Mang Fan Ni Ngan Madenomnag Fare Abich Ni Balayal Rok Somol?

“Somol e ke pi’ ngog e n’en ni ku kug pi’ ngomed.”​—1 KORINTH 11:23.

1, 2. Mang e ke rin’ Jesus u nap’an fare nep’ ni kan madenomnag fare Paluk’af ko duw ni 33 C.E.?

IMMOY Fak Jehovah ni maagirag rok ko ngiyal’ nem. Maku arrogon fa 11 e girdi’ ni ‘kar pared rok ko gafgow ni i tay.’ (Luke 22:28) Rorran nem e aningeg fen e maruwel ni balayal, ko pul ni March 31, 33 C.E., ma bochan e ngoon ma Dabi siy ni ke fel’ yaan lan e lang u daken yu Jerusalem ko ngiyal’ nem. Jesus Kristus nge fapi apostal e kefin ra mu’gad ko fare madenom ko Palukaf. Judas Iskariot nde yul’yul’ e ka nog ngak ni nge chuw u rom, machane gathi aram e tayim ni nge chuw yugu boch e girdi’. Mang Fan? Ya bochan ni ke chugur ni nge rin’ Jesus ban’en ni rib ga’ fan. Be mang e re n’em?

² Bochan ni immoy e en ni yoloy fare Gospel i Matthew u rom, ma ngada paged ni ir e nge weliy ngodad. I yoloy ni gaar: “Ma nap’an ni yad be abich, me fek Jesus e flowa, me pining e magar riy ngak Got, me t’et’ar, me pi’ ngak pi gachalpen me gaar, “Mfeked ngam ked; ya biney e be yip’ fan dowag.” Me ki fek fare kap’ me pining e magar riy ngak Got, nge mu’ me pi’ ngorad ma gaar, “Mu unumed ni gimed gubin, ya biney e be yip’ fan rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan e nge n’ag Got fan e denen.’” (Matthew 26:26-28, NW) Ireray e n’en ni ra buch ni ke mus ni taab yay? Mang e be yip’ fan e re n’em? Bay fan e re n’em ngodad ko ngiyal’ n’ey?

“Umu Rin’ed e Re N’ey”

3. Mang fan ni n’en ni ke rin’ Jesus ko Nisan 14, 33 C.E., e bay fan?

³ Fare n’en ni rin’ Jesus Kristus ni nep’ ko Nisan 14, 33 C.E., e gathi ke mus ni n’en ni yigi i buch ko yafas rok. Ke weliy Paul ni apostal murung’agen ko ngiyal’ ni be yoloy ngak e piin Kristiano u Korinth ni kan dugliyrad, ni re n’em e ka yibe rin’ u tomren ni ke pag 20 e duw. Yugu aram rogon ni da immoy Paul rok Jesus nge fa 11 e apostal ko 33 C.E., ma mmutrug ni ke fil ban’en rok boch e apostal ko mang e ke buch ko re madenom nem. Maku, ba tamilang ni kan tamilangnag ngak Paul rarogon e re madenom nem u nap’an ni kan piliyeg e changar rok. I yog Paul ni gaar: “Ya tin ni kug weliy ngomed e yog ngog rok Somol ni faani lungug: re nep’ i n’en nni yognag Somol Jesus e fek Somol Jesus fare flowa, nge pining e magar riy ngak Got, me t’ar me gaar, “Ereray dowag ni fan ngomed. Um rin’ed ni aray rogon ngi i pugurag ngomed.” Ma ku aram rogon ni fek fare kap u tomren e abich ni balayal’ me gaar, “Re kap ney e bin nib biech e m’ag u thilin Got nge girdi’, ni rachaeg e bayi micheg. Ngiyal’ ni gimed ra unum e n’en ni ba’ riy e ngam rin’ed ni nge pugurag ngomed.’”​—1 Korinth 11:23-25.

