Ke Yog Ngom “Gelngin Fare Thin Riyul’”?

“En ni Chitamangiy . . . e ra pi’ ngomed yugu reb e ta ayuw ni nge par romed ndariy n’umngin nap’an, ni eram gelngin fare thin riyul’.”—JOHN 14:16, 17, New World Translation.

1. Mang e thin nib ga’ fan ni ke pi’ Jesus ngak pi gachalpen u nap’an e bin tomur e awa ni chag ngorad u lan fare singgil ko thal ni lang?

“SOMOL, u uw e ngam man ngay?” Ereram reb ko fapi u fithik’ e pi deer ni ke fith e pi apostal rok Jesus ngak u nap’an e bin tomur e awa ni par rorad u lan fare singgil u Jerusalem ko thal ni lang. (John 13:36) Nap’an ni yad be muulung, me yog ngorad ni ke taw nga nap’an ni nge chuw rorad ma ra sul ngak e Chitamangin. (John 14:28; 16:28) Dabkiyog ni nge par rorad ni nge skulnagrad mi i fulweg e pi deer rorad. Machane, i micheg ngorad ni gaar: “Bay gu wenig ngak e en ni Chitamangiy, nge pi’ yugu reb e taayuw ngomed [ara, tama fal’eg lanin’uy] ni nge par romed ndariy n’umngin nap’an.”—John 14:16, NW footnote.

2. Mang e i micheg Jesus ni nge l’og ngeb ngak pi gachalpen u tomren ni ke chuw rorad?

² I tamilangnag Jesus ngan nang fare taayuw me weliy rogon ni nra ayuweg fapi gachalpen ni gaar: “Da kaa gog e pi n’ey ngomed ko som’on, ya gu ba’ romed. Machane chiney e nggu wan ngak e en ni ke l’ugeg ku gub . . . Machane nggog e tin riyul’ ngomed: kab fel’ ngomed ni gu ra yan, ya faanra dab gu wan, ma en ni nge ayuwegmed e dabi yib ngomed. Ma faan gu ra yan ma gu ra pi’ nge yib ngomed. . . . Ngiyal’ nra yib fare Kan ni Thothup ni ma dag e tin riyul’ e bayi pow’iymed ngam nanged urngin e tin riyul’.”—John 16:4, 5, 7, 13.

3. (a) Wuin e kan l’og “gelngin fare thin riyul’” keb ngak e piin Kristiano kakrom? (b) Mang reb e kanawo’ nib ga’ fan ni gelngin fare kan ni thothup e ir e “taayuw” rorad?

³ Re thin ney e ke lebug ko Pentecost 33 C.E., nrogon ni weliy Peter ni apostal ni gaar: “I Got e ke faseg e cha’nem i Jesus ko yam’, nre bugithin ney e gamad gubin ni gamad e mich riy. Kan faseg ke yan i par nga ba’ ni mat’aw rok Got ma ke pi’ Got fare Kan ni Thothup ngak, ni bod rogon ni yog e Chitamangin; ma n’en ni gimed be guy e chiney ma gimed be rung’ag e tow’ath rok ni ke puog nga dakenmad.” (Acts 2:32, 33) Rogon e n’en ni gad ra guy taaboch, e fare kan ni thothup ni kan puog u nap’an e Pentecost ni ke lebuguy boor ban’en ni fan ngak e tin kakrom e Kristiano. Machane i micheg Jesus ni “gelngin fare thin riyul’” e ra ‘ayuwegrad nge yib ngan’rad urngin e tin ni ke weliy ngorad.’ (John 14:26) Ra ayuwegrad e re n’ey ni nge mit ngorad fare machib ni i ta’ Jesus nge pi n’en ni ke fil, ni mus ko fapi thin rok, mar yoloyed e pi n’ey nga but’. Re n’en ney e ri ayuweg John ni apostal ni ke pilibthir u tomuren fa bin som’mon e chibog C.E. u nap’an ni tabab ni nge yoloy fare Gospel rok. Re chep nem a ba l’ag ngay e fonow nib ga’ fan ni ke pi’ Jesus u nap’an ni ke tababnag fare Puguran ko yam’ ni tay’.—John, chapters 13-17.

