Mang Fan Fare Abich Ni Balayal Rok Somol Ngom?
“Aram fan ni faanra kay be’ e flowa rok Somol ara unum e n’en ni bay’ ko fare kap rok, ma aram e ke denen, ya ke dariyfannag downgin nge rachaen Somol.”—1 KORINTH 11:27.
1.Mang e n’en nth’bi ga’ fan ni yira rin’ ko duw ni 2003, ma uw rogon ni ke tabab?
FARE n’en ni th’abi ga’ fan ni yira rin’ ko duw ni 2003 e ra aw ko April 16 u nap’an ni ke aw e yal’. Pi Mich Rok Jehovah e yad ra muulung ni ngara madenomnaged fare Puguran ko yam’ ni tay Jesus Kristus. Rogon ni dag ko fare article ni ke yan, me Jesus e i tabab ni nge madenomnag e re madenom ney, ni ku yima pining fare Abich ko Balayal rok Somol ngay, u tomren ni kar mu’gad e pi apostal rok i madenomnag fare Paluk’af ko Nisan 14, 33 C.E. Fare flowa ni dan ta’ e n’en ni ma thownag e flowa ngay nge fare wain nib rowrow ni fan ko Puguran e be yip’ fan e dowef rok Kristus ndariy denen riy nge rachaen ni kan puog—ni kari mus e re maligach ni rayog ni nge biyuliy e girdi’ me pithigrad ko denen nge yam’ ni ke af ngorad.—Roma 5:12; 6:23.
2. Mang thin ni bay ko 1 Korinth 11:27 ni be ginangey?
2 Piin ni ma kay fare flowa ma ma unum fare wain ni fan ko Puguran e thingara rin’ed e re n’ey u fithik’ e tayfan. I tamilangnag Paul ni apostal e binem u nap’an ni yol ngak e piin Kristiano u Korinth kakrom, ni ereray e gin ni kan madenomnag riy fare Abich ni Balayal’ rok Somol nde fel’ rogon. (1 Korinth 11:20-22) I yoloy Paul ni gaar: “Aram fan ni faanra kay be’ e flowa rok Somol ara unum e n’en ni bay u kap rok ndariy fan u wan’, ma aram e ke denen, ya ke dariyfannag downgin nge rachaen Somol.” (1 Korinth 11:27) Mang fan e pi thin nem?
Boch e Girdi’ e Kara Madenomnaged fare Puguran ni Dariy Fan u Wan’rad
3. Mang ngongol ni dag e piin Kristiano u Korinth u nap’an ni kar madenomnaged fare Abich ni Balayal rok Somol?
3 Boor e Kristiano u Korinth e ka ra ked e flowa ma ka ra unumed e wain ni fan ko Puguran ni dariy fan u wan’rad. Kar yoor raba’gad, ma ba’ biyay, ni boch i yad e ka ra feked e ggan rorad ma kar abichgad u m’on ara nap’an ni yibe muulung, ni baga’ ni kara abichgad nib pag rogon. Kar malmalgad ko tirok Got nge lem rorad. Bochan e re n’ey ma kar “denengad ko rogon e ta’ fan ko dowef nge rachaen Somol.” Piin dariy e ggan rorad e ke yib e bilig ngorad ma ke wagay lanin’rad. Arrogon, boor e girdi’ ni kar ked fare flowa ma kar unumed fare wain ni fan ko Puguran ndariy fan u wan’rad ma de yib ngan’rad ni polo’ feni ga’ fan e re madenom nem. Aram fan ni kar feked e gechig nga dakenrad!—1 Korinth 11:27-34.
4, 5. Mang fan ni baga’ fan ni piin ni ma kay fare flowa ma ma unum fare wain ni fan ko Puguran e ngara yaliyed yad?
