Fan ni Gad Ma Madnomnag Fare Abich ni Blayal’ rok Somol

1, 2. Mang e n’en ni rin’ Jesus ko fare nep’ i n’em ko Nisan 14, ko duw ni 33 C.E.? (Mu guy fare sasing ni bay u tabolngin e re article ney.)

RE NEP’ i n’em ko Nisan 14, ko duw ni 33 C.E. e ba ngoon u Jerusalem. Ma ka fini mu’ Jesus nge pi apostal rok i madnomnag fare madnom ko Paluk’af. Re n’ey e nge puguran ngorad rogon ni chuweg Jehovah piyu Israel ko sib u Egypt u nap’an 15 e chibog ni ke yan. Tomuren e re madnom nem ma aram me tababnag Jesus nge fa 11 i apostal rok ni yad ba yul’yul’ yugu reb e abich nib thil ni aram e ngar madnomnaged e yam’ nra tay.a​—Matt. 26:1, 2.

² I pining Jesus e magar ngak Got, ma aram me pi’ e flowa ndariy e is riy ngak pi gachalpen, me gaar: “Mfeked ngam ked.” Maku aram rogon ni fek fare kap ni bay e wain riy, me pining e magar riy ngak Got me gaar: “Mu unumed ni gimed gubin.” (Matt. 26:26, 27) Dakuriy yugu ba mit e ggan ni ku ra pi’ Jesus ni nge kay e pi apostal rok, machane ka boor ban’en ni ka bay nra weliy ngorad e re nep’ nem.

3. Mang boch e deer ni yira weliy ko re article ney?

³ Re nep’ i n’em ma aram me tababnag Jesus fare Puguran ko yam’ ni tay ni ka nog fare “Abich ni Blayal’ rok Somol” ngay. (1 Kor. 11:20) Boch e girdi’ e sana yad ra fith ni lungurad: Mang fan ni ngan madnomnag e yam’ ni tay Jesus? Mang e be yip’ fan fare flowa nge fare wain? Uw rogon ni ngad fal’eged rogodad ni fan ko re Madnom nem? Chon mini’ e thingar ra ked fare flowa mar unumed fare wain? Ma uw rogon u wan’ e piin Kristiano e athap rorad?

FAN NI GAD MA MADNOMNAG E YAM’ NI TAY JESUS

4. Bochan e yam’ ni tay Jesus, ma mang e ke yag ni ngad rin’ed?

⁴ Bochan ni gadad pi fak Adam, ma aram fan ni ke af e denen nge yam’ ngodad. (Roma. 5:12) Dariy be’ nib flont nrayog rok ni nge biyuliy ir, fa nge biyuliy yugu boch e girdi’. (Ps. 49:6-9) Machane, kemus ni Jesus e ke yag rok ni nge pi’ e yafos rok nib flont ni fan ngodad ni aram e re biyul nib ga’ fan mab m’agan’ Got ngay. Ma bochan ni ke ognag fel’ngin e re biyul nem ngak Got, ma aram fan ni ke mab e kanawo’ ngodad nrayog ni ngad chuwgad u tan gelngin e denen nge yam’ me yag fare tow’ath ngodad ni yafos ni manemus.​—Roma. 6:23; 1 Kor. 15:21, 22.

5. (a) Uw rogon ni kad nanged nib t’uf e girdi’ rok Got nge Kristus? (b) Mang fan ni ngad uned i madnomnag e yam’ ni tay Jesus?

⁵ Ke micheg Got nib t’uf e girdi’ rok u daken fare biyul ni pi’ Jesus. (John 3:16) Maku bochan e re biyul nem ma ke micheg Jesus ni gad ba t’uf rok. U m’on ni dawori yib Jesus nga fayleng ma ir “be’ nib salap i maruweliy ban’en” ma kub “fel’” e girdi’ u wan’! (Prov. 8:30, 31) Bochan ni gad be pining e magar ngak Got nge Fak ko n’en ni kar rin’ew ni fan ngodad, ma aram fan ni gad ma fol ko n’en ni tay Jesus chilen ni ngan rin’ ni gaar: “Um rin’ed ni aray rogon ngi i pugurag ngomed.”​—1 Kor. 11:23-25.

