“Jehovah, E Ir Fare Got Nri Ma Runguy E Girdi’ Ma Ma Kireban’ Ngorad”

“Jehovah, Jehovah, e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.”​—EXODUS 34:6, New World Translation.

1. (a) Mang e be yog e Bible ni be fl’eg laniyan’ e piin ni ke kireban’rad ni bochan e piin nib t’uf rorad ni kar maloggad ko liyor nib machalbog? (b) Uw rogon u wan’ Jehovah e piin ni kar olobochgad?

“FARE rugod ni fakag e yog ngog ni dabki un ko ulung ni Kristiano,” aram e thin rok reb e matam ni Kristiano. “In e rran nge wik nge pul u tomren, ma kug thamiy e amith u fithik’ag. Kab gel e amith riy ko bin ni nggum’.” Dabi siy ni rib gel e kireban’ riy u nap’an nra malog be’ nib t’uf rom nga orel u kanawoen e liyor nib machalbog. Ke buch e re n’em ngom biyay fa? Faanra er rogon ma ra gapas lanin’um ni ngam nang ni be runguyem Jehovah. (Exodus 3:7; Isaiah 63:9) Machane uw rogon e pi girdi’ nem u wan’? Be dag e Bible ni ma runguyrad Jehovah ma be piningrad ni ngar sulod ngak. Ke wenig ko piyu Jew ni yad e tatogopuluw u nap’an Malaki ni gaar: “Mu sulod ngog, mu gu sul ngomed.”​—Malaki 3:7.

2. Uw rogon ni be dag e Bible ni runguy aram felngin Jehovah nib lingagil?

² Kan tamilangnag ngak Moses rogon ni ma runguy Got e girdi’ u nap’an ni bay ko fare Burey ni Sinai. Mu rom e dag Jehovah ni ir “fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Exodus 34:6) Pi thin nem e be tamilangnag ni runguy e aram reb i felngin Jehovah. I yoloy apostal Peter ni ir e Kristiano ni: “ba adag [Got] ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Machane gathi dariy e gin nra mus riy e k’adan’ ni ma tay Got. Kan nog ngak Moses ni gaar: “Dabi fek owchen fe pag ndabi pi’ e gechig.” (Exodus 34:7; 2 Peter 2:9) Machane “Got e t’ufeg,” ma runguy aram bang ko re felngin nem. (1 John 4:8, NW; James 3:17) Dabi par Jehovah nib “damumuw ni dariy n’umngin nap’an,” ma ba “falfalan’ ni nge runguy e girdi’ me yul’yul’ ngorad.”​—Mikah 7:18, 19, NW.

3. Uw rogon e runguy u wan’ Jesus ni ba math keru’ ko lem ko pi tamachib ko motochiyel nge pi Farise?

³ Jesus e ri taareb rogorow e Chitamangin nu tharmiy. (John 5:19) Ke runguy e piin ni kar olobochgad machane gathi aram e dariy fan e denen ni kar rin’ed ya ke runguyrad ni bod rogon ni yad e piin nib m’ar. (Mu taarebnag ko Mark 1:40, 41.) Arrogon, yog Jesus ni runguy e reb e “tin ni ri baga’ fan” ko Motochiyel rok Got. (Matthew 23:23) Ma gathi arrogon e pi tamachib ko motochiyel nge fapi Farise, ya rogon e lem rorad e ngongol nib mat’aw e dariy e runguy riy. Nap’an ni ur guyed Jesus ni be un ko piin tadenen, mar gun’gun’gad nra gaargad: “Re moon ney e ba adag daken e piin ndabuy dakenrad u lan binaw ni mus ko abich ni be un ngorad ngay.” (Luke 15:1, 2) Me fulweg Jesus ngorad ko dalip e fanathin, ni ra reb ma ke tamilangnag e runguy rok Got.