4. Mang fan ni piin Kristiano e yad ma madenomnag fare Abich ni Balayal rok Somol?

⁴ Luke ni en ta yol ko fare Gospel e ke micheg ni i motochiyelnag Jesus ni gaar: “Um rin’ed e re n’ey ngi i pugurag ngomed.” (Luke 22:19) Maku kan thiliyeg ni: “Mu rin’ed e re n’ey ngi i pugurag ngomed” (Today’s English Version) nge “Mu rin’ed e re n’ey nge mang puguran rog.” (The Jerusalem Bible) Riyul’, ni re madenom ney e baga’ ni yima yog ni fare Puguran’ ko yam’ ni tay Kristus. Maku Paul e be yog fare Abich ni Balayal rok Somol ngay​—ma ba puluw e re n’em, ya bochan kan rin’ e re n’em ni balayal’. (1 Korinth 11:20) Piin Kristiano e kan motochiyelnag ngorad ni ngar madenomnaged fare Abich ni Balayal’ rok Somol. Machane mang fan ni kan tababnag e re madenom ney?

Mang Fan ni Kan Tababnag e Re Madenom Nem

5, 6. (a) Mang reb i fan ni i tabab Jesus ni nge madenomnag fare Puguran? (b) Mu pi’ yugu reb i fan ni kan tabab ni ngan madenomnag fare Abich ni Balayal’ rok Somol.

⁵ Reb i fan ni kan tababnag fare Puguran e ba l’ag nga reb i fan e yam’ ni tay Jesus. Ke yim’ ni be gagiyelnag e gagiyeg rok e Chitamangin nu tharmiy nth’abi tolang. Ma aram ke micheg Kristus ni Satan ni fare Moonyan’, ni ir faanem ni ke yog e thin nde riyul’ ni girdi’ e yad be pigpig ku Got ni bochan e yad be chogownag ban’en, aram e ke ban. (Job 2:1-5) Yam’ ni tay Jesus u fithik’ e yul’yul’ e be dag ni de riyul’ e re n’em me felfelan’nag gumir’chaen Jehovah.​—Proverbs 27:11.

⁶ Yugu reb i fan ni kan tababnag fare madenom ko fare Abich ni Balayal’ rok Somol e bochan ni nge puguran ngodad e yam’ ni tay Jesus ni ir be’ nib flont, ni dariy e denen rok, me ‘pi’ e pogofan rok nge biyuliy boor e girdi’ ngay.’ (Matthew 20:28) Nap’an ni ke denen fa bin som’mon e pumoon nib togopuluw ngak Got, me n’ag e yafas rok nib flont nge urngin e athap rok. Machane i yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni be maruweliy e michan’ rorad ngak e dabkur m’ad ya ke yog ngorad e yafas ni manemus.” (John 3:16, NW) Riyul’ ni, “denen e ma pi’ puluwoy - ni yam’; machane taw’ath rok Got ngodad ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) Fare madenom ni Abich ni Balayal’ rok Somol e be puguran’ ngodad e t’ufeg nib gel ni ke dag Jehovah nge Fak nib peth ko yam’ ni tay Jesus nib maligach. Uw rogon ni ngada pininged e magar nbochan e re t’ufeg nem!

Wuin e Yira Madenomnag?

7. Uw rogon ma piin Kristiano ni kan dugliyrad e yad ma kay fare flowa ma yad ma unum fare wain ni fan ko Puguran ni “biyay nge biyay”?

⁷ Murung’agen fare Abich ni Balayal’ rok Somol, e yog Paul ni gaar: “Ya nguum weliyed murung’agen e yam’ ni tay Somol ko ngiyal’ ni gimed ra kay e re flowa ney mi gimed unum e n’en ni ba’ ko re kap ney nge yan i mada’ ko ngiyal’ ni bayi sul Somol riy.” (1 Korinth 11:26) Urngin e Kristiano ni kan dugliyrad e ra kay fare flowa ma ra unum fare wain u nap’an fare Puguran. Ma aram, u p’eowchen Jehovah Got nge girdi’ nu fayleng, e yad ma machibnag e michan’ rorad ko fare yaram rok me pi’ Jesus’ nge mang biyul ni maligach.