4 Bochan ni bay fare Puguran u gubin e duw, ma baga’ fan ni piin ni ma kay fare flowa ma ma unum fare wain ni fan ko Puguran e ngara yaliyed yad. Ran un ko re abich ney ni ka nog e communion meal ngay nrogon, mab t’uf ni yad ba fel’ ko tirok Got. En ni ma dariyfannag, ma ku ra gathibthibnag, e maligach rok Jesus e rayog ni ngan “thang ngan chuweg ko girdi’ rok Got’, ntaabrogon ko fa cha’ ni be’ nu Israel ni ke un ko reb e communion meal ni de klin.—Leviticus 7:20; Hebrews 10:28-31.
5 I taareb rogonnag Paul fare Puguran ko abich ni ka nog e communion meal ngay ni yima rin’ u Israel kakrom. I weliy murung’agen e piin ni kar uned ko abich ni yad bang ko dowef rok Kristus me yog ni gaar: “Dabiyog ni ngam unumed ban’en ko kap rok Somol mi ki gimed unum ban’en ko kap rok e pi moonyan’; dabiyog ni ngam abichgad u ‘tebel rok Somol mi ki gimed abich u tebel rok e pi moonyan’.’” (1 Korinth 10:16-21) Faanra ke denen nib gel e en ni ma kay e flowa nge ma unum e wain u nap’an fare Puguran, ma thingari yog e re n’ey ngak Jehovah makub t’uf ni nge ning e ayuw ko piin piilal u lan e ulung. (Proverbs 28:13; James 5:13-16) Faanra riyul’ ni ke kalngan’ ma ngongol rok e riyul’ ni be micheg ni aram rogon, ma aram gathi be un ko re abich ney ndariyfan u wan’.—Luke 3:8.
Ngan Un ni Ngan Motoyil u Fithik’ e Tayfan
6. Mini’ e ke pi’ Got ngorad fare taw’ath ni ngar uned ko Abich ni Balayal rok Somol?
6 Piin ni be rin’ e tin nib fel’ ni fan ko tin ni ka ba’ ko fa 144,000 e girdi’ ni walagen Kristus e susun ngar uned ko fare Abich ni Balayal rok Somol? (Matthew 25:31-40; Revelation 14:1) Dangay. Ke pi’ e re taw’ath nem ngak e girdi’ ni ke dugliyrad ko kan ni thothup ma rayog rorad ni ngar “uned ngak Kristus ko boch e flaab.” (Roma 8:14-18; 1 John 2:20) Ere mang e liw rok e piin ni yad be athapeg ni ngar pared u paradis u fayleng ni ga’ngin u tan Gil’ilungun ndariy n’umngin nap’an? (Luke 23:43; Revelation 21:3, 4) Bochan dabra uned ngak Jesus nga tharmiy, ma aram yad ma un ko fare Puguran ni kemus ni ngara motoyilgad u fithik’ e tayfan.—Roma 6:3-5.
7. Mang fan ni piin Kristiano ko fa bin som’mon e chibog e kara nanged ni thingara ked fare flowa nge ngara unumed fare wain ni fan ko fare Puguran?
7 Tin riyul’ e Kristiano ko fa bin som’mon e chibog e kan dugliyrad ko kan ni thothup. Boor i yad e kara fanayed reb e taw’ath ni pi’ fare kan ni thothup ara kab boor ko taareb, ni bod e nga nog e thin nu bang. Ere, de mo’maw’ ngorad ni ngar nanged ni yad e piin ni kan dugliyrad ma ngar ked fare flowa ma ngar unumed fare wain ni fan ko fare Puguran. Machane, ngiyal’ ney, e rayog ni ngan nang ko susun nge un be’ ngay fa danga’ u daken e pi thin ni kan thagthagnag ni gaar: “Urngin e piin ni be pow’iyrad fare kan ni thothup rok Got e yad pi fak Got. Ya dan pi’ ngomed e lem ni bod ba sib ni ra k’aring e marus ngomed, ya kan pofmed ni ngam manged pifak, ma bochan e re gelngin ney e gadad ma tolulnag e: ‘Abba, Chitamangimad!’”—Roma 8:14, 15.
8. “Fare wheat” nge “fare pan” ni weliy ko Matthew guruy ni 13 e be yip’ fan mini’?