4. Uw rogon ni “gelngin fare thin riyul’” e ma ayuweg e piin Kristiano kakrom?

⁴ Maku i micheg Jesus ngak pi gachalpen kakrom ni fare gelngin era ‘fil urngin ban’en ngorad’ ma ra ‘pow’iyrad ngar nanged e tin riyul’.’ Fare gelngin e ra ayuwegrad ni nge tamilang uwan’rad e thin rok Got nib toar fan ma ra ayuwegrad ni nge taareb e lem rorad, nge tamilangan’, nge tin nib m’agan’ ngay. (1 Korinth 2:10; Efesus 4:3) Arfan ni fare kan ni thothup e ke pi’ gelngin fapi Kristiano kakrom ni ngara rin’ed e maruwel rorad ni yad fare “tapigpig nib yul’yul’ mab gonop” ni yad ma pi’ ko fapi Kristiano ni kan dugliyrad e ggan nib spiritual “u ngalan’.”—Matthew 24:45.

Fare Kan ni Thothup e Be Micheg

5. (a) Mang athap ni ke bing Jesus ngak pi gachalpen ko fare nep’ ni Nisan 14, 33 C.E.? (b) Mang maruwel nra rin’ fare kan ni thothup nge lebuguy e tin ni ke micheg Jesus?

⁵ Re nep’ ni Nisan 14, ko 33 C.E., e i tamilangnag Jesus ngak pi gachalpen ni bay fini fekrad nga ra pared rok nge Chitamangin u tharmiy. I yog ngorad ni gaar: “Pire’ e singgil ni bay u lan e naun rok e Chitamag, me ere nggu wan gu ngongliy tagilmed. Faan mang e gathi aram rogon ma dab gog ngomed e re bugithin ney. Ma nap’an ni gu ra yan gu ngongliy tagil’med, ma bay gu sul nggu fekmed, ni aram e bay um pired ko gin ni gu ba’ riy.” (John 13:36; 14:2, 3) Yad ra un ko gagiyeg u Gil’ilungun. (Luke 22:28-30) Rayog ni nge yog ngorad e re athap ney nga ranod nga tharmiy, ma ba t’uf ni ngani “gargelnagrad ko kan ni thothup” mi yad mang pifak Got nib spiritual min dugliyrad ngar manged pilung nge prist u tharmiy.—John 3:5-8; 2 Korinth 1:21, 22; Titus 3:5-7; 1 Peter 1:3, 4; Revelation 20:6.

6. (a) Wuin e ke tabab e pong ni ngan pining be’ nge yan nga tharmiy, ma in e girdi’ ni yibe piningrad? (b) Piin ni kan piningrad e kan taufenagrad ko mang?

⁶ Ke tabab e “pong ko yan nga tharmiy” u nap’an e Pentecost 33 C.E. ma be m’ug ni ke m’ay e re maruwel ney u lukngun e pi duw ni 1930. (Hebrews 3:1) Ma urngin e piin ni ke tay fare kan ni thothup e pow ngorad ni ngar manged bang ko fare Israel nib spiritual e 144,000 oren, ni kan “biyuliyrad u fithik’ e girdi’ nu fayleng.” (Revelation 7:4; 14:1-4) Kan taufenagrad ngar manged bang ko dowef rok Kristus nib spiritual, nge ulung rok, nge yam’ ni tay. (Roma 6:3; 1 Korinth 12:12, 13, 27; Efeses 1:22, 23) Tomren ni kan taufenagrad ko ran min dugliyrad ko kan ni thothup, ma kar uned nga reb e yafas ni kara paged parad, ni aram ngar yul’yul’gad nge mada’ ko yam’.—Roma 6:4, 5.

7. Mangfan nib puluw ni kemus ni piin ni kan dugliyrad e bay rogorad ni ngar ked e flowa mar unumed e wine ni be yip’ fan ban’en u nap’an fare Puguran?

⁷ Bochan e yad piyu Israel nib spiritual, ma aram fa piin Kristiano ni kan dugliyrad ni yad bang ko fare m’ag nib beech ni kan ngongliy ni fan ku Jehovah nge “fare Israel rok Got.” (Galatia 6:16; Jeremiah 31:31-34) Kan gelnag fare m’ag nib biech u daken rachaen Kristus ni kan puog. I weliy Jesus murung’agen u nap’an ni ke tababnag fare Puguran ko yam’ ni tay. I yoloy Luke ni gaar: “Ma aram me fek e flowa, me pining e magar ngak Got, me t’ar nge pi’ ngorad ni be gaar: ‘Ereray dowag ni kan pi’ ni bochmed. Um rin’ed e re n’ey ngi i pugurag ngomed.’ Maku, bod rogon e n’en ni kan rin’ ko fare kap u tomren ni kar abichgad, me yog ni gaar: ‘Re kap ney e bin nib beech e m’ag u thilin Got nge girdi’ ni rachaeg ni bay map nga but’ ni fan ngomed e ir e bayi micheg.’” (Luke 22:19, 20) Tin ni ka ba’, ara piin ni yad bang ko fa 144,000 ni ka bay u fayleng, e bay mat’awrad ni ngar ked fare flowa nge ngara unumed fare wine ni be yip fan ban’en u nap’an ni yibe madenomnag fare Puguran ko yam’ ni tay Kristus.