8. Uw n’umngin nap’an ni fare ulung ko piin ni kan dugliyrad e nguura madenomnaged fare Abich ko Balayal’ rok Somol?

⁸ Uw n’umngin nap’an ni fare ulung ko Kristiano ni kan dugliyrad e nguura madenomnaged fare Puguran’ ko yam’ ni tay Kristus? “Nge yan i mada’ ko ngiyal’ ni bayi sul Somol riy,” rogon ni yog Paul, ma ba tamilang ni re n’en ney e be yip’ fan ni yira madenomnag e re madenom nem nge mada’ ko ngiyal’ ni keb Jesus ni nge fek pi gachalpen ni kan dugliyrad nga ranod nga tharmiy u daken e fas ko yam’ u nap’an ni “bay.” (1 Thessalonika 4:14-17, NW) Ba puluw e re n’ey ko thin ni yog Jesus ngak fa 11 e apostal nib yul’yul’ ni gaar: “Ma nap’an ni gu ra yan gu ngongliy tagil’med, ma bay gu sul nggu fekmed, ni aram e bay um pired ko gin ni gu ba’ riy.”​—John 14:3.

9. Mang fan e pi thin rok Jesus ni bay ko Mark 14:25?

⁹ Nap’an ni ke tabab Jesus ko fare madenom ko Puguran, me weliy murung’agen e kap ko wain me yog ngak e pi apostal rok nib yul’yul’ ni gaar: “Nggog ngomed ni gathi bay ku gu unum e re wain ney bayay nge yan i mada’ ko chirofen ni bay gu unum e bin biech e wain ko gin nsuwon Got.” (Mark 14:25) Bochan dabi unum Jesus e wain nib riyul’ u tharmiy, yab tamilang ni be lemnag e felfelan’ ko yu ngiyal ni yima unum e wain ni be yip’ fan ban’en. (Psalm 104:15; Eklesiastes 10:19) Ngan par u taabang u lan fare Gil’ilungun e ba gel e felfelan’ riy ni Jesus nge piin ni kar leked luwan ay e ereray e n’en ni kara athapeged nrib gel.​—Roma 8:23; 2 Korinth 5:2.

10. Uw rogon ni ngan madenomnag fare Puguran?

¹⁰ Ngan madenomnag e yam’ ni tay Jesus u gubin e pul, ara gubin e wik, ara gubin e rran? Danga’. I tabab Jesus ni nge madenomnag fare Abich ni Balayal’ rok Somol min li’ ngem’ ko rran ko Paluk’af, ni kan madenomnag ni “reb e puguran” ko fare rran ni kan pag piyu Israel u Egypt ko 1513 B.C.E. ni dabkuura pared ni sib rok piyu Egypt. (Exodus 12:14) Kan madenomnag fare Paluk’af ni taab yay u gubin e duw, ko bin 14 e rran ko fare pul rok piyu Jew ni Nisan. (Exodus 12:1-6; Leviticus 23:5) Biney e be dag ni yam’ ni tay Jesus e susun ni ngan madenomnag ni taareb rogon ko fare Paluk’af​—ni taab yay u reb e duw—​ma gathi gubin e pul, nge gathi gubin e wik, ara gubin e rran.

11, 12. Mang e be dag chepin e girdi’ u murung’agen e Puguran ni kan madenomnag kakrom?