4. Mang l’agruw e fanathin ni weliy Jesus, ma mang e be tamilangnag?

⁴ Som’on e weliy Jesus u morngaagen ba moon ni ke pag 99 e saf rok ni nge yan i gay reb ni ke sor nga bayang. Mang e be tamilangnag? “Baga’ e felfelan’ ni yira tay u tharmiy ni bochan taareb e tadenen ni ke pi’ keru’ ko kireb ni be ngongliy, ko felfelan’ ni yira tay ni bochan mereb i ragag nge mereb e girdi’ ni yad ba yal’uw ni dariy rogon ni ngar pied keru’rad ko denen.” Bin migid me weliy Jesus u morngaagen be’ ni ppin ni ke gay e salpiy ni wasey ma faani pirieg me ri falfalan’. Ke puluwnag e re n’em ko mang? “Ku erera’ rogon e pi engel rok Got ni yad ra felfelan’, ni bochan taareb e tadenen ni pi’ keru’ ko kireb ni be ngongliy.” Ma bin dalip e fanathin ni weliy Jesus e bod e yat.a Ka nog ni aram e bin th’abi fel’ e yat ni ke weliy be’. Gad ra weliy e re yat ney ma ra ayuwegdad ngad ted fan ma gad folwok rok Got u rogon ni ma dag e runguy.​—Luke 15:3-10.

Ba Pagal ni Tatogopuluw ni Chuw u Tafen

5, 6. U lan e bin dalip e fanathin ni weliy Jesus ma uw rogon ni dag fa bin bitir ni fak be’ ni de tay fan ban’en?

⁵ “Immoy be’ nib moon ni ba’ l’agruw i pagel ni fak. Me gaar e bin bitir ngak e chitamangin, ‘Chitamag, mpi’ e birog e f’oth ko tin ni ba’ rom ban’en.’ Ma aram me kuweg fare matam e tin ni ba’ rok u thilin fa gali cha’ ni fak. Ma in e rran nga tomren me pi’ e cha’ nib bitir rok fa gal i nem ni fak e birok e f’oth nchuway, me fek e salpiy riy me pag e tabinaw rorad nge yan. Me yan nga bangi nam nib mal’af, me par u rom ngi i adbey e salpiy rok nge m’ay.”​—Luke 15:11-13.b

⁶ Fa bin bitir e pagal e ke dag ni der tay fan ban’en. Som’on me yog ni ngan pi’ e birok e f’oth ngak, nge mu’ me adbey e salpiy rok “ko ngongol nib kireb.” Fare thin ni “ngongol nib kireb” e nni piliyeg ko thin ni Greek ni ma sor fan ko “par nib gel e wagey riy.” Be’ ni ma fil ban’en e yog ni re bugithin nem e “be sor fan ko ngongol nib pag rogon ndariy felngin.” Ere bay fan ni kan pining fak ni prodigal ngak fare pagal ko re yat rok Jesus nem ya re bugithin nem e ma sor fan ku be’ ni ma adbey urngin ban’en ma chuw’iy e tin ndariy rogon ko par.

7. Mini’ ko ngiyal’ ney e yad bod fare pagal ni prodigal, ma mang fan ni yad ma gay rogon ni ngar pared u rogon ni yad ba adag u “reb e nam nib mal’af”?

⁷ Bay boch e girdi’ ko ngiyal’ ney ni aram rogon fa? Arrogon. Boch e girdi’ e kar chuwgad u “tafen” e Chitamangidad nu tharmiy, Jehovah. (1 Timothy 3:15) Boch e girdi’ e ma lemnag ni kaygi elmirin e pi motochiyel ko tabinaw rok Got, mi yad lemnag ni kaygi pag rogon ni be yaliy Jehovah urngin ban’en ni gad ma rin’ ma gathi be ayuwegdad ko riya’. (Mu taarebnag ko Psalm 32:8.) Mu lemnag reb e ppin ni Kristiano ni kan chugliy ni nge fol ko thin ko Bible machane munmun me mang be’ ni tamuun alkul ma ma fanay e drug. Faani sap nga tomur ko ngiyal’ nem ni be par u fithik’ e lumor me gaar: “Ya kug adag ni nggu micheg ni rayog ni nge fel’ e par rog ni gag e kug n’igin. Kug adag ni nggu rin’ e tin ni gu ba adag ma dabug ni nge yog be’ e n’en ni nggu rin’.” Bod fare pagal ni prodigal, ma re ppin ney e ke guy rogon ni nge par ni be rin’ e tin ni ba adag. Ma bochan ni ke un ko boch ban’en ni de puluw ko Bible ma kan tharbog ko ulung ko Kristiano.​—1 Korinth 5:11-13.