8 Ka nap’an fa bin som’mon e ulung ko Kristiano, ma tin riyul’ e Kristiano ni kan dugliyrad e kar tugulgad ni bod e “wheat” ko gin ni be tugul e “pan” riy ara Kristiano ni googsur. (Matthew 13:24-30, 36-43) Ka nap’an e duw ni 1870, ma ke gagiyel fare “wheat” i yan, ma boch nga tomren e ka nog ngak e piin piilal ni Kristiano ni kan dugliyrad ni gaar: “Piin ni piilal . . . e thingara ted u p’eowchen e piin ni yad be muulung [ni fan ko fare Puguran] boch e thin ni,—(1) michan’ ko racha’ [rok Kristus]; nge (2) ngan ognagey ngak Somol nge ngan pigpig ngak, nge mada’ ko yam’. Ere thingara pininged urngin e piin ni baadag ma aram kar ognaged yad ni ngar uned ko fare madenom ko yam’ ni tay Somol.”—Studies in the Scriptures, Series VI, The New Creation, page 473.a
Yibe Gay “Yugu Boch e Saf”
9. Uw rogon me tamilang u wan’uy ko mini’ fare “ulung ni baga’” ko duw ni 1935, ma uw rogon ni re n’ey e ke rin’ ban’en ngak boch e girdi’ ni ma ka’ fare flowa ma ma unum fare wain ni fan ko Puguran?
9 Me yib e tayim, ma ulung rok Jehovah e ke tabab ni nge tiyan’ ngak boch e girdi’ ni yira uneg ngak pi gachalpen Kristus ni kan dugliyrad. Ke gagiyel e re n’ey u lukngun e pi duw ni 1930. Kafram, ma girdi’ rok Got e kar lemnaged ni fare “ulung ni baga’” ni rogon ni yog ko Revelation 7:9 e yad e fa bin l’agruw e ulung ni ngara uned ngak e piin kan dugliyrad min fasegrad ko yam’ ni 144,000 oren nga ranod nga tharmiy—ni bod e piin bridesmaids ara girdi’ nra un ngak fare ppin ni nge mang leengin Kristus. (Psalm 45:14, 15; Revelation 7:4; 21:2, 9) Machane rorran ni May 31, ko duw ni 1935, nap’an ni yibe pi’ e welthin ko reb e convention ko Pi Mich Rok Jehovah u Washington, D.C., U.S.A., min weliy e thin nu Bible ni be dag ni fare “ulung ni baga’” (“great multitude,” King James Version) nge fare “yugu boch e saf” e taareb rogorow ni yow be par ko ngiyal’ ni ka nog tin tomren e rran ngay. (John 10:16) Tomren ere convention nem, ma boch i yad ni kar ked fare flowa ma kar unumed e wain ni fan ko Puguran kafram e kar talgad ya kar naabgad ni athap rorad e gathi yafas u tharmiy ya fayleng.
10. Uw rogon ni ngam weliy fare athap nge maruwel ko piin “yugu boch e saf” e ngiyal’ ney?
10 Baga’ ni ka nap’an e duw ni 1935 e kan gay e piin ni kar manged e piin ni ka nog “yugu boch e saf” ngorad, nib mich fare biyul u wan’rad, ma kar ognaged yad ngak Got, ma kar ayuweged “fachi ulung” ni kan dugliyrad ngar wereged e thin ko Gil’ilungun. (Luke 12:32) Piin ni ka nog yugu boch e saf ngorad e yad be athapeg ni ngar pared u fayleng ndariy n’umngin nap’an, machane urngin ban’en riy e yad ba taareb rogon ko tin ni ka ba’ ko piin ni yad ra yan nga tharmiy. Taab rogon ko girdi’ nu bang ni yad ma par u Israel kakrom ni kar pigpiggad ku Jehovah ma kar folgad ko fare motochiyel, ma yugu boch e saf e chiney e kar adaged ni ngar uned ko maruwel rok e piin Kristiano, ni ngan wereg fare thin nib fel’ ni yad ba chag ngak e piin ni yad bang ko Israel nib spiritual. (Galatia 6:16) Machane, bod ni dariy e girdi’ nu bang ni ma par u Israel ni nge mang pilung ara prist, ma ku dariy e girdi’ nu bang ko yugu boch e saf e rayog ni nge mang pilung ko gagiyeg u tharmiy ara nge mang prist.—Deuteronomy 17:15.