¹¹ Ere, ba puluw ni ngan madenomnag fare Puguran ni taab yay u reb e duw ko Nisan 14. Reb e babyor e be yog ni gaar: “Fapi Kristiano u Asia Minor e kan pining e Quartodecimans ngorad [Fourteenthers] ni bochan e yalen rorad ni yad ma madenomnag fare pascha [Abich ni Balayal rok Somol] ni ka yima ta’ ko Nisan 14 . . . Re fen e pul ney e rayog ni nge aw ko Biernes ara demtrug e rran u reb e wik.”​—The New Schaff-Herzog Encyclopedia of Religious Knowledge, Volume IV, page 44.

¹² Be weliy murung’agen e n’en ni yima rin’ ko fa bin l’agruw e chibog C.E., ma fare historian ni J. L. von Mosheim fithingan e be weliy ni piin ni Quartodecimans e kara madenomnaged fare Puguran ko Nisan 14 ya bochan “kar lemnaged e n’en ni dag Kristus ni be’ ni ba’ mat’awon nga reb e motochiyel.” Yugu reb e historian e be yog ni gaar: “Ban’en ni ma rin’ fapi galesiya ko Quartodecimans u Asia ni ba taareb rogon ko n’en ni ma rin’ fare galesiya u Jerusalem. U lan fa bin 2 e chibog, ma pi galesiya ney e kara madenomnaged e biyul u daken e yam’ ni tay Kristus u nap’an e Pascha rorad ko Nisan 14.”​—Studia Patristica, Volume V, 1962, page 8.

N’en ni Be Yip’ Fan fare Flowa

13. Mit i mang e flowa e ke fanay Jesus u nap’an ni ke tabab ni nge madenomnag fare Abich ni Balayal’ rok Somol?

¹³ Nap’an ni ke tabab Jesus ni nge madenomnag fare Puguran, “me fek e flowa, me pining e magar, me t’et’ar, me pi’ ngak [pi gachalpen].” (Mark 14:22) Fare flowa ni immoy ko re madenom nem e ba taareb rogon ko n’en ni kan fanay ko Paluk’af. (Exodus 13:6-10) Bochan ni kan lith fare flowa ni dan tay e n’en ni ma thownag e flowa ngay, ma de thow mab mom ni ngan t’ar ma susun ni ngan t’et’ar min wereg. Nap’an ni ke yoornag Jesus e flowa ni fan ko bokum biyu’ e girdi’, ma ku ireray e flowa ni mom nib ngan t’ar, ya bochan ke t’et’ar e re n’em ni fan ni ngan wereg. (Matthew 14:19; 15:36) Ere ba tamilang ni, fare n’en ni yima t’ar e flowa u nap’an fare Puguran e der yip’ fan ban’en.

14. (a) Mang fan nib puluw ni fare flowa ni fan ko Puguran e der ma ta’ e n’en ni ma thownag e flowa ngay? (b) Mit i mang e flowa e rayog ni ngan lith ni ngan fanay ko Abich ni Balayal’ rok Somol?

¹⁴ Murung’agen fare flowa ni kan fanay u nap’an ni ke tabab ni ngan madenomnag fare Puguran, me yog Jesus ni gaar: “Biney e be yip’ fan dowag ni fan ngomed.” (1 Korinth 11:24; Mark 14:22, NW) Ba puluw ni fare flowa e dan tay e n’en ni ma thownag e flowa ngay. Mang fan? Bochan fare n’en ni ma thownag e flow e rayog ni nge yip’ fan e kireb, ara denen. (1 Korinth 5:6-8) Fare flowa e be yip’ fan e dowef rok Jesus ni ba flont, ma dariy e denen rok, nib puluw ni kan pi’ ni biyul’ ni maligach. (Hebrews 7:26; 10:5-10) Pi Mich Rok Jehovah e kar ted e re n’en ney nga lanin’rad ma yad ma fol ko n’en ni dag Jesus ma aram yad ma fanay e flowa ni dan ta’ e n’en ni ma thownag e flowa ngay u nap’an fare Puguran. Yu ngiyal’, e yad ma fanay fare crackers ni ma fanay piyu Jewish u nap’an e Paluk’af ndariy ban’en ni kan ta’ ngay, ni bod fapi onion ara fak e nimen. Ma reb, e rayog ni ngan lith e flowa ni dabni tay fare n’en ni ma thownag e flowa ngay ya kemus ni merikengko ni ka nog e whole-grain flour ngay (faanra bay e wheat ma ffel) ni buchuw min athkuy buchuw e rran ngay. Ba t’uf ni ngan fanay ban’en nib tolulbuy ni ngan achichignag ma aram rayog ni ngan lith u th’ib ni kan ta’ buchuw e oil ngay nge mada’ ko ngiyal’ ni ke milik mab mom ni ngan t’ar.