N’EN NI BE YIP’ FAN FARE FLOWA NGE FARE WAIN

6. Susun ni nge uw rogon u wan’dad fare flowa nge fare wain ni yima fanay u nap’an e Puguran ko yam’ ni tay Jesus?

⁶ Nap’an ni tababnag Jesus fare Puguran ma de pilyeg fare flowa nge ngal’ ni downgin, maku de pilyeg fare wain nge ngal’ ni rachaen. I weliy murung’agen e n’en ni be yip’ fan fare flowa ni gaar: “Ireray dowag.” Miki weliy e n’en ni be yip’ fan fare wain ni gaar: “Ereray rachaeg ni bay map’ nga but’ ni fan ngak boor e girdi’.” (Mark 14:22-24) Ere, ba tamilang ni bay ban’en ni be yip’ fan fare flowa nge fare wain.

7. Mang e be yip’ fan fare flowa ni yima fanay u nap’an fare Puguran ko yam’ ni tay Jesus?

⁷ Nap’an e re madnom nem nib ga’ fan nni tay ko duw ni 33 C.E., me fanay Jesus e flowa ndariy e is riy ni ke aw ko fare madnom ko Paluk’af. (Ex. 12:8) Bay yu ngiyal’ ni ma weliy e Bible murung’agen e is ni nge yip’ fan e denen. (Matt. 16:6, 11, 12; Luke 12:1) Ere, ba puluw ni nge fanay Jesus e flowa ndariy e is riy ni bochan e be yip’ fan downgin nib flont. (Heb. 7:26) Aram fan ni yima fanay e flowa ndariy e is riy u nap’an fare Puguran ko yam’ ni tay Jesus.

8. Mang e be yip’ fan fare wain ni yima fanay u nap’an e Puguran ko yam’ ni tay Jesus?

⁸ Fare wain ni fanay Jesus ko re nep’ nem ko Nisan 14 ko duw ni 33 C.E., e be yip’ fan rachaen, maku taareb rogon ko fare wain ni yima fanay u nap’an fare Puguran ko yam’ ni tay Jesus ni yima tay e ngiyal’ ney. I yim’ Jesus u bangi ban’en u wuru’ yu Jerusalem ni ka nog yu Golgotha ngay, ya nge yag ni n’ag Got fan e “denen” rodad. (Matt. 26:28; 27:33) Faanra ba ga’ fan u wan’dad fare biyul ni pi’ Jesus, ma gubin e duw nra ud athamgilgad ni ngad fal’eged rogodad ni ngad uned ko re madnom ney. Uw rogon ni ngad rin’ed e re n’ey?

BOCH E KANAWO’ U ROGON NI NGAD FAL’EGED ROGODAD

9. (a) Mang nib ga’ fan ni ngaud beeged fapi thin nu Bible ni yima beeg u m’on ngu tomuren fare Puguran ko yam’ ni tay Jesus? (b) Uw rogon u wan’um fare biyul ni pi’ Jesus?

⁹ Gad ra beeg fapi thin nu Bible ni yima beeg u m’on ngu tomuren fare Puguran ko yam’ ni tay Jesus ni bay ko calendar rodad, ma gad beeg fare babyor ni Examining the Scriptures Daily, ma rayog ni ngaud fal’eged i lemnag e pi’ n’en ni i rin’ Jesus u m’on nli’ nge yim’. Gad ra rin’ e pi n’ey ma aram e gad be fal’eg rogodad ni fan ko fare Abich ni Blayal’ rok Somol. I yoloy reb e walag nib pin ni gaar: “Ri gamad ma athapeg ni nggu uned ko fare Puguran ko yam’ ni tay Jesus. Ma gubin yay ni gamad ra un ngay, ma ri be gel feni ga’ fan u wan’mad. Ke yib ngan’ug e ngiyal’ ni yim’ e chitamag min fek ko gin ni yima tayam’ riy. Nap’an ni gu bay u rom ni gu be yaliy ma aram me yib ngan’ug fare biyul ni ke pi’ Jehovah ma aram ma ri gu pining e magar riy ngak u lanin’ug . . . Gu manang gubin e thin nu Bible ni murung’agen fare biyul nge rogon ni nggu weliy! Machane, ngiyal’ ni yim’ e chitamag e aram e ngiyal’ ni fini tamilang u wan’ug feni ga’ fan fare biyul, ma aram mar gu felfelan’.” Nap’an ni gad be fal’eg rogodad ni fan ko fare Puguran ko yam’ ni tay Jesus, mab ga’ fan ni ngad fal’eged i lemnag fan fare biyul ni ke pi’ ni ir e ke pithigdad ko denen nge yam’.

10. Faan gad ra fal’eg rogodad ni fan ko fare Puguran ko yam’ ni tay Jesus, ma uw rogon nra yib angin ko machib ni gad ma tay?