8. Uwrogon ni nge nang e piin ni kan dugliyrad ni kan piningrad ni nga ranod nga tharmiy?

⁸ Uwrogon ni nge nang e piin kan dugliyrad ni kan piningrad ni ngaranod nga tharmiy? Ba mudugil ni fare kan ni thothup e ra micheg nga lanin’rad. I yoloy Paul ni apostal ngak e pi cha’ nem ni gaar: “Piin ni be pow’iyrad fare Kan ni Thothup rok Got e yad pi fak Got. . . . Fare Kan ni Thothup rok Got e ir e be micheg nga lanin’dad ni gadad pi fak Got. Ere faanra kad manged pi fak ma rayog e flaab ni ke tay ni fan ko girdi’ rok, maku ra da uned ngak Kristus ngad fanayed e tin ni ke tay Got ni fen; ya faanra gadad be un ko gafgow ni tay Kristus, ma ka gadad ra un ko flaab rok.” (Romans 8:14-17) Fare kan ni thothup e ma micheg nga lanin’uy nib gel ma arfan ni piin ni be maruwaran’rad boch ko kan piningrad nga tharmiy ara danga’ e rayog ni ngarogned ni dan piningrad, ma arfan ni dabra ked fare flowa ma dabra unumed fare wine u nap’an fare Puguran.

Fare Kan ni Thothup nge Piin Yugu Boch e Saf

9. Mang l’agruw e ulung nib thil ni ke weliy fapi Gospel murung’agen nge lan fare babyor ni Revelation?

⁹ Be lemnag Jesus e piin Kristiano ni kan piningrad ni ngar manged bang ko Israel nib spiritual ni kan dugliy urngirad, ma aram ke pining “fachi ulung” ngorad. Kan tayrad nga lan e “yoror” ko fa bin nib biech e m’ag, ma yad ba thil ko piin “yugu boch e saf” ni de mudugil urngirad, nrogon ni yog Jesus ni ku thingari kuni ulunguyrad. (Luke 12:32; John 10:16) Piin ni yad bang ko fare ulung ni baga’ ni yibe ulunguy ko ngiyal’ ney ni tin tomren e rran e yad ra mang bang ko fare “ulung ni baga’” ni kan dugliy ni ngar magaygad nib fas u nap’an “fare gafgow ni baga’,” ni athap rorad e yad ra par nib fas u paradis u fayleng. Ffel’ ni ngan lemnag, fare n’en ni ke guy John u nap’an ni kan piliyeg e changar rok ko fa bin som’mon e chibog C.E. e be dag e n’en nib thil u thilen fare ulung ni baga’ nge fa 144,000 e girdi’ ni yad bang ko fare Israel nib spiritual. (Revelation 7:4, 9, 14) Gur ku ma yib fare kan ni thothup ngak fare ulung ni baga’, ma faanra aram rogon, mang e ra rin’ e re n’ey ko yafas rorad?

10. Uwrogon ni piin yugu boch e saf e kan taufenagrad “nga fithingan e Chitamangiy nge Fak nge fare kan ni thothup”?

¹⁰ Baga’ fan e n’en ni ma rin’ fare kan ni thothup ngak yugu boch e saf. Yad ra dag ni kar ognaged yad ku Jehovah u daken e taufe “nga fithingan e Chitamangiy nge Fak nge fare Kan ni Thothup.” (Matthew 28:19) Yad ma tayfan e liw rok Jehovah ni Pilung ni ba th’abi tolang, ma yad ma par u tan pa’ Kristus ni Pilung rorad nge Taayuw, ma yad ma fol ko tin ni ma rin’ e kan ni thothup rok Got, ara gelngin nib gel, ko yafas rorad. Urngin e rran, yad ma athamgil ni nge yog ngorad e “wom’engin fare kan ni thothup,” ni bod e “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’ nge sobut’an’, nge t’ar laniyan’.”—Galatia 5:22, 23.