N’en ni Be Yip’ Fan fare Wain

15. Mang e n’en ni bay u lan fare kap ni kan fanay u nap’an ni ke tabab Kristus ni nge madenomnag fare Puguran ko yam’ ni tay?

¹⁵ Tomren ni kan wereg fare flowa ni dan ta’ fare n’en ni ma thownag e flowa ngay, me fek Jesus reb e kap, “ma nap’an ni mu’ i pining e magar riy ngak Got me pi’ ngorad [fapi apostal], mi yad unum e n’en ni ba’ riy ni yad gubin.” Me gaar Jesus ngorad: “Biney e be yip’ fan ‘rachaeg ni fan ko fare m’ag,’ ni ngan puog nga but’ ni fan ko girdi’ ni boor.” (Mark 14:23, 24) Mang e n’en ni bay u lan fare kap? Wain ni ke mugunin, gathi logowen e grape ndawori mugunin. Nap’an ni be weliy e Bible murung’agen e wain, ma der yip’ fan e logowen fare grape ndawori mugunin. Ni bod ni, wain ni mugunin, ma gathi logowen fare grape, nra kirebnag fare “tafen e wain ni keru’ e gamanman ni ke kaday,” rogon ni yog Jesus. Ma toogor rok Kristus e ka rogned ni “ma unum e wain.” Ma ra aw ndariyfan e thin ni ka nog nfaanra fare wain riy e kemus ni logowen e grape. (Matthew 9:17; 11:19) Kan unum e wain u nap’an e madenom ko Paluk’af, ma i fanay Kristus e wain u nap’an e yay ni som’mon ni ke madenomnag fare Puguran ko yam’ ni tay.

16, 17. Mit i mang e wain nib puluw u nap’an ni ngan madenomnag fare Puguran, ma mang fan?

¹⁶ Ke mus ni wain nib rowrow e ba puluw ni nge fanathinnag ko fare n’en ni bay u lan fare kap, ni be yip’ fan rachaen Jesus ni map’. Me ir e ke yog ni gaar: “Biney e be yip’ fan ‘rachaeg ko fare m’ag,’ ni ran puog ni fan ko girdi’ ni boor.” Me yoloy Peter ni apostal ni gaar: “Gimed [piin Kristiano ni kan dugliymed] manang ni gathi bochan e tin nrayog ni nge kireb, ni bod e silver ara gol, ni kan pithigmed u pangimed nib m’ayfan ni af ngomed rok pi chitamangimed ni kakrom. Machane bochan rachaen nib ga’ fan, ni ir Kristus ni dariy bang u dow nib kireb ara ba alit.”​—1 Peter 1:18, 19.

¹⁷ Dariy e maruwar riy ni wain nib rowrow e ir e wain ni i fanay Jesus u nap’an ni tabab ni nge madenomnag fare Puguran. Machane boch e wain nib rowrow ko ngiyal’ ney e dabiyog ni ngan fanay ya bochan kan rin’ ban’en ngay ni nge gel boch ara brandy ara kan uneg e herbs nge spices ngay. Rachaen Jesus e ba gaman, ma de t’uf ni ngan uneg ban’en ngay. Ma aram, wain ni kan ta’ e n’en ni aram rogon e dabiyog ni ngan fanay. Fare kap ni fan ko Puguran e ba t’uf ni ngan ta’ e wain nib rowrow ngay ni dan ta’ e suga ngay ma dan ta’ ban’en ngay ni nge gel boch. Wain nib rowrow ni kan ngongliy ko grape ma dan ta’ e suga ngay ni kan ngongliy u tabinaw e rayog ni ngan fanay, me ere ku rayog ni ngan fanay fare wain ni burgundy nib rorow nge claret.