¹⁰ Ra ngad fal’eged rogodad ni fan ko fare Puguran ko yam’ ni tay Jesus, mab muun ngay ni ngad yoornaged e tayim rodad ni fan ko machib. Rogon ni ngad rin’ed e re n’ey e aram e ngad uned ko pioneer ni ayuw ko pi pul u m’on ngu tomuren fare Puguran. Gad ra felfelan’ u nap’an ni gad ra pining e piin ni gad ma fil e Bible ngorad nge yugu boch e girdi’ ni ngar uned ko fare Abich ni Blayal’ rok Somol ni bochan e gad be weliy murung’agen Got nge Fak nge pi tow’ath ni bay ni fan ngak e piin ni yad be rin’ e n’en nib m’agan’ Jehovah ngay, maku yad be pining e sorok ngak.​—Ps. 148:12, 13.

11. Mang e rin’ boch e walag u Korinth ni be m’ug riy ni yad be darifannag fare wain nge fare flowa ni fan ko fare Puguran ko yam’ ni tay Jesus?

¹¹ Nap’an ni ga be fal’eg rogom ni fan ko fare Abich ni Blayal’ rok Somol, ma ngam lemnag fapi thin ni yoloy apostal Paul nge yan ko pi Kristiano nu Korinth. (Mu beeg e 1 Korinth 11:27-34.) I tamilangnag Paul ni en nra kay fare flowa me unum fare wain ni yugu dariy fan u wan’ e “aram e ke denen, ya ke darifannag downgin nge rachaen Somol” Jesus Kristus. Ere, u m’on ni nge kay be’ ni kan dugliy fare flowa me unum fare wain, ma thingari “fith ir u laniyan’” ko rayog ni nge rin’ fa dabiyog. Ya faanra ke rin’ ban’en nib kireb me kay fare flowa me unum fare wain, ma aram e ke “girngiy e gechig nga daken ni fan e ke kay e re flowa nem ma ke unum e n’en ni bay ko fare kap.” Bochan nib kireb e ngongol ko pi walag nu Korinth nem, ma aram fan ni boor i yad e gowa “ke m’ar ke meewar, ma boch e ke yim’.” Re n’ey e be yip’ fan ni kar meewargad ko tirok Got ban’en. Sana bay boch e pi walag nem ni ur abichgad ma yad be unum nib pag rogon u m’on ara u nap’an ni yibe madnomnag fare Abich ni Blayal’ rok Somol. Ma aram fan nde yag ni ngar tedan’rad ko tirok Got ban’en. Bochan e re n’ey, ma aram fan nde m’agan’ Got ko ngongol rorad.

12. (a) Mang e taarebrogonnag Paul fare Abich ni Blayal’ rok Somol ngay? Mang fonow e pi’ ngak e piin ni yad ma kay fare flowa mi yad unum fare wain? (b) Faanra bay be’ ni ma kay fare flowa me unum fare wain u nap’an e Puguran ni ke ngongliy reb e denen nib ubchiya’, ma mang e susun ni nge rin’?

¹² I taarebrogonnag Paul fare Abich ni Blayal’ rok Somol nga reb e abich ni yima tay. Me fonownag e piin ni yad ma kay fare flowa mar unumed fare wain ni gaar: “Dabiyog ni ngam unumed ban’en ko kap rok Somol mi ki gimed unum ban’en ko kap rok e pi moonyan’; dabiyog ni ngam abichgad u tebel rok Somol mi ki gimed abich u tebel rok e pi moonyan’.” (1 Kor. 10:16-21) Faanra bay reb e walag ni ma kay fare flowa me unum fare wain u nap’an fare Abich ni Blayal’ rok Somol ni ke rin’ reb e denen nib ubchiya’, mab t’uf ni nge yog ko piin piilal ya nge yag nra ayuweged ko tirok Got ban’en. (Mu beeg e James 5:14-16.) Faanra ke dag ko ngongol rok ‘ni ke pi’ keru’ ko denen’ rok, ma nap’an nra kay fare flowa me unum fare wain u nap’an fare Puguran ko yam’ ni tay Jesus, ma aram e gathi be darifannag fare biyul ni pi’ Jesus.​—Luke 3:8.

13. Mang fan nra fel’ rogodad ni faan gad ra yibilay fare athap ni ke pi’ Got ngodad?

¹³ Nap’an ni gad be fal’eg rogodad ni fan ko fare madnom ma ra yib angin ngodad ni faan gad ra meybil ma gad fal’eg i lemnag fare athap ni ke pi’ Got ni fan ngodad. Susun ndariy reb e tapigpig rok Jehovah ni nge darifannag fare biyul ni ke pi’ Jesus ni aram e nge un i kay fare flowa me unum fare wain ni faanra de mich u wan’ ni ir bagayad e piin ni kan dugliy. Ere, mini’ e rayog ni nge kay fare flowa me unum fare wain?