8. (a) Mang ayuw ni rayog ni ngan pi’ ko piin ni yad ba adag ni ngar pared ni dabra folgad ko pi motochiyel rok Got? (b) Mang fan ni susun ni nge lemnag be’ e n’en ni ke turguy u morngaagen e liyor?

⁸ Rib gel e kireban’ riy u nap’an ni ke turguy reb e walag ni nge par nib togopuluw ko motochiyel rok Got. (Filippi 3:18) Nap’an ni ra buch e re n’ey ma piin piilal nge girdi’ nib ilal ko tirok Got ban’en e ra guy rogon ni ngar ayuweged fa en ni ke oloboch. (Galatia 6:1) Machane, dabiyog ni ngan towarsariy be’ ni nge mang reb e Kristiano. (Matthew 11:28-30; 16:24) Nap’an ni ra ilal e piin fel’ yangaren ma thingara turguyed ban’en ko liyor ni yad ra tay. Gad gubin ma ke puf rogorad ma ra be’ e ra yog ku Got e n’en ni ke rin’. (Roma 14:12) Ma dabi siy ni ‘ra be’ ma mit i n’en ni yung e ir e ra t’ar wom’engin’​—aram ban’en ni fil fare pagal ni prodigal ko fanathin rok Jesus.​—Galatia 6:7, 8.

Gafgow u Bangi Nam

9, 10. (a) Uw rogon ni ke thil salpen fare pagal ni prodigal, ma mang e rin’ ni bochan? (b) Mu weliy ko uw rogon ma boch e girdi’ ko ngiyal’ ney e ma digey e bin riyul’ e liyor mi yad un ko gafgow ni bod fare pagal ni prodigal.

⁹ “Me pi’ urngin e salpiy rok nge m’ay. Ma aram me yib ba uyungol nib gel ko re gi nam nem ni ba’ riy, me yan i par nri dakuriy bochi ban’en rok. Ma aram me yan ni par ngak be’ ni girdien e gi nam nem, me l’og faanem fachi cha’ nge yan i par nga milay’ rok ngi i ayuweg e babiy. Mi i finey ni manga yigi kay boch e pi mame ni baaram ni be kay e babiy, machane dariy be’ ni pi’ boch ngak.”​—Luke 15:14-16.

¹⁰ Yugu aram rogon nib gel e gafgow rok fare pagal ni prodigal machane da i lemnag ni nge sul nga tabinaw rok. Ya ke mada’nag be’ ko re nam nem ni ke pi’ e maruwel ngak ni nga i ayuweg e babiy rok. Motochiyel ku Moses e be yog ni babiy e mit e gamanman nde klin, me ere dabi un piyu Jew ko maruwel ni aram rogon. (Levitikus 11:7, 8) Machane yugu demtrug rogon ni manang fare pagel machane thingari k’adan’. Ya dabiyog ni nge lemnag ni en ni pi’ e re maruwel nem ngak ni be’ ko re nam nem e ra tay fan e nangan’ rok be’ ko yugu reb e nam. Ku aram rogon boch e girdi’ ko ngiyal’ ney ni kar digeyed fare kanawo’ ko liyor nib machalbog. Yad ma un ko boch ban’en ni da ur lemnaged ni ngar uned ngay faram ni ngongol ni ma sobut’nagey. Susun, nap’an ni gaman 17 e duw rok reb e pagal, me togopuluw ko par rok ko Kristiano. Ke gaar: “Kug un ko ngongol ndarngal nge drugs ma aram me m’ay fan urngin e duw ni kug fil e Bible.” Ma de n’uw nap’an nga tomren min nin’ e re pagal ney nga kalbus ni bochan ni ke kol e boyoch me mororo’ me li’ be’ ngem’. Ma munmun me sul nga rogon ko tirok Got ban’en machane rib tolang puluwon ni pi’ ni fan ko “falfalan’ nib ngoch nap’an ni be ngongliy e denen”!​—Mu taarebnag ko Hebrews 11:24-26.