11. Mang fan ni rorran ni ke ognag be’ e yafas rok ngak Got e ba peth ko athap rok?
11 Ere nap’an e pi duw ni 1930, e ke tamilang i yan, ni ke m’ay i mel’eg e piin ni ra yan nga tharmiy. U lan boor e duw e chiney, e yima gay e piin ni yad bang ko fare yugu boch e saf, ni athap rorad e yafas u fayleng. Faanra reb e Kristiano ni kan dugliy e de yog rok ni nge par nib yul’yul’, ma baga’ ni en ni bang ko fare yugu boch e saf ni ke pigpig ku Got nib n’uw nap’an u fithik’ e yul’yul’ e yira pining ni nge yan nga luwan ya ke mul bagayad fare 144,000.
Mang Fan ni Kan Oloboch
12. U tan e mang magawon ni piin ma kay fare flowa ma ma unum fare wain ni fan ko Puguran e susun ni ngar talgad i rin’ e re n’em, ma mang fan?
12 Piin Kristiano ni kan dugliyrad e ri mudugil lanin’rad ni kan piningrad ni nga ranod nga tharmiy. Machane uw rogon ni faanra bay boch e girdi’ ni dan piningrad ma yad ma kay fare flowa mi yad ma unum fare wain ni fan ko Puguran? Chiney ni kar nanged ni dariy e athap rorad ni nga ranod nga tharmiy, ma mmutrug ni nangan’ rorad e nge k’aringrad ni ngar talgad i rin’ e re n’ey. Dabun Got e en ni be tay ir ni kan pining ni nge mang pilung nge prist u tharmiy nfaanra manang ni gathi riyul’ ni kan pining ni nge un ngay. (Roma 9:16; Revelation 20:6) I li’ Jehovah Korah ni Levite ya dan pi’ mat’awun ma ke guy rogon ni nge mang prist ni aram e maruwel ni kan pi’ ngak Aaron nge girdi’ rok. (Exodus 28:1; Numbers 16:4-11, 31-35) Faanra bay e Kristiano ni ke kay fare flowa ma ke unum fare wain ni fan ko Puguran ma ke naab ni ke oloboch riy, ma susun ni nge tal ma nge meybil ngak Jehovah ni nge n’agfan.—Psalm 19:13.
13, 14. Mang fan ni boch e girdi’ e kar olobochgad kar lemnaged ni kan piningrad ni nga ranod nga tharmiy?
13 Mang Fan ni boch e girdi’ e kara olobochgad kar lemnaged ni kan piningrad ni nga ranod nga tharmiy? Sana bochan e ke yim’ e ani mabgol rok ara keb e gafgow ngorad nib gel ma kar dabuyed ni ngar pared u fayleng. Ara sana kara adaged e athap ni aram rogon ya bay e fager rorad ni ke yog ni ir reb e Kristiano ni kan dugliy. Riyul’, ni dariy be’ ni ke pi’ Got e maruwel ngak ni nge pi’ athamgil nga laniyan’ e girdi’ ngar uned ko re taw’ath ney. Ma dabi dugliy Got e girdi’ ni ngar manged bang ko Gil’ilungun me gagiyegnag ni ngar rung’aged ba lam ni be yog ni aram rogon.