MINI’ E RAYOG NI NGE KAY FARE FLOWA ME UNUM FARE WAIN?

14. Mang e ma rin’ e piin ni kan dugliyrad ni yad bang ko fare m’ag nib beech u nap’an fare Puguran ko yam’ ni tay Jesus?

¹⁴ Piin ni yad ma kay fare flowa mi yad unum fare wain e ke mich u wan’rad ni yad bang ko fare m’ag nib beech. I weliy Jesus murung’agen fare wain ni gaar: “Re kap ney e bin nib beech e m’ag u thilin Got nge girdi’, ni rachaeg e bayi micheg.” (1 Kor. 11:25) I yiiynag Got u daken Jeremiah ni profet nra ngongliy ba m’ag nib beech u thilrad piyu Israel ni nge yan nga lon fare m’ag ko Motochiyel. (Mu beeg e Jeremiah 31:31-34.) I ngongliy Got fare m’ag nib beech u thilrad e piin ni kan dugliyrad ara girdien fachi ulung. (Gal. 6:15, 16) Ma ke yib i m’ug nib riyul’ e re m’ag nem ni bochan fare maligach ni pi’ Jesus. (Luke 22:20) Jesus e ir e Ta Maaf ko bin nib beech e m’ag u thilin Got nge piin ni kan dugliyrad ni yad ba yul’yul’ ni athap rorad e nga ranod nga tharmiy.​—Heb. 8:6; 9:15.

15. Mini’ e piin ni yad bang ko fare m’ag ni fan nga Gil’ilungun Got, ma mang e rayog ni ngar rin’ed ni faan yad ra par ni yad ba yul’yul’?

¹⁵ Piin ni yad ma kay fare flowa mar unumed fare wain e yad bang ko fare m’ag ni fan nga Gil’ilungun Got. (Mu beeg e Luke 12:32.) Pi girdi’ ney ni ur pared ni yad ba yul’yul’ mar uned ngak Jesus ko gafgow u taabang e yad ra un ngak ko gagiyeg u tharmiy. (Fil. 3:10) Ma bochan ni pi girdi’ ney ni kan mel’egrad e yad bang ko fare m’ag ni fan nga Gil’ilungun Got, ma aram fan ni yad ra un ngak Kristus ko gagiyeg u tharmiy ndariy n’umngin nap’an ni yad boch e pilung. (Rev. 22:5) Pi girdi’ ney e bay rogon ni ngar ked fare flowa mar unumed fare wain u nap’an fare Abich ni Blayal’ rok Somol.

16. Mu weliy fan fare thin ni bay ko Roma 8:15-17.

¹⁶ Yigoo piin ni ke micheg gelngin Got nib thothup nga lanin’rad ni yad pi fak Got e yad e thingar ra ked fare flowa mar unumed fare wain. (Mu beeg e Roma 8:15-17.) Rogon ni yog Paul e ma lungurad: “Chitamag, Chitamag!” I fanay Paul bbugithin nu Aramaic ni yima yog u fithik’ e t’ufeg nge tayfan ni bod fa gal bugithin ni “papa’” nge “chitamag.” Bochan nrib chugur e tha’ u thilrad Jehovah, ma aram fan ni yad ma pining e “chitamag” ngak. Piin ni kar ‘manged pi fak Got’ e yad e piin ni kan dugliyrad u daken gelngin Got nib thothup. Piin ni ke ‘ngongliyrad’ gelngin Got nib thothup kar manged pi fak Got e aram e piin ni kan dugliyrad. Re n’ey e gathi be yip’ fan ni dubrad ni ngar pared u fayleng. Ya yad manang ni faan yad ra par ni yad ba yul’yul’ nge mada’ ko yam’, ma yad ra un ngak Jesus ko gagiyeg u Gil’ilungun Got u tharmiy. Ngiyal’ ney e, kemus nri ka in ko fare 144,000 i gachalpen Kristus ni “ke dugliyrad” Jehovah e ka yad bay u fayleng. (1 John 2:20, NW; Rev. 14:1) Ma bochan gelngin Got nib thothup, ma aram fan ni yad ma tolul ni ma lungurad, “Chitamag, Chitamag!” Riyul’ nrib fel’ e tha’ u thilrad Got!