11. Mang fan ni ke gel e magawon ko fare pagal ni prodigal, ma uw rogon ni ke pirieg boch e girdi’ ko ngiyal’ ney ni pi n’en ko re fayleng ney ni ma wawliy e girdi’ e yigoo “sabanban ndariy rogon”?

¹¹ Ke gel e gafgow ko fare pagal ni prodigal ya “dariy be’ ni pi’ ban’en ngak.” Ke diin e pi fager rok? Bochan ni dakuriy e salpiy rok ma kan “fanenikay.” (Proverbs 14:20) Ku aram rogon e girdi’ ko ngiyal’ ney ni yad ma malog ko tin riyul’ ma yad ma pirieg ni pi n’en ni be wawliy e girdi’ ko re fayleng ney e yigoo “sabanban ndariy rogon.” (Kolose 2:8) Reb e rugod ni ke chuw ko ulung rok Got u ba ngiyal’ e ke gaar: “Kug gafgow ma ke amith gum’erchaeg ni bochan dagu sap ngak Jehovah ni nge pow’iyeg. Kug guy rogon ni nggu mang reb e girdi’ ko fayleng, machane kar dabuyed gag ya gathi ri gu bod yad. Kug lemnag ni gu bod ba bitir ni ke malog nga bayang ma ba t’uf e matam ni nge pow’iyeg. Aram e ngiyal’ ni ke tamilang u wan’ug nib t’uf Jehovah rog. Ma aram e kug dabuy ni nggu par nib orel rok biyay.” Ku aram rogon fare pagal ni prodigal ko fanathin rok Jesus.

Ke Sulan’ fare Pagal ni Prodigal

12, 13. Mang boch ban’en ni ke ayuweg boch e girdi’ ko ngiyal’ ney ni nge sul e lem rorad nga rogon? (Mu guy fare kahol.)

¹² “Ma aram e fini sulan’ ngak me gaar u wan’, ‘Urngin e girdi’ ni be pi’ e chitamag puluwrad yad be maruwel rok e pire’ garad nder m’ay i kay rorad, mi gag e ray ni nggum’ ni bochan e bilig! Ere nggu sak’iy nggu sul ngak e chitamag nge lungug, “Chitamag, kug ngongliy e tin nib kireb nib togopuluw ngak Got ma ba togopuluw ngom. Dab kug bung ni nga nog ni fakam gag; ere mu tiyeg ni gag bagayad e piin ni ga be pi’ puluwrad yad be maruwel rom.”’ Ma aram me sak’iy nge sul ngak e chitamangin.​—Luke 15:17-20.