14 Machib ni ma ta’ e teliw ni googsur ni urngin e girdi’ nib fel’ e yad ra yan nga tharmiy e rayog ni nge k’aring boch e girdi’ ni ngar lemnaged ni kan piningrad ni nga ranod nga tharmiy. Ma arfan, nib t’uf ni ngad koled ayuwngidad ni dabi suruy lanin’dad e lem rodad kafram ni de puluw nga yugu boch ban’en. Ni bod ni, boch e girdi’ e sana ra fithed yad ni ra gaar gad: ‘Gu ma fanay e falay nrayog ni nge rin’ ban’en ko lem rog nib gel? Ma yib ngog e lem nrib gel ma aram rayog ni nggu oloboch nrogon ni gu ma lemnag ban’en?’
15, 16. Mang fan ni in e girdi’ e kar olobochgad kar lemnaged ni yad e piin ni kan dugliyrad?
15 Boch e girdi’ e sana ra fith ni yad ra gaar: ‘Gu baadag ni nggu mang be’ nib gilbuguwan? Ri gu baadag ni nge yog ngog reb e liw e chiney ara nge yog ni nggu un ngak Kristus?’ Nap’an ni kan pining e girdi’ ni nge mang bang ko Gil’ilungun ko fa bin som’mon e chibog, gathi urngin e kan pi’ ngorad e liw nib tolang u lan e ulung. Ma piin ni kan piningrad ni nga ranod nga tharmiy e dar ma guy rogon ni nge sap e girdi’ ngorad ma dar ma uf ya bochan kan dugliyrad. Kar daged nib sobut’ lanin’rad ni susun aram rogon e piin ni “ba’ rorad e lem rok Kristus.”—1 Korinth 2:16.
16 Boch e girdi’ e keb ngan’rad ni kan piningrad ni nga ranod nga tharmiy ya bochan e ke yoor e tamilangan’ rorad ko Bible. Machane dagathi ba yoor e llowan’ rok be’ ya bochan ni kan dugliy ko kan ni thothup, ya susun ni nge fil Paul ma nge fonownag boch e girdi’ ni kan dugliyrad. (1 Korinth 3:1-3; Hebrews 5:11-14) Bay e yaram rok Got u rogon ni nge pi’ e ggan nib spiritual ngak urngin e girdi’. (Matthew 24:45-47) Ere susun dariy be’ ni ra lemnag nbochan ni ir reb e Kristiano ni kan dugliy ko kan ni thothup ma bay e tamilangan’ rok ni kab yoor ko piin ni bay e athap rorad ni ngar pared u fayleng. Rab salap be’ u rogon ni nge pi’ e fulweg ko deer u murung’agen e thin nu Bible, ara rogon ni nge machibnag e thin, ara rogon ni nge pi’ e welthin ma gathi aram e pow ni kan dugliy ko kan ni thothup. Boch e Kristiano ni bay e athap rorad ni ngar pared u fayleng e ku kar salapgad riy.
17. Ngan dugliy ko kan ni Thothup e ma tor nga daken e mang ngu daken mini’?
17 Faanra fith reb e walag murung’agen fare athap u tharmiy, ma reb e piilal ara yugu reb e Kristiano ni ke ilal ko tirok Got e rayog ni nge weliy ngak. Machane, dabiyog rok be’ ni nge dugliy ban’en ni fan nga reb e athap. Be’ ni riyul’ ni kan pining ko re taw’ath ney e de t’uf ni nge fith yugu boch e girdi’ ko bay athap rok ni aram rogon fa danga’. Piin ni kan dugliyrad e “kan gargelegrad biyay, ni gathi dowef nra kireb, ya dowef ndabi kireb, u daken fare thin rok Got nib fas ma dabi yim’ biid.” (1 Peter 1:23, NW) U daken e kan ni thothup nge Thin rok, me yung Got fare “awoch” me thiliyeg be’ me mang be’ ni “kefin ni sunmeg,” ni bay e athap rok ko yan nga tharmiy. (2 Korinth 5:17) Me Jehovah ir e ma mel’eg. Rogon ni ngan dugliy e girdi’ e “gathi be tor nga daken e en baadag ara piin ni be rin’ ban’en, ya u daken Got.” (Roma 9:16) Ere uw rogon ni nge mudugil laniyan’ e girdi’ ni kan pining ni nge yan nga tharmiy?
