Mfolwok Ko Runguy Rok Jehovah

“Um runguyed e girdi’, ni bod rogon e Chitamangimed ni ma runguy e girdi’.”​—LUKE 6:36.

1. Uw rogon ni dag e pi Farise ni dariy e runguy rorad?

YUGU aram rogon ni kan sunmeg e girdi’ ni bod yaan Got, machane dar folwokgad rok u rogon ni ma runguy e girdi’. (Genesis 1:27) Susun, mu lemnag e pi Farise. Da ur falfalan’gad u nap’an ni ke golnag Jesus baraba’ i pa’ be’ nib moon ni ke marwoth u nap’an e rofen ni Sabbath. Ma ur puruy’naged e n’en nra rin’ mar “lied Jesus ngem’.” (Matthew 12:9-14) Ku biyay u nap’an e Sabbath me golnag Jesus be’ nib moon nni gargeleg ma mmalmit. Maku biyay “boch i yad fapi Farise” e dar falfalan’gad ko n’en ni rin’ Jesus u fithik’ e runguy. Ya ur gun’gun’gad ni gaar: “Re moon ni ke rin’ e re n’ey e gathi yib rok Got, ya der fol ko motochiyel ko Sabbath.”​—John 9:1-7, 16.

2, 3. Mang e yog Jesus ko pi thin ney, “Mu ayuweged gimed ko is ko pi Farise”?

² Lem ko pi Farise ni dariy e runguy riy e aram ba denen nib togopuluw ko girdi’ nge Got. (John 9:39-41) Aram fan ni ginang Jesus pi gachalpen ni gaar, “Mu ayweged gimed ko is” ko re ulung i girdi’ nem nge girdien yugu boch e teliw ni bod e Sadduse. (Matthew 16:6) Is aram ban’en ni bay u lan e Bible ni ma sor fan ko denen ara ban’en ni ke kireb. Ere be yog Jesus ni machib ko “pi tamachib nge pi Farise” e rayog ni nge kirebnag e bin machalbog e liyor. Uw rogon? Yad be fil ko girdi’ ni ngar lemnaged e Motochiyel rok Got ni nge puluw ko pi motochiyel nge yalen rorad, ma kar dariy fannaged e “tin ni ri baga’ fan ni be yog e Motochiyel,” ni bod e runguy. (Matthew 23:23) Rogon e liyor ni ur ted e ke n’igin ni nge mo’maw ni ngan liyor ku Got.

³ Bin l’agruw guruy ko fanathin rok Jesus u morngaagen fare pagal ni prodigal, me tamilangnag e lem nib kireb ko pi tayugang ko teliw ko piyu Jew. U lan e re fanathin nem ma fa en chitamangin e be yip’ fan Jehovah, ni ba adag ni nge n’ag fan e kireb rok fak ni ke kalngan’. Ma walagen nib ilal e be yip’ fan e “pi Farise nge pi tamachib ko motochiyel,” ma rib thil e lem rok e re pagal nem.​—Luke 15:2.

Ke Damumuw Walagen

4, 5. Uw rogon ma walagen fare pagal ni prodigal e ke “malog nga bayang”?

⁴ “Ma ngiyal’ nem e ba’ fa bin ilal i fak faanem u milay’. Ma faani sul ni ke chugur ko naun, me rung’ag lingan e musik nge churu’ ni yibe tay. Me pining reb fapi tapigpig nge fith ni gaar, Mang e yibe rin’? Me fulweg fare tapigpig ni gaar, Ke sul walagem nga tabinaw, me ere ke li’ e chitamangimew fare pifak e garbaw ni ir e th’abi fel’ ni fan e ke sul ngak nde buch ban’en rok. Me ri damumuw fa en nib ilal ko fa gali walag ni ke dabuy ni nge yan nga naun; ma aram me yib e chitamangin nga wen ngeb i wenig ngak ni nge yan nga naun.”​—Luke 15:25-28.