¹³ Ke “sulan’” fare pagal ni prodigal. Ya ke par ba ngiyal’ ni be lek e tin nra falan’ ngay, ni bod ni be par ko lik’ay. Ma chiney e ke tamilang u wan’ ko uw rarogon ko tirok Got ban’en. Arrogon, yugu aram rogon ni ke mul, machane ka rayog ni nge sul e re pagal ney nga rogon. Ya bay felngin. (Proverbs 24:16; mu taarebnag ko 2 Kronicles 19:2, 3.) Ma uw rogon e piin ni ma chuw ko yu ran’ i saf rok Got ko ngiyal’ ney? Bpuluw ni ngan lemnag ni dabkiyog ni ngan ayuwegrad, ma kanawo’ rorad e be dag ni kar denengad nib togopuluw ko kan ni thothup rok Got fa? (Matthew 12:31, 32) Danga’. Ya boor i yad e ke magawon lanin’rad ni bochan e kar sorgad nga bayang, ma munmun ma boor i yad e ma sulan’rad. Reb e walag ni ppin e weliy u morngaagen e ngiyal’ ni ke chuw ko ulung rok Got me gaar: “Dariy taareb e rran ni dagu lemnag Jehovah. Gubin ngiyal’ ma kug meybil ni reb e rran ma ra pageg ni nggu sul ko thin riyul’.”​—Psalm 119:176.

14. Mang e ke turguy fare pagal ni prodigal ni nge rin’, ma uw rogon ni ke dag ni ke sobut’an’?

¹⁴ Machane mang e rayog ni nge rin’ e piin ni kar maloggad nga bayang? Fare fanathin rok Jesus e be weliy ni ke turguy fare pagal ni prodigal ni nge milekag nge sul nga tafen me wenig ko chitamangin ni nge n’ag fan e rok. I mudugilan’ me gaar: “Mu tiyeg ni gag bagayad e piin ni ga be’ pi’ puluwrad yad be maruwel rom.” Be’ ni yibe pi’ puluwon e maruwel rok e be yan u rogon reb e rran nge reb ma rayog ni ngan taleg ko maruwel ndemtrug e ngiyal’. Aram e kab sobut’ ku be’ nib sib ni ir bang ko re tabinaw nem. Ere da i lemnag fare pagal ni prodigal ni nge yog ni nge sul ko liw rok ni ir fak e cha’ nem. Ya fel’ u wan’ ni nge un ko thal nth’abi sobut’ ni aram e ra micheg ni ba yul’yul’ ko chitamangin u reb e rran nge reb. Machane, bay ban’en nra buch nra gin fare pagal ni prodigal ngay.

Kan Runguy

15-17. (a) Mang e rin’ e chitamangin fare pagal u nap’an ni ke guy fak? (b) Fare mad nge luwew nge sus ni ke pi’ e chitamangin e be yip’ fan e mang? (c) Mang e be tamilangnag ni bochan ke yog fa en chitamangin ni ngan fl’eg e madnom?

¹⁵ “Kab orel ko tabinaw me changar e chitamangin me guy; me kireban’ ngak me yan ni be mil, me yan i gumuchmuch ngak e chi cha’ nem ni fak, nge faray owchen. Me gaar fachi cha’, ‘Chitamag, kug ngongliy e kireb nib togopuluw ngak Got ma ba togopuluw ngom. Dab kug bung ni nga nog ni fakam gag. Ere mu tiyeg ni gag bagayad e piin ni ga be pi’ puluwrad yad be maruwel rom.’ Machane me kunuy e chitamangin e pi tapigpig rok nge gaar ngorad, ‘Mu gurgad ngam feked i yib e bin th’abi fel’ e mad nga mon’ed nga daken. Mi gimed tay reb e luwew nga bugul i pa’ mi gimed yin’ e sus nga ay. Me ere mfeked i yib e bin th’abi fel’ e pifak e garbaw ngam lied, ngad madnomgad! Ya cha’ ni fakag ney e yim’ machane chiney e ke fos; i malog, machane chiney e kan pirieg.’ Ma aram mi yad tabab ko madnom.”​—Luke 15:20-24.

¹⁶ Dabi siy ni piin gallabthir e ri yad ba adag ni nge sul e bitir rorad nga rogon ko tirok Got ban’en. Ere rayog ni ngad lemnaged ko uw rogon chitamangin fare pagal ni prodigal ni gubin e rran ma be sap ko kanawo’ ko tabinaw rok, ni be sonnag fak ni nge sul. Ma chiney e ke guy fak ni be yib ko re kanawo’ nem! Dabi siy ni ke thil yaan fare pagal. Machane ke poy e chitamangin fak ni “kab orel ko tabinaw.” Ma dariy fan u wan’ e mad rok nib magchoth nge yaan ni ke mulan’; ya ke guy fak me mil ngak ngar mada’gow!