18. Mang fan ni de fal’eg Jesus reb e maangang nib l’ag ko fare flowa nge wain ni fan ko fare Puguran?

¹⁸ Nap’an ni tababnag Jesus e re abich nem, ma de fal’eg e maangang, ni ngan thiliyeg fare flowa nge wain nge mang ufin nge rachaen nib riyul’. Ran kay e ufin e girdi’ min unum rachaen ma ka nog e talang girdi’ ngay, mab togopuluw ko motochiyel rok Got. (Genesis 9:3, 4; Leviticus 17:10) Ka be par ni bay dowef rok Jesus ni polo’ nge rachaen e ngiyal’ i nem. Kan pi’ downgin ni maligach nib flont, min puog e rachaen ko balayal’ ni bin migid ko re rran rok piyu Jew nem, ni Nisan 14. Ere, fare flowa nge wain ni fan ko Puguran e goo be yip’ fan ban’en, be yip’ fan e ufin nge rachaen rok Kristus.a

Fare Puguran​—Abich ni Fan ko Girdi’ ni Boor

19. Mang fan ni yu ngiyal’ ma gathi taareb e plet nge taareb e kap e ngan fanay u nap’an ni ngan madenomnag fare Abich ni Balayal’ rok Somol?

¹⁹ Nap’an ni ke tabab Jesus ni nge madenomnag fare Puguran, me pining e pi apostal rok ngar unumed e wain u taareb e kap. Fare Gospel rok Matthew e be yog ni gaar: “Me fek [Jesus] fare kap, me pining e magar riy ngak Got, ngemu’ me pi’ ngorad me gaar: ‘Mu unumed ni gimed gubin.’” (Matthew 26:27) Ngan fanay “fare kap,” ma gathi boor, e dariy e magawon riy, ya bochan ngiyal’ nem e ke mus ni 11 e girdi’ mab tamilang ni kar fanayed taareb e tebel mab mom ni ngan pi’ fare kap ngak be’ nge be’. Biney e duw, ma bokum million e girdi’ e ngar uned ko fare Abich ni Balayal’ rok Somol u lan e ulung ko Pi mich rok Jehovah ni ke pag 94,000 u ga’ngin e fayleng. Bochan boor e muulung e yira ta’ ni fan ko re madenom ney ko re nep’ nem, ma dabiyog ni ngan fanay taareb e kap ni fan ko urngin e girdi’. Machane dabi thil ban’en ma dariy e kireb riy ni ngan fanay boor e kap ni fan ko ulung ni boor e girdi’ riy ma rayog ni ngan pi’ ngorad ni gathi reb n’uw nap’an. Taareb rogon ko fare flowa, rayog ni ngan fanay boor e ko taareb e plet. Dariy e thin nu Bible ni be yog ni fare kap e ngan fal’eg ntaareb yaan. Machane, kap nge fare plet e susun ni nge dag ni aram e muulung ni yima tayfan. Ffel’ ni nge dabni suguy fare kap nge dabi mom ni nge map’ fare wain nga but’ u nap’an ni yibe pi’ i yan.

20, 21. Mang fan ni rayog ni nga dogned ni fare Puguran e reb abich ni nge un boor girdi’ ngay?