⁵ Ba tamilang ni gathi ke mus ni fachi pagal ni prodigal e bay e magawon rok. Be weliy reb e babyor ni gaar: “Fagal pagal ni fak fare moon e yow l’agruw ni kar sorgow nga bayang, ya bagayow e ke un ko ngongol nde mat’aw, ma fa binem e be lemnag ni ir e ba mat’aw ma aram me par nib malmit.” Mu tiyan’um ngay ni walagen fare pagal ni prodigal e ke dabuy ni nge un ko falfalan’ miki “par nib damumuw.” Fare bugithin ni Greek ni “damumuw” e ma sor fan ko rarogon lanin’uy ma gathi yaan e damumuw ni be m’ug. Be m’ug riy ni walagen fare pagal nib prodigal e ke par nib awan’ ngak walagen, me ere ke lemnag ni de puluw ni ngan madenomnag e cha’ nem ya susun ni dabi chuw ko tabinaw rok machane ke chuw.

6. Mini’ e be yip’ fan walagen fare pagal ni prodigal, ma mang fan?

⁶ Walagen fare pagal ni prodigal e be yip’ fan e piin ni ur dabuyed rogon ni ke runguy Jesus e piin tadenen. Pi girdi’ ney ni be lemnag ni yad ba mat’aw e dar falfalan’gad ko runguy rok Jesus; ma de m’ug rorad e falfalan’ u tharmiy u nap’an ni kan n’ag fan e kireb ku be’ ni ta denen. Danga’ ya runguy rok Jesus e ke k’aring e damumuw ngorad, ma kar lemnaged boch ban’en nib kireb u gum’ercha’rad. (Matthew 9:2-4) Bay biyay ni ke damumuw e pi Farise nib elmirin ma aram mar fithed boch e deer ku be’ ni ke golnag Jesus e m’ar rok ma aram mi yad “chuweg u lan tafen e muulung”​—min tharbog ko ulung! (John 9:22, 34) Bod rogon walagen fare pagal ni prodigal ni “ke dabuy ni nge yan nga naun,” ma ke dabuy e pi tayugang ko teliw nu Jew ni ngar uned ko “felfelan’ ngak e piin ni kar felfelan’gad.” (Roma 12:15) Miki tamilangnag Jesus e kireb rorad u nap’an ni ke ul’ul’ iyan i weliy fare fanathin.

Lem nde Puluw

7, 8. (a) Uw rogon ni de puluw e ngongol rok walagen fare pagal ni prodigal ni ir fakey? (b) Uw rogon ni de taareb rogon fa bin nib ilal i fak nge chitamangin?

⁷ “Ma aram me yib e chitamangin nga wen ngeb i wenig ngak ni nge yan nga naun. Me fulweg ngak e chitamangin ni gaar, A mu guy, ka aram urngin e duw ke mada’ ko chiney ni gu maruwel rom ni gowa gub sib, ma dariy taab yay ni kug pag lungum. Ma mang e kam pi’ ngog? I mus nga ba kaming ma dawor mpi’ ngog ni nggu murniged e pi tafager rog! Machane re pagal ni fakam nem e ke adbey urngin e tin ni immoy rom ban’en ngak e piin ni ppin ni yad ma chuw’ay ngorad, ma faani sul nga tabinaw, ma ga li’ e bin th’abi fel’ e pifak e garbaw ni bochan!”​—Luke 15:28-30.

⁸ Pi thin ney ni yog walagen fare pagal ni prodigal e be dag ni de nang u wan’ nriyul’ ni de puluw ni be ngongol ni ir be’ ni fakey. I pigpig ko chitamangin ni bod rogon be’ ni ma maruwel ku be’. I yog ku chitamangin ni gaar: “Gu maruwel rom ni gowa gub sib.” Re pagal nem ni bin nib ilal e dariy biyay ni ke chuw u tabinaw ara th’ab e motochiyel ko chitamangin. Machane ke fol ni bochan e t’ufeg fa? Ke falfalan’ ni nge pigpig ku chitamangin, fa ke par ni yugu be pigpig ku chitamangin me lemnag ni ir reb e bitir nib manigil ya ke rin’ e maruwel rok? Faanra ir ba fak nib yul’yul’ ma mang fan ni de taareban’row e chitamangin? Nap’an ni rayog ni nge runguy walagen, ma mang fan ni dariy e runguy rok u gum’erchaen?​—Mu taarebnag ko Psalm 50:20-22.

