ban’en ni yad be rin’ ko pigpig ku Jehovah, ma de tor e michan’ rorad nga daken e yu ngiyal’ ni kan sumarnag