11, 12. (a) Uwrogon ni kan machalbobnag e piin ni kan dugliyrad u reb e kanawo’ ni rib thil? (b) Mang kanawo’ ni piin yugu boch e saf e kan thothupnagrad riy?

¹¹ Piin yugu boch e saf e ku thingara paged e Thin rok Got nge fare kan ni thothup ni nge machalbognagrad. Piin ni kan dugliyrad e kan machalbognagrad u yug reb e kanawo’ ni rib thil, ya kan weliy ni kan mat’awnagrad ma kar thothupgad ya ngar mabgolgad Kristus. (John 17:17; 1 Korinth 6:11; Efesus 5:23-27) Daniel ni profet e ke pining “piin nib thothup rok e Ani Th’abi Tolang” ngorad me yog ngorad fare Gil’ilungun u tan e en ni “fak e girdi’,” ni Kristus Jesus. (Daniel 7:13, 14, 18, 27) U m’on riy, ma ke yog Jehovah boch e thin ngak fare nam nu Israel e daken Moses nge Aaron ni gaar: “Gag Jehovah ni Got romed; ma thingar mu beechniged gimed ma nga mu micheged ni gimed ba thothup, ya gag e gub thothup.”—Leviticus 11:44, NW.

¹² Fare bugithin ni “ngan thothupnag” e baga’ ni be yip’ fan e “maruwel nib thothup, nge ngan ta’ nga bang ni fan ko pigpig ku Jehovah Got; nge rarogon be’ ara ban’en nib thothup, nge ban’en ni kan thothupnag, ara kan machalbognag.” Duw ni 1938, ma fare The Watchtower e ke weliy ni piin ni yima yog Jonadab ngorad, fa yugu boch e saf, “urngin e girdi’ ni ngar manged bang ko ulung ni baga’ ma ngar pared u fayleng” e thingara nanged ni susun ra be’ ma nge pi’ ir ngak Got [ognagey] ya ngan thotupnag. Nap’an ni kan guy fare ulung ni baga’, ni kan yoloy ko fare babyor ni Revelation, ma ka nog murung’agrad ni kar “lukniged e mad rorad kar wechwechniged nga rachaen fare Fak e Saf” ni yad ma pigpig ku Jehovah ni fare “pigpig nib thothup ni rran nge nep u lan e tempel rok.” (Revelation 7:9, 14, 15) U daken e ayuw ko kan ni thothup, ma piin yugu boch e saf e yad ma athamagil ni ngara folgad ko tin ni baadag Jehovah ni ngara rin’ed ma aram e rayog ni ngara pared nib thothup.—2 Korinthi 7:1.

Ngan Rin’ e Tin nib Fel’ Ngak e Pi Walagen Kristus

13, 14. (a) Rogon e fanathin ni weliy Jesus murung’agen fapi saf nge kaming, ma mang ni yafas rok e pi saf e be tor nga daken? (b) Ngiyal’ ney ni ke taw ko tomur, uwrogon ni piin yugu boch e saf e kara rin’ed e tin nib fel’ ngak e pi walagen Kristus?

¹³ I tamilangnag Jesus nib fel’ thilin e piin yugu boch e saf nge piin girdien fachi ulung u reb e fanathin ni ke weliy murung’agen fapi saf nge kaming, nib peth ko thin ni ke yiiynag nib m’ag ko “fare tomuren urngin ban’en.” U lan fare fanathin, me dag Kristus nib tamilang ni rogon ni nge thap e piin yugu boch e saf ngak Got e rib m’ag ko ngongol ni nguura daged ngak e piin ni kan dugliyrad, ni ke pining “pi walageg” ngorad. I yog ni gaar: “Ra non fare pilung ngak e piin ni bay u ba’ nib mat’aw rok ni gaar, ‘Mired, gimed e piin ni ke fal’eg e Chitamag e waathmed, ngan pi’ e gin suwon Got ngomed ni kan ngongliy rogon kan ta’ ni fan ngomed u m’on ni kan sunmeg e fayleng. . . . Ri nggog ngomed, Bochan kam rin’ed e pi n’ey ngak bagayad fapi cha’ nth’abi sobut’ u fithik’ e pi cha’ ni pi walageg ney e kam rin’ed ngog.’”—Matthew 24:3; 25:31-34, 40.