9. Mu weliy ko uw rogon ni taareb rogon e pi tayugang ko teliw nu Jew nge fa bin nib ilal i fak fare moon.

⁹ Pi tayugang ko teliw nu Jew e yad bod fa bin ilal fak fare moon. Ya ur lemnaged ni yad ba yul’yul’ ku Got ni bochan e yad be fol ko pi motochiyel. Rriyul’ nib ga’ fan e fol. (1 Samuel 15:22) Machane rogon fene ga’ fan e motochiyel u wan’rad e kaygi pag rogon ma aram me n’igin ni liyor ni yad be tay e yugu yima rin’ ni fan ni nge guy e girdi’, ma gathi fan ko tirok Got ban’en. Kari mus ni yad be lemnag e yalen nge fol riy. Ma dariy e t’ufeg u gum’ercharad. Ma ur sapgad nga but’ ko yugu girdi’, mar rogned ni “ke bucheg Got waathrad.” (John 7:49) Ere uw rogon nra felan’ Got ko tin ni ma rin’ e pi tayugang nem ya rib mal’af gum’ercharad rok?​—Matthew 15:7, 8.

10. (a) Mang fan nib puluw e pi thin ney ni, “Dabug ni ngan pi’ e gamanman ni maligach ngog, ya runguy e gub adag”? (b) Uw fene ga’ fan ni ngan siyeg e ngongol ndariy e runguy riy?

¹⁰ Yog Jesus ko pi Farise ni gaar: “Mmarod ngam guyed fan e re bugithin ni baaray u lan e babyor nib thothup ni gaar, ‘Dabug ni ngan pi’ e gamanman ni maligach ngog, ya runguy e gub adag.’” (Matthew 9:13; Hosea 6:6) Dar nanged e n’en th’abi ga’ fan ya mm’ay fan e maligach ni yad ma pi’ ni bochan ndariy e runguy rorad. Aram ban’en nib ga’ fan ya be yog e Bible ni piin “dar golgad ma der kireban’rad ngak be’” e ra turguy Got ni “ba’ rogon ni ngan li’rad ngar m’ad.” (Roma 1:31, 32) Ere dabni gin ngay ni yog Jesus ni pi tayugang ko teliw e ra un ko magothgoth ndabi m’ay biid. Yira pufthinnagrad ni aram rogon ni bochan e da ur runguyed e girdi’. (Matthew 23:33) Machane sana rayog ni nge thil boch i yad. Ya n’en ni yog Jesus ko tomur u lan e fanathin rok e ke guy rogon ni nge thiliyeg e lem ko piyu Jew u daken e thin ni yog fa en chitamangin ngak e bin ni ilal i fak. Ngad guyed ko uw rogon.

Runguy Rok Ba Matam

11, 12. Uw rogon ni be guy rogon fa an matam ko fare fanathin ku Jesus ni nge yib fan ko bin ilal i fak, ma mang fan ni yog ngak e re bugithin ney ni “walagem”?

¹¹ “Me fulweg e chitamangin ngak ni gaar, ‘Fakag, i gur e gubin ngiyal’ ni ga bay u tabinaw ma urngin ban’en ni ba’ rog me gur e fanam; machane thingar da ngongliyed e madnom ngad felfelan’gad, ya walagem e yim’, machane chiney e ke fos; i malog, machane chiney e kan pirieg.’”​—Luke 15:31, 32.

¹² Mu tiyan’um ngay ni yog fare chitamangin fare bugithin ni “walagem.” Mang fan? Ya u m’on riy me yog fa bin nib ilal e pagal ngak e chitamangin ni gaar “fakam” ko fare pagal ni prodigal ma de gaar, “walageg.” Ere dabun ni nge yog ni bay e tha’ u thilrow walagen. Ere chiney ma gowa be yog fare chitamangin ngak fa bin ilal i fak ni gaar: ‘Cha’ ney e gathi ke mus nfakag. Ya ku ir walagem, ni taab racha’ gimew. Ere bay tapgin ni ngam falfalan’ ni bochan e ke sul!’ Susun ni ba tamilang e thin ni yog Jesus u wan’ e pi tayugang ko teliw nu Jew. Ur sapgad nga but’ ko piin tadenen machane yad “pi walagrad.” Ya, “dariy taabe’ u fayleng nib mat’aw ma gubin ngiyal’ ma goo tin manigil ban’en e be ngongliy ma der ma denen.” (Eklesiastes 7:20) Ere bay fan ko pi tayugang ko teliw nu Jew ni ngar uned ko falfalan’ u nap’an ni ke kal e pi tadenen ngan’rad.