Mang Fan ni Ke Mudugil Lanin’rad
18. Uw rogon ni ma micheg e kan ni thothup rok Got nga laniyan’ e piin ni kan dugliyrad?
18 Rogon ni be micheg e kan ni thothup rok Got e ke ayuweg e Kristiano ni kan dugliyrad ni nge gel e pagan’ rorad ni bay e athap rorad ni nga ranod nga tharmiy. “Kan pi’ ngomed gelngin e pof me gimed mang pifak,” ke yol Paul, me ulul ngay ni gaar, “u daken e re gelngin ney ma gad ma tolulnag: ‘Abba, Chitamangidad!’ Fare gelngin Got e ma micheg nga lanin’dad ni gadad pifak Got. Ere faanra gadad pifak, ma ku bay ban’en ni nga yog ngodad: riyul’ ni ra pi’ Got ban’en ngodad, machane gad ra un ngak Kristus ko re flaab ney, nfaanra ngada uned ko gafgow u taabang maku gadad ra un ngak ko flaab u taabang.” (Roma 8:15-17) U tan gelngin fare kan ni thothup, ma laniyan’ e piin ni kan dugliyrad e ke k’aringrad ni ngar folgad ko Thin nu Bible ni be yog murung’agen pifak Jehovah nib spiritual. (1 John 3:2) Kan ni thothup rok e ke ayuwegrad ngar thamiyed ni yad pifak Got me yibnag e athap nib thil nga fithik’rad. (Galatia 4:6, 7) Arrogon, rogon ni nge yog e yafas ni manemus ngak e girdi’ ni kar flontgad u fayleng ni bay u toobrad e girdi’ rorad nge fager e ri bay e felfelan’ riy, machane gathi aram e athap ni ke pi’ Got ngorad. U daken e kan ni thothup rok, me tay Got nga lanin’rad e athap ni rib gel ni nga ranod nga tharmiy ma aram e ba m’agan’rad ngay ni ngar n’aged urngin ban’en rorad u fayleng nge athap rorad.—2 Korinth 5:1-5, 8; 2 Peter 1:13, 14.
19. Mang maruwel ni be rin fare m’ag nib biech ko yafas rok e piin ni Kristiano ni kan dugliyrad?
19 Piin Kristiano ni kan dugliyrad e ke mudugil lanin’rad ko athap rorad u tharmiy, nge fare n’en ni kan fekrad ni kar manged bang ko fare m’ag ni biech. I weliy Jesus murung’agen u nap’an ni ke tabab ni nge madenomnag fare Puguran me yog ni gaar: “Re kap ney e be yip’ fan fare m’ag nib biech nu daken rachaeg, ni yira puog ni fan ngomed.” (Luke 22:20) Piin ni yad bang ko fare m’ag nib biech e Got nge piin kan dugliyrad. (Jeremiah 31:31-34; Hebrews 12:22-24) Jesus e bay u thilrad. Bochan ke tabab i maruweliy fare m’ag nib biech u daken rachaen Kristus ni kan puog, ma aram ke fek e girdi’ ni gathi kemus ni piyu Jew ya ku ke fek e girdi’ ko pi nam ni ngar manged girdi’ ni fan ko ngochol rok Jehovah ma kar manged bang ko fare “owchen” Abraham.” (Galatia 3:26-29; Acts 15:14) Re “m’ag ney ndariy n’umngin nap’an” e ke ayuweg ni ngan faseg piyu Israel nib spiritual ni yad urngin me yog ngorad e yafas ndabku nim’ biid u tharmiy.—Hebrews 13:20.
20. Piin kan dugliyrad nge Kristus e kan fekrad ni ngar manged bang ko mang m’ag?
20 Piin ni kan dugliyrad e ke mudugil lanin’rad ko athap rorad. Min fekrad ngar manged bang ko yugu reb e m’ag, ni fare m’ag ko Gil’ilungun. Rogon ni yad ba chag ngak Kristus, me yog Jesus ni gaar: “Urngin e gafgow ni yib ngog ma mpired rog nda mpaged gag; ere rogon ni ke fal’eg e Chitamag e m’ag u thilmow, ma nggu fal’eg e m’ag ko Gil’ilungun u thildad.” (Luke 22:28-30) Re m’ag ney u thilin Kristus nge piin pilung nra uned ngak e ra par ni be maruwel.—Revelation 22:5.