¹⁴ Fare bugithin ni “bochan kam rin’ed e re n’ey” e be yip’ fan e ayuw ni kan pi’ ngak e pi walagen Kristus ni kan ni thothup e fakayrad, ni fayleng rok Satan e yima tayrad ni yad e girdi’ nu bang, ma boch i yad e kan kalbusnag. Ba t’uf rorad e ggan, nge gaman e mad rorad, nge ngan ayuweg e dowef rorad. (Matthew 25:35, 36, footnote) Ngiyal’ n’ey ko tomur, ni ka nap’an 1914, ma boor u fithik’ e piin ni kan dugliyrad ni be par ni aram rogon e par rorad. Tin ni ke buch ko Pi Mich rok Jehovah e be micheg ni ma ayuwegrad e piin ni be chag ngorad nib yul’yul’, ni piin yugu boch e saf, ni kan ni thothup e ke k’aringrad.

15, 16. (a) Mang maruwel e ke ayuweg e piin yugu boch e saf pi walagen Kristus ni kan dugliyrad riy nib gel u roy u fayleng? (b) Mang e ke yog e piin ni kan dugliyrad ni be dag ni ke felan’rad ko piin yugu boch e saf?

¹⁵ Pi walagen Kristus ni kan dugliyrad ni bay u fayleng e chiney ni ngiyal’ ko tomur e kari ayuwegrad e piin yugu boch e saf ni ngar lebuguyed fare maruwel ni Got e ke pi’ ngorad ni ‘ngan machibnag fare thin nib fel’ ko Gil’ilungun nga gubin yang u fayleng nge nang e girdi’ u urngin e nam.’ (Matthew 24:14; John 14:12) Yugu aram rogon ni piin ni kan dugliyrad e be lich i yan u lan e pi duw ni ke yan, ma piin yugu boch e saf e ke yoor i yan kar tawgad ko bokum million. Ma bokum biyu’ u fithik’rad e kara pigpiggad ni yad tamachib ni polo’ ko thin nib fel’—ni yad e pi pioneer nge missionary—ni yad be wereg fare thin nib fel’ ko Gil’ilungun “nge yan i mada’ ko yungi n’en ni yan i mus e fayleng ngay.” (Acts 1:8) Boch i yad e yad ma wereg e machib ni rogon ni rayog rorad ma yad ma pi’ e salpiy ni fan ko re maruwel n’ey.

¹⁶ Uwrogon ni dag e pi walagen Kristus ni yad ba felfelan’ ko ayuw nib gel ni ke pi’ e piin yugu boch e saf ni be chag ngorad! Uw rogon e lem rorad ni kar daged nib tamilang ko fare ke babyor ni Worldwide Security Under the “Prince of Peace,” ni piin ni yima yog e sib ngorad e kar ngongliyed ko duw ni 1986. Be yog ni gaar: “Ka nap’an fa bin II e Mahl ko Fayleng, nge rogon ni ke lebug fare yiiy rok Jesus ni fan ko ‘fare tomuren urngin ban’en nib baga’ nbochan e maruwel ni be rin’ fare ‘ulung ni baga’’ ni ‘yugu boch e saf’. . . . Ere kari magar fare ‘ulung ni baga’ ni yad bay ko pi nam nib thilthil e thin rorad ko maruwel nib gel ni yad be rin’ ni yad be lebuguy fare yiiy rok [Jesus] ni bay ko Matthew 24:14!”

‘Dabra Flontgad nib Dar Rodad’

17. Mang kanawo’ ni piin nib yul’yul’ kakrom ni ran fasegrad u roy u fayleng e “dabra flontgad nib dar ko” piin ni kan dugliyrad?

¹⁷ Paul ni apostal ni ir bagayad ko piin ni kan dugliyrad e i weliy murung’agen e piin pumoon nge ppin nib yul’yul’ ni ur moyed u nap’an ni dawori yib Kristus, i yoloy ni gaar: “Urngin e pi n’ey e dag ngak e girdi’ gelngin e michan’ rok e pi cha’nem ngak Got! Machane de yog ngorad e ngiyal’ nem e tin ni yog Got nra pi ngorad, ya bay e thin ni kab fel’ ban’en ni ke m’ay i lemnag rok Got ni fan ngodad [piin ni kan dugliyrad], ni aram e dar flontgad nib dar rodad.” (Hebrews 11:35, 39, 40, NW) U nap’an fare Bbiyu’ i duw, me Kristus nge pi walagen u tharmiy ni kan dugliyrad ni yad 144,000 e bay ra maruwelgad ni pilung nge prist ma ur garareged angin e taw’ath ni biyul nra yib nbochan e maligach ni ke pi’ Kristus nga fayleng. Arfan ni “ra flont” e piin yugu boch e saf ni dowef rorad nge lem rorad.—Revelation 22:1, 2.