13. Mang deer ni sum ni bochan rogon ni ke museg Jesus fare fanathin rok?

¹³ Tomren ni yog e en chitamangin e re n’em, me mus fare fanathin. Gowa be yog Jesus ko girdi’ ni ngar yoloyed e n’en ni buch ko tomur ni ra be’ ma rogon ni lemnag. Yugu demtrug e n’en ni rin’ fa bin ilal fak fare moon ma bay e deer ni fith ko urngin e girdi’, ‘Gur, ga ra un ko falfalan’ ni yibe tay u tharmiy u nap’an ni ke kalngan’ be’ ni tadenen fa?’ Ku rayog ko pi Kristiano ko ngiyal’ ney ni ngar daged ko uw rogon ni yad ra fulweg e re deer nem. Uw rogon?

Ngan Folwok ko Runguy Rok Got e Ngiyal’ Ney

14. (a) Uw rogon nrayog ni ngad folgad ko n’en ni yog Paul u Efesus 5:1 ni ma sor fan ko runguy? (b) Mang e ba t’uf ni ngad ayuwgad riy ko uw rogon e runguy rok Got?

¹⁴ Yog Paul ko piyu Efesus ni gaar: “Thingar um guyed rogon nguum pired ni gimed be folwok rok Got, ni bochan e gimed pi fak ni gimed ba t’uf rok.” (Efesus 5:1) Ere, susun ni ngad ted fan e runguy rok Got ya gad e Kristiano, ma ngad ted nga gum’ercha’dad, ma ngad daged e re felngin ney ko ngongol rodad ngak yugu boch e girdi’. Machane bay ban’en ni ngan ayuw riy. Susun ndabda lemnaged ni bochan ni ma runguy Got e girdi’ me ere gathi ri ba ga’ fan ni ngan siyeg i denen. Susun, boch e girdi’ e ra gaar u lanin’rad, ‘Faanra gu ra denen, ma rayog ni nggu meybil ku Got ni nge n’ag fan rog ma ra runguyeg.’ Lem ni aram rogon e taareb rogon ko n’en ni weliy Jude morngaagen u lan e Bible ni gaar: “kar pingeged e thin rok Got nga bayang, ni murung’agen e runguy rok, ya nge yib e tawey rorad ko ngongolen e darngal ni yad be rin’.” (Jude 4) Ma runguy Jehovah e girdi’ machane “dabi fek owchen fe pag ndabi gechignag” e piin ni kar rin’ed e kireb ma dar kalgadngan’rad ngay.​—Exodus 34:7; mu taarebnag ko Joshua 24:19; 1 John 5:16.

15. (a) Mang fan nib t’uf ko piin piilal ni ngar pared nib thabthabel e lem rorad u morngaagen e runguy? (b) Mang e susun ni nge athamgil e piin piilal ni ngar rin’ed machane ku dabra paged ni nguun rin’ e kireb, ma mang fan?

¹⁵ Maku thingarda ayuwgad riy ni dab darod nga baraba’ nib pag rogon​—ni aram e kaygi elmirin ni gad ma turguy e kireb ko girdi’ ni kar kalgadngan’rad ko denen ni kar rin’ed ma ke kireban’rad. (2 Korinth 7:11) Mil fan ngak e piin piilal e yu ran’ i saf rok Jehovah, me ere ba ga’ fan ni ngar pared nib thabthabel ko re n’ey, ni mus ko ngiyal’ ni thingara turguyed ban’en ni judicial. Thingari par e ulung ko Kristiano nib klin, ma ba puluw ko Bible ni ngan “chuweg e en nib kireb ngongolen u lan e ulung” min tharbog. (1 Korinth 5:11-13) Machane kub manigil ni ngan runguy e girdi’ nfaanra bay rogon ni ngan rin’. Ere dabi pag e piin piilal e kireb ko girdi’ ni kan rin’ ni pumay, machane yad ma athamgil ni ngar daged e runguy nge t’ufeg nfaanra ba mat’aw ni ngan rin’. Ya yad manang e thin ko Bible ni be gaar: “Ngiyal’ nra pufthinnag Got e en nde runguy be’ e ku dabi runguy Got faanem; ya runguy e ra gel ko pufthin.”​—James 2:13; Proverbs 19:17; Matthew 5:7.

16. (a) Mu fanay e Bible ma ga dag ko uw rogon ni ba adag Jehovah ni nge sul e piin ni kar rin’ed e kireb ngak. (b) Uw rogon nrayog ni ngad daged ni gad ba adag ni ke sul ko ulung e piin ni kar rin’ed e kireb mar kalgadngan’rad?