Nap’an fare Puguran—e Aram e Tayim nib Felfelan’
21. Uw rogon nra fel’ rogodad ko pi rran nib chuchugur ko fare Puguran?
21 Boor e taw’ath nra yib ko pi rran ni ke chuchugur fare Puguran. Rayog ni nge fel’ rogodad ko Bible ko pi rran ney. Maku ir e tayim nib puluw ni ngan meybil, min fal’eg i lemnag e yafas rok Jesus u fayleng nge yam’ ni tay, min un ko maruwel ngan machibnag e thin ko Gil’ilungun. (Psalm 77:12; Filippi 4:6, 7) Fare madenom e ra puguran ngodad e t’ufeg ni dag Got nge Kristus nib peth ko biyul ni pi’ Jesus. (Matthew 20:28; John 3:16) Re yaram ney e ke pi’ ngodad e athap me baudeg lanin’dad ma susun ni nge gelnag e lem rodad ni kad turguyed ni ngad folgad ko tin ni ke rin’ Kristus. (Exodus 34:6; Hebrews 12:3) Fare Puguran e ku susun ni nge gelnagdad ni ngad lebguyed e tin ni ke milfan ngodad ni gadad e piin kad ognaged gadad ku Got ma gadad e pi tapigpig rok ma ngad manged pi gachalpen fak nib t’uf rok u fithik’ e yul’yul’.
22. Mang e bin th’abi ga’ e taw’ath rok Got ngak e girdi’, ma mang reb e kanawo’ ni kar pininged e magar riy?
22 Mang taw’ath nib fel’ ni be pi’ Jehovah ngodad! (James 1:17) Bay e Thin rok ni be pow’iydad, fare kan ni thothup ni be ayuwegdad, nge fare athap ni nge yog ngodad e yafas ni dariy n’umgin nap’an. Taw’ath ni th’abi ga’ ni pi’ Got e aram fare biyul rok Jesus ni fan ko denen ko piin ni kan dugliyrad nge ngak urngin e girdi’ ni yad be maruweliy e michan’ rorad. (1 John 2:1, 2) Ere uw feni ga’ fan ngom fare yam’ ni tay Jesus? Ga ra un ngak e piin ni be dag ni yad be pining e magar ma yad ra muulung ko April 16, 2003, u nap’an ni ke aw e yal’ ni fan ni ngar madenomnaged fare Abich ni Balayal rok Somol?
[Footnote]
a Babyor ni Pi Mich Rok Jehovah e ke ngongliy machane chiney e dakuriy.
Mang e Pi Fulweg Rom?
• Mini’ e susun ni nge kay fare flowa ma nge unum fare wain ni fan ko fare Puguran?
• Mang fan ni piin “yugu boch e saf” e yad ma un ko fare Abich ni Balayal rok Somol ni ngar motoyilgad u fithik’ e tayfan?
• Uw rogon ni nge nang e piin Kristiano ni kan dugliyrad ni susun ni ngar ked fare flowa ma ngar unumed fare wain u nap’an fare Puguran ko yam’ ni tay Jesus?
• Pi rran ni ke chuchugur ko fare Puguran e ba fel’ ni ngan rin’ e mang?
[Graph/Pictures on page 28]
(For fully formatted text, see publication)
Memorial Attendance
IN MILLIONS
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Picture on page 28]
Ga ra moy u nap’an fare Abich ni Balayal rok Somol ko biney e duw?
[Pictures on pages 30]
Pi rran nib chuchugur ko fare Puguran e aram e tayim nib puluw ni ngan yoornag e tayim ko bieg Bible min un ko maruwel ni ngan wereg e thin ko Gil’ilungun