²⁰ Yugu aram rogon ni gathi kemus ni taareb e plet ko flowa ma gathi kemus ntaareb e kap e rayog ni ngan fanay, ma fare Puguran e ereray e abich ni nge un boor e girdi’ ngay. U Israel kakrom, ma rayog rok be’ ni nge fal’eg e abich ni fan ko girdi’ ni boor ma aram nge fek reb e gamanman nga gin ni ka nog e sanctuary rok Got ngay, ni ngan li’ riy. Bang ko fare gamanman e ngan urfeg u daken fare altar, ma bang riy e ngan pi’ ngak e prist ni be rin’ fare maruwel ma bang riy e ngan pi’ ngak e pi prist ni pifak Aaron, mab muun ngay fa cha’ ni ir ke fal’eg fare abich nge girdien e tabinaw rok ngar abichgad u taabang. (Leviticus 3:1-16; 7:28-36) Fare Puguran e ku ereray e abich ni nge un boor e girdi’ ngay ya bochan ni nga ur fothed ban’en u taabang.

²¹ Ba muun Jehovah ko re abich ney ni ka nog e communion meal ngay ya ir e tabolngin ko re yaram ney. Jesus e ir fare maligach, ma piin Kristiano ni kan dugliyrad e yad ra kay fare flowa mar unumed fare wain ya kan tayrad ni ngar uned ngay. Ngara uned ko abich ko tebel rok Jehovah ni be yip’ fan ni ba aw e gapas u thilrad Got. Arfan ni yoloy Paul ni gaar: “Fare kap ni ma fel’ rogodad riy ni ir e gadad ma pining e magar riy ngak Got; gathi ra bagadad ma be un i fek rachaen Kristus ko ngiyal’ ni kad unumed ban’en ko re kap nem? Ma fare flowa ni gadad be t’ar: gathi ra bagadad ma be fek e foth rok u downgin Kristus ko ngiyal’ ni gadad ra kay fare flowa? Ya taareb e flowa ni ba’, ma gadad gubin ni aray fadad yoor e gadad taab dowef; ya gadad gubin ni gadad be fek e foth rodad u taab flowa.”​—1 Korinth 10:16, 17.

22. Mang boch e deer u murung’agen fare Puguran e kub t’uf ni gad ra weliy?

²² Fare Abich ni Balayal rok Somol e kemus ni ereray e madenom ni ma madenomnag e Pi Mich Rok Jehovah. Mab puluw e re n’ey ya bochan e i motochiyelnag Jesus ngak pi gachalpen ni gaar: “Um rin’ed e re n’ey ngi i pugurag ngomed.” Nap’an fare Puguran, ma gad be madenomnag e yam’ ni tay Jesus, reb e yam’ ni be gagiyelnag e gagiyeg rok Jehovah nth’abi tolang. Rogon ni kad guyed, u nap’an e re abich ney ni nge un boor e girdi’ ngay, ma fare flowa e be yip’ fan e dowef rok Kristus ni maligach ma fare wain e be yip’ fan rachaen ni kan puog ni maligach. Machane, kemus ni buchuw e girdi’ ni ma kay fare flowa ma ma unum fare wain ni be yip’ fan ban’en. Mang fan ni aram rogon? Bay fan fare Puguran ngak e girdi’ ni bokum million ni dar ma kay fare flowa ma dar ma unum fare wain? Riyul’, mang e be yip’ fan fare Abich ni Balayal’ Rok Somol ni fan ngom?

[Footnote]

Mang Fapi Fulweg ni Ga Ra Pi’?

• Mang Fan ni ke tabab Jesus ni nge madenomnag fare Abich ni Balayal’ rok Somol?

• Uw n’umngin nap’an ma ngan madenomnag biyay fare Puguran?

• Mang e be yip’ fan fare flowa ni fan ko Puguran ndan ta’ e n’en ni ma thownag e flowa ngay?

• Mang e be yip’ fan fare wain ni fan ko Puguran?

[Picture on page 24]

I tabab Jesus ni nge madenomnag fare Abich ni Balayal’ rok Somol