¹⁶ Fare fanathin u morngaagen fare pagal ni prodigal e be tamilangnag ni ba adag Jehovah ni nge sul e piin ni kar rin’ed e kireb ngak. Arrogon, ma piningrad ni ngar sulod ngak nge mada’ ko ngiyal’ ni kar daged ni ri dabra kalgadngan’rad. (Ezekiel 33:11; Malaki 3:7; Roma 2:4, 5; 2 Peter 3:9) Bod rogon chitmangin fare pagal ni prodigal ma ma ngongol Jehovah u fithik’ e runguy ngak e piin ni kar sulod ngak, me felan’ ngorad ni yad girdien e tabinaw rok. Ere ga be folwok rok Jehovah ko re n’ey? Nap’an ni ke sul be’ ni kan tharbog ko ulung, ma uw rogon u wan’um? Gad manang ni “ba ga’ e falfalan’ u tharmiy.” (Luke 15:7) Ma bay e falfalan’ u fayleng, ngu lan e ulung rom, ngu gum’erchaem fa? Fa bod fa bin nib ilal fak fare moon ma kan dabuy e cha’ ni ke rin’ e kireb ke sul, ni ba dake dariy rogon ngak ni ngan pining e magar ngak ya ke chuw ko yu ran’ i saf rok Got faram?

17. (a) Mang e buch u lan e ulung nu Korinth u nap’an e bin som’on e chibog, ma mang e yog Paul ko re ulung nem ni ngar rin’ed? (b) Mang fan nib puluw e n’en ni yog Paul, ma uw rogon nrayog ni ngad folwokgad riy ko ngiyal’ ney? (Mu guy fare kahol u ba’ ni mat’aw.)

¹⁷ Ngad lemnaged e n’en ni buch ko duw ni 55 C.E. u Korinth. Kan tharbog be’ nib moon ko ulung ma ke yal’uweg e ngongol rok nga rogon. Me ere mang e ra rin’ e pi walag? Susun ni ngar tororuwgad ko cha’nem mi yad siyeg fa? Danga’ ya yog Paul ko piyu Korinth ni gaar: “Ere chiney e ngam n’iged fan u wun’med e tin ni ke rin’ mi gimed pi’ e athamgil nga laniyan’, ya ri gel e kireban’ rok nge pag ir. Ere ri gu be wenig ngomed ni ngam guyed rogon nge nang nri kab t’uf romed.” (2 Korinth 2:7, 8) Boor yay ma piin ni kar kalgadngan’rad e kar tamra’gad mi yad par ni ke kireban’rad. Ere ba t’uf ni ngan pi’ e athamgil nga laniyan’ e pi girdi’ nem mi yad nang ni yad ba t’uf rok e pi walagrad nge Jehovah. (Jeremiah 31:3; Roma 1:12) Ri ba ga’ fan e re n’ey. Mang fan?

18, 19. (a) Uw rogon ni dag piyu Korinth faram ni kar paged e tin kireb ni yibe rin’? (b) Uw rogon ni ra “gel Satan” ngak piyu Korinth nfaanra kar pared ni dariy e runguy rorad?

¹⁸ Nap’an ni yog Paul ko piyu Korinth ni ngar n’aged fan e kireb ko girdi’ ma ke yog ni ngar rin’ed ni bochan e “ngad tiyed moonyan’ ndabiyog ni nge gel ngodad; ya gadad manang e tin ni be lemnag ngodad.” (2 Korinth 2:11) Mang fan e re n’em? Boch u m’on riy ma ke fonownag Paul fare ulung nu Korinth ya kar paged e tin kireb ni rin’ boch e girdi’. Ma kar paged e re moon nem ni nge ul’ul’ iyan ni be denen ma dan gechignag. Ma ke yan i aw ni fare ulung​—nge piin piilal​—e kar rin’ed e n’en ba adag Satan, ya ba adag ni nge kireb thin fare ulung.​—1 Korinth 5:1-5.