¹⁷ Nap’an ni ke mada’nag e chitamangin fare pagal ni fak, me gumuchmuch nga kangan ni be faray owchen. Ma aram me yog ko pi tapigpig rok ni ngar feked i yib e mad nge luwew, nge sus. Fare mad e gathi yugu mad ya “bin th’abi fel’ e mad”​—sana fa tin ni yima pi’ ko piin nri yima tay farad. Ma piin ni yad e tapigpig e der ma fanay e luwew nge sus, me ere be tamilangnag e chitamangin ni be sulweg fak ko liw rok ni ir girdien e tabinaw rok. Ma ka bay ban’en ni rin’ e chitamangin. Ke yog ni ngan fl’eg e madnom ni bochan fak ni ke sul. Ere rib tamilang ni re moon ney e gathi ke mus ni be n’ag fan e kireb rok fak machane gathi ri ba adag ni nge rin’ ara be rin’ ni bochan ni thingari rin’ ya ke sul fak; danga’ ya ke adag ni nge n’ag fan e rok. Ke falfalan’ ngay.

18, 19. (a) Mang e kam fil u morngaagen Jehovah ko fare fanathin u morngaagen fare pagal ni prodigal? (b) Rogon ni ngongol Jehovah ngak yu Judah nge yu Jerusalem, ma uw rogon ni ma “sonnag” Jehovah e ngiyal’ nra sul be’ ni ke denen ngak ni nge ayuweg?

¹⁸ Ere mang e gad be fil u morngaagen Got ko re fanathin ney u morngaagen fare pagal ni prodigal? Som’on ma gad ma fil ni Jehovah e “ri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Exodus 34:6) Arrogon, runguy aram ba felngin Got nib lingagil. Aram rogon ni ma ngongol ngak girdi’ nib t’uf e ayuw rorad. Maku fare fanathin rok Jesus e ma fil ngodad ni Jehovah e “be par ni be n’en ni nge n’ag fan e kireb ko girdi’.” (Psalm 86:5) Be par ni be changar ni nge guy be’ ni ke denen ni ke thil gum’ercha’en ma aram e rayog ni nge n’ag fan e rok.​—2 Kronicles 12:12; 16:9.

¹⁹ Mu lemnag rogon ni ngongol Got ngak piyu Israel. Ke thagthagnag Jehovah nga laniyan’ Isaiah ni profet ni nge weliy u morngaagen yu Judah nge yu Jerusalem ni yad ba ‘m’ar nga lolugrad nge mada’ ko rifrif u ayrad.’ Machane ki gaar: “Jehovah e be sonnagmed ni ngam sulod ngak me ayuwegmed. Ba adag ni nge runguymed.” (Isaiah 1:5, 6; 30:18, NW; 55:7; Ezekiel 33:11) Bod rogon fare chitamangin ko fanathin rok Jesus ma Jehovah e be par ni yugu be ‘sap ko kanawo’. Ya ba adag ni nge sul e piin ni kar chuwgad ko tabinaw rok. Aram rogon e matam ni ma t’ufegey fa?​—Psalm 103:13.

20, 21. (a) Uw rogon ma boor e girdi’ ko ngiyal’ ney e be chugur ngak Got ni bochan ni ke runguyrad? (b) Mang e ran weliy ko bin migid e article?