NGE GA’ FAN U WAN’UM E PI N’EN NI KE L’AGAN’UM NGAY NI BE YOG E BIBLE

17. Mang e athap ko piin ni kan dugliyrad, ma uw rogon e re n’em u wan’rad?

¹⁷ Faanra gur bagayad e piin Kristiano ni kan dugliyrad, ma dariy e maruwar riy nri ga baadag ni ngaum weliy murung’agen e athap rom u lan e meybil rom. Nap’an nra weliy e Bible murung’agen fare pin ni ‘ka nog ni yow ra mabgol’ Jesus Kristus, ma ga ma lemnag rogon ni gab l’ag ko re n’ey, ma ga ma athapeg e ngiyal’ ni ga ra mang bagayad e piin ni kan taarebrogonnagrad ngak fare ‘pin ni ngar mabgolgow’ Kristus. (2 Kor. 11:2; John 3:27-29; Rev. 21:2, 9-14) Nap’an nra yog Got u daken e Thin rok nib t’uf e piin ni kan dugliyrad rok, ma rayog ni nge lungum, “I gag bagayad.” Maku nap’an nra yog e Thin rok Jehovah e n’en ni nge rin’ e piin ni kan dugliyrad, ma ma k’aringem gelngin Got nib thothup ni ngam fol riy, me lungum, “Re n’ey e bay rogon ngog.” Gelngin Got nib thothup e ra micheg nga lanin’um ni athap rom e ngam man nga tharmiy.

18. Mang e athap rok “yugu boch e saf,” ma uw rogon e re n’em u wan’um?

¹⁸ Maku reb e, faanra gur bang ko “fare ulung nib ga’” ara “yugu boch e saf,” ma aram e athap rom ni ke pi’ Got e ngam par u fayleng. (Rev. 7:9; John 10:16) Ga baadag ni ngam par u Paradis u fayleng ni manemus, ma ga ma felfelan’ ni ga ma fal’eg i lemnag e pi n’en ni be weliy e Bible u murung’agen e par u fayleng boch nga m’on. Ga be athapeg ni ngam pared e girdi’ rom nge pi fager rom u roy u fayleng u fithik’ e gapas. Ga be athapeg e ngiyal’ nra chuw e uyungol, nge gafgow, nge m’ar, nge yam’. (Ps. 37:10, 11, 29; 67:6; 72:7, 16; Isa. 33:24) Ka ga be athapeg e ngiyal’ ni ga ra guy e piin ni kan fasegrad ko yam’, maku bay e athap rorad ko par u fayleng ni manemus. (John 5:28, 29) Ri ga be pining e magar ngak Jehovah ko biney e athap ni ke pi’ ngom! Yugu aram rogon ni damur ma un i kay fare flowa mag unum fare wain, machane ga ma un ko fare Puguran ko yam’ ni tay Jesus Kristus ni bochan e ga be pining e magar ko fare maligach ni ke pi’.

GA RA UN KO RE MADNOM NEM, FA?

19, 20. (a) Uw rogon nrayog ni nge yag e yafas ndariy n’umngin nap’an ngom? (b) Mang fan ni ga ra un ko fare Abich ni Blayal’ rok Somol?

¹⁹ Demtrug ko athap rom e ngam par u fayleng ara ngam man nga tharmiy, ma rayog ni nge riyul’ e re n’ey u wan’um ni faan ga ra maruweliy e michan’ rom ngak Jehovah Got, nge Jesus Kristus, nge fare biyul. Ga ra un ko fare Puguran ko yam’ ni tay Jesus, ma aram e ngiyal’ nrayog ni ngam fal’eg i lemnag e athap rom nge feni ga’ fan e yam’ ni tay Jesus. Ere, mu nameg ni ngam un ngak bokum milyon e girdi’ ni yad ra un i madnomnag fare Abich ni Blayal’ rok Somol u tomuren ni ke aw e yal’ ko rofen ni Biyernes ko April 3, 2015 ko pi Kingdom Hall nge ku yang ni yima tay e re muulung ney riy.

²⁰ Ga ra un ko re Puguran ney, ma ri ga ra felfelan’ ko fare biyul ni ke pi’ Jesus. Faan ga ra motoyil nib fel’ rogon ko fare welthin ni yira pi’ ma ra k’aringem ni ngaum t’ufeg e piin nib migid ngom, ni aram e ngaum weliy ngorad murung’agen e t’ufeg rok Jehovah nge pi n’en nib m’agan’ ngay ni fan ko girdi’. (Matt. 22:34-40) Ere, mu athamgil ni ngam un ko fare Abich ni Blayal’ rok Somol.