¹⁹ Machane faanra yan e piin piilal nga baraba’ nib pag rogon ma dabra n’aged fan e kireb ko facha’ ni ke kalngan’, ma ku aram e be felan’ Satan ko re n’em. Uw rogon? Ya puwan’ ni dariy e runguy riy e be ayuweg Satan. Faanra ke “gel e kireban’ rok [faanem] nge pag ir”​—fa rogon ni yog fare ke Bible ni Today’s English Version, “kari gel e kireban’ rok me mulan’”​—ma piin piilal e thingara dum’gad ku Jehovah ko re n’em! (Mu taarebnag ko Ezekiel 34:6; James 3:1) Ere aram fan ni yog Jesus ko pi gachalpen ni ngar ayuwgad riy ndabra taleged “bagayad e pi bitir ney” ko machib nge mu’ me gaar: “Faanra denen walagem ni girdien Kristus ma ga puwan’ ngak, ma faanra yib i wenig ngom, ma ga n’ag fan u wun’um e tin ni ke rin’.”a​—Luke 17:1-4.

20. Uw rogon ma bay e falfalan’ u tharmiy nge fayleng u nap’an ni ke kalngan’ be’ ni ke denen?

²⁰ Fa bokum biyu’ e piin ni ma sul ko bin riyul’ e liyor u gubin e duw e yad ma pining e magar ku Jehovah ya ke runguyrad. Reb e Kristiano ni ppin ni ke sul ko ulung e ke gaar: “Dakuriy yugu ba ngiyal’ ko yafas rog ni kug falfalan’ ni aray rogon.” Dabi siy ni ki falfalan’ e pi engel. Ma ngad uned ko “falfalan’ u tharmiy” u nap’an nra kalngan’ be’ ni ke denen. (Luke 15:7) Faanra gad ra yodor, ma gad be folwok rok Jehovah u rogon ni ma runguy e girdi’.

[Boch e Thin nra Tamilangnag Murung’agen]

Ngan Sul nga Daken

◻ Uw rogon ni taareb rogon e pi tayugang ko teliw nu Jew nge walagen fare pagal ni prodigal?

◻ Uw rogon ni de tamilang u wan’ walagen fare pagal ni prodigal ko susun uw rogon e ngongol u thilrow’ be’ nge chitamangin?

◻ Ra ngad boded Got u rogon ni ke runguy e girdi’ ma mang l’agruw ban’en ni thingarda paloggad riy?

◻ Ngiyal n’ey ma uw rogon nrayog ni ngad folwok rok Got u rogon ni ma runguy e girdi’?

[Kahol ko page 27]

“NGAM GUYED ROGON NGE NANG NRI KAB T’UF ROMED”

I yog Paul ko piyu Korinth u morngaagen facha’ ni kan tharbog ko ulung me kalngan’ ni gaar: “Ri gu be wenig ngomed ni ngam guyed rogon nge nang nri kab t’uf romed.” (2 Korinth 2:8) Fare bugithin nu Greek ni “nge nang” e ma sor fan ko “micheg.” Arrogon, piin ni kar kalgadngan’rad mar sulod ko ulung e ba t’uf ni ngar nanged ni yad ba t’uf rodad ma yad e girdi’ ko ulung.

Machane thingarda nanged ni girdi’ ko ulung e dar nanged e n’en ni buch min tharbog be’ ko ulung fa n’en ni buch min sulweg ko ulung. Maku sana boch e girdi’ u lan e ulung e kan rin’ ban’en nib kireb ngorad​—ni sana ba n’uw nap’an​—ni bochan e kireb ni rin’ facha’ ni ke kalngan’. Ere nap’an ni ran announcenag ni ke sul be’ ko ulung, ma gad ra son ko ngiyal’ ni goo gimew e cha’ nem ma ga pining e magar ngak.

Ma gelnag e michan’ ko piin ni kar sulod ko ulung ni ngan pining e magar ngorad ni yad e girdi’ ko ulung ni Kristiano! Rayog ni ngad pininged e athamgil nga laniyan’ e pi girdi’ nem ni kar kalgadngan’rad ma gad sabethin ngorad u lan e Kingdom Hall, nge nap’an e machib, nge yug ba ngiyal’. Ere faanra gad ra micheg ara guy rogon nge nang e pi girdi’ ney ni yad ba t’uf rodad, ma gathi gad be dariy fannag fene gel e kireb ni ur rin’ed faram. Danga’ ya gad be falfalan’ u taabang e pi engel ya kar digeyed e kanawo’ nib denen mar sulod ngak Jehovah.​—Luke 15:7.

[Sasing ko page 25]

Ke dabuy e bin nib ilal fak fare moon ni nge un ko falfalan’ ya ke sul walagen