²⁰ Gubin e duw ma bokum e girdi’ ni ma sul nga rogon ko tirok Got ban’en ni bochan e ma runguyrad Jehovah. Ri ba falfalan’ e piin ni yad ba t’uf rorad! Mu lemnag fare matam ni Kristiano ni kan weliy morngaagen ko som’on. Ke falfalan’ ya ke sul fak ni rugod ko tirok Got ban’en ma chiney e be un ko pioneer. Ke gaar fare matam: “Gub falfalan’ u rogon nrayog u lan e re m’ag nib kireb ney. Lu’ u owcheg ni bochan e kireban’ e ke mang lu’ ko falfalan’.” Dabi siy ni ku ma falfalan’ Jehovah ngay!​—Proverbs 27:11.

²¹ Machane ka bay boch ban’en nran fil ko fare fanathin u morngaagen fare pagal ni prodigal. I ul’ul’ Jesus ko re fanathin nem ya nge tamilangnag e runguy rok Jehovah nib math keru’ ko lem ko fapi Farise nge pi tamachib ko motochiyel ni yad ma pufthinnag e girdi’ ni kaygi pag rogon. Ran weliy e re n’ey ko bin migid e thin​—nge mang fan ngodad.

[Boch e Thin nra Tamilangnag Murung’agen]

Ngan Sul Nga Daken

◻ Uw rogon nib math’ keru e lem rok Jesus ko pi Farise u morngaagen e runguy?

◻ Chon mini’ ko ngiyal’ ney e yad bod fare pagal ni prodigal, ma uw rogon?

◻ Mang e buch me sul e lem ko fare pagal ni prodigal nga rogon?

◻ Uw rogon ni ke runguy fa en chitamangin fak?

[Kahol ko page 21]

KE SUL E LEM RORAD NGA ROGON

Mang e ke ayuweg boch e girdi’ ni kan tharbog ko ulung ko Kristiano ni nge sul e lem rorad nga rogon? Pi thin ney e ra tamilangnag e re n’em.

“U gum’erchaeg ma kug nang e thin riyul’. Bokum e duw ni ug fil e Bible mu gu un ko pi muulung ko Kristiano me ere ke par u lanin’ug. Ere uw rogon nrayog ni nggu par ni kugu pi’ keruug ku Jehovah? Gathi ir e ke chuw rog; ya gag e kug chuw rok. Ma aram e kug nang u wan’ug ni gag e kireb rog ya ke gelan’ug ma ba sorok e Thin rok Jehovah ni be gaar​—‘ra be’ ma mit i n’en ni yung e ir e ra t’ar wom’engin.’”​—C.W.

“Ke tabab e bitir rog ni ppin ko non, ma aram me taw nga gum’erchaeg ya gu ba adag ni nggu fil boch ban’en ngak u morngaagen Jehovah ko ir mini’ nge rogon ni ngan meybil ngak. De yog ni nggu mol ma reb e nep’ ma kug wan u karro nga park mu ug yor. Kug yor ma kug meybil ku Jehovah ni aram e yay nsom’on. Kug nang ni ba t’uf rog ni nge sul Jehovah ngog, ma kug athapeg nrayog ni nge n’ag fan e kireb rog.”​—G.H.

“Nap’an ni ran weliy u morngaagen e teliw ma gu ra yog ko girdi’ ni faanra thingar gu mel’eg fare raba’ i teliw ni ir e be fil e thin riyul’ ma gu ra un ko Pi Mich Rok Jehovah. Ma gu ra yog ni faram e kug un ko baan nem e teliw, machane de yog ni nggu par ni gu be fol riy, ere kug tal. Ma boor yay ni gu be par ni ke kireban’ug ni bochan. Munmun mu gu nang ni ‘Dariy e falfalan’ rog. Ba t’uf ni nggu thiliyeg e par rog.’”​—C.N.

“Guyey nge lal e duw faram ma kan tharbogmow e pumoon rog ko ulung. Ma nap’an e duw ni 1991, ma ke yib l’agruw e piilal mi yow weliy ngomow ni rayog ni nggu sulow ngak Jehovah. Ma nel’ e pul nga tomren ma kug falfalan’gow ya kug sulow ko ulung. Figirngig e 79 e duw rok me gag e 63 e duw rog.”​—C.A.