18. (a) Thin riyul’ u Bible e ra ayuweg e piin yugu boch e saf ni nge tamilang u wan’rad e mang? (b) Mang athap ni be sonnag e piin yugu boch e saf ba ngiyal’ ni “ngan dag ngan nang pifak Got”?

¹⁸ Urngin e pi’ ney e susun ni nge par u laniyan’ e piin yugu boch e saf ko mangfan ni bang ko Bible ni Christian Greek Scriptures e ri ma weliy murung’agan Kristus nge pi walagen ni kan dugliyrad nge fare maruwel rorad ni baga’fan ni fan ni nge lebug e tin nib m’agan’ Jehovah ngay. Ere piin yugu boch e saf e ma ta’ ni reb e tow’ath ni ngara ayuweged e piin ni kan dugliyrad ko urngin e kanawo’ nrayog ko ngiyal’ ni yad be sonnag ba ngiyal’ ni “ngan dag ngan nang e piin pifak Got” u nap’an Armageddon nge nap’an Bbiyu’ e Duw. Rayog ni ngara sapgad nga m’on ko ngiyal’ ni “bayra pired ni gathi yad e sib rok e wod, mi yad un ko flaab rok pi fak Got.”—Roma 8:19-21.

Ke Taareban’uy u Nap’an fare Puguran

19. Mang e ke rin’ “gelngin fare thin riyul’” ni fan ko piin ni kan dugliyrad nge piin ma chag ngorad, ma uw rogon nra taareban’rad ko rorran ni March 28 ni balayal’?

¹⁹ Nap’an e bin tomur e meybil ni fek Jesus ko Nisan 14, 33 C.E. ni nep’, i yog ni gaar: “Gu be wenig ngom . . . ni fan ni nge taareban’rad ni yad urngin, ni bod gur, ni Chitamag, ni ga bay rog nge gag ni gu bay rom nib taareban’dow, ni fan ni nge yog ni nge taareban’dad, ma ra mich u wan’ e girdi’ nu fayleng ni kam l’ugeg ku gub.” (John 17:20, 21, NW) Bochan e t’ufeg rok Got, mi l’og Fak keb ni fan ni nge pi’ e yafas rok nge thapeg e piin ni kan dugliyrad nge girdi’ nu fayleng ni piin ma fol rok. (1 John 2:2) “Gelngin fare thin riyul’” e ke taarebnag Kristus nge pi walagen nge piin ma chag ngorad. Rroran ni March 28 ni balayal’, tomren ni ke aw e yal’, ma fa gal ulung i girdi’ e ur muulunggad u taabang ni ngara madenomnaged fare yam’ ni tay Kristus ma ur lemnaged urngin ban’en ni ke rin’ Jehovah ngorad u daken fare maligach ni ke pi’ ni aram Fak nib t’uf rok, i Kristus Jesus. Yibe athapeg ni wub rorad ko re madenom nib ga’ fan nem e ra ayuweg ni ngari taareban’rad ma ngari mudugil lanin’rad ni ngara ul’ul’gad i rin’ e tin nib m’agan’ Got ngay, ma aram e yad be micheg ni yad ba falfalan’ ni yad bay u fithik’ e piin ni yad ba t’uf rok Jehovah.

Ngan Sul nga Daken

• Wuin e kan l’og “gelngin fare thin riyul’” ngak e piin Kristiano Kakrom, ma mang e be dag ni eram e “taayuw”?

• Uwrogon me nang e piin ni kan dugliyrad ni kan piningrad ni nga ranod nga tharmiy?

• Mang boch e kanawo’ ni be maruwel e kan ni thothup rok Got riy u daken e piin yugu boch e saf?

• Uw rogon ma piin yugu boch e saf e kara rin’ed e tin nib fel’ ngak e pi walagen Kristus, ma mang fan ni “dabra flontgad nib dar” ko piin ni kan dugliyrad?

[Picture on page 27]

“Gelngin fare thin riyul’” e kan puog nga daken fapi gachalpen ko Pentecost 33 C.E.

[Pictures on page 29]

Piin yugu boch e saf e kara rin’ed e tin nib fel’ ngak e pi walagen Kristus u daken e ayuw ni kar pied ngorad ni nge lebug fare maruwel ni ke pi’ Got ngorad ngar